صيدلية د/دينا إسماعيل

12/09/2025

عشان ريحتك تفضل جميلة ومنعشة طول اليوم 🌸
عملنالكوا *Pureva Body Splash* 💥

ريحة منعشة تثبت معاكِ بالساعات 🕛
تركيبة خفيفة على البشرة وبتديكي إحساس بالنظافة والانتعاش 🛀
آمنة ومناسبة للاستخدام اليومي ✨
ألوان وروائح متنوعة تناسب كل شخصية 😍

مفاجأتنا ليكوا🥰💣
قررنا نخلي تجربتك كاملة ومميزة،
فعملنا نفس روائح الديودرنت علشان تستخدميهم مع بعض،فتبقى ريحِتك ثابتة وأقوى طول اليوم! 🔗✨

ولأننا عارفين إن فى كتير مننا بيحب التجديد،
بنقدملكوا كمان روائح جديدة ومختلفة تناسب جميع الاذواق وبتعبر عنكوا فى كل المناسبات♥️
"يرش مباشرة على البشرة وغير مخصص للملابس." 🚫

خلي كل يومك مليان طاقة وحيوية مع pureva body splash ! 🌿
دمتم حلوين ومنتعشين♥️
pureva natural products☘️
Where science creates beauty🔮

07/09/2025

https://www.facebook.com/share/p/177gchhkpF/

🔥 من أكبر مشاكل الصيف اللى ممكن تسببلنا إحراج وتقلل ثقتنا فى نفسنا،
هى العرق !!

ومع إن العرق مهم جداً لصحة جسمنا لانه بيتخلص من السموم بشكل مستمر لكن بتواجهنا مشكله الرائحة المزعجة🫣

✨ وهنا بييجي الحل مع Pureva Deodorant ✨

🌱 مكونات طبيعية 100% يعنى آمن تمامًا على بشرتك

⏳ ثبات 24 ساعة و ريحة منعشة تدوم طول اليوم

💧 جسمك هيفضل يتنفس و يعرق بشكل طبيعي ولكن من غير ما يسبب
أي رائحة كريهة

وده لأنه ببساطة Deodorant مش Antiperspirant ✋🏻
يعني مبيسدش المسام زي معظم المنتجات اللي بتدوم 48 ساعة،
واللي مع الوقت ممكن تسبب مشاكل للبشرة ومضاعفات خطيرة 😔

🪄 *Active ingredient:*

🌱 Beeswax : شمع النحل لحماية البشرة وترطيبها

🥭 Mango Butter :زبدة المانجو لنعومة وانتعاش

🥥 Coconut Butter :زبدة جوز الهند مضاد لالتهابات البشرة

🌰 Sweet Almond Oil :
زيت اللوز الحلو لترطيب وتهدئة البشرة

🌿 Tea Tree Oil : زيت شجرة الشاي لمقاومة البكتيريا المسببة للروائح

🌸 Fragrance Oil : زيوت عطرية طبيعية لريحة منعشة طول اليوم

✨ Starch : النشا لامتصاص الرطوبة الزائدة

دمتم حلوين ومنتعشين♥️
pureva natural products☘️
Where science creates beauty🔮

03/01/2024

مطلوب صيادله للعمل فى صيدلية بمدينة نصر امام نادى السكة شفت صباحى من ٩ ل ٤ عصرا
وسعر الساعة يحدد بعد تحديد الخبرة
للتواصل واتس اب وموبيل 01017299997

22/08/2020

معلومة كدة عل ماشى بتتكرر كتير اوى فى الصيدلية بس مهمة جدا جدا علشان صحتكوا⚠️

◀️بلاش ارجوكوا الباى الكوفان اللى بتاخدوه عمال على بطال للصداع لانه خطر جدا⁦ وهقولكوا ليه؟!⁦✋🏻⁩

⁦◀️⁩ اولا ببساطة كدة الباى الكوفان تركيز القرص الواحد ١٥٠ مجم من الكيتوبروفين ولو خدت قرصين بس فى اليوم كدة يعتبر انت وصلت للجرعة القصوى للدواء اللى بعدها ممكن تدخل فى اعراض جانبية كتيرة احنا فى غنى عنها

⁦◀️⁩ثانياً بقى المادة الفعالة بتاعته تعبتر من اكتر المواد الفعالة اللى ممكن تسبب قرح فى المعدة بجانب انه خطر على الكلى

