Dr. Gyna

29/11/2021

☀️الاول لازم نعرف ان المهبل فيه بكتيريا 🦠 عايشة طبيعي جواه اسمها البكتريا المتطفلة ودي مسؤلة عن حماية⚔ المهبل من اي ميكروبات ضارة...

ايوه بكتريا بتحمي المهبل عن طريق انها بتغير درجة حامضية المهبل🧪 وتخليه بيئة غير مناسبة لنمو الميكروبات...

تاني حاجة لازم نعرفها ان المهبل بيطهر🚿 نفسه بنفسه...
بمعني ان اي شئ غير طبيعي بيكون جواه حتي لو افرازات فهو بيتخلص منها باستمرار عن طريق الجاذبية وكمان انقباضات بسيطة في جداره...

طيب لما الحاجات دي موجودة علشان تحمي المهبل ايه اللي بيخلينا يجيلنا التهابات❗❗

في حاجات كتير سواء فسيولوجية او مرضية بتخلي الواحدة مننا عرضة للإلتهابات زي:
⓵ الحمل🤰...
اثناء الحمل بيحصل تغير في درجة حامضية المهبل وكمان بتقل مناعة الجسم وده بيخلي الحامل اكثر عرضة للإلتهابات...

⓶ الصابون 🧼والمستحضرات العطرية...
الصابون قلوي والمهبل حمضي فلما بتستخدمي الصابون ده بيقلل من حامضية المهبل وبيخليه عرضة للميكروبات الضارة.
اما المستحضرات العطرية بقي فدي اغلبها فيه كحول وده طبعا بأثر علي سلامة الجلد وبيخليه ضعيف...

⓷ التشطيف 🚿(الدوش) المهبلي...
زي ما اتفقنا ان المهبل ده بينضف نفسه بنفسه مش محتاج حد ينضفه فلما تستخدمي الدوش المهبلي انتي بتتخلصي من البكتريا النافعة والضارة مع بعض...

⓸بعض الأمراض اللي بتأثر علي المناعة واهمهم طبعا السكر🍬🍬...

⓹ بعض الادوية واهمها المضادات الحيوية💊...
لو حضرتك بتاخدي مضاد حيوي لفترة طويلة فده بيأثر علي كل البكتيريا اللي في الجسم سواء الضارة او النافعة...
كمان الكورتيزون ومثبطات المناعة...

اعرف ازاي ان الافرازات اللي عندي دي طبيعية والا نتيجة التهابات؟

الطبيعي خلال الشهر ان الافرازات المهبلية كميتها وخصائصها بتختلف بس بتتميز ب:
❶ لونها شفافة مائل للأبيض
❷ بدون رائحة
❸ غير مصحوبة بحكة او احمرار بالجلد
❹ بتزيد في فترة التبويض (تقريبا 14 يوم قبل موعد الدورة التالية)

22/06/2021

22/06/2021

ايه هي التحاليل اللي لازم تتعمل خلال الحمل؟

بتختلف التحاليل من سيدة لأخري حسب الأعراض والتاريخ المرضي والحالة الصحية لكن في بعض التحاليل المتعارف عليها لكل الحالات دون استثناء وهي:-

5-8 اسابيع
صورة دم كاملة ـ فصيلة دم ـ فيروسات كبدية ـ الحصبة الألماني ـ الأمراض المنقولة جنسيا ـ تحليل بول.

24-28 اسبوع
تحليل السكر

تحليل زلال في البول مع كل زيارة للطبيبـ/ـة خلال الحمل...

20/06/2021

ليه أول سونار اثناء الحمل مهم؟

فيه اسباب كتير تخلي اول سونار في الحمل مهم خلينا نتكلم عن الاسباب دي واحد واحد...

1. تأكيد عمر الحمل..
اول سونار اثناء الحمل هو الأدق لتحديد الهمر الجنيني وخصوصا في الحالات اللي بتكون مش عارفة الحمل حصل امتي...

2. تحديد عدد الأجنة...
اول سونار بردو بيكون مهم لاستبعاد الحمل في توأم ولو ثبت ان الحمل في توأم بيحدد حالة المشيمة والكيس الأمنيوسي الخاص بالأجنة وده بيفيدنا بعدين في المتابعة في حالة التوأم...

3.تحديد ما اذا كان الجنين حي او لا ومكانه...
وبده بنقدر اننا نستبعد الحمل خارج الرحم والإجهاض المنسي...

امتي نقدر نعمله؟
من 6-8 اسابيع من عمر الحمل...
في العمر الصغير (6-8 اسابيع) بيفضل عمل سونار مهبلي...

هل السونار ضار بالجنين؟
السونار بيعتمد الي موجات صوتية لإستخراج صورة للجنين ودي بتعتبر امنة جدا مع الحمل...

#نساء #الحمل #السونار

19/06/2021

هل لقاح الكورونا آمن اثناء الحمل؟

أول ما نزل اللقاح كانت التعليمات واضحة انه لا يعطي للحوامل لأن مكنش في دراسات واضحة علي علاقته بالحمل...

لكن في بداية 2021 ومع انتشار اللقاح قامت الجامعات والمؤسسات الكبري في مجال النساء والتوليد زي الكلية الملكية البريطانية والكلية الأمريكية للنساء والتوليد بتغيير توصياتهم...

