30/09/2025
🔴 ترامب عايز يبقى رئيس غزة، في خطة سلام كاذبة هدفها إعادة استعمار الشرق الأوسط... والموساد من شوية صفى سفير جنوب إفريقيا في قلب باريس!
⚫️ وفي نفس اللحظة وعلى الناحية التانية، إيران بتتحرك وبتعمل تعبئة عسكرية ضخمة بشكل مريب، وتقارير غربية بتتكلم عن إن أمريكا بتنقل معداتها وبترفع من استعداداتها في الشرق الأوسط، كأنها بتجهز لحدث كبير... وفي خضم ده كله، أسطول الصمود على وشك إنه يتم تصفيته بالكامل!
🔹️ العالم حصلت فيه تطورات مهمة أوي خلال الساعات اللي فاتت ولحد اللحظة اللي بتقرأ فيها السطور دي... ف خلينا بقى نمر عليهم واحدة واحدة كده ونفكك الخيوط كلها من البداية للنهاية، عشان الصورة الكاملة توصلك وتبقى عارف أيه اللي بيدور حواليك دلوقتي بالضبط... وهنقسمهم لـ 1 و2 و3 و4... 👇
1️⃣🔴 خلينا نبدأ من خطة ترامب...
امبارح في قلب مؤتمر في البيت الأبيض، الرئيس الأمريكي أعلن أخيرًا عن خطة وقف الحرب في القطاع... والخطة دي كان بقالها فترة طويلة بتتحضر، كتمهيد لوقف حرب الإبادة اللي دمرت صورة أمريكا واسرائيل في العالم كله... بس البنود اللي تم الإعلان عنها، كانت عكس اللي أمريكا والدول العربية كانوا متفقين عليه قبل كده، اللي هو كان "حل الدولتين"...
🔸️ والسبب في تغيير الكلام المفاجيء في آخر لحظة كان مين؟
نتنياهو!
🟢 حسب تقرير لصحيفة أكسيوس الأمريكية، فأول امبارح اللي هو يوم الأحد 28 سبتمبر، جاريد كوشنر صهر الرئيس الأمريكي ترامب، ومعاه ستيف ويتكوف، اتقابلوا لمدة 6 ساعات كاملين مع نتنياهو ومستشاره المقرب منه رون ديرمر... وخلال اللقاء ده نتنياهو عمل تعديلات على الخطة الأمريكية اللي ترامب كان عرضها على الإدارات العربية قبل كده، فرغتها من مضمونها وغيرتها تمامًا!
طب أيه التغييرات دي؟
🟣 الخطة بعد ما كانت مصممة قبل كده لوقف الحرب وإنسحاب اسرائيل بالكامل من القطاع ووقف ضم الضفة وبدء خطوات عملية لإقامة دولة فلسطينية، أصبحت دلوقتي بتنحصر في وقف مؤقت للقتال، وانسحاب تدريجي للجيش الإسرائيلي لحدود "منطقة عازلة"، وبعديل بدء عمليات تبادل للأسرى الفلسطينيين مقابل الأسرى الإسرائيليين...
🔹️ وركز بقى في النقطة اللي جاية دي... 👇
🔵 خلال 72 ساعة فقط من قبول الخطة، المفروض حـ.ـم.ــا.س تفرج عن جميع الأسرى الإسرائيليين (أحياء وأموات)، ومقابل ده تفرج إسرائيل عن 250 سجين فلسطيني من ذوي أحكام المؤبدات، إضافة إلى 1,700 معتقل من غزة تم اعتقالهم بعد أحداث 7 أكتوبر...
وبالمناسبة دي النقطة الوحيدة في الخطة اللي محددة بوقت أو Deadline بتعبير أصح، عشان تفرغ نقطة التفوق والضغط الوحيدة اللي في إيد المقاومة، وتخليهم بدون أي أوراق...
🟡 طيب بعد ما المقاومة تطلق سراح الأسرى، أيه اللي هيحصل؟!
المفروض انه بعد كده يتم السماح بإدخال المساعدات للشعب الفلسطيني بدون قيود، وبعدها يتم نزع سلاح كل الفصائل الفلسطينية وتدمير الأنفاق بالكامل والقضاء على مصانع السلاح، ويتم تشكيل لجنة فلسطينية "تكنوقراطية"، غير تابعة لا لـ حـ.ـم.ــا.س ولا فتح، تدير القطاع مؤقتًا...
🟠 بس الأهم من كل ده، هو إن اللجنة دي هتشتغل تحت إشراف هيئة دولية جديدة اسمها "مجلس السلام"، وهيكون رئيسها هو ترامب بنفسه!
أيوه... أنت قرأت صح... ترامب عايز يحكم غزة بنفسه رسميًا، ويكون معاه مساعد هو "توني بلير" رئيس وزراء المملكة المتحدة سابقًا، اللي هو نفس الشخص اللي شارك في غزو العراق سنة 2003 وارتكب جرائم حرب لا تعد ولا تحصى وقتها!
🔴 اتفاق سايكس بيكو جديد، بيحصل قدام عينك، لتقسيم الأراضي العربية وإعادة استعمارها بشكل مباشر مرة تانية!
الاسوأ كمان هو إن بمجرد الإعلان عن الخطة ومغادرة نتنياهو للبيت الأبيض، طلع وغير كلامه كالعادة وقال في تصريحات رسمية نقلتها "فرانس 24" إنه إسرائيل لم توافق على قيام دولة فلسطينية، ولم تلتزم بالإنسحاب من القطاع، وإن قواتها ستبقى داخل الجزء الأكبر من غزة!
🟣 يعني بالشكل ده ممكن جدًا أول ما المقاومة تسلم الأسرى، ترجع اسرائيل تكمل عملياتها في القطاع بدون رادع، ويكون كمان نتنياهو تخلص من الضغط الشعبي الداخلي عليه بسبب الأسرى!
🟡 المقاومة لسه لحد دلوقتي مقالتش رأيها النهائي، لكن بالفعل"زياد نخالة" أمين عام حركة الجـ.ـهـ..ا.د الإسلامي رفض الخطة، وبعض قيادات المقاومة بيقولوا إن القبول بالخطة دي بشكلها الحالي يعتبر أقرب للإعتراف بالهزيمة... وغالبًا هيرفضوها أو هيعملوا عليها