⁦◀️⁩ثالث جاحة بقى ممكن فى حالة الصداع ناخد اى حاجة مادتها بارسيتامول زى الباندول آمن جدا بس ناخد بالنا ان الجرعة القصوى منه ٤ مجم فى اليوم

⁦
🌸
⁦

22/04/2020

🌸

20/04/2020

طبعاً المرة دى احنا مش محتاجين مقدمة طويلة عن موضوعنا اللى هنتكلم عنه لانه بقى حديث المدينة خلاص🏙️
وهو ال(COVID-19) أو ال(Coronavirus)🚨🚨

انا عارفه ان الموضوع اتهرس كتير بس احنا هنتكلم عن نقط مختلفة جايز بدور فى بال الناس ومحتاجين ليها اجابات غير طرق الوقاية اللى اتهرينا منها زى جملة "خليك فالبيت"😂✋🏻⁩

يلا بينا نبدأ بقى🏃💪🏻

✳️مبدأياً كدة اية هو ال19-COVID؟!

⁦👈🏻⁩بإختصار شديد جداً هو فيروس بيصيب الجهاز التنفسى فى الإنسان وسرعة انتشارة عالية جداً
............................................................................
⁦✳️⁩طب واية هى اعراضه؟!

◀️حرارة ٣٧,٥ أو أعلى
⁦◀️⁩كحه وممكن تكون اى نوع بس غالباً بتكون ناشفة
⁦◀️⁩ضيق تنفس
⁦◀️⁩تعب وارهاق عام

💡والأعراض دى ممكن تظهر بعد يوم ل ١٤ يوم من إصابتك بالفيروس............................................................................
⁦✳️⁩مين الأشخاص اللى بيكونوا أكثر عُرضة للمرض؟؟!

◀️كبار السن (اللى عندهم ٦٥ سنه أو اكثر)
⁦◀️⁩الناس اللى عندها سكر
⁦◀️⁩الناس اللى عندها سمنه
⁦◀️⁩أى شخص عندة امراض صدرية او مشاكل بالكلى او الكبد
⁦◀️⁩الناس اللى عندها مشاكل بالقلب
⁦◀️⁩واكيد بردو الناس اللى مناعتها قليلة سواء بتاخد كيماوى او عندهم امراض بتقلل المناعة
⁦◀️⁩واخيراً طبعاً الطاقم الطبى لانه بيتعامل مع مرضى كتير ودا بيزود فرصة اصابته بالفيروس
⁦.............................................................................
✴️أنا عارفة ان معظمنا حفظ الكلام دا ،،
بس دا كان اساسى نعرفه عن الفيروس ⁦عشان اللى هنقوله فى اللى جاى⁦✋🏻⁩
↩️ندخل بقى على الاسئلة الغير تقليدية ⁦💪🏻⁩

⁦✳️⁩هل الفيروس بيتنقل عن طريق الأكل؟؟!

⁦👈🏻⁩لأ الفيروس مش بينتقل عن طريق الأكل تماماً ودا لأن زى ما قولنا فوق انه مرض بيصيب الجهاز التنفسى يبقى ملوش اى علاقة بالأكل خالص❎
وطرق انتقاله هى من شخص لشخص عن طريق الرذاذ من الشخص المصاب اثناء الكحه او العطس أو الكلام💦😷
او ان رذاذ الشخص المصاب دا يكون متواجد على اى سطح ويقوم الشخص التانى لامس السطح دا وبعدها يلمس فمه أو انفه او عينه ............................................................................
⁦✳️⁩يعنى معنى كدة ان اى سطح ممكن يكون ملوث لحد ما يتم تطهيره؟!🤔
⁦
⁦👈🏻⁩الحقيقة لأ بردو لأن منظمة الصحة العالمية قالت ان الفيروس بيفضل حى على اى سطح:
⁦◀️⁩ بلاستيك وستانليس ستيل لمدة ٣ ايام
⁦◀️⁩نحاس لمدة ٤ ساعات
⁦◀️⁩كرتون لمدة يوم واحد بس

وبعد المدة دى الفيروس بيموت تلقائى⁦⁦⁦⁦☠️⁩............................................................................
⁦✳️⁩طب هل الفيروس منتشر فى الجو حوالينا وممكن يدخل الجهاز التنفسى بتاعنا واحنا بنتنفس عادى؟!

