مؤسسة نماء للطب البيطري والأعلاف - د/ أحمد مجاهد

07/11/2023

15/03/2022

5 جرام شيح علي كيلو العلف بيعالج الكوكسيديا وممكن نستعمله كوقايه من عمر ١٠ ايام بس مش يوميا ✌️🐥
. علق بتم واعمل لايك عشان يوصلك كل حاجه جديدة بننزلها وكمان توصل المعلومه لغيرك ويستفاد بيها 📢👨‍🌾👨‍🌾

19/02/2022

مطلوب انسه للعمل في مؤسسه نماء تجيد القراءه والكتابه ومتفرغه
للتواصل
01091553390

12/02/2022

⏪{ #معلومات تفيد مربى ألدواجن}



يجماعه الخير علشان الهبد الكتير
⬅️الحمام الاحمر او الابيض الجيري كوكسيديا وده بيكون من وساخه الفرشه والسقايه والعلافه وده علاجه (كوكسي كيور +امبرول + اموكسي يشتغل للكولسترديا )
⬅️الحمام الابيض السايب سالمونيلا وده علاجه بان (فلور او فلوريكول)
⬅️الحمام البني لون الطحينه او اصفر او اسمر كولسترديا وديه بتيجي من نسبه السموم ال في العلف وعلاجه (كولستين مع امبيسلين سقوه وسقوه مضاد سموم )
⬅️الحمام الاخضر ده برد وسببه تلاعب في درجه الحراره وعلاجه( تيدوفيت او دوكسي مع اريثروماسين سقوه وسقوه موسع شعب)
⬅️العين الموجوعه او بتدمع اوومقفوله دي نتيجه سوء تهويه سعتها تظبط التهويه فتح شبابيك وكتر لند تظبط درجه الحراره وحط (تيدوفيت سقوه وموسع شعب سقوه )
⬅️مش كل الكساح نقص فيتامينات ممكن يكون من التعب ال عنده اول حاجه تشوفها في حمام في الارضيه ولالا في حمام من لونه تعرف عنده ايه مافيش حمام ننزل باملاح نركز لو مفيش اسهال ننزل (بالاملاح وفيتامينات )
⬅️الكمشان بدون اسهال (اموكسي مع امبيسلين)
⬅️لمه الفراخ تحت ال لمبه يبقي المكان (برد)
⬅️لمه الفراخ بعيد عن ال لمبه يبقي المكان(حر )
⬅️درجه الحراره عاليه في الصيف ارفع العلف في فتره الشمس وحط في المياه ڤيتامين سي
⬅️مينفعش نحط ڤيتامينات او عسل اوخميره او اي خلطه لزياده وزن طول مافي اسهال
⬅️تحصين الكتاكيت عمر اليوم
اول يوم محلول جفاف
⬅️تاني يوم لخامس يوم مضاد حيوي معوي وتنفسي
⬅️سادس يوم راحه من سابع يوم ل تاسع يوم فيتامينات املاح ح اد ه سلينيوم فيتامين ك
⬅️عاشر يوم راحه او غسيل
من ال ١١ ل ١٣ تحصين كوكسيديا صباحا وجرعه سموم بليل او خل
الفرخ بياكل كيلو ناعم وباقي الدوره خشن
⬅️وقت تغير العلف نخلط شويه ناعم علي شويه خشن علشان الفراخ متاخدش صدمه العلف وتحط جرعه مضادا سموم
ديه تقريبا معظم الامراض ال بتيجي للناس وبالاخص الاهالي غير كده هبد..

