23/11/2025
أوقات بنشوف مريض عنده نزيف واضح… ولما نعمل له تحاليل التجلّط الأساسية PT و PTT نلاقيهم طبيعيين 100%.
وده يخلّي الناس تستغرب: "إزاي بينزف والتحليل طبيعي؟"
السبب إن فيه حاجات التجلّط العادية مش بتكشفها، وأهم 3 أسباب هم:
1) مشكلة في “تثبيت الجلطة” مش في تكوينها
فيه عامل اسمه Factor XIII دوره يربط الجلطة ويثبتها.
لو ناقص… الجلطة بتتكون عادي، عشان كده التحاليل تطلع طبيعية،
لكن الجلطة بتتفك بسرعة والمريض ينزف.
2) الصفايح شغّالة غلط
عدد الصفايح ممكن يكون طبيعي…
لكن وظيفتها نفسها مش شغّالة كويس.
وده يخلي النزيف يحصل من غير ما PT أو PTT يتأثروا، لأن التحاليل دي مش بتقيس “وظيفة الصفايح”.
3) نقص بسيط في عامل اسمه von Willebrand
ده عامل بيساعد الصفايح تمسك في الجرح.
لو فيه نقص بسيط… يحصل نزيف،
وبرضه التحاليل الأساسية تطلع طبيعية.
طب هل ممكن نعرف السبب من التلاتة دول؟
أيوه… ومعظم الوقت نقدر نضيّق دائرة الشك من خلال شوية نقط بسيطة:
لو النزيف بيظهر بعد الجرح بفترة نشك في Factor XIII.
لو فيه كدمات، نزيف لثة، Nosebleed متكرر وعدد الصفايح طبيعي نفكّر في Platelet function.
لو النزيف بيزيد مع العدوى، الإجهاد، الدورة الشهرية نفكّر ف von Willebrand.
وبعد كده بنعمل تحاليل مخصصة تحدد السبب بدقة