⁦👈🏻⁩الكلام دا غلط لان زى ما قولنا ان الطريقة الوحيدة لانتقاله هى الرذاذ من الشخص المصاب
⁦◀️⁩والرذاذ دى تقيل جداً انه يفضل متعلق فى الجو وهيسقط بسرعة على اى سطح............................................................................
⁦✳️⁩يبقى معنى كدة بقى هل لازم افضل لابس ماسك (قناع الوجة) عمال على بطال؟!
⁦
⁦👈🏻⁩لأ خالص ،لو أنت شخص سليم يبقى مش لازم تفضل لابس الماسك إلا:
◀️⁩لو فى عندك كحة او سعال
⁦◀️⁩او انك تكون بتتعامل مع شخص مصاب بالفيروس

💡و بكدة نقدر نوفر الماسكات للطاقم الطبى لانهم أكتر ناس فعلاً محتاجينه⁦☑️............................................................................
⭐نيجى بقى لجزء السيدات الحوامل واللى بيرضعوا🤰

👶هل السيدات الحوامل أكثر عرضة للإصابة بالفيروس؟!
⁦👈🏻⁩لأ ،مصادر قليلة بتؤكد ان السيدات الحوامل مش اكثر عرضه للإصابة بالفيروس عن السيدات اللى فى نفس سنهم ومش حوامل

👶طب هل الفيروس بيزود مضاعفات الحمل؟!
⁦👈🏻⁩اه للاسف والسيدات الحوامل المصابة بالفيروس ممكن يجلهم تسمم حمل او يضطروا للولادة بدرى عن المعاد

👶هل الفيروس اصلاً ممكن يتنقل من الأم للجنين عن طريق المشيمة؟!
⁦◀️⁩الحقيقة مفيش اى مصادر بتؤكد الكلام دا🤔
⁦◀️⁩وهما بيرجحوا ان الاطفال اللى اتولدت مصابة بالفيروس ممكن يكون الفيروس اتنقلهم اثناء عملية الولادة ومش من الأم

🍼طب هل الفيروس بيتنقل عن طريق لبن الأم أثناء الرضاعة؟!
⁦◀️⁩لحد دلوقتى مش عارفين هل الفيروس ممكن يكون موجود فى لبن الأم ولا لأ
⁦◀️⁩بس تم اختبار لبن الأم ل٦ حالات ووجدوا ان اللبن خالى تماماً من الفيروس✌🏻............................................................................
⭐طيب نيجى بقى للناس اللى بتربى حيوانات😍

🐈هل الحيوانات الأليفة ممكن تنقل الفيروس؟!

⁦👈🏻⁩لا خالص،مفيش اى دليل لحد الآن بيقول انهم ممكن ينقلوا الفيروس وان نوع تانى من الcoronavirus بيصيب الحيوانات ودا مش بينتقل للإنسان

🐕طب هل الفيروس بيعيش فى فرو أو جلد الحيوانات الأليفة؟!
⁦👈🏻⁩لا بردو الفيروس مش بيعيش فى فروهم او على جلدهم بس يستحسن غسل الايدين بماء والصابون بعد ملامستهم

🐈طب هل الحيوانات ممكن تتعدى من إنسان مصاب بالفيروس؟!
⁦👈🏻⁩اه ممكن للأسف تتعدى لو اتعاملت مع الشخص المصاب.............…........….…………................................…....
💊هل ممكن استخدام المضادات الحيوية كعلاج او وقاية من الفيروس؟!
⁦👈🏻⁩لأ طبعاً لأن ببساطة دا فيروس والمضادات الحيوية بتقتل البكتيريا مش الفيروس
💡فبلاش ارجوكوا تاخدوا المضادات الحيوية عمال على بطال❎

💉طب هل فى اى تطعيم يعمل كوقاية من الفيروس؟!
⁦👈🏻⁩بردو لأ للأسف لسة مقدروش يوصلوا لأى تطعيم ضدة😔

💊فى النهاية بقى هل قدروا يتوصلوا لأى دواء لعلاج او الوقاية من الفيروس؟!

