25/08/2025
من حوالي سنة دخل عليّ العيادة زوج وزوجته ومعاهم ابنه اللي في بداية سن الشباب 👨👩👦
وقالولي: "إحنا كنا متابعين مع دكتور عماد خطاب – الله يرحمه" 🤲
وما بين كل جملة والتانية دعوات صادقة ليه من قلبهم ❤️.
سألتهم: "هو دكتور عماد عمله عملية إيه؟"
قالولي: "لا.. هو ما عملش عملية.
ابننا كان في حادثة، وكل اللي شافوه قالوا لازم عملية وإلا هيموت 💔.
لكن دكتور عماد قال: لا.. ما يعملش.
والحمد لله زي ما حضرتك شايفه.. عايش وزي الفل ورجع مدرسته وكله تمام 🙏✨".
وقتها افتكرت كلمة قالهالي دكتور عماد – رحمه الله – في لحظة صفا من خبرته:
"إوعي تفتكر إن العيان اللي هيفتكرك هو بس اللي عملتله عملية..
إحنا كجراحين فاكرين كده، لكن ممكن تلاقي عيان بيدعيلك ليل ونهار لمجرد إنك طمنته وفهمته حالته ومشي مع العلاج" 🌿.
والحاجة قوت – الله يرحمها 🤍 – كانت مثال حي للكلام ده.
كنت دايمًا مستغرب ليه بتحبني كده وبتدعيلي بدعوات مخلصة 🙏، مع إني ما عملتلهاش عملية.
أول مرة جاتلي كانت منهارة.. كل الناس قالولها: "لازم عملية في الفقرات وإلا هتتشلي" 😔.
الأشعات كانت فعلًا محتاجة عملية، لكن تحاليلها ما تسمحش.. الالتهابات كانت شديدة جدًا، ولو عملنا عملية كانت هتتضر أكتر.
فهمتها حالتها ومشينا بالعلاج التحفظي، والحمد لله اتحسنت 🌸.
اللي متابعني من سنتين تلاتة هيعرف الحاجة قوت..
لأنها ما كانش يفوتها أي بوست من غير تعليق فيه حب صادق ودعوات من القلب 💌.
أنا شخصيًا كنت بستغرب عِفّتها وطيبة نفسها..
كانت بترفض تمامًا إنها ترجع الكشف، ونقعد نتخانق كل مرة ومافيش فايدة 😅.
النهاردة ظهرلي بوست كنت كاتبه من ٣ سنين، ولقيت تعليقها عليه..
فقلت أفضفض معاكم بالكلمتين دول 🖤
يمكن حد فيكم يدعي لدكتور عماد وللحاجة قوت دعوة بظهر الغيب 🌹.
اللهم اغفر لهم وارحمهم، واجعلهم من أهل الجنة 🕊️،
وارزقنا وإياهم حسن الخاتمة، واجمعنا بيهم على خير.. غير فاتنين ولا مفتونين 🤲.
