27/07/2023
حقن البنسلين طويل المفعول كل كم اسبوع مع تحليل الميكروب السبحي فقط بدون أي أعراض للحمى الروماتيزمية هو ظلم عظيم وجهل كبير .
معظم الاطفال اللي بتاخدها، بتاخدها علي الفاضي وبتكون حالتهم مش مستدعيه ولا في داعي طبي لأخذها .
🛑الحمى الروماتيزميه هي مرض ليه معايير عالميه حطها العلماء وتم تحديثها عام ٢٠١٥ ويحدث نتيجه تكرار الاصابه بالميكروب السبحي اللي بيسبب اللوز عند نسبه كبيره من الاطفال علشان نشخص المرض ده لازم تنطبق المعايير العالمية على الطفل.
💥اول حاجه المعايير الاساسيه (العلامات الكبرى) major criteria :
1️⃣ التهاب المفاصل Polyarthritis:
في اكتر من مفصل بالترتيب زي مفصل الركبه والكوع والفخد اللي بييجوا ورا بعض وبيتنقل الالتهاب من مفصل للتاني زي البرغوث بيسموه fleeting arthritis.. التهاب المفصل ده يعني مورم ومحمر وساخن ومأثر على حركة الطفل وبيتحسن مع الاسبرين تحسن دراماتيكي .. انما العيل يقولك ركبي ومش قادر امشي من غير الكلام ده ده همدان ووجع من السخونية بس مش اكثر وممكن يكون Arthralgiaالم ف المفصل بس ده من المعايير الصغيرة.
2️⃣ التهاب القلب Carditis:
في اي طبقة من القلب وبيجي باعراض زي فشل القلب نهجان وورم ف الرجل وضربات سريعه .. وبنحتاج ايكو .. حتى لو التهاب صامت بدون اعراض subclinical Carditis بالايكو هنعتبره علامة كبرى.
3️⃣ ظهور كتل تحت الجلد Subcutaneous nodules :
كتل صلبه مبتوجعش وتتحرك وتظهر حوالين المفاصل وبالذات الكوع والركبه وبتفضل لاسابيع.
4️⃣ طفح جلدي Erythema marginatum:
بقعة كبيره باهته في النصف ويروح علطول ويظهر في مكان تاني وهكذا وبتيجي في الظهر والبطن و الذراعين
5️⃣ حركات لا اراديه نتيجه التهاب المخ Chorea:
تيجي أكثر للبنات لان في أجسام مضادة هجمت أجزاء ف المخ تلاقي البنت مش راسية وايدها ورجليها بتعمل حركات غصب عنها ويهيء لك انها بتحاول تخليها شبه ارادية.
💥ثاني حاجه المعايير غير الاساسية(العلامات الصغرى):
٢ بالاعراض و ٢ بالفحوصات
1️⃣ السخونيه أكثر من ٣٨.٥
2️⃣ الم المفاصل .. اللي هو بيحصل نتيجه الهمدان والسخونيه
3️⃣ ارتفاع ال acute phase reactant ..نسبة سرعة الترسيب ESR و CRP ونسبه كرات الدم البيضا وكل ده بيتعمل في المعمل.
4️⃣ شكل معين بيظهر في رسم القلب ان مسافة ال PR تطول.
💥عشان تشخص يا حلو بقى حمى روماتيزمية لازم يتوفر
👌اتنين معيار اساسي
او
👌معيار اساسي واحد واتنين معيار غير اساسي .
مش بس كده لا ده كمان مع توافر المعايير السابقه لازم يكون في 👌👌دليل على ان في عدوى حديثة بالميكروب السبحي Recent streptococcal infection👌👌
اما الميكروب السبحي عالي (ASOT) او مسحه حديثه من الحلق طالع فيها الميكروب السبحي positive .
🛑🚫اوعي حد مش خريج طب يظلم ابنك ويقولك عنده حمى روماتيزمية عشان الميكروب السبحي وسرعه الترسيب عاليين بدون اي أعراض ولا معايير❌ .. انتو بتهببوا ايه مع العيال 😮😡🤬
✍️ملحوظة مهمة :
الحقن دي مضاد حيوي له استخدامات اخرى زي التهابات اللوز البكتيرية يعطى مرة واحدة ونتائجه ممتازة جدا .. عشان لو دكتور كتبه لطفل عنده اللوز متتخضوش.
❤ربنا يحفظ ولادنا وبناتنا❤
عيادات د/ رائد محمد قمر
أخصائى الأطفال وحديثى الولادة
عضو الجمعية المصرية لطب الأطفال
مدير مركز تبارك للأطفال والحضانات
واتس 01069676347 📞
⏱️المواعيد⏱️
❤عيادة شبين
(بجوار سوبرماركت أبورقية ومدرسة النصر )
يوميا من ٥-٨م عدا الثلاثاء والجمعة
❤عيادة الأحراز
(ش الحبايبة - بجوار أبواليزيد- وصيدلية د سمر )
أيام السبت والاثنين والاربعاء والخميس من ١-٤ عصرا
❤مركز تبارك
(بجوار مستشفى الشاملة -فوق مركز نبض الحياة )
الثلاثاء من ١٠ص-١٠م
الخميس من ١٠ م - ١٠ ص