⁦👈🏻⁩للأسف لأ ،ملوش لحد دلوقتى اى علاج إطلاقاً😔
ففعلاً مفيش داعى ابداً نسمع لكلام اى حد ونسحب ادوية من السوق يكون فى ناس محتاجاها حقيقى زى دوا ال(بلاكينيل) اللى نقص فجأة وهو ملوش اى فايدة ولا بيقضى على الفيروس⁦✋🏻⁩


🌸

18/04/2020

مساء الخير عليكم جميعاً🌸
انا كنت حابه اوضح نقطة مهمة،
وهى ان الصفحة هنا مش بتعلن عن اى منتج اطلاقاً ولا بنزل عليها اى اعلانات ،،
احنا مجرد بنوضح اية الصح اللى المفروض يتاخد فى المواضيع اللى بنتكلم فيها وبنزل صور الادوية بالاسامى التجارية بتاعتها عشان يكون سهل عليكوا تسألوا عنها⁦❤️⁩

🌸

13/01/2020

⁦👇🏻⁩

وبعد ما اهتمينا بالمرأة فى البوست اللى فات جة الوقت علشان نهتم شوية بالرجُل👨🏻
بس نظراً للوضع الراهن بتاع مجتمعنا فالموضوع دا هيكون توعية للكل ،رجال وسيدات وأسفه انى هقول اطفال كمان😔
⁦
⁦◀️⁩وموضوعنا هو التوعية ضد سرطان الرئة🚨🔊
⁦◀️⁩فعايزين نعرف سوا كدة:
⁦👈🏻⁩اية هى أعراض سرطان الرئة؟!
⁦👈🏻⁩اية هى اسبابة؟!
⁦👈🏻⁩هل ممكن اتجنب بعض اسبابة زى التدخين ولا لأ؟!
⁦👈🏻⁩هل فى علاج بالادوية ولا لأ؟!............................................................................

⁦ℹ️⁩اولاً اية هى أعراض سرطان الرئة؟!

⁦◀️⁩وهنا تيجى بقى المشكلة لأن للاسف أغلب اعراض سرطان الرئة مش بتظهر فى بداية المرض ولكن بتبدأ تظهر لما الحالة تسوء والواحد صحتة تدهور ومن الاعراض دى:
⁦
⁦👈🏻⁩كحة مستمرة وبتسوء تدريجياً
⁦👈🏻⁩من الممكن ان تكون مع الكحة بلغم او دم
⁦👈🏻⁩بحة فى الصوت
⁦👈🏻⁩فقدان الشهية
⁦👈🏻⁩فقدان فى الوزن خارج عن إرادتك
⁦👈🏻⁩ضيق فى النفس
⁦👈🏻⁩إحساس مستمر بالتعب
⁦👈🏻⁩استمرار العدوى بالإلتهاب الرئوى أو إلتهاب الشعب الهوائية
⁦👈🏻⁩وجود صوت تزييق أثناء التنفس (Wheezing)

◀️والأسوأ من كدة ان ممكن سرطان الرئة ينتقل لبقية أجزاء الجسم وساعتها ممكن يحصل😔:
⁦
⁦👈🏻⁩وجع فى العضم
⁦👈🏻⁩تغيرات فى الجهاز العصبى مما يؤدى إلى صداع،تنميل فى الذراع أو الرجل ،عدم الإتزان، تشنجات
(ودا طبعاً لو اتنقل سرطان الرئة للمخ)🚨
⁦
⁦👈🏻⁩اصفرار فى الجلد والعين (اللى هى الصفرة) ودا طبعاً لو سرطان الرئة انتقل للكبد🚨
⁦👈🏻⁩من الممكن حدوث انتفاخات فى الغدد الليمفاوية اللى موجودة فى اماكن كتيرة فى الجسم منها الرقبة...........................................................................

