22/02/2026
كان يا مكان يا سادة يا كرام .. في يوم من ذات الأيام اللي هو امبارح و انا قاعد في امان الله في العيادة .. اذ تدخل عليا سيدة في التلاتينات من عمرها و معاها طفل صغنطوط حليوة كدة عنده ٦ سنين و نص كدة .. و اول ما قلتلها اتفضلي اقعدي يا ست الكل .. لقيتها اتفلتت في العياط و عمالة تفنهق و انا بحاول اهديها و مش فاهم اي حاجة خالص .. و قلت للطفل اللي معاها انت فاهم حاجة .. شاورلي بإيده و قالي معرفش في ايه .. المهم مطولش عليكوا .. قولوا طول براحتك يا دكتور🙄 .. اقولكوا شكرا يا جماعة 😁 .. المهم لقيتها ماسكه ورقة في ايديها .. و رمتهالي ع المكتب و قالتلي خد شوف ده لغاية ما اخلص عياط 😁
المهم مسكت الورقة .. اتاريه تحليل صورة ده .. فتحت الورقة و قريت اللي فيها .. لقيت التحليل زي الفل و مفيش حاجة فيه غير شوية انيميا بسيطه محتاجة علاج بسيط و هيبقى زي الفل .. بس برضه انا حاسس ان في حاجة تانيه و قلبي متوغوش و مش هو ده اللي يخليكي تعيطي يا ست .. ايه اللي حصل يا حجة خلاكي بالمنظر ده .. جوزك اتجوز عليكي و لا ايه اللي حصل 😁
قالتلي إخص عليك يا ضاكتور .. بالذمة تيجي منك انت .. ده انا كنت علقته و فرجت عليه الناس 🤬... امال ايه اللي حصل يا ست الستلت .. بتعيطي ليه ؟ 😁
( و نبتدي منين الحكاية ) على رأي اخويا ( هيثم سليمان ) .. اسمعوا بقى ( القصة الكاملة ) على رأي اخويا ( سامح سند )
🧕: الواد ده يا ضاكتور بقاله يومين بيرجع و بطنه تعباه و مش راضي ياكل .. اخدته الصيدليه قالولي برودة في المعدة و ادوني دوا فيسرالجين و فلاجيل و روحت
👨⚕️: ها .. تمام .. و بعدين
🧕: بعدها بيوم لقيت الواد همدان و تعبان و مش قادر يروح المدرسه و الترجيع زاد
👨⚕️: و لون البول ايه يا ست البنات
🧕: بصتلي شذرا و بلهجة مستنكرة و بتمصمص شفايفها .. و انت اشمعنى بتسال على لون البول يا ضاكتور ؟ 🤨
👨⚕️: يا ست ان راجل مخي تعبان .. و بحب اسال على لون البول .. فيها حاجة دي ؟
🧕: المهم يا ضاكطور انا عاوز اكملك اللي حصل .. لقيتهم بيكلموني في المدرسة و بيقولولي الواد تعبان و بيرجع و وشه اصفر و مش قادر يقف على حيله 🥹
👨⚕️: و لن البول ايه يا ام المحروس ؟ 🤨
🧕: ما تستنى يا ضاكطور ما انا جيالك في الكلام .. رحت بيه الصيدليه تاني .. و الضاكطور في الصيدليه قالي الواد ده عنده انيميا روحي اعمليله تحليل يا ست الكل 🙄
👨⚕️: و لون البول يا ست البنات .. عامل ايه ؟
🧕: رحت المعمل عملت التحليل و جيت جري على هنا و زي ما انت شايف التحليل اهو .. هو التحليل في ايه ضاكطور ؟
👨⚕️: طيب ايه رايك بقى مش هقولك التحليل فيه ايه غير لما اكشف عليه و اعرف عنده ايه و تعملي التحليل دي كمان .. و تقوليلي لون البول ايه 🤨 ... روحي بقى اعملي التحليل ده و ارجعيلي و هقولك التحليل فيه ايه 😎
( بعد التحاليل )
🧕: مش هتقولي بقى التحاليل فيها ايه يا ضاكتور ؟
👨⚕️: ابنك عنده التهاب كبدي أ يا ست الستات
🧕: يا لهوي يا ضاكتور .. و دي حاجة خطيرة يا ضاكتور ؟
👨⚕️: لا يا حجة .. ده فيروس ضعيف جدا و في الاغلب مش بيسيب اي اثر الا في حالات نادرة جدا .. و بيتحسن خلال اسبوعين لاربع اسابيع
🧕: و طبعا في اكل ممنوع عليه ياضاكتور .. صح ؟
👨⚕️: للاسف معظم الامهات و الدكاترة كمان فاهمين كدة 🤨
🧕: امال ياكل ايه يا ضاكتور ؟ 🙄
👨⚕️: بس كدة !.. صلي على النبي كدة في الكومنتات .. و ساعدينا ننشر المعلومة بالشير و هتلاقيني برد عليكي في الكومنتات بالممنوعات و المسموحات في الأكل 😊
