https://www.facebook.com/110462591592589/

أخصائي التغذية د.أنس عادل, Mansoura (2026)

29/09/2023

( الشراهه او الجوع العاطفي )
⬅️اللي بيحصل ان المخ والمعده بيرسلوا لبعض اشارات متبادله عن طريق الهرمونات بتخلينا نحس بجوع كاذب او اننا عايزين ناكل اكل يحسسنا بالانبساط والراحه والسعاده 🤩
أيوة زي مانت شايف كده ركز معايا عاوز تعرف لي بناكل كتير رغم اننا مش جعانين🤨
بص بقا بدليل ان في ناس لما بتفرح بتاكل وفيه ناس لما بتزعل بتاكل
وفيه فرق كبير بين الجوع الحقيقي والجوع العاطفي.
بص بقا🙄
⬅️ يعني الجوع الحقيقي بتحس بيه كل 3 ل6 ساعات لكن الجوع العاطفي بيحصل فجأه مش بيتطور تدريجيا ⁉️
الجوع الحقيقي لما بتحس بيه بتاكل اي حاجه تسكت الجوع دا ،لكن الجوع العاطفي بيبقي عندك رغبه لصنف معين من الاكل زي الحلويات او البيتزا أو غيرو.🌯🫠

🟢الجوع الحقيقي مش بيخلي الاكل مسيطر علي عقلك لكن الجوع العاطفي بتحس انك عايز تاكل من غير ما تكون محتاج للاكل او انك عايز تاكل علشان تسلي وقتك او احساس بالفراغ ومش لاقي حاجه تعملها . توهت معايا؟ لا متهوتش انا هفهمك اكتر بينهم!😌

🟢الجوع الحقيقي بتتوقف عن الاكل اول ما بتحس بالشبع لكن الجوع العاطفي لا تتوقف حتي عند الاحساس بالشبع .
( ازاي بقي نتغلب علي الجوع العاطفي )‼️
اولا نعتمد في نظامنا الغذائي علي النشويات المعقده زي الشوفان والبطاطس والبقول والخضراوات او البطاطا ونهتم بالبروتين وخصوصا اللحم الابيض وبعدين اللحوم الحمرا ومنتجات الالبان علشان نحس بالشبع فتره طويله . 🥛🥦
لازم كمان ناكل فاكهه وخضروات يعني ضروري طبق سلطه في اليوم وثمرتين فاكهه 🍇🍎
بلاش نوزن كل شويه وننسي حوار الميزان دا انا نزلت اد ايه انا هنزل كام كيلو في اد ايه انا هاخد الفري امتي انا هخلص دايت امتي ركز في انك تاكل اكل صحي وتلعب رياضه وبس كدا ، تكون رشيق يعني😍
نهتم اوي بالرياضه وخصوصا التمارين اللي باوزان ولازم ميكونش التمرين اقل من 3 ايام في الاسبوع
منوصلش نفسنا اننا نجوع اوي علشان مناكلش كتير
🟢خليك دايما مع ناس يشجعوك مش ناس تاكل قدامك ومتراعيش مشاعرك او تحبطك وخصوصا اهلك والمحيطين بيك لازم تطلب منهم يساعدوك فـ متحبطش نفسك يا غالي 😵

🟢لما تلخبط في اول اليوم او نصه متكملش لخبطه ظبط باقي اليوم عادي
لازم يكون عندنا صبر ونظبط الدنيا واحده واحده منجيش علي نفسنا مره واحده
اخر حاجه بقي نحاول نبعد علي قد ما نقدر عن اي حاجه تضايقنا او تضغطنا او تتعبنا نفسيا .🥰🥰
وبس كده أتمني أكون قدمت حاجة تفيدكم لبعد كده وشكرا♥️♥️🤩
✍️🏼 /Dr:-Asmaa Abdelbaset🔥

24/03/2023

معلومه مهمه لازم نكون عارفينها
لازم السحور يكون غني بالبروتين،
● وده لأن البروتين يساهم في إفراز الهرمون المسئول عن فقدان الوزن(اللبتين)، بالنسبه لحالات السمنه ..
●كما أن ذلك الهرمون يبطئ عملية إفراغ الطعام من المعدة؛
●كما يؤثر ذلك الهرمون على إفراز الإنسولين الدم، فيعطينا ذلك إحساسًا بالشبع
كل سنه و أنتم طيبين🌙❤️

13/11/2022

ليه لازم ناكل رنجه مره أو مرتين شهريا؟؟
أقولك أنا
أولا
بروتين ارخص من بروتين كتير

وعلشان نتجنب الاملاح إلي فيها
نأخد رنجه دلعه و نشرب بعدها لتر مياه و كوب شاي اخضر

ثانيا
بتخفص الدهون الثلاثيه ف الجسم
الأحماض الدهنية أوميجا 3 لها خصائص مضادة للالتهابات، وقد تبين أن استهلاك الأسماك الزيتية يساهم فى خفض مستويات الدهون الثلاثية الضارة بالكبد، ويعتقد أن كل هذه التغييرات تقلل من خطر حدوث أمراض القلب والأوعية الدموية.

ثالثا
فيها كميه فيتامين د قويه
من المعروف أن التعرض للشمس الآمن هو أفضل مصدر لفيتامين د، ومع ذلك هناك أيضا بعض المصادر الغذائية الممتازة لفيتامين D3 ، وتعتبر الرنجة من بينهم.
يمكن أن يكون سمك الرنجة اختيارًا ممتازًا لأولئك الذين يعيشون في أجزاء من العالم لا يتعرضون فيها لضوء الشمس سوى ساعات محدودة.