⁦ℹ️⁩ثانياً بقى عايزين نعرف اية هى اسباب المرض دا علشان نشوف هنقدر نتجنبه ولا لأ⁦⁦‼️⁩

⁦◀️⁩تعددت اسبابة الحقيقة بس طبعاً السبب اللى واضح وضوح الشمس وكلنا عارفينه هو التدخين🚬
(علشان كدة قلتلكوا فى الأول ان التوعية هتكون للكل لأن للأسف مصر كلها بقت بتدخن من رجالة لستات لمراهقين واطفال)😔

⁦◀️⁩دا غير مادة الAsbestos دى مادة كدة بتستخدم فى تصنيع العازل الحرارى او العازل الكهربائى والغبار بتاعها بيعمل تغيير فى چينات الخلايا ويحولها من خلايا طبيعية لخلايا سرطانية فهى خطر جداً على الناس اللى شغالة فى اماكن تصنيع المواد دى☠️
⁦
⁦◀️⁩وغاز الرادون (Radon gas) دا غاز بينتج من التحلل الطبيعى لمادة اليورانيوم وممكن تواجدها بنسبة فى الأبنية والبيوت
⁦
⁦◀️⁩والأكيد تلوث الهواء اللى احنا عايشين فية دا بيزود نسبة الإصابة بسرطان الرئة بس هنعمل اية بقى🤷

⁦◀️⁩دا غير ان فى بعض الناس بيكون تركيبهم الچينى بيزود عندهم فرصة الإصابة بالمرض عن غيرهم علشان كدة مش لازم كل المدخنين يصابوا بسرطان الرئة لان الچينات ليها دور كبير فى الموضوع دا
⁦
⁦◀️⁩التدخين السلبى كمان بيزود فرصة الأصابة بالمرض

⁦◀️⁩ووجود بعض الأمراض بالرئة زى مرض الإنسداد الرئوى المزمن (COPD) بيزود فرصة الإصابة بسرطان الرئة

⁦◀️⁩كمان التاريخ الوراثى للعائلة بيلعب دور كبير فى الموضوع دا ،يعنى لو اقارب من الدرجة الأولى زى (أب،أم،أخ،أخت) جالهم المرض فبكدة بيزيد فرصة اصابتك بسرطان الرئة

🚨طبعاً فى أسباب ملناش دخل فيها بس فى أسباب بإيدنا نغيرها علشان نحافظ على نفسنا وصحتنا من كل الهم دا واهمها التدخين زى ما قلنا🚬

👎🏻المؤسف ان فرصة الإصابة بسرطان الرئة بتزيد مع زيادة عدد السجاير اللى انت بتشربها فى يومك فى مجموع السنين اللى انت كنت بتدخن فيها

⁦👍🏻⁩بس الشىء المُفرح بقى إن فرصة الإصابة بسرطان الرئة بتقل مع كل سنة بتعدى عليك وانت مبطل فيها تدخين🚭
لإن الخلايا المدمرة بيتم استبدالها بخلايا طبيعية مع الوقت...........................................................................

⁦ℹ️⁩يبقى ثالثاً بقى نقدر نقول ان احنا ممكن نتجنب بعض الاسباب اللى بتؤدى لسرطان الرئة زى التدخين ☑️
بس عايزين نعرف ازاى بقى 🤔⁉️

🚨 اولاً بقى لو انت او انتى فى البداية خالص وبتفكروا تجربوا حاجة جديدة و تدخلوا فى السكة دى فبلاش عشان صحتكوا اللى اغلى من اى شىء وعشان اكيد فى ناس بتحبكوا ومحتاجاكوا جنبهم فبلاش تفرطوا فى نفسكوا وصحتكوا عشان خاطرهم⁦❤️⁩⁦🙏🏻⁩

🚨ثانياً بقى لو انت او انتى دخلتوا فى سكة التدخين ،،
لسة والله قدامنا وقت نغير من نفسنا ونحسن صحتنا ومش مطلوب منكوا اى حاجة غير بس الإرادة والاقتناع فعلاً ان صحتكوا دى اغلى شىء عندكوا،،

💡لو بجد اقتنعتوا وعايزيين تتغيروا يبقى يلا بينا نكمل البوست سوا ونشوف هنساعد نفسنا بالعلاج ازاى 💪🏻⁩💊
عشان شبعنا كلام تنمية بشرية😌

◀️العلاج الاول لازم نفهم اية دوره معانا⁉️🤔
👈🏻فى عندنا ٧ طرق اساسية للعلاج طبقاً لبروتوكلات الادوية (Guidelines) والمُصرح استخدامها عالمياً بس ٥ طرق فقط هما اللى متاحين عندنا فى مصر
⁦👈🏻⁩الطرق دى هتقلل اعراض الانسحاب اللى الواحد بيحس بيها بعد ما يبطل تدخين باربع ل١٢ ساعة وممكن توصل لمدة يوم او ٣ ايام
⁦👈🏻⁩وكمان هتقلل رغبة الشخص واقبالة بشراهه على التدخين............................................................................

