18/09/2021
ليه جروح مرضى السكر بتاخد وقت أطول علشان تصحى و تلتئم؟
فيه ٣ أسباب مهمين أوي لتأخر شفاء جروح مرضى السكر :
1- ضعف الدورة الدموية و قلة وصول الأكسجين يسبب تلف الشعيرات الدموية و بالتالي يؤخر الالتئام.
2- نقص المناعة عند مرضى السكر يزيد من فرص الإصابة بالعدوى و الغرغرينا و التي تعني موت الانسجة الحية و ضمورها نتيجة توقف التغذية الدموية لمناطق معينة في الجسم.
3- بيحصل كمان اختلال لوظائف الجهاز العصبي مثل ضعف الاحساس بالألم فيصاب المريض بالحروق أو الجروح و قد ينزف و هو مش حاسس خالص باي حاجة و دي حاجة خطيرة جدا.
-- طيب لو عندك مريض سكر في البيت هتعمل ايه لو فيه جرح ؟؟
خلونا نتفق ان جرح مريض السكر من الحاجات اللي لازم نتعامل معاها بجدية عشان المضاعفات مش بسيطة
لو مريض السكر اتعور او اتعرض لاي اصابة سببت جرح أو نزيف لازم بسرعة:
١- تنظيف الجرح جيدا بالماء و المطهر زي بيتادين مثلا.
٢- استخدام مرهم مضاد حيوي زي فيوسيدين او جاراميسين.
٣- لف الجرح و تغطيته من الاتربة و الغبار بقطعة شاش نظيفة.
٤- و دي أهم حاجة بقى ان لازم لازم ياخد مضاد حيوي بالفم حاجة قوية زي أوجمنتين و الجرعة و التركيز حسب وزن الجسم و عمر المريض.
٥- تكرار الغيار على الجرح و تنظيفه بشكل يومي منتظم لحد ما يلتئم الجرح.
٦- لازم نخلي بالنا انه يكون بياخد ادوية السكر بانتظام و مش بينساها أو بيطنش ياخدها لأنه طول ما السكر عالي في الدم شفاء الجروح بيأخر.
٧- لو بياخد انسولين لازم نتأكد انه بيغير مكان الحقن كل فترة.
طيب ايه المضاعفات و المشاكل اللي ممكن تحصل لو اهملنا في علاج جرح مريض السكر ؟؟
قلنا ان مريض السكر عنده المناعة ضعيفة و بالتالي هيكون معرض لحدوث عدوى بكتيرية شديدة في العضو اللي فيه الجرح
كمان مع ضعف التغذية الدموية و التهاب الاعصاب و ضعف الاحساس
بيكون احتمالية حدوث الغرغرينا عالي جدا
و للأسف حدوث الغرغرينا في عضو معين ملوش حل إلا البتر
فلو حصل في اصابع القدم و دا وارد جدا بيحصل التهاب شديد
لو ما اخدش مضاد حيوي و متعالجش بسرعة بتحصل عدوى كمان مع وجود صديد و قيح و دم
و في الآخر الصباع بيزرق و بعدين يسود و بعدها يسقط لوحده
لو امتدت العدوى لباقي القدم ممكن المريض يفقد قدمه كلها
و السبب هو عدم الاهتمام و الاستهانة بجرح صغير في الصباع
يا ريت كلنا نخلي بالنا من أي حد عندنا مريض سكر
لأنه كمان ممكن يتجرح و ميحسش بالجرح بسبب ضعف الاعصاب الحسية
ممكن المريض نفسه يستخدم مرآة يفحص بيها باطن القدم كل يومين او تلاتة للاطمئنان و قولنا اهم حاجة انه ياخد العلاج بانتظام
و يحلل عشوائي كل فترة يتأكد ان مستويات السكر بين ٨٠ إلى ١٣٥ مجم/دل دم
و دمتم في حفظ الله و تمام الصحة و العافية
[10:2
