10/08/2024
حضرة المريض، بعد التحية
دعني أفشي لك بعض الأسرار الجراحية:
- مفيش حاجة اسمها تقفيل جرح لحام ولا ليزر؛ بيشتغلوك ... وانت حابب ده.
- لا يوجد دائما علاقة بين شكل الجرح من بره وبين اللي حصل جوة ... المظاهر عادة ما تخدع.
- أخذ العينة من الأورام -كقاعدة- لا ينشر الورم ... لكل قاعدة شواذ كما تعلم.
- مفيش حاجة اسمها جراح العيلة؛ أو جراح بيعمل كل حاجة ... اسمها تخصصات.
- منع الطعام عن طريق الفم وتركيب أنبوبة أنفية عادة ما يكون علاجا وليس أحد وسائل التعذيب.
- المريض حين يصل إلى غرفة إقامته عادة ما بيكون فضل فترة في الإفاقة ودكتور التخدير والجراحة بصوا عليه ... بلاش فقرة "بقاله ساعة طالع من العمليات وماحدش بص عليه"
- "ولا خد إزازة محلول" ... مش لازم محلول، والمحلول في حد ذاته مش علاج إلا في حالات معينة.
- في علاج اسمه "علاج تحفظي" اللي هو المريض بيفضل كده على محاليل وأدوية دون تدخل جراحي فعلي ... وبيجيب نتايج كويسة للحالات اللي محتاجاه
- مجرد منظر المريض وهو بيفوق من البنج و توجعه بعد العملية بيأثر في المرافق جدا وبيفضل متوتر ... حقه ... إنما ما توترش اللي حواليك وتتعصب -لو سمحت-.
- مش كل جراح كبير شاطر ومش كل جراح صغير مش كويس ... والعكس برضه مش دايما صحيح
- افتكر دي كويس؛ مش كل المستشفيات الحكومية مش كويسة، ومش كل المستشفيات الخاصة كويسة .... وكتير ناس اتنصب عليها حرفيا وخرجت مبسوطة وسعيدة، وناس اتعمل لها اللازم وفوقه شوية زيادة وخرجت تشتم في المستشفى وتلعن إهمال الأطباء
- الدكتور اللي في المستشفى الحكومي المحترم اللي أجل لك العملية عشان عينة أو فحوصات انت محتاجها كتير بيبقى عنده حق ... ولو لغاها خالص على عكس ما اللي بره قال لك فغالبا هو أنقذك من حاجة ما كنتش محتاجها
- العلم فيه وجهات نظر ...ممكن نفس المريض ينفع له جراحة أو علاج ... بس وجهات النظر دي بتبقى مبنية على الدراسة والعلم مش الأهواء الشخصية وغالبا مش هتعرف تميز بينهم.
- المرافقين اللي حوالين حضرتك مع كامل الاحترام لهم ليسوا أطباء ... ولو كانوا أطباء مش في نفس التخصص برضه لا يحق لهم الإفتاء فيما لم يعرفوا ... والأمور بتمشي بالعلم مش بالتخمين ولا ما تظنه المنطق.
- نيجي بقى للمضاعفات .. احفظ الكلمة دي وحطها حلقة في ودنك "مفيش جراح ما بيحصلش منه مضاعفات"
- وحصول المضاعفات عمره ما كان مبرر إن حضرتك تطلع أسوء ما في قاموسك الأخلاقي والعائلة الكريمة بالإضافة إلى التهديد والشكاوى والفيسبوك والكثير من التعليقات المصحوبة ب"حسبي الله ونعم الوكيل" و"الجزار" و"أصل أنا بنت خالتي كان عنده وحصل لها" و"متى يتوقف مسلسل إهمال الأطباء"
- في جراح أمين وعنده علم ومطلع ومش نصاب وحصلت منه مضاعفات رغم اتخاذه لكل الاحتياطات اللازمة، وتابع المريض كويس بعد المضاعفات ... ده بيتقال له شكرا.
- وفي جراح حصلت منه المشكلة قضاء وقدر ... سهو ... ممكن جدا
- وفي واحد حصلت منه المشكلة بسبب عدم أمانته(إنه يعمل عملية المريض مش محتاجها) أو عدم علمه أو استهتاره .. ده اللي محتاج يتحاسب؛ وهاصدمك لو قلتلك إنه في الأغلب هيبقى مأمن نفسه كويس جدا.
- خلاصة اللي فات في سطر واحد؛ إنك كمريض تروح لجراح شاطر وأمين في مكان محترم وتعمل عمليتك وتخرج بالسلامة ده لا يضمنه إلا حاجة واحدة لك وللجراح ... ستر ربنا وبس والله صدقني . cpd