رابعا
بيزيد من إنتاج اوكسيد النيتريك
الدراسات الحديثة بتاكد أن الرنجة لها تأثير زيادة إنتاج أكسيد النيتريك في الدم مما قد يعمل على خفض ضغط الدم .

خامسا.
فيها فيتامين b12 بشكل كبير
يحتوي الرنجة على تركيزات كبيرة من فيتامين ب 12، بالإضافة إلى ذلك ، تحتوي الرنجة على كمية جيدة من فيتامينات ب الأخرى، والتي تلعب جميعها دوراً أساسياً في استقلاب الطاقة
ويعتبر فيتامين ب 12 أحد أكثر أوجه نقص المغذيات شيوعًا في العالم، خاصة في البالغين الأكبر سنًا.

وأخيراً
يعتبر سمك الرنجة من الأسماك المفيدة نظرا لاحتوائه على أحماض الأوميجا 3 3 ، بجانب أنه أحد أكثر مصادر الأحماض الدهنية تركيزًا

By. خالد جمال

30/10/2022

مساء الخير عزيزي القارئ..😃
أهلا بيك فى سلسلة دور أخصائي التغذية في رحلة علاج المريض ومعانا موضوع مهم جدا جدا وبالأخص عن مرض بسببه بيموت كتير جدا من الناس😞..

النهاردة هتكلم عن واحد من أكتر الأمراض إنتشاراً بين الناس و هو مرض القلب أو بمعنى أدق أمراض القلب كُلياً زي (مرض الصمام- القلب التاجي- الذبحة الصدرية و غيرها كتير من الأمراض اللي تخص القلب)
بس بدايةً كدة خليني أعرفك معلومة بسيطة علشان تعرف ان ممكن الحل يبقى بإيدك بإنك تسيطر على المرض او تحمي نفسك منه خالص!!

هل تعلم عزيزي القارئ إن السبب الأول للوفاة في العالم هي مشاكل في القلب و الشرايين
- سنة 2012 تم تقدير 31% من حالات الوفاة بسبب أمراض القلب

و دلوقتي بعد ما عرفت انه من اكتر الأمراض انتشاراً و السبب الأول للوفاة فى العالم تعالى أعرفك دوري ك أخصائية تغذية علاجية مع مرضى القلب و ازاي نقدر بشوية خطوات تغذوية سليمة نساعد فى تحسن صحة المريض و هو ده موضوعنا النهاردة
-مبدأياً كدة خليني أقولك ايه الأسباب او عوامل الخطر Risk Factors اللي بتعرض الشخص انه يبقى مريض قلب و دي بتنقسم لجزئين
اول جزء هو عوامل خطر قابلة للتعديل بمعنى انه لو غيرنا سلوك و عادة معينة نقدر نتجنب المرض
و تاني جزء هي عوامل خطر غير قابلة للتعديل بس عالأقل ممكن نتكلم ازاي نحمي نفسنا منها بقدر الإمكان

أولاً: العوامل القابلة للتعديل:
١- ضغط الدم المرتفع (بتزيد نسبة الإصابة ب ١٣%)
٢- نسبة الكوليسترول العالية فى الدم (بتزيد نسبة الإصابة ب ٤٦%)
٣- قلة النشاط البدني او عدمه(بتزيد نسبة الإصابة ب ٣٧%)
٤- السمنة (تزيد نسبة الإصابة ب ٦%)
٥- مؤشرات السكر العالية فى الدم
٦- التدخين (تزيد نسبة الإصابة عن غير المُدخنين بنسبة من ١٩ ل ٢٠%)

ثانياً: العوامل الغير قابلة للتعديل:
١- السن و النوع (اكبر من ٤٥ سنة فى الرجال و أكبر من ٥٥ سنة فى السيدات)
٢- عوامل وراثية
٣- التاريخ المرضي للعائلة

▶️ كدة عرفنا الأسباب و عوامل الخطر خليني بقى أنتقل معاك يا عزيزي القارئ لأهم جزء و هو دور التغذية العلاجية، ايه الحاجات اللي هتساعد المريض يبقى افضل و ايه الحاجات اللي يتجنبها علشان صحته متدهورش أكتر؟😁🌚
دي شوية قواعد و تعليمات تم نشرها من جمعية القلب الأمريكية American Heart Association

في قايمة ببعض الأطعمة اللي يجب منعها تماما (حتى لو مش مريض قلب) زي:
١- الوجبات السريعة (Fast Food)
٢- الحلويات المُصنعة و بعض المُعجنات(الكيك الجاهز- السينابون- الخ..)
٣- الدهون المتحولة (السمنة المهدرجة- دهون الحيوانات)
٤- عدم استهلاك السُكريات بشكل كبير لأنها بتأثر على صحة القلب و الشرايين و بتزود نسبة الكوليسترول في الدم و السكريات العالية دي ممكن نلاقيها فى المشروبات الغازية و المصنعة و الشوكولاتة (معادا الشوكولاتة الدارك) و مشروبات الطاقة و الحلويات
٥- السكر الأبيض و البُني
٦- اللحوم المُصنعة بأنواعها( اللانشون بأنواعه- البلوبيف- البرجر- السوسيس- إلخ..)
٧- الأكلات المقلية و اللي بتحتوي على كمية كبيرة من الزيت
٨- الزيت اللي تم استخدامه اكتر من مرة