⬅️علق بتم واعمل لايك عشان يوصلك كل حاجه جديدة بننزلها وكمان توصل المعلومه لغيرك ويستفاد بيها👍👍
ووضع

10/02/2022

كام معلومه كدا علي الماشي
استقبال الكتاكيت

👈 مفيش حاجه اسمها مايه بسكر في اول ٨ ساعات استقبال دي سقوة ملهاش اي لازمه لان الغدة متكونتش طيب احط ايه
حط
كيس محلول جفاف بشري لكل ٢ لتر مايه
و ٥سم عسل اسمر لكل لتر مايه

👈في التحضين متزودش عند ٣٥ فرخ للمتر مربع واول يوم متحرمش الفراخ من انك تخلي كل مساحة الحضان علف اول يوم بس افرد اطباق تحضين علي قد ماتقدر ده هيفرق جااامد في عدم ظهور السرده وتفاوت في الاحجام وسيبك من اللي بيقولك لكل ٥٠ كتكوت طبق تحضين ده كلام بيعمل تفاوت اوزان للفراخ وسرده كتير افرد علفك علي قد ماتقدر بس متكترش علف وزوده كل ساعتين الاطباق
وخليها شكل هرمي في نص الطبق ده هيقلل الهادر

👈المضاد الحيوي اللي البيطري بيديه ليك نزله اليوم التالت او الرابع طول مالفرخ ماشي كويس وبياكل وحيوي وبيحول لان في حاجه اسمها مناعه اميه الفرخ لما ياخد مضاد حيوي بدري اوي كدا مش بيكتسب مناعه اميه عاليه ودي طبعا بتفرق في مناعة الفرخ طول الدوره هو بيديك المضاد عشان لو الفرخ فيها امراض اميه او من المعمل فانت تحط المضاد فالفرخ ميظهرش عليه الامراض دي الا متاخر يعني لما تنزل مضاد بدري او اول يوم فانت بتداري خيبة صاحب الكتاكيت دي لو مريضه
الصح
اشتغل فيتامينات ذي
ه سلنيوم وأد٣ه
ب ك واملاح معدنيه
بروبيوتك (بكتريا نافعه ) منتج محترم

اليوم الرابع حط سقوة المضاد لمدة ٤ ايام
طيب لو ظهر امراض من تاني او اول يوم تكلم صاحبهم ييجي يشيلهم لانهم هيتعبوك انت والعمر الكبير ممكن يروحو منك

👈 وقلة الاكسجين بتنشط الكولسترديا وتعمل اسهال اصفر وترطب اافرشه فطول مانت مكتم وعندك الفرشه رطبه وبتعالج كولسترديا مش هتستفاد من العلاج والفراخ هترجع اسوء مجرد ماتوقف علاجك
اظبط تهويه فرشه اكسجين وبعدين عالج

👈 الناس اللي بتاكل ١ كيلو بادي انت كدا بتعمل حمل عالي علي الكلي ملوش اي لازمه ومش هتستفاد علي قد ماهتضر الفرخ اكل ٥٠٠ : ٦٠٠ جرام بادي وبعدين ٥٠٠ نامي مفتت وانقل نامي محبب
وانت بتغير العلف من بادي لنامي متغيرش فجأه لان ده هينشط معاك الكولسترديا ويعمل حاجه اسمها فوضي بكتيريه بسبب التغير المفجأ
الصح
اول يوم نخلط تلتين بادي علي تلت نامي
تاني يوم نص بادي ونص نامي
تالت يوم تلتين نامي وتلت بادي
وبعد كدا اكل نامي صافي
كدا انت ضمن امعاء وتغيير صح جدااااا من غير مشاكل معويه بامر الله
👈 لما تتصاب بكلوسترديا وكوكسيديا دوره لازم بعد ماتغسل المكان تجيب صودا كاويه وترشها علي الارضيه وتحط دي خطوه من خطوات التطهير ودي نقطه مهمه جدا وللاسف الاغلب بيطهر بكلور ويغسل وتلاقي مظبط تهويه وفرشه ويلاقي عنده كولسترديا وكوكسيديا من بدري وده نتيجة التطهير الغلط من البدايه

