19/10/2025
كلمتين وبس ٤ :
لو في يوم سمعت دكتور او اخصائي او مكان يقولك هات ابنك وانا اضمنلك إنه يبطل اعرف انك قدام نصاب ... لأن الحقيقة الوحيدة إن مفيش حاجة في الإدمان اسمها ضمان ... الإدمان هو مش جهاز بيتصلح ولا دور برد ليه كورس دواء الإدمان هو احيانآ بيبقى مرض معقد بيتعلق بالعقل وبالمخ وبالنفس وبالجسم كله علشان كدة مافيش وصفة واحدة هي ممكن تنجح مع كل الناس .. في تجربة كل طرف لازم يعيشها ويخلقها بنفسه المريض نفسه بيبداء يتعلم إنه يعمل اللي بيتقاله ويبداء يجرب يتكلم عن اللي جواه ويبداء يواجه ويسمع نفسه لأول مرة ومن جوة التجربة دي يبداء يكتشف هو انا قادر ولا لاء ومفيش ضمان إنه يكمل لكن في فرصة حقيقية إنه يتغير لو دخل التجربة صح ... الاهل هنا هما مش مجرد متفرجين هما نفسهم بيعيشوا تجربة بيتعلموا امتى يوقفوا تمكين وامتى يقولوا لاء وامتى يواجهوا خوفهم في الاخر الاهل مش بيدوا ضمان لكن بيبنوا بيئة بتساعد او بتهدم ... الاخصائي او الدكتور او المعالج او المكان هو مش معاه مفتاح سحري هو دوره إنه يوجه ويوضح ويدي ادوات لكن هو مش بيقدر يعيش مكان المريض ولا بدل الاهل العلاج هو رحلة من تلات اطراف كل واحد مسئول عن جزء المخ بيحتاج وقت طويل علشان يبداء يتغير والذاكرة محتفظة بمشهد الجرعة الاولى والمحفزات دايمآ موجودة زي ريحة او مكان او كلمة ممكن تبداء تفتح الباب تاني علشان كدة مفيش حد يقدر يديك ضمان بيبقى موجود فقط احتمالات ممكن تعلى او تقل على حسب اللي بيتعمل جوة التجربة .. كام مرة سمعتوا حد بيقول ابني راح لدكتور او لاخصائي او دخل مكان وبعد ماخرج رجع زي مهو السبب هنا مش إن العلاج فاشل السبب إن مفيش حد عمل دوره كامل وكام مرة اهل افتكروا إن الدفع والفلوس هو العلاج والحقيقة إن العلاج مش فلوس العلاج هو تجربة مشتركة التعافي هو مش ورقة ضمان التعافي تجربة الابن بيخلق تجربته والاهل بيخلقوا تجربتهم والدكتور او الاخصائي او المعالج او المكان بيوفر الادوات للتجربة لكن اي حد يقولك هات ابنك وانا اضمنلك صدقني هو كده بيلعب على خوفك الحقيقة اللي لازم تعرفها إنه مفيش ضمان في بس رحلة ولو كل طرف عمل دوره الرحلة دي تقدر تنجح