دي كانت قايمة بأهم الممنوعات و ده آخر تحديث نازل فى جمعية القلب الأمريكية طيب تعالى دلوقتي اقولك ايه الأطعمة و الأغذية اللي تساعد على تحسن صحة القلب😃🤍

جسم الإنسان محتاج دهون و بروتين و نشويات و فاكهة و خضار بس مش كل حاجة هنا تنفع لمريض القلب أو حتى لشخص عايز يحمي نفسه من أمراض القلب فبالتالي هنقسم كل حاجة للي ينفع يُستخدم و اللي مينفعش و اول حاجة هنبدأ بيها الدهون
مصادر الدهون اللي يمكن استخدامها: زيت الزيتون- زيت الكانولا- الزيوت النباتية و زيوت المكسرات- الافوكادو-المكسرات و البذور -أنواع معينة من السمنة او الزبدة مصنوعة و مُدعمة بإنها تقلل نسب الكولسترول فى الجسم و يتناوله مرضى القلب عادي بس بكميات بيتم تحديدها من أخصائي التغذية و من ضمن انواعهم
Promise Activ
Benecol Butter
Smart Balance

اما بالنسبة للدهون اللي بيتم تجنبها ف هي :
الزبدة و السمنة المهدرجة- دهون الحيوانات- المرقة- زيوت جوز الهند و النخيل

البروتينات اللي بيتم اختيارها:
اللحوم البيضة زي الأسماك و الدواجن - الأسماك الزيتية زي (السلمون- الماكريل- السردين- التونة)- البقوليات- فول الصويا- اللحوم الحمراء الخالية من أي دهون تماما (يُفضل التقليل من اللحوم الحمراء بشكل عام لأنها بتحتوي على نسبة دهون أعلى من الأسماك و اللحوم البيضاء)- منتجات الألبان و اللبن و الجبن الخالي من الدسم

بروتينات يتم تجنبها:
**اللحوم المُصنعة بجميع أنواعها
**لحوم الأعضاء الداخلية (زي الكبدة و القلب إلخ..)
**اللحوم اللي بتحتوي على عروق دهنية

الفاكهة و الخضار المسموح بيهم:
**الفاكهة و الخضار الطازة او المجمدة
**الخضروات المعبأة قليلة الصوديوم
**شرب عصائر طبيعية كتير و بدون إضافات و خاصة عصير الرُمان لأنه بينقي الشرايين المسدودة و يُحسن تدفُق الدم

الفاكهة و الخضار اللي يتم تجنبهم او التقليل منهم:
**الخضار المطبوخ اللي بيحتوي على صلصات دسمة
**الفاكهة المُعلبة المحفوظة فى شراب يحتوي على سكر عالي
**الفاكهة المجمدة مع سكر مضاف

منتجات و حبوب تساعد فى تعزيز صحة القلب :
دقيق القمح الكامل
خبز الحبوب الكاملة (نبعد عن الخبز الأبيض تماما و عن أي مخبوزات بتتعمل بالدقيق الأبيض او عيش الذرة)
حبوب الإفطار الغنية بالألياف
الحبوب الكاملة زي الرز البُني و الشعير
مكرونة الشوفان
= و في النهاية يا عزيزي القارئ حبيت اديك نبذة بسيطة عن دور أخصائي التغذية العلاجية مع مرضى القلب و كمان حبيت أوضح اننا نقدر نتجنب أي أمراض مُتعلقة بالقلب و نقدر نساعد فى تحسين صحة المريض و حمايته من حدوث أي مخاطر لصحته و حابة أنوه على كام حاجة في خِتام الموضوع :

- إن العلاج عن طريق التغذية السليمة و خلق عادات صحية ممكن يأخر من حدوث المرض او يمنع حدوثه خالص في بعض الأحيان او حتى يساعد المريض بأنه يعيش بصحة افضل و المرض ميبقاش ليه تأثير قوي عليه ف إفتكر دايماً إن في ايدك تساعد نفسك او القريبين منك و من أهم الحاجات اللي هنوه عليها تاني علشان تتلاشى أي فرصة إصابة بمرض من أمراض القلب :
١- الإبتعاد عن التدخين تماماً
٢- الإبتعاد عن المشروبات الكحولية تماما برضة😂
٣- الإعتدال فى الأكل و تناول اللي صحتك محتاجاة فقط
٤- ممارسة الرياضة حتى لو ٢٠ دقيقة مشي بس فى اليوم
٥- الإبتعاد عن الأكل الغير صحي زي الوجبات السريعة و السكريات الكتير
٦- متابعة تحاليلك أول بأول و صحتك الجسدية

و كدة يكون موضوع النهاردة خلص، أتمنى اكون قدرت أفيدك عزيزي القارئ💙💙
دُمتم بخير و بصحة جيدة🤍
BY: DR. Mariam Adel

15/10/2022

إن شاء الله هنعمل سلسلة منتظمة و نتكلم عن كل مرض مع التغذية المناسبة. ☺️
و هنبدأ معاكم ب
🔴 الأنيميا (فقر الدم) .

👈بالنسبة لأعراضه بيكون إنخفاض في عدد خلايا كرات الدم الحمراء و مستوي الهيموجلوبين في الدم .و دي أعراض مبتظهرش بوضوح عليه

إنما بقا الأعراض اللي بتكون ظاهره :
🔰 عدم القدره علي القيام بالأنشطة الجسدية و العضلية .

🔰 الشعور بالتعب و الإجهاد و الضعف .