👈 الخل مجرد محمض مش مضاد سموم وفي فرق كبير بين مضاد السموم اللي بينضف الكبد ويعيد نشاطه وترميم الخلايا ويزيح اي سموم متراكمه ممكن تعمل عرج او تقلل التحويل او تموت الفراخ عمر كبير
وبين الخل اللي هو بس بيحمض الامعاء لمنع انتشار البكتريا الضاره وكمان مش بيقتلها بس بيمنع انتشارها
يبقا حضرتكم لو عندك سموم سيبك من الخل خاااالص والحق فراخك واشتري مضاد سموم بيطري محترم عشان السموم بتضعف الفرخ وتقلل الوزن والتحويل

ان شاء الله نكمل ونحاول نفيد الناس

09/02/2022

✴️ ظاهرة 🐥🐥🐥

⬅️ كتير من الناس بيسأل ويقول جبت كتاكيت بس كلهم متجمعين على بعض ومش بيتحركوا 😧😲
⬅️ احب اعرفكم ان الظاهره دي ليها #سببين يا إما ( بردانين ❄️ او حرانين☀️)

✳️طيب نعرف إزااااااااي ؟! 🤔🤔
⬅️ شوف يا سيدي لو #بردانين🥶 هيتجمعوا #لأقرب مكان فيه دفى والغالب تحت اللمبة أو جنب الدفاية
⬅️ أما لو #حرانين🥵 هيتجمعوا بردو بس في #ابعد مكان عن اللمبه او الدفاية

✳️طيب ايه #أضرار التجمع ده؟! 😥😞
⬅️ أولا : وبالبلدي كده هيفتصوا بعض لأن التجمع ده بيخلي الضعيف منهم بيتخنق
⬅️ ثانياً : بيتسبب في أنهم يعرقوا ودي مش حاجه كويسة
⬅️ ثالثاً : مش هيروحوا لا لاكل ولا لمياه

✳️طيب #أحل الموضوع ده ازاي؟ 😲😞
طبعاً اغلبنا بنجيب كام #كتكوت على ادنا ومش عندنا امكانيات (الدفايات وترمومترات) او عنبر مجهز لضبط درجة الحرارة بسهولة #لكن الموضوع ببساطة عاوز شويه تعب منك لحد ما تضبط درجه الحرارة المناسبة بشوية خطوات بسيطة وهي كالآتي : 👇👇
⬅️ الأغلب مننا بيستخدم التدفئة ب فهنستخدم لمبة ( 200 وات في #الشتاء لكل ٢٥ كتكوت)
و ( 60 وات في #الحر الشديد)
⬅️ لازم تكون اللمبة في #منتصف المكان ، ولو مكان واسع ممكن نستعمل #لمبتين وهكذا
⬅️ بنحاول #نرفع اللمبه شويه أو #ننزلها شويه وده ع حسب احنا ف (الصيف 🌞 ولا ف الشتا 🌧️) لمدة نصف ساعة تقريباً وهكذا لحد ما تلاقي كتاكيتك انتشروا وبدأوا ياكلوا ويشربوا ويلعبوا
⬅️وهنا تعرف أن درجه الحراره اتظبطت 🌡️👌
👈عزيزى المربى 🐣إذا وصلك المنشور برجاء اخبارنا بلايك وكومنت ليصلك كل جديد 👍

