12/12/2021
مخدر الشابو, وسفاح الإسماعيلية
طبعا كلنا عارفين قصة , إللى ذبح مواطن فى الشارع عيانا بيانا وسط آلاف الناس, وقال وقتها إن #المجني عليه إغتصب أخته وأمه‼️
مش هنتكلم تاني فى تفاصيل الواقعة🤷🏼♀️, لأنها قتلت بحثا وكل الناس تقريبا عارفينها‼️
تمت محاكمة #السفاح ده, والغريب إنه قال فى المحكمة كلام عجيب جدا‼️
قال إنه ملبوس, وإن الجن اللى لابسه هو اللى عمل كده‼️
وقال إن إسمه تحت #الأرض حسام مش عبد الرحمن‼️
ولما القاضي سأله: إنت مش قلت إنك قتلت المجني عليه لأنه إغتصب أهل بيتك؟؟🤔🤔
قاله أيوه هو إغتصبهم فعلا, بس أنا بقالي فترة بتحصلي حجات غريبة, أنا #مسحور وعليا جن بيخليني أعمل حاجات غريبة‼️
الشاب ده بشهادة كل جيرانه ومعارفه, مدمن على مخدر الشابو بقاله فترة طويلة‼️
, قلنا إن مخدر الشابو بيسبب هلاوس سمعية وبصرية للمدمن, وممكن يتسبب فى إرتكابه لجرائم نتيجة إنه بيصورله حاجات مش حقيقية, ممكن يتصور إن زوجته بتخونه فيتقتلها, ممكن يروح يقتل واحدة ميعرفهاش أصلا, وهو متصور إنها زوجته وإنها خانته وعرفت واحد غيره وراحت عاشت معاه‼️
ممكن يتصور إن أخوه عاوز يقتله علشان يورثه فبالتالي يسبق هو ويقتل أخوه, وواقع الأمر إن مفيش بينهم #ورث أصلا‼️
ممكن يتصور إنه , أو العبد الصالح, أو إنه نبي أو حتى إله‼️
ممكن يتصور إنه #جني مش بني آدم‼️
ببساطة شديدة, بيختل عقليا‼️
مخدر الشابو فعلا #كارثة ممكن تتسبب فى أغرب وأخطر الأحداث والجرايم, هو لوحده كافي جدا إنه يدمر مجتمع كامل, ويحوله لمجموعة مجانين ماشيين يقتلوا فى بعض‼️
اللى يهمني أقوله هنا هو نصيحة للجميع, كبار وصغيرين, بنات وشباب, علشان محدش يقع فى فخ إدمان المخدر الداهية ده أو أى مخدر عموما👇
👈 ربي ولادك بشكل سليم👌, عرفهم الصح والغلط والعيب والحرام, علمهم تحمل المسؤولية مش #الهروب منها, صاحبهم وخليهم يحكولك أى حاجة من غير حرج ولا كسوف, ووجهم وإنصحهم من غير توبيخ ولا إهانة ولا تستعرض عيوبهم قدام الغريب والقريب وكأنك بتذلهم علشان حكولك أخطائهم‼️
👈 ولاحظ أى تغير فى سلوكهم مهما كان بسيط, وإعرف سببه, شهيتهم للأكل إتغيرت مثلا,بقوا بياكلوا أكتر أو أقل, طبيعة نومهم إختلفت, أسلوبهم فى #الكلام أو التعامل مبقاش هو اللى انت تعرفه, معدلات خروجهم من البيت زادت أو قلت عن المعتاد بتاعهم, وزنهم قل فجأة أو زاد فجأة, فجأة بقوا مرحين على غير المعتاد أو نكديين على غير المعتاد, أى حاجة إختلفت فى ولادك لازم تفهم سببها.
👈 إعرف #أصحاب ولادك👍, هما مين وأهلهم مين وأخلاقهم شكلها إيه, معظم مشاكل الشباب بتحصل لما أهلهم يبتدوا ميركزوش فى معارف ولادهم‼️
👈 ولادك على مواقع التواصل الإجتماعي 24 ساعة, لازم تعرف هما بيعملوا عليها إيه🤔, أحيان كتير موزعي المخدرات بيتعرفوا على الشباب عن طريقها, ويجروهم لسكة الإدمان‼️
👈 قرب من ولادك وإحتويهم وناقش معاهم مشاكلهم, علشان ميهربوش منها لسكة #المخدرات‼️
👈 تابع #الفلوس اللى مع ولادك💵, وإعرف بيجيبوها منين وبيصرفوها فى إيه, حتى لو بيصرفوها فى حاجات هايفة من وجهة نظرك دى مش مشكلة, وقتها إنصحهم من غير توبيخ علشان ميكذبوش عليك ويقولولك إنهم بيشتروا بيها أمهات الكتب وبياخدوا بيها كورسات فى علوم الفضاء, وهما فى الواقع بيشتروا بيها ألعاب وفاست فود والصبارة الراقصة والبطة البهلوانية, المشكلة الحقيقية إنهم يكونوا بيصرفوها على المخدرات‼️
👈كل #ولد وكل #بنت, متاخدش أى حاجة من صاحب أو صاحبة متكونش إنت وأهلك عارفينهم كويس🤐, ومتتصرفش من ورا أهلك حتى لو هيوبخوك وكلامهم هيضايقك, فى الأول والآخر هما أكبر منك وخبرتهم فى الحياة أضعاف خبرتك, وهدفهم مصلحتك, ثق تماما إن ضياعك هيبتدي من أول ما تتصرف من وراهم‼️
👈متسعاش ديما لإنك تساير #الموضة والسلام🤷🏼♀️, مش علشان كل اللى حواليك غلط لازم تبقى إنت كمان غلط زيهم, حتى لو محدش هيعرفك أصلا, الناس الغلط خسارتهم مكسب, وكل واحد بيتحمل لوحده نتيجة تصرفاته, لما تتعاطى مخدرات لمجرد تساير جو أصحابك وميتريقوش عليك, وبعدها ترتكب جريمة أو تصاب بمرض قاتل أو تتجنن, محدش منهم هيتحمل النتيجة معاك, ولا حد هيتحاسب قدام ربنا بدالك‼️
الشاب اللى ارتكب مذبحة #الإسماعيلية ده, محدش من أصحابه اللى مشوه فى سكة المخدرات💉 وقالوا عليه جامد وشبح هيتسجن أو يتعدم بداله دلوقتي‼️
طبعا إحنا منقدرش نجزم هل المجرم ده مجنون فعلا, وللا بيدعي الجنون علشان يهرب من العقوبة🤷♂️, لكن اللى إحنا متأكدين منه إن إدمان المخدرات فعلا بيسبب إختلال العقل👻, وبينتهي المدمن إما بالموت أو الجنون أو #السجن⛓ أو #الإنتحار‼️
ربنا يحفظ شبابنا وبناتنا جميعا🤲 من شر #السموم دي, ويهدي كل اللى ضل ومشي فى الطريق ده لإنه يطلب العلاج🤲 قبل ما يفوت الأوان وينتهي بيه الحال مريض ميئوس من شفاه أو ميت أو سفاح أو مجنون‼️
تمنياتنا للجميع بدوام #الصحة والعافية ولجميع المرضى بالشفاء العاجل🤲