🔰 عدم القدرة علي التركيز و ضعف القدرة الذهنية علي التعليم .

🔰 شحوب الجلد و هشاشة الأظافر و سرعة إنكسارها .

🔰 ضعف الشهية و ضعف الجهاز المناعي .

🔰 زغللة في العين و ضعف الجسم علي مقاومة الأمراض ..

🔰 عدم إنتظام الدورة الشهرية في حالة الانيميا الشديدة.

👈 يصاب الإنسان غالبا بالأنيميا نتيجة :

• تناول وجبات غذائية فقيرة بالحديد لمدة طويلة .

• ضعف إمتصاص الحديد من خلال جدار الأمعاء .

• الإصابة بالنزيف أو نتيجة الدورة الشهرية للنساء . أو نتيجة سرطان القولون.

👈 أكثر الافراد عرضة للإصابة بالأنيميا :

🔸 الأطفال اللي في عمر ( ٤ ل ٦ أشهر )
و دا لأن بيقل مخزون الحديد في جسم الرضيع بعد العمر دا من الولادة.

🔸البنات في مرحلة المراهقة بسبب زيادة حجم الجسم خلال مرحلة البلوغ و دا بيصاحبها زيادة في حجم الدم و زيادة في فقدان الحديد مع دم الطمث .

🔸 الأشخاص اللي بتعاني من بعض الأمراض زي القرحه و أمراض الجهاز الهضمي.

🔸 الناس النباتية اللي مش مبتاكلش اللحوم أو أي مصدر حيواني .

🔸 الإصابات الشديدة بالطفيليات المعوية و الإصابات الجرثومية المزمنة .

🔸 المرأة الحامل .

🟥 الوقاية من المرض .

🔹 تغذية الأطفال الرضع باللبن الصناعي المدعم بالحديد.

🔹 إعطاء الأطفال الرضع اللي بيعتمدوا في تغذيتهم علي اللبن الصناعي مدعمات الحديد بالتنقيط.

🔹 تناول الأغذية الغنية بالحديد زي الكبد و اللحوم والبيض والدواجن والأسماك والبقوليات والسبانخ .

🔹 إجراء فحوص معملية لمستوى الهيموجلوبين في الدم للأطفال وعمل فحوص دورية للمرأة اللي بتعاني من فرط الطمث . ومعالجة الأمراض المُسبّبة لفقدان الحديد

🔹 تعاطي المرأة الحامل مدعمات الحديد.

🔹 تناول فيتامين ج مع الوجبات و دا لأنه بيزيد من معدل امتصاص الحديد خلال جدار الأمعاء

🔹 عدم الإفراط في تناول الشاي والقهوة و دا لأنه بيحتوي علي حمض التانيك اللي بيعيق امتصاص الحديد خلال جدار الأمعاء.

By :Dr/Rawan Awad.

20/09/2022

موضوع في غايه الأهميه ولازم كل أخصائيين التغذيه يكونو علي درايه شديده بيه .♥️
كبار السن !!
٤ حاجات لازم نحطهم فدماغنا بخصوص كبار السن عشان نحاول ننقذ ما يمكن انقاذه ⬅️ التغذيه ، الهرمونات ، المخ ووظائف الجهاز العصبي ، الشيخوخه .

- *التغذيه* ⬅️ السنين ال عدت عليهم طول حياتهم بياكلو المحَمر اثر عليهم وع اعضائهم الداخليه والشرايين والقلب والكبد ... فلازم يشيلو اي حاجه بتزود التهاب م حياتهم
- ( ممنوع حلويات وسكريات .. لبن الابقار ومنتجاته .. الجلوتين .. الزيوت المهدرجه والمواد المحفوظه )
- الاكل الصابح من الحيوان او الارض هو دا التارجت لكبار السن .
- فالعادي عند الكل النشويات تدينا طاقه .. البروتين لبناء الجسم .. الدهون بتظبط الهرمونات وتدي طاقه وقت اللزوم
- التارجت الاساسي لكبار السن انهم يحافظو ع جسمهم وع عضمهم والعضلات والاعضاء .. مش محتاج الطاقه الزياده ومش محتاج بناء للجسم .
- اقلل النشويات .
- اهم عنصر لازم اخده بروتين ( عشان اقدر احافظ عالعضلات الموجوده والعضم والاسنان ) ⬅️ ( اسماك .. بذور كتان وبذور الشيا وبذور السمسم وبذور عباد الشمس وبذور القرع )
- اللحوم الحمراء ⬅️ مع الناس الكبيره بتوقف الاوتوفاجي ( يعني بتوقف الجسم من انه ياكل الخلايا السرطانيه والخلايا القديمه ) يكفيه نص كيلو فالشهر .
- الدهون الصحيه( هي سر النجاه في معظم امراضنا ) زي مثلا الانسولين دا اي غير انه هرمون حصله مشكله ؟ والامراض المناعيه اي هي غير ان الكورتيزول عالي والامعاء حصلها مشكله . ( كل دي هرمونات والهرمونات اساسها الدهون )
- الدهون ⬅️ زبده ، زبده جوز الهند ، زيت الزيتون .
- *المخ والجهاز العصبي* ⬅️ المخ بيحتاج دهون محترمه ( زبده جوز هند ، انسولين واطي ، نوم بدرى ، اوميجا 3 )
- النشويات المسموح بيها ⬅️ الشوفان ، الرز البسمتي

المكملات الهيحتاجها فيتامين د ⬅️ عشان الهشاشه
اليود⬅️ مضاد سرطان .. يخلي الغده الدرقيه شغاله .. الكبد يعمل ديتوكس ( زي اعشاب البحر )
المغنسيوم
فيتامين k2 ⬅️ بياخد الكالسيوم وفيتامين د يدخلهم للعضم عشان امنع الهشاشه
- الكولاجين وفيتامين سي .
- الزنك.

*الهرمونات* ⬅️ ممنوع الهرمونات الصناعيه لانها سبب الكانسر
- طول مالكورتيزول عالي الشيخوخه بتقرب
- الانسولين لازم يبقي واطي
- اتزان الغده الدرقيه ( اليود )

- *الشيخوخه* ⬅️ عشان امنعها تظهر احافظ عالميكروبيوم والحمض النووي والميتوكندريا.
الميكروبيوم⬅️ ( منع مسببات الالتهاب والجلوتين ) .
الحمض النووي ⬅️فيتامين سي .. اوميجا 3 .. فوليك اسيد .. b3 .
الميتوكندريا ⬅️ مضادات الاكسده ( زيت الزتون .. التوت .. الشطه .. المكسرات .. الزنجبيل ) .
BY.Dr Doha Tarek

01/08/2022

عُمرك فكرت ايه ممكن يبقى دور دكتور التغذية غير السِمنة و النحافة؟ و ليه اسمها تغذية علاجية؟ تفتكر علشان بس بتساعد مرضى السِمنة و النحافة؟🤔
أسمحلي عزيزي القارئ أقولك إن التغذية العلاجية تشمل علاج أو المساهمة في علاج الكثير من الأمراض (إذا مكنش معظمها) و لكن عن طريق الغذاء سواء ان كان وريدي، معوي او طبيعي و ده حسب الحالة و المرض.
و ما بإننا يا عزيزي القارئ بنتكلم عن الأمراض و دور التغذية العلاجية في رحلة العلاج ف خليني أكلمك النهاردة عن مرض السرطان و رحلة أخصائي التغذية في العلاج و خليني أقولك شوية معلومات و نصايح ممكن تتبعهم لو لقدر الله تعرف حد في عيلتك او من المُقربين مريض كانسر.

-أولاً: مريض السرطان بيتم علاجه بكذا طريقة زي (العلاج الكيماوي- العلاج الاشعاعي- العلاج المناعي- التدخل بالجراحة)
- كل علاج من دول بيبقى ليه آثار جانبية على المريض و لكن الآثر المشترك بين كل طرق العلاج هو فقدان الوزن بمعنى إن بنسبة من 50-90% من مرضى الكانسر بيعانوا من فقدان الوزن بشكل غير صحي.
- و إذا تم نزول وزن المريض عن الطبيعي بنسبة 5% ده ممكن يؤدي إلى إستجابة منخفضة او ضعيفة للعلاج (شوفت يا عزيزي القارئ التغذية مهمة ازاي في رحلة العلاج)
- و خليني أقولك كمان إن20% من مرضى الأورام بيتوفوا بسبب سوء التغذية و ليس المرض نفسه و ده بسبب ان المريض لما مش بيتلقى التغذية الصح و المناسبة ليه مش بيقدر يواجه المرض ولا يقاومه لحد ما بتحدث الوفاة.

= ذكرت من شوية الطُرق اللي بيتعالج بيها مريض السرطان و قولت ان اكتر آثر جانبي مشترك بينهم هو فقدان الوزن و ده ببساطة لأن الآثار الآخرى هي اللي أدت لفقدان الوزن بالتالي لو عرفنا نتعامل مع الآثار التانية هنقدر نتحكم فى فقدان الوزن و الآثار الجانبية الآخرى زي⬇️:
١- الشعور بالتعب و الإرهاق الشديد ✔️
٢- القئ و الشعور بالغثيان: ده منتشر بنسبة 30-90% بين المرضى اللي بيتعالجوا بالكيماوي و الإشعاعي و اللي خضعوا للجراحة ✔️
٣- إلتهاب الغشاء المُخاطي للفم Oral Mucositis: بنسبة 40-100% للمرضى اللي بيتعالجوا بالكيماوي، الإشعاعي و العلاج المناعي
٤- إمساك: بيبقى منتشر بشكل اكبر فى المرضى اللي بيتعالجوا بالكيماوي

طيب إحنا دلوقتي بقى عندنا وعي إلى حدٍ ما بالمشكلة بس هنحلها إزاي؟😅😃

في عدة إستراتيجيات أتعملت علشان نقدر نساعد المريض بشكل كبير انه ياكل و ياخد احتياجاته من الاكل و العناصر اللي جسمه محتاجها و قبل ما اتكلم عن الطرق و الاستراتيجات دي هقول معلومة بسيطة و هي ان مريض السرطان بيحتاج نسب سُعرات حرارية و عناصر غذائية مختلفة عن الشخص الطبيعي بمعنى ان الانسان الطبيعي بيحتاج من 25-30 سُعر حراري لكل كيلو جرام من وزنه في حين ان مريض السرطان بيحتاج من 30-40 سُعر حراري لكل كيلو جرام من وزنه ( يعني لو عندي انسان وزنه ٧٠ كيلو ف هو محتاج ٢١٠٠ سُعر حراري بينما المريض لو نفس الوزن هيحتاج ٢٨٠٠ سُعر حراري) و هكذا مثلا في احتياج البروتين الشخص الطبيعي بيحتاج 0.8g/kg و المريض بيحتاج 1.5-2.5 g/kg ف علشان كدة لازم نراعي كل الفروق دي أثناء وضع خطة غذائية للمريض.
و دلوقتي هبدأ أطرح بعض الطرق اللي تساعد المريض على الأكل:
١- هقسم الوجبات ل ٦ او ٧ وجبات صغيرة بدل ٣ وجبات كبيرة على مدار اليوم و ده لأن المريض بيكون فاقد الشهية و حاسس بتعب و إرهاق ف مش هقدر أديله وجبة كبيرة مرة واحدة لانه كدة كدة مش هيقدر يكملها و مش هيقدر ياكل تاني على عكس لو قسمتله الوجبات لوجبات بسيطة يقدر ياكلها بسهولة و ياخد كل ٣ او ٤ ساعات سناكس خفيفة لأن بعد ساعتين او ٣ بتكون المعدة بالفعل قدرت تهضم الجزء البسيط اللي دخلها ف اقدر ادي وجبات تاني

٢- أعتمد اني ادي للمريض الأكل اللي بيحبه أكتر علشان يبقى مبسوط و هو بياكل و مش مضطر و دي حاجة هتحسن نفسيته و لكن أراعي دايما اني اقدمله الأكل اللي بيحبه بشكل صحي
٣- وضع خطة للنشاط البدني حتى لو كانت بسيطة، لو المريض بيقدر يقوم و يتحرك يبقى لازم يعمل رياضة حتى لو كانت مشي لمدة ٢٠ دقيقة لأن ده هيحسن الصحة النفسية، هيحسن حركة الأمعاء و الهضم و إمتصاص الجسم للأكل، و كمان هيحميني من زيادة الوزن
٤- طب نفترض احنا عملنا كل ده بس المريض برضة مش بيقدر ياكل اكتر من 60% من احتياجاته؟ وقتها ممكن أديله nutritional support او nutritional drinks و دي منتجات pharmaceutical nutritional support بتديني القيمة الغذائية اللي محتاجاها و لكن بصورة سهلة عن طريق عصاير او shakes يقدر المريض يشربها بين الوجبات و لكن نراعي ان المريض يبقى عالأقل بياكل بنسبة 60% و لو المريض مش بيقدر ياكل خالص لأي سبب صحي ف هنلجأ للتغذية الوريدية او المعوية و دي مش هنتكلم عنها دلوقتي لأنها ليها تفاصيل أكتر.
-يعني خلاص يا دكتورة إحنا كدة خلصنا؟ لا ثانية فاضل كام حاجة صغيرين هقولهم و ده برضة مش معناه ان الموضوع انتهى خالص😅😁 و لكن إلى حدٍ ما هتبقى عرفت شوية معلومات عن تغذية مريض السرطان.
- من شوية إتكلمت إن من ضمن الآثار الجانبية للعلاج بالكيماوي-الاشعاع-الجراحة هو القئ و الاحساس بالغثيان طب ازاي ممكن أخلي مريض ياكل و هو حاسس بغثيان؟
اولا بديله وجبات صغيرة على مدار اليوم
ثانيا بديلة اكل ساقع او في درجة حرارة الغرفة او دافي مائل للبرودة مش العكس و ده لسبب مهم جداً جداً و معلش يا عزيزي القارئ انا تعبتك كتير بس ركز هنا كويس اوي🤫
الأكل السُخن بيأثر على ال Sensor Neuro Transmitter و الأعصاب المسئولة عن إنها تنبه الجزء الخاص بالقئ و الأحساس بالغثيان و الجزء ده اسمه Chemoreceptor Trigger Zone (CTZ) و علشان كدة بندي الأكل ساقع او في درجة حرارة الغرفة علشان ميتمش تنبيه المنطقة دي فبالتالي نقلل الأحساس بالغثيان و القئ
و بناءاً عليه في شوية ممنوعات كدة أخيرة لازم نراعيها مع المريض اللي بيشعر بالغثيان:
١- الأكل اللي في دهون و حراق ممنوع
٢- الأكل اللي ريحة قوية ممنوع
٣- الأكل السخن ممنوع(تاني)
٤- الأكل المسكر اوي ممنوع
٥- شُرب سوائل مع الأكل ممنوع السوائل بتبقى بعد الوجبات بفترة
طبعاً دي مش كل حاجة تخص تغذية مرضى الأورام لأنه مجال دقيق جدا و مليان تفاصيل و انا حاولت أوضح و أسهل كام حاجة مهمين و لو حابين تعرفوا تفاصيل او معلومات أكتر فى تغذية الأورام ف ممكن أبقى انزل تاني و بس كدة أتمنى أكون قدرت أعرفكم و لو بجزء قد ايه تغذية المرضى مُهمة كبيرة و جزء كبير في رحلة العلاج💙💙
BY. Dr:Mariam Adel

15/07/2022

بتتعرض البنت للألام و التعب في فترات معينه كل شهر و مش بتكون عارفه تاكل ايه بالظبط و ايه تتجنبه و هكذا🙍‍♀️🥲 ...

👈علشان كدا هنتكلم عن التغذيه في فتره البيريود ( الدوره الشهريه)👉.

طبعا في الفتره دي الحالة المزاجية للأكل للبنت في الفتره دي بتختلف من بنت ل التانيه و دا لان طبيعة الجسم بتكون مختلفه 👍.

👀 فيه بنات بتتسد نفسهم عن الأكل و فيه العكس نفسهم بتكون مفتوحه و بياكلوا كميات كبيره من الاكل . ف احنا ان شاء الله هنقول نظام غذائي يكون مشترك بين الحالتين 🤗.

🟥 أول حاجه هنتكلم عن السوائل اللي بتأثر علينا في الفتره دي 👀🤗.

⬅️ زيادة استهلاكنا لشرب الماء مفيد جدا في الفتره دي زي شرب 2 لتر حوالي 12 كباية ميه💦.

⬅️ شرب السوائل من الاعشاب الطبيه زي الينسون و النعناع و دا لأنها بتهدي العضلات 👉.

⬅️ مهم نبعتد في الفتره دي عن المشروبات الغازية و السوائل اللي فيها كافيين زي الشاي و القهوه لأنها بتزود التعب و التوتر و الفتره دي لوحدها انتي بتكوني متوتره و مخنوقه لوحدك ف بلاش تزودي القلق عليكي ي غاليه 🙂😂🤌.

⬅️ القرفه تناولها مفيد في انها بتنشط الدوره الدمويه بحيث انها تخلي الدم يمشي بحركة طبيعيه بس ( تناول القرفه يكون كمية معتدلة و غير مفرطه ).

🟦 هنتكلم بعد كدا عن الحاجات اللي تتجنبيها و تاخدي بالك منها 👉

⬅️ تجنبي أو قللي علي قد ما تقدري أكل المخللات و الموالح في الفتره دي
لأنها بتزيد نسبة الأملاح و بالتالي بتحبس السوائل في الجسم .

⬅️ و كذلك السكريات العاليه. مهم الاعتدال لان زيادته بتحبس السوائل و بتغير من الحاله المزاجيه و بسبب صداع 🥲.

🟩 هنتكلم بقاا عن الحاجات المهمه اللي هنوفرها في أكلنا الفتره دي 🤗.

🟢 ناكل أكل غني بالفيتامينات والمعادن خاصه الحديد و البوتاسيوم و الماغنسيوم و المنجنيز.
و هيكون موجود في الخضار الداكن زي
⬅️ السبانخ و البقدونس و البروكلي .....

⬅️ الكبده و دي هيكون متوافر فيها عنصر الحديد.

🟢 نستبدل أكل الحلويات ب الفواكه و الخضروات و دا لأنها غنيه بالفيتامينات و فيها ألياف هتساعدنا علي تقليل التقلصات و الآلام . زي....

⬅️ الاناناس موجود فيه عنصر المنجنيز و دا بيرخي العضلات..

🟢 فيتامين B بكل انواعه في الفتره دي مهم جدا علشان الفتره دي فيها شعور بالإرهاق و التعب . فلازم ناخد حاجه فيها طاقه .

👈و دا موجود في
⬅️ اللبن و اللحوم و مشتقاتها.

🟢 زيادة استهلاك الاطعمه الغنيه بالكالسيوم زي
⬅️ الألبان و الجبن بس تكون قليلة الدسم علشان نضمن أن الملح يكون قليل.

🟢 أوميجا 3 و أوميجا 6 .
مهمين للجهاز العصبى لانه يتأثر في الفتره دي .
و دا هيكون موجود في👀

⬅️ الاسماك و المكسرات .

🟪 ممارسة الرياضه🚶‍♀️.
مهم جدا انك تتحركي في الفتره دي و متسيبش نفسك نايمه طول اليوم حتي لو مارستي رياضة المشي بحيث تحركي و تنشطي الدوره الدمويه و غير أن الرياضه بتقلل من الالام ...

📝 آخر حاجه احب اقولها لو انتي عندك فقر دم بشكل يومي لازم تهتمي ب الاكل اللي فيه مصادر حديد طوال الشهر مش تقتصري علي الفتره دي و بس👀❤️.

By: Rawan Awad .

01/05/2022

كل سنه و انتم طيبين عيد سعيد عليكم جميعا 🥰

طبعا كلنا في رمضان متعودين علي وجبة الفطار و السحور الخفيفه 🙂
علشان كدا مش عايزين اول ايام العيد نبالغ في أكلنا و نصدم المعده 🤌😂

إحنا هنقول شويه حاجات سهله نعملها لحد ما نتعود تدريجي ل طبيعة اكلنا ( ٣ وجبات الرئيسيه) 🤗

🔴 ناكل وجبة فطار خفيفه
بحيث نعود المعده علي كمية قليلة في البدايه و بعد كدا بالتدريج...

🔴 نتجنب تناول الوجبات الدسمة في الفطار اللي ممكن تسبب عسر هضم.

🔴 نقلل في الإفراط في تناول الحلويات و خاصه الكحك...
و هنا سنسكت قليلاً..... 😂🤌

طبعا احنا عارفين أن مظاهر الاحتفال بعيد الفطر المبارك 🎊
تناول الكحك وحلويات العيد سواء بقا هنعملها فالبيت او نشتريها ..وتتنوع أشكالها ما بين الكحك ، والبسكويت، والغريبة، والبيتى فور، والمعمول وغيرها . وتتميز ب اي بقا ؟ بمحتواها العالي من الدهون والسعرات الحرارية اللي بتسبب مشاكل صحيه😢.

📝 السعرات الحرارية ل الكحك بيكون علي حسب حجمها و علي حسب مكوناتها
بس يتراوح عدد السعرات الحرارية من ⬅️250:200 كالوري.

و لو حجم الكحك صغير يبقا من ⬅️ 200:150 كالوري.