08/02/2022

- فوائد الخميرة في تربية الدواجن البيضاء ✨🥄
- تستخدم كمنشط للنمو الطبيعي
- الخميرة غنيه بالحديد بالإضافة إلى العديد من الفيتامينات العضويه
- تحتوي على المعادن والبروتين والاحماض الامينيه والفسفور والكروميوم والزنك والبوتاسيوم وحامض النكليك وهو يمد الدجاج الابيض بالكثير من عناصر الغذاء لنمو افضل
- الخميرة لها فوائد هامه في بناء الجهاز الهضمي خاصه بعد الاسهالات أو السموم
- الخميرة لها فوائد مناعيه وذلك لأن ٧٥٪ من الخلايا المناعية للدواجن موجودة في الأمعاء ووجود الخميرة بيحافظ علي الخلايا المناعية ويقويها
- الخميرة لها دور وقائى لأنها بتحفز نمو بكتريا اللاكتيك اسيد فبتعمل وسط حمضي في الأمعاء وهذا يمنع نمو البكتيريا المعوية زي الاي كولاي والسالمونيلا كما أن وجود البكتيريا النافعة بيشغل مستقبلات الجهاز الهضمي وبالتالي بيمنع البكتيريا الضارة.
طريقه استخدام الخميره للفراخ البيضاء 🐔
- 🥄معلقه كبيره علي ٣ كيلو علف
او -🥄 معلقه صغيره علي ٦ لتر ماء
يفضل استخدامها في العليقه
وعند استعمالها في الماء احذر أن تتركها أكثر من نصف ساعه لأنها تختمر ومن الممكن أن تضر الدواجن بدلا من أن تنفعهم ...
اوقات الاستخدام ✨
- عند اضافه الخميره علي العلف كل يوم ويوم .
- عند اضافه الخميره علي الماء كل يومين.

تحذيرات 📌📌📌📌📌
- التزم بالجرعات المحدده ولا تكثر من وضع الخميره للدواجن لأنها قد تؤدي لانتفاخات ومشاكل أخري .
- عدم وضع الخميره مع المضادات الحيويه أو اي علاجات أخري .
- عدم وضع الخميره في الماء أكثر من نصف ساعه في المره الواحده
- نبدا في وضع الخميره بعد عمر ٢٠ يوم .

07/02/2022

⬅️ما هي الأسباب التي تؤدي إلى أن تأكل الدجاجات بيضها ؟
⬅️وما طرق للتخلص من تلك الظاهرة ؟
(الأسباب ):
· عدم وجود أعشاش بيض كافية.
· عندما تكون قشرة البيضة ضعيفة ورفيعة.
· ترك البيض دون جمع لفترات طويلة.
· عدم توفر مياه الشرب ربما يكون ذلك دافعاً للدجاجات لأكل البيض للحصول على كميات أكبر من السوائل.
-نقص بعض العناصر الأساسية مثل :الكالسيوم و فيتامينات B12

الوقاية والعلاج :
· توفير عش بالأبعاد القياسية لكل 4 دجاجات.
· تقديم العلف الجيد المتزن.
· يجب وضع فرشة من الخامات اللينة بعش البيض بحيث يتوفر المكان المناسب لوضع البيض.
· يجب المحافظة على القطيع خالياً من الطفيليات الخارجية والداخلية.
· يجب فرز الدجاجات غير البياضة.
· يجب جمع البيض بانتظام مرتين إلى ثلاث مرات يومياً حيث أنه كلما زاد الوقت يمكث فيه البيض بالعش كلما زاد من احتمال كسره وبالتالي استهلاكه (الأكل).
-اضافة العناصر الأساسية الكالسيوم خلال فترة انتاج البيض و الفيتامينات
· يجب توفير المياه النظيفة الكافية حيث أن الدجاجات تحتاج إلى كميات كبيرة من الماء أكثر من الطيور الأخرى غير البياضة
👈عزيزى المربى 🐣إذا وصلك المنشور برجاء اخبارنا بلايك وكومنت ليصلك كل جديد

05/02/2022

ــ علي حسب العدد اللي عندك انا هتكلم علي 100 كتكوت/فرخه
هتجيب كيلو بصل ناشف
ونص كيلو ثوم
ونص كيلو ليمون
هتقشر البصل والثوم وتقطع اللمون بقشره

وتحطهم في الخلاط وتحط عليهم (خل )مقدار يخلي الخلاط يشتغل فقط ركز بقول خل مش مايه

ولما تضربهم مع ببعض هتصفي المايه منهم بماصفه او طرحه

المايه هتحطها في ازازه وتحطها في الثلاجه وهتاخد منها 8 سم لكل لتر

مش تقعد ففي الثلاجه اكثر من 3 ايام
والتفل بتاع الخلطه دي
هتحط عليه معلقه حبه البركه مطحونه و معلقه كركوم ومعلقه حلبه مطحونه