⁦ℹ️⁩رابعاً بقى عايزين نتكلم عن العلاج بالتفصيل شوية💊
⁦◀️⁩احنا كنا قلنا ان ٥ طرق اساسية للعلاج موجودة عندنا فى مصر
⁦◀️⁩اول ٣ طرق دول اسمهم بدائل النيكوتين ( ودى المادة الاساسية اللى بتكون موجودة فى السجاير)🚬

💡ببساطة كدة بدائل النيكوتين دى بتخرج النيكوتين بصورة أبطأ عن السجاير
↩️وبكدة الواحد واحدة واحدة هيبدأ يستغنى عن السجاير⁦💪🏻⁩

💊اول طريقة للعلاج هو اللبان(ودا يعتبر من بدائل النيكوتين):
🚨اسمها NICOTINELL GUM 🚨

◀️طبعاً مش اى لبان ،،دا لبان مخصوص لتبطيل التدخين بيكون فى نسبة نيكوتين زى السجاير بس الفكرة انة بيطلع بصورة ابطأ عن السجاير وبكدة الواحد زى ما قلنا واحدة واحدة هيبدا يستغنى عن النيكوتين تماماً🚭
⁦
⁦◀️⁩فى نوعين منه:
⁦⏺️⁩٢مجم
⁦⏺️⁩٤مجم
⁦
⁦👈🏻⁩الشخص اللى بيدخن ٢٥ سيجارة فى اليوم أو اكتر لازم يستخدم النوع بتاع ال ٤مجم
⁦

⁦👈🏻⁩اما الشخص اللى بيدخن أقل من ٢٥ سيجارة فى اليوم لازم يستخدم النوع بتاع ال ٢ مجم
⁦

⁦◀️⁩قطعة اللبان الواحدة تستخدم كل ساعة او ساعتين فى اول ٦ اسابيع من العلاج
⁦◀️⁩بعد كدة نستخدم قطعة لبان واحدة كل ساعتين او اربعة من اول الاسبوع السابع للاسبوع التاسع من العلاج
⁦◀️⁩وبعدها نستخدم قطعة لبان واحدة كل ٤ او ٦ ساعات من اول الاسبوع العاشر للاسبوع ال ١٢ من العلاج
⁦
⁦✳️⁩يبقى كدة مدة العلاج هتكون حوالى ١٢ اسبوع⁦💪🏻⁩

⁦👈🏻⁩اقصى عدد لقطع اللبان فى اليوم الواحد هو ٢٤ قطعة لبان⁦✋🏻⁩

🚨فى بقى شوية تعليمات لاستخدام لبان النيكوتين وهى:

⁦⏺️⁩لازم نمضع اللبانه ببطء لحد ما نحس بتنميل فى الفم كدة نقوم نركن اللبانه عند الخد كدة لحد ما احساس التنميل دا يروح وبعدين نرجع نمصغها ببطء تانى ونركنها عند الخد لما نحس بالتنميل ونفضل نعمل كدة لحد ما نلاقى احساس التنميل دا مبقاش بييجى خالص
⁦↩️⁩ودا معناة ان النيكوتين فى اللبانه خلص خلاص والمفعول بتاعها انتهى ( وتقريبا بتقعد نص ساعة لحد ما مفعولها ينتهى🕕)

⁦⏺️⁩لازم نركن اللبانة فى حتت مختلفة فى الفم مش نفس المكان كل مرة⁦
❌ممنوع اى اكل او شرب اثناء مضغ اللبانه او قبل مضع اللبانه بربع ساعة

⚠️من اعراضها الجانبية:
⁦👈🏻⁩احساس بمرارة فى الفم
⁦👈🏻⁩عسر هضم
⁦👈🏻⁩ارق
⁦👈🏻⁩وجع بالمعدة

❌ممنوع استخدامها للحوامل
❌ممنوع استخدامها لمرضى القلب...........................................................................

