04/11/2025
ياريت كل ام بتدى طفلها حقنة البنسلين طويل المفعول تركز فى البوست ده
👈 الواد يا دكتور رجله بتوجعه
👈 طب نعمله تحليل الميكروب السبحي " الحمى الروماتزمية" (ASOT)
👈طيب التحليل يا دكتور عالى (اكتر من ٢٠٠) مش هتكتب بنسلين !!
الموضوع ده شائع جدا و متكرر و يخلينا نتكلم عن ايه أسباب وجع الرجل عند الأطفال؟ و ايه هى الحمى الروماتزمية و ازاى بتتشخص ؟
🔵أولا .. أسباب وجع الرجل المتكرر عند الأطفال ..
✍️ فى أسباب كتير و اشهرهم هو " وجع النمو Growing pain " و ده شائع فى الأطفال فى سن المدرسة ، و عشان نقدر نقول ان ده وجع النمو لازم يتحقق فيه الشروط دى
( عمر الطفل من ٣ ل ١٢ سنة ، الوجع فى الرجلين شبه بعض و مش مقتصر على مفصل ، وجع ميجيش أبدا فى بداية اليوم اول ما يصحى ، الطفل مش بيعرج ، أنشطة الطفل و اللعب مش متأثر ، الفحص سليم باستثناء بعض الأطفال ممكن يكون عندهم ليونة في المفاصل hypermobility )
✍️من الأسباب التانية ممكن يكون خبطة او كدمة و هو بيلعب ، التهاب فى العظام او فى المفصل ..
💥ايه العلامات اللى تخلينا نقلق و يستدعى عمل فحوصات 😮
١ _ الوجع اول ما يصحى من النوم
٢ _ الطفل بيعرج
٣ _ فى مشكلة فى حركة الطفل و الطفل مش بيلعب و يجرى زى المعتاد
٤ _ معاه أعراض تانية زى السخونة او الطفل همدان و مقريف على طول ، فى اماكن كدمات زرقاء تحت الجلد ، عنده انيميا ، عدوى متكررة ،
٥ _ تدهور فى المهارات المكتسبة يعنى الطفل كان بيمشى مثلا و مبقاش يمشى او تأخر فى النمو الحركى
٦ _ فى خلل فى النمو سواء الوزن أو الطول
ساعتها لازم نروح للدكتور و الطفل يتفحص فحص كامل و يتعمل تحاليل و فحوصات 👌🏻
🔵ثانيا : الحمى الروماتزمية و دى بتيجى فى سن ٥ ل ١٥ سنة و عشان نشخصها لازم مجموعة من الأعراض تتجمع مع تحاليل و دى اسمها jones criteria
✍️✍️*الأعراض الأساسية :
١_التهاب في القلب carditis و ده أعراضه فشل فى عضلةالقلب أو مشكلة في صمامات القلب و ما ينتج عنها من أعراض او صوت يتسمع بالسماعة murmer
او ارتشاح حوالين القلب
٢_ التهاب مفاصل Migratory arthritis و ده بيبقى فيه وجع و احمرار و تورم فى المفصل و بيتنقل يعنى مفصل يخف و يأثر على مفصل تانى
٣_حركات لا إرادية و انفعالات غريبة فى الطفل Sydenham chorea
٤_ بقع حمرا Erythema marginatum تظهر على البطن أو الضهر او الأطراف
٥_ كلاكيع Subcutaneous nodules أد البسلة تظهر على الايد و مش بتوجع
✍️✍️*الأعراض الثانوية :
١ _ سخونة
٢_ وجع فى المفاصل
٣_ علامة معينة بتظهر فى رسم القلب prolonged PR interval
٤ _ارتفاع فى دلالات الالتهاب ESR , CRP
*عشان تشخص حمى الروماتزمية لازم ٢ من الأعراض الأساسية أو عرض أساسى مع ٢ من الأعراض الثانوية +دليل على عدوى سابقة بميكروب السبحى ASOT
يعنى تحليل ASOT ده لوحده مش دليل على اى حاجة و مش داعى ان طفل ياخد بنسلين خالص لأن على الأقل ٢٠ % من الأطفال الطبيعية عندها التحليل ده هيطلع عالى
يبقى مفيش حاجة اسمها تحليل حمى روماتيزميه