وتحط التفل دا علي 5 كيلو علف وتقلب كويس
وتحطهم للفراخ علي #جوعه عشان يخلصوا في ساعتين زمن
دي خلطه البصل
للوزن ـ مضاد حيوي ـ مطهر معوي ـ فاتح شهيه ـ مضاد سموم ـ قاتل للبكتريا
👈عزيزى المربى 🐣إذا وصلك المنشور برجاء اخبارنا بلايك وكومنت ليصلك كل جديد 👍

04/02/2022

¶ اربى ابيض ولا ساسو ولا بلدى وايه الفرق ؟؟🤔

لكل اللي محتار يربي اي نوع من الطيور ومش عارف مميزات كل نوع منهم .. وايه الفرق بينهم ...وكل نوع بيكبر في وقت قد ايه وبياكل كام كيلو علف ...
نبدا باسم الله .
👈 هنيجي علي أول نوع وهو الفراخ البيضاء واللي هي معظم بلاد العالم بتربيها ويعتبر هو الطائر الاقتصادي رقم واحد في العالم لسرعه نموه ..
طب بياكل قد ايه علف ..الفرخ الابيض بياكل من 3.25 الي 3.5 علف عشان يحول 2 كيلو لحم .. في مده 37 يوم تقريبا .. وطبعا الفرخ الابيض ده فيه انواع كتيرة زي الهابرد والكب والروص والافيان والاربو والاي ار ...
طب وانهي نوع ينفع في الشتا وانهي نوع ينفع في الصيف ...بصو يا جماعه باختصار عشان ما تدخلوش في تفاصيل طبيه معقده في التفريق بين الأنواع دي ..
اعرفو ان احسن فرخ في الشتا ده هو نوع اسمه كب ايوة هو زي ما قريتو كده كب الفرخ ده بيكبر بسرعه جدا في الشتا وبيرمي وزن في اقل من 37يوم لو اتدفي كويس ..
طب و في الصيف نربي انهي نوع ..هنربي حاجه اسمه روص ..فرخ حجمه كبير وبيستحمل حراره الصيف كويس جدا ....
كده بقي احنا اخدنا نبذه كويسه عن الابيض ..
ندخل بقي علي النوع الثاني وهو الفرخ الساسو ..
👈 الفرخ الساسو ده فرخ ملون لونه مائل للاحمر والبني .طعمه افضل من طعم الفرخ الابيض مقرب من طعم البلدي ...
طيب بياكل علف قد ايه .. بياكل 4.5كيلو عشان يحول 1.8كيلو لحم في خلال من 55الي 60يوم ... حلو كده وبيستحمل شويه الأمراض عن الابيض لان مناعته اعلي من الابيض ...
👈 نيجي بقي للنوع التالت ونتكلم علي الفراخ الهجين وهي هجين بين الساسو والبلدي ودي بتاكل زي الساسو 4.5علف وبتجيب نفس الوزن بس في خلال 70يوم بس طعمها احلي كمان من الساسو ومناعتها اقوي والوانها اكتر بيدخل فيها الرمادي كمان مع الاحمر والبني والازرق والأصفر وهكذا ...
👈 نيجي بقي لرابع نوع معانا وهو الفراخ البلدي بتاعنا اللي اخر جيل اتربى عليها
بصو يا جماعه فيه فراخ بلدي عاديه اللي بيسموها فراخ بلدي حر أو مشعر ودي بيكون داخل عليها سنه تهجين بسيطه جدا عشان كده سموها مشعر ودي بتجيب وزن حوالي 1.4كيلو في خلال 90يوم ومناعتها طبعا قويه وطعم لحمها لذيذ جدا ولو الفرخه طولت عندكم لحد 5شهور هتبيض بس طبعا البيض مش هيكون كتير قوي يعني ممكن الفرخه الواحده تجيب لها في السنه 150بيضه ....حد هيسالني مفيش فراخ بلدي متخصصه للبيض هقوله فيه طبعا ..
فيه الفيومي والروزي والجميزي كل الانواع دي متخصصه لانتاج البيض وبتجيب بيض كتير جدا بيوصل ان الفرخه ممكن تجيب من 200الي 220بيضه في السنه ...
طبعا انتو توهتو مني ..وعشان الخصلكم البوست ده هنختصره في كلمتين ...
لو مستعجل وعاوز تربي بسرعه وتملي تلاجتك ربي فراخ بيضه أو ساسو ..
لو صاحب مزاج وبتحب الطعم البلدي ومش بتحب الفراخ البيضه ربي فراخ بلدي أو هجين
لو عاوز فراخ بلدي تبيض وتجيبلك انتاج كويس ومتخصصه للبيض وتستحمل هات فيومي أو جميزي أو روزي ...
👈عزيزى المربى 🐣إذا وصلك المنشور برجاء اخبارنا بلايك وكومنت ليصلك كل جديد 👍

