22/06/2023
,, وَلَن يُؤَخِّرَ اللَّهُ نَفْسًا إِذَا جَاءَ أَجَلُهَا ۚ وَاللَّهُ خَبِيرٌ بِمَا تَعْمَلُونَ،،
النهاردة جت مريضة ٧٠ سنة اول ما وصلت حصل توقف مفاجئ في عضلة القلب فاشتغلنا انعاش قلبي رئوي علطول اكتر من نص ساعة ولكن مفيش اي استجابة من المريضة فحطيتها علي جهاز التنفس الصناعي وقلت هخليها ساعتين عليه وطبعا انا سامع اهلها برة بيعيطوا و كان وضعهم صعب جدا فطلعت اقولهم اللي حصل وامهدلهم الوضع لان كدا بالنسبة لي خلاص مفيش امل فطلعت لقيت ولادها كلهم بيعيطوا ومنهارين فبدات اقولهم القلب توقف وعملنا انعاش قلبي بس الوضع صعب ففيه ابن من ابنائها وكان متاثر جدا ووضعه صعب جدا و اصر يدخل عندها فدخلته ودخلت معاه
ودخل حضنها وهو منهار وبيقولها متسيبينيش يا اما وردي عليا متسيبيناش لوحدنا فا انا بشده وبطلعه وبقوله خليك مؤمن بربنا وبقضاؤه، فوجئت بحاجة غريبة جدا علي المونيتور ضربات القلب ظهرت تاني وكنا وقفنا شغل لمدة دقيقة تقريبا فطلعته وبحس النبض لقيته محسوس فعلا فشوفنا الضغط وطبعا كان قليل جدا فحطينا مدعم للدورة الدموية وبدا الضغط يعلى و الحالة استقرت اكتر طبعا هي لسه مش فايفة بس دي كانت معجزة بكل المقاييس فسبحان الله كل شيء يجري بأمر الله وما نحن إلا أدوات يستخدمها ليمتحن قلوب الناس ونسال الله ان يتم شفائها ويعين ابنائها
