دكتور حماده عبدالباسط لأمراض القلب والشرايين

13/11/2025

#اعتذار
اعتذر عن عدم التواجد بالعياده اليوم الخميس علي أن نعود للانتظام بالعمل بالعياده اعتبارا من السبت القادم إن شاء الله وكل عام وحضراتكم بخير وسعاده 🌹

09/11/2025

#مواعيدالعمل 🌹

مواعيد العمل بالعياده ثابته وهي بعد صلاة العصر مباشرة وده في الصيف مع التوقيت الصيفي بيكون تقريبا الساعه الخامسه عصرا وفي الشتاء مع التوقيت الشتوي بيكون تقريبا الساعه الثالثه عصرا وكل عام وحضراتكم بخير وسعاده
🌹🌹🌹💓💓💓🌹🌹🌹

25/10/2025

07/10/2025

النهاردة؛ نوبل الطب راحت لـ٣ علماء.. اتنين أمريكان وياباني؛ وبينهم لحسن الحظ واحدة ست.

الـ٣ علماء اكتشفوا حاجة مهمة جدًا اسمها فرامل المناعة. القصة باختصار مش إنهم اكتشفوا حاجة واحدة وخلاص، لأ… التلاتة كانوا بيكمّلوا بعض في لغز كبير اسمه "المناعة المنظمة"، أو بمعنى أبسط: إزاي جسمنا يعرف يهاجم اللي بيؤذيه، من غير ما يهاجم نفسه... ازاي بنعرف ذاتنا؛ ونفرق بينها وبين الآخر.

زمان كان العلماء فاكرين إن المناعة لازم تكون قوية على طول علشان نحمي نفسنا من الفيروسات والبكتيريا، بس اللي محدش كان فاهمه إن القوة دي لو زادت عن اللزوم… بتتحول لسلاح ضد الجسم نفسه. زي جيش بيهاجم شعبه. وده اللي بيحصل في أمراض المناعة الذاتية زي الروماتويد والذئبة والتصلب المتعدد.

العالمة “ماري برانكو” كانت أول واحدة تلاحظ إن جهاز المناعة مش دايما شغال، وإن فيه نوع من “فرامل” بتمنعه من إنه يتجنن ويهاجم خلايا الجسم. بدأت تدرس خلايا غريبة كانت بتتصرف كأنها "المراقب الداخلي" للمناعة. الخلايا دي طلعت اسمها "الخلايا التائية التنظيمية" (T-regs)، اللي دورها إنها تقول لباقي خلايا المناعة: “اهدوا يا جماعة، دي مش عدو، دي خلية مننا.”

بعدها جه “فريد رامزدل” اللي قرر يفك شفرة اللعبة دي. اشتغل سنين طويلة لحد ما اكتشف الجين اللي بيخلي الخلايا دي تبقى "منظمة"، وسماه FOXP3. لما الجين ده بيبوظ أو بيختفي، المناعة بتفقد السيطرة وتبدأ تهاجم الجسم فعلاً. هو اللي أثبت علميًا إن من غير الجين ده، المناعة بتتحول لقنبلة.

أما الياباني “شيمون ساكاغوتشي”، فكان أول واحد يوصف النوع ده من الخلايا بشكل دقيق جدا ويثبت وجودها فعليًا بالتجربة، مش بالافتراض. هو اللي خلا العلماء كلهم يعترفوا إن “الفرامل المناعية” دي موجودة فعلا، وإنها أساسية في كل جهاز مناعي سليم.

برانكو شافت الظاهرة وساكاغوتشي أثبت وجودها ورامزدل فسّرها جينيا.

وده الفهم اللي فتح الباب لعلاج أمراض زي السكري المناعي والتصلب والروماتويد وحتى السرطان، لأن دلوقتي العلماء بيلعبوا بنفس المفهوم ده: لما عايزين المناعة تشتغل أكتر ضد السرطان، بيشيلوا الفرامل، ولما عايزين يوقفوها ضد الجسم نفسه، بيرجعوا يشدوا الفرامل دي تاني.

ببساطة؛ الثلاثة فهمونا "فن التوازن المناعي" — إزاي نخلي الجسم يقاتل من غير ما يدمر نفسه. وده في عالم الطب مش إنجاز عادي… ده تغيير في مفهوم المناعة كله.

مبروك لثلاثي نوبل.. وخاصة السيدة "ماري برانكو" واللي بتعتبر السيدة رقم ٢٧ اللي تحصل على نوبل في مجال العلوم؛ والسيدة رقم ٦٨ اللي بتحصل على نوبل في جميع فروعها.

#نوبل2025
منقول