03/02/2022

#معلومات للمبتدئين في التربية

١- المتر المربع في التحضين بياخد ٤٠ كتكوت وكل اسبوع ينزل ١٠ كتاكيت الي عمر ٢٠ او ٢١ المتر المربع ياخد ١٠ كتاكيت في الشتاء
اما في الصيف المتر بياخد من ٣٠ الي ٤٠ وكل اسبوع ينزل ١٠ كتاكيت الي عمر ٢٠ يكون في المتر ٧ او ٨

٢- لكل من ٣٠ الي ٤٠ كتكوت طبق تحضين وعلي ٨ ايام تبتدي تنزل بالعلفات لمدة يومين او تلاتة

٣- لكل من ٥٠ الي ٧٠ كتكوت سقاية صغيرة ومع العمر تنزل بالسقايات الكبيرة والسقاية الكبيرة تكفي ٢٠ الي ٣٠ طائر

٤- الفرشة تحت الكتاكيت اما تبن او نشارة
بتكون من ٧ الي ١٠ سم شتاء و٥ سم صيف

٥- درجة الحرارة المطلوبة بتكون من ٣٣ الي ٣٤ حسب نوع الكتكوت وكل اسبوع تنزل درجتين الي ان تثبت ٢٥ الي اخر الدورة

* الكب درجة الحرارة استقبال ٣٣
* الروص درجة الحرارة استقبال ٣٤

٦ - الاستقبال بيكون علي محلول معالجة جفاف ٢ جرام للتر لمدة من ٨ إلى ١٢ ساعة

٧ - لو هتحضن على دواء مضاد حيوي
أفضل تحضين بيكون ١٢ ساعة دواء مضاد حيوي و١٢ ساعة منشط كبد اربع ايام

٨- افضل أدوية تحضين .. تايلوزين مع كولستين
ارثرو مع فليمكوين
سيبرو مع كولستين
دوكسي مع تايلوزين في حالة وجود برد

٩- الفيتامينات للطائر شيء مهم للحصول علي كتكوت جيد والفينامينات هي اد٣ه ه سيلينيوم فيتامين سي

١٠ - الطائر كائن حي مثل الإنسان بيتأثر بجميع الأحوال الخارجية فيجب أن تهيء الظروف له ولتحصل وقتها علي اعلي نسبة تحويل وفرحة ممتازة. 👌
علق بتم ولايك ومشاركة عندك لغيرك يستفاد
لا تنسونا من صالح دعائكم

تابعونا ع البيدج لتصلك أخبار وأسعار الطيور يوميا

02/02/2022

السلام عليكم ورحمه الله وبركاته
ان شاء الله متوافر لدينا جميع انواع الكتاكيت فرز اول
⬅️كتاكيت بيضه🐣
⬅️كتاكيت ساسو 🐥
كتاكيت بلدي مشعر 🐓
⬅️كتاكيت جميزه🐥
⬅️كتاكيت هجين 🐥
اللي عايز يحجز معايا