💊تانى طريقة للعلاج هى اقراص الاستحلاب(ودا يعتبر من بدائل النيكوتين):
🚨اسمها NICORETTE LOZENGES 🚨

⁦◀️⁩طبعاً دى مش اى اقراص استحلاب زى بتاعة وجع الحلق،
دى اقراص استحلاب نيكوتين مخصوصة لتبطيل التدخين بيكون فيها نسبة نيكوتين زى السجاير بس الفكرة انها بتطلع بصورة ابطأ عن السجاير وبكدة الواحد زى ما قلنا واحدة واحدة هيبدا يستغنى عن النيكوتين تماماً🚭

⁦◀️⁩فى بردو منها نوعين:
⁦⏺️⁩٢مجم
⁦⏺️⁩٤مجم

⁦👈🏻⁩لو اول سيجارة بتاخدها بعد نص ساعة او اقل من الصحيان يبقى لازم تستخدم ال ٤ مجم

⁦👈🏻⁩اما لو اول سيجارة بتاخدها بعد اكتر من نص ساعة من الصحيان يبقى تستخدم ال ٢ مجم

⁦✳️⁩بردو مدة العلاج هتكون ١٢ اسبوع⁦⁦💪🏻⁩
⁦◀️⁩من الاسبوع الاول للاسبوع السادس: هنستخدم قرص استحلاب واحد كل ساعة او ساعتين

⁦◀️⁩من الاسبوع السابع للاسبوع التاسع :هنستخدم قرص استحلاب واحد كل ساعتين او اربع ساعات

⁦◀️⁩من الاسبوع العاشر لل١٢:هنستخدم قرص استحلاب واحد كل اربع او ٨ ساعات

⁦⁩⁦👈🏻⁩اقصى عدد لاقراص الاستحلاب فى اليوم الواحد هو ٢٠ قرص استحلاب✋🏻⁩

🚨فى بقى شوية تعليمات لاستخدام اقراص استحلاب النيكوتين وهى:
⁦⏺️⁩بياخد حوالى تلت او نص ساعة عشان يدوب فى الفم
⁦⏺️⁩ممكن يعمل احساس تنميل فى الفم
⁦⏺️⁩القرص بيتمص مينفعش نمضغة ولا نبلعه
⁦⏺️⁩نحاول نبدل مكان القرص فى البوء كل شوية
⁦
❌ممنوع اى اكل او شرب اثناء مص القرص او قبل مص القرص بربع ساعة

⚠️من اعراضها الجانبية:
⁦👈🏻⁩كحه
⁦👈🏻⁩حموضة
⁦👈🏻⁩احساس بالقىء
⁦👈🏻⁩ارق
👈🏻صداع

❌ممنوع استخدامه للحوامل
❌ممنوع استخدامه لمرضى القلب............................................................................

💊تالت طريقة للعلاج هى لزقة النيكوتين(ودى تعتبر من بدائل النيكوتين):
🚨اسمها NICOTINELL PATCH🚨
⁦◀️⁩فى منها ٣ انواع:
⁦⏺️⁩٧ مجم
⁦⏺️⁩١٤مجم
⁦⏺️⁩٢١مجم

⁦◀️⁩لو بتدخن اكتر من ١٠ سجاير فى اليوم:
⁦👈🏻⁩يبقى تستخدم ال٢١ مجم لمدة ٤ اسابيع
⁦👈🏻⁩وبعدها تستخدم ال١٤ مجم لمدة اسبوعين او ٤ اسابيع
⁦👈🏻⁩وبعدها تستخدم ال٧ مجم لمدة اسبوعين او ٤ اسابيع

⁦◀️⁩لو بتدخن ١٠ سجاير او اقل فى اليوم:
⁦👈🏻⁩يبقى تستخدم ال١٤ مجم لمدة ٦ اسابيع
⁦👈🏻⁩وبعدها تستخدم ال٧ مجم لمدة اسبوعين

✳️يبقى مدة العلاج كلها هتكون تقريباً من ٨ ل ١٠ اسابيع⁦💪🏻⁩

🚨فى بقى شوية تعليمات لاستخدام لزقة النيكوتين وهى:
⁦👈🏻⁩ممكن اللزقة تفضل حوالى ١٦ ساعة ولو كان فى ارق او قلق أثناء النوم فممكن نشيل اللزقة

⚠️من اعراضها الجانبية:
⁦👈🏻⁩هرش او احمرار او حرقان مكان اللزقة
⁦👈🏻⁩ارق
👈🏻صداع

❌ممنوع استخدامها أثناء الحمل او الرضاعة
❌ممنوع استخدامها لمرضى القلب
❌مممنوع استخدامها للمراهقين ( أقل من ١٨ سنة)...........................................................................