وقالوا ان مفيش مشكلة من أخذ اللقاح في فترة الحمل وانه ثبت انه مش بيأثر علي الدورة الدموية في المشيمة زي ما كانوا متوقعين...

فلو حضرتك حامل وبتفكري في اخذ اللقاح عندك مطلق الحرية في انك تاخديه اثناء الحمل او تنتظري لبعد الولادة...
#نساء #الحمل #كوفيد١٩ #لُقاح_كورونا

18/06/2021

حبوب منع الحمل الهرمونية المركبة

هي حبوب بتحتوي علي مشتقات من هرموني الاستروجين والبروجيستيرون...

لما بتاخديها بتعمل في الجسم حالة شبيهة بالحمل...

بس لما بدأت السيدات تستخدمها لقينا ان ليها عرض جانبي خطير جدا وهو انها بترفع ضغط الدم...

وبالتالي حضرتك لو ضغط دمك عالي من الأساس فهي هترفعه زيادة وتحط حضرتك في موقف خطير...

علشان كده حبوب منع الحمل الهرمونية المركبة ممنوعة تماما لمريضات ارتفاع ضغط الدم..

#نساء #الحمل

16/06/2021

اهمية مساج الرحم بعد الولادة؟
اغلبنا اتعرض للموقف ده ان بعد الولادة بتدخل الممرضة او الطبيبـ/ـة ويبدأوا في عمل مساج للرحم...

طبعا انت بتكوني مرهقة وتعبانة غير إن المساج ده بيكون مؤلم واحيان كتير بترفضي المساج..

بس مسألتيش نفسك ليه هم غاويين يتعبوكي؟!!

النهارده انا جبتلك الرد...

بصي يا قمر مساج الرحم بيعمل علي انقباض عضلات الرحم وبالتالي بيحمي من نزيف ما بعد الولادة...

وبيكون مهم جدا خصوصا في اول ساعتين بعد الولادة وبيكون كل ربع ساعة وبعد كده بيكون كل ساعة لمدة ست ساعات...

وكمان اثناء عمل المساج بتنزل أي كتل دم متجمعة داخل الرحم وبنقدر بكده نحدد كمية الدم المفقود بعد الولادة ونحميكي من الدخول في نزيف ما بعد الولادة...

#نساء #الحمل #الولادة

15/06/2021

كتير بتيجي سيدات يشتكوا ان دورتهم متأخرة...

في البوست ده جمعتلكم اشهر اسباب تأخر الدورة...

1. الحمل
وده اول حاجة بنشك فيها لو جت سيدة تشتكي من تأخر الدورة...

2. متلازمة تكيس المبيض
في الفترة الأخيرة زادت جدا نسبة النساء المصابة بالمتلازمة دي واشهر شكوي بيشتكوا منها هي تأخر وعدم انتظام الدورة...

3. خلل في الغدة النخامية
الغدة النخامية هي المسؤلة عن افراز العرمونات المنظمة للدورة الشهرية وأي خلل بيحدث في الغدة النخامية بيؤدي الي خلل في الدورة
خلل الغدة النخامية ممكن يكون بسبب:
ورم ـ فقدان سريع في الوزن ـ تمارين قاسية ـ سمنة مفرطة - اضطرابات التغدية زي البوليميا و الانوريكسيا (anorexia nervosa)

4. الإضطراب الهرموني
وده زي خمول او نشاط الغدة الدرقية وزيادة افراز هرمون الحليب وكمان ممكن في حالات متلازمة كوشنج

طبعا دي مش كل الاسباب دي زي ما ذكرت من قبل الأسباب الأشهر...

#الحمل #نساء

03/06/2021

دي شكوي مشهورة جدا بعد تناول كورس علاج للكوفيد خصوصا لو بيحتوي علي مضاد حيوي قوي زي الكورس اللي بيتم اعطاءه في مصر...

السبب ٳن المضاد الحيوي بيقتل البكتيريا اللي في الجسم سواء نافعة ٲو ضارة وده بيسبب خلل في درجة الحامضية في المهبل ويؤدي الي نشاط الفطريات اللي بتكون اصلا موجودة طبيعي بصورة تطفلية في الجسم...

والحل بيكون ٳننا ناخد مضاد للفطريات علشان نقضي عليها حتي يعود نمو البكتيريا النافعة الطبيعية مرة تانية وترجع درجة الحامضية لطبيعتها...

#كورونا #كوفيد١٩ #التهابات

02/06/2021

هل ليزر ازالة الشعر أثناء الحمل آمن؟

سؤال بيجيلي كتير جدا...

احنا بننصح بتجنب ليزر ازالة الشعر خلال الحمل...

وده بيرجع الي ان بالنسبة لليزر نفسه كأشعة هو بيخترق فقط طبقة الجلد الخارجية دون تأثير علي الأعضاء الداخلية فنظريا هو آمن...

لكن حتي الآن مفيش دراسات اكيدة علي تأثيره علي الجنين وبالتالي منقدرش نجزم بإنه آمن...

النقطة التانية اللي تخلينا مننصحش بيه هي ان هرمونات الحمل بتؤدي الي تصبغات وتغير في لون البشرة وده المؤشر اللي بنعتمد عليه في تحديد كمية اشعة الليزر اللي هتستخدم فممكن ده يؤدي الي حروق للجلد...


#ليزر
#حمل

#الحمل #تجميل