و عندنا بعض الحلويات السائده زي
الكحك الساده ⬅️200 كالوري

الغريبه و البيتي فور⬅️150 كالوري

البسكويت ⬅️60 كالوري

الكحك بالملبن ⬅️ 240 كالوري

📌 طب بعد اللي قولناه دا هينفع ناكل 🤷؟
طبعا زي ما متعودين مافيش حاجه اسمها حرمان ☺️.

هناخد بس في خلال ساعه من واجبه كامله من ⬅️ و1ل 3 دا بالنسبه للناس اللي بتتحرك ديما و بتعمل رياضه .

أما من 1ل 2 للناس اللي حركتها قليله .

و المهم عايزين نحافظ من عدم حدوث إضرابات الجهاز الهضمي🤝💗

🔴 نحاول نقلل من الإفراط في تناول المشروبات الغازية

🔴 نقلل من المشروبات اللي فيها الكافيين زي الشاي و القهوه لان زيادتها بيسبب التوتر في الجسم و اضطرابات في النوم 😢

🔴 ممارسة الرياضة🏋️.
هتكون مهمه لان تناول و الإفراط في الأكل بيصاحب الراحه و الكسل و مع الوقت بيولد تراكم الدهون في الجسم و تراكم الدهون مع الوقت هيسبب مشاكل صحيه ..... ف نركز علي الرياضه و عدم الكسل.

🟢 طبعا مننساش شرب الماء بانتظام💦 🌚♥️

و ان شاء الله مع الوقت هنرجع نتعود علي طبيعة أكلنا من جديد🤗♥️♥️

By:Dr. أنس عادل& Doha Tarek & Rawan Awad

10/04/2022

كلنا قبل الفطار بنكون محضرين جميع العصاير و الحلويات و الاكل اللي هيعوض الحرمان و الضعف اللي كنا فيه طول اليوم 🥲 . و بنكون مستنين المغرب يأذن بفارغ الصبر 😂.

طب تعالوا نتكلم علي حاجه هتفيدنا علي الفطار 🤗

👈 فوائد الأفطار علي التمر👉
🟢 بيزود الجسم بالطاقه و سهل الامتصاص و دا لانه بيحتوي علي السكريات البسيطة زي الجلوكوز و الفركتوز و السكر و لأن التمره الواحده فيها حوالي 66 كالوري .
🟢 بيساعد علي التركيز و تحفيز خلايا المخ و دا لانه غني بالعناصر المهمه زي البوتاسيوم و احتوائه علي بعض الفيتامينات.
🟢 بيقلل أو بيمنع حدوث الإمساك و بيعالج الإضطراب المعوي و دا لانه بيحتوي علي الألياف الطبيعية اللي تعتبر ملينات طبيعه
🟢بيساعد علي الوقايه من فقر الدم (الأنيميا)و دا لانه غني بعنصر الحديد .
🟢بيحمي من حدوث هشاشه العظام لانه بيحتوي علي العناصر المعدنيه زي الكالسيوم و الماغنسيوم و المنجنيز.
🟢 بيزود مناعة الجسم

🔴 طبعا مننساش أنه بيحتوي علي سعرات حرارية كتير و غني بالسكريات . ف نخلي بالنا من مرضي السكر يتناولوا باعتدال(تمره أو اتنين بالكتير)
و بردو الناس اللي بتعاني من زياده في الوزن يعتدلوا في التناول ❤️

🔵 حابين تشاركونا و تقولوا اي اول حاجه بتفطروا عليها ؟🤗

و كل سنه و انتم طيبين 💙
صوما مقبولا 💙

By:Dr.Rawan Awad

08/04/2022

كلنا قبل اذان الفجر بنفتح التلاجه نجيب ازازه المياه نشرب لما بطننا تتملي لدرجه تحس ان بطنك بتعوم وتيجي تاني يوم تعطش بردو 😂

ودا بيحصل لان الجسم لما بيحس ان فيه مياه زياده عنده هو مش محتاجها بيبدا يتخلص منها ي اما عرق او انك تفضل تدخل عالحمام طول الليل

طيب نعمل ايه عشان منعطش في رمضان 🤔

• اشرب مياه كتير بس علي مدار فتره الفطار علاقل ٢ لتر يعني تقريبا من كوبايه ل ٢ كل ساعه💧

• كل فاكهه علي السحور (موز - بطيخ ..) 🍌

• خلي في اكلك علي السحور خضروات زي الخيار🥒

• ابعد عن المخللات والحاجات الحادقه

• نقلل من شرب القهوه والشاي والحاجات اللي فيها كافيين لانها مدارات للبول فبتزود من احتياج الجسم للمياه ( الناس ال بتحبس بكوبايتين شاي )☕

واخر حاجه بعيدا عن العطش اوعو تعملو دايت فرمضان وتحسبو جرامات .. بشويه نصايح هتخس فرمضان عادي وانت بتاكل كمان ♥️

كل سنه وانتم طيبين💙💙
صوما مقبولا 💙

By: Dr.Doha Tarek

08/04/2022

🛑مريض السكر لو شك أنه مش مظبط أو تعبان و قاس سكره أثناء الصيام وكان اقل من ٧٠ أو اكتر من ٣٠٠ وجب عليه الأفطار لانه سيعرض نفسه للخطر إن لم يفطر .

أخصائي التغذية د.أنس عادل

29/09/2023

24/03/2023

13/11/2022

30/10/2022

15/10/2022

20/09/2022

01/08/2022

15/07/2022

01/05/2022

10/04/2022

08/04/2022

08/04/2022

Address

Telephone

Website

Alerts

Shortcuts

Share

Category