06/04/2021
" جرثومة المعدة " باسلوب بسيط .
ايه يعني دي يا دكتور ؟ 🤔
أقوللك دي عبارة عن ميكروب عادي جدا بيسكن في معدة البني آدمين بنسبة تتجاوز ال 50 -60 % من سكان العالم - إنتوا متخيلين الرقم المرعب ده 😯😯 .
يعني أكتر من نص البشر عندها جرثومة معدة في بطنها و عايشة بيها كده من غير مشاكل .
طب يا دكتور الميكروب ده بيتنقل ازاي .. أقولك بيتنقل عن طريق الفم . أكل ملوث بقى إيديك ملوثة , أو Feco - Oral ، و دي خلي حد غيري يشرحهالك 😂😂 .
طيب و بعد ما تتنقل للبني آدمين بتنزل تتزرع في جدار المعدة فالسؤال المهم بقى ازاي بتعيش في المعدة و انتوا قلتوا قبل كده ان المعدة حمضيتها عالية جدا ممكن تموتها ... أقولك ما دي حكمة ربنا ،هو خلق الجرثومة دي و هيألها سبل العيش في المعدة بطريقة ما صعب اشرحها حاليا.
بتعمل ايه بقى الجرثومة دي ؟؟ . . دي حضرتك بتفضل تاكل في جدار المعدة و الإثنى عشر و تعمل التهاب المعدة و الإثنى عشر و يؤدي إلى قرح تسبب أعراض زي حرقان بفم المعدة بعد الأكل و ميل للقيء أو حتى القيء المتكرر في حالة قرحة المعدة و في الصيام في حالة قرحة الإثنى عشر . و ممكن تنزف القرح دي و تؤدي إلى القيء الدموي او نزيف شرجي أو كليهما 😱 .
مش بس كده !! . لا ده كمان الالتهاب الشديد ده ممكن لا قدر اللى على المدى الطويل جدا تتسبب في ورم خبيث بالمعدة لكن ده نادر جدا.
طيب تتشخص ازاي دي يا جماعة ؟؟
بسيطة .. الدكتور بيفحصك الاول و بعدين يخليك تعمل تحليل جرثومة المعدة .
هنا بقى فيه نقطة مهمة . فيه تحليل للجرثومة بالدم و فيه تحليل في البراز .🥴
طب نعمل انهو تحليل يا دكتور ؟
بص يا سيدي .. المريض لو جاي أول مرة و بيشتكي من أعراض التهاب المعدة يبقى يفضل يعمل الاتنين في الدم و في البراز ، انما لو خد علاج الجرثومة بعد كده يبقى نعمل تحليل البراز بس لأن كده كده تحليل الدم بيطلع إيجابي لأنه عبارة عن أجسام مضادة هتفضل موجودة في الدم طول العمر .
فيه فحوصات تانية كتير ليها و لكن ادق حاجة في الدنيا اللي تخليني متأكد هو اني أعمل منظار و آخد عينة و أحللها تحت الميكروسكوب و أشوف الميكروب الحلزوني قدام عيني 🧐 . بس طبعا مش منطقي اني أعمل كده لكل عيان عنده شوية تعب في بطنه نبعته منظار يعني علشان كده المراجع قالت ان أي مريض بيشتكي من أعراض معدة ياخد علاج لمدة اسبوعين لو مخفش يبقى يحلل جرثومة معدة و يعالجها لو مخفش يبقى يعمل منظار معدة و ياخد عينة و تتحلل و نبدا مرحلة العلاج 😊 .
يعني ليها علاج يا دكتور ؟ .. متقلقوش بتتعالج لكن صعبة شويتين و عايزة صبر و خبرة في التعامل معاها .. و ده علشان بقا فيه مقاومة للمضادات الحيوية ✌️ .
د/ مينا ماجد
اخصائي الباطنة العامة و الكبد و السكر
💻 الكشف بالاشعة التليفزيونية و رسم القلب
🏬 العيادة: شارع حسين بك اعلى مطعم اولاد الشال - المنصورة
📆 المواعيد: من الاحد الى الاربعاء + الجمعة من ٣-٦ م
☎️ للحجز: ٠١٥٥٥٤٩٨٩٠٠ // ٠١٠٦٦١٨١٢٥١