💊رابع طريقة للعلاج هو دواء مادته Bupropion :
🚨واسمه ZYBAN🚨

◀️المادة دى بتقلل اعراض الانسحاب وكمان بتقلل شراهة الشخص للتدخين🚬

⁦◀️⁩الجرعة هتكون:
⁦👈🏻⁩١٥٠ مجم صباحاً لمدة ٣ أيام وبعدها هتزيد الجرعة ل١٥٠ مجم مرتين فى اليوم ويكون الفرق بين الجرعتين على الأقل ٨ ساعات
⁦👈🏻⁩متزدش الجرعة عن ٣٠٠ مجم فى اليوم
⁦👈🏻⁩نبدأ العلاج دا قبل تبطيل السجاير باسبوع او اتنين
⁦
⁦✳️⁩مدة العلاج بتكون من ٧ ل١٢ اسبوع

🚨فى بقى شوية تعليمات لاستخدام الدواء دا وهى:
⁦👈🏻⁩بلاش تكون فى جرعة قبل النوم عشان بيسبب ارق
⁦👈🏻⁩ممكن نستخدمة مع بدائل النيكوتين اللى اتكلمنا عنها فى الأول زى ( لبان النيكوتين أو لزقة النيكوتين أو اقراص استحلاب النيكوتين)

⚠️من اعراضها الجانبية:
⁦👈🏻⁩جفاف الفم
⁦👈🏻⁩ارق
👈🏻إمساك
⁦👈🏻⁩وممكن يحصل تشنجات بس نسبة حدوثها ضئيلة جداً

❌ممنوع استخدامها مع مرضى التليف الكبدى
❌ممنوع استخدامها فى حالة الحمل أو الرضاعة
❌مممنوع استخدامها للمراهقين ( أقل من ١٨ سنة)
❌ممنوع استخدامة مع اى دواء تانى مادتة Bupropion...........................................................................

💊خامس طريقة للعلاج هى ادوية ماده Varenicline:
🚨واسمه CHAMPIX🚨

◀️الجرعة هتكون:
⁦👈🏻⁩من اليوم الاول لليوم التالت: ٠,٥ مجم صباحاً
⁦👈🏻⁩من اليوم الرابع لليوم السابع: ٠,٥ مجم مرتين فى اليوم
⁦👈🏻⁩من الاسبوع التانى للاسبوع ال١٢: ١مجم مرتين فى اليوم

⁦✳️⁩كدة مدة العلاج تقريبا هتكون حوالة ١٢ اسبوع⁦💪🏻⁩
⁦👈🏻⁩ممكن نبدأ العلاج اسبوع قبل تبطيل التدخين

🚨فى بقى شوية تعليمات لاستخدام الدواء دا وهى:
⁦👈🏻⁩يجب اخذ الجرعة بعد الأكل مع شرب كوب ماء
⁦👈🏻⁩يجب وقف الدواء لو حصل تشنجات او اى اضطرابات مزاجية

⚠️من اعراضها الجانبية:
⁦👈🏻⁩احساس قيىء
⁦👈🏻⁩أرق
⁦👈🏻⁩إمساك
⁦👈🏻⁩غثيان

❌ممنوع استخدامها مع مرضى القلب
❌ممنوع استخدامها فى حالة الحمل أو الرضاعة
❌مممنوع استخدامها للمراهقين ( أقل من ١٨ سنة)

⁦✳️⁩وبكدة نبقى خلصنا طرق العلاج لتبطيل التدخين⁦💪🏻⁩

⁦✳️⁩والموضوع فعلاً ابسط مما يمكن بس محتاج نلتزم بالعلاج اللى هيساعدنا نبطل تدخين والاهم من كدة الارادة اللى هتخلينا نتحرك عشان نغير نفسنا ونحافظ على صحتنا🚭⁦💪🏻⁩

💡مستنيين اسئلة واستفسارات حضراتكوا⁦⁉️⁩⁦
ونشوفكوا الموضوع الجاى💕

😂⁦✌🏻⁩
🌸
⁦❤️⁩