23/11/2025
حفظ اللبن
تخزين لبن الأم بطريقة صحيحة
أيوه… لبن الأم يتخزن مش يترمي!
عارفة إن المعلومة دي ممكن تكون جديدة أو غريبة للبعض 😅
بس تعالوا نشوف إزاي نحافظ على لبن الأم من غير ما يفقد فوائده.
🧩 القاعدة الأولى: “اللي دخل الأول يطلع الأول”
يعني اللبن الأقدم هو اللي نستخدمه قبل اللبن الجديد.
علشان كده وإنتي بترصّي اللبن في التلاجة أو الفريزر، خدي بالك إن القديم يكون قدام والجديد وراه.
🗓️ القاعدة الثانية: اكتبي التاريخ
كل عبوة أو كيس لبن لازم يتكتب عليه تاريخ الضخ.
ما تعتمديش على الذاكرة اللي بقت زي ذاكرة السمكة 🐠 🤭
كده هتعرفي بسهولة أي لبن تستخدمينه الأول.
🧊 القاعدة الثالثة: التلاجة قبل الفريزر
التخزين في التلاجة أفضل لو اللبن هيستخدم خلال ٤–٦ أيام.
لكن لو محتاجة تخزين أطول، من الأول حطيه في الفريزر.
🚫 القاعدة الرابعة: ممنوع الميكرويف
تسخين لبن الأم في الميكرويف ممنوع تمامًا لأنه بيكسر المكونات المفيدة ويغير تركيب اللبن.
🔁 القاعدة الخامسة: “اللي اتسخن مايرجعش”
أي كمية لبن اتسخنت لازم تتاخد خلال ساعتين بالكتير.
ماينفعش ترجعيها التلاجة تاني، ومينفعش اللبن اللي فك تجمده تاني.
🧺 نحفظ اللبن في إيه؟
يفضّل استخدام أكياس أو أكواب حفظ لبن الأم المخصصة (موجودة في مواقع التسوق وجروبات الماميز 🥰).
ولو مش متوفرة، ممكن استخدام علب بلاستيك صحية أو برطمانات زجاجية نظيفة.
💡 لو هتحطي في الفريزر، سيبي حوالي تلت الوعاء فاضي لأن السوائل بتتمدّد لما تتجمد.
📦 أماكن التخزين:
في التلاجة: أول رف تحت الفريزر مباشرة (في الضهر)، من ٤ إلى ٦ أيام.
❌ مش في الباب
❌ ومش جنب الأكل
في الفريزر العادي: من ٦ إلى ٨ شهور.
في الديب فريزر: ممكن يقعد لحد سنة كاملة. 💪
لو عندك أي سؤال عن تخزين أو استخدام لبن الأم، اكتبيه في الكومنتات وإن شاء الله أرد عليك 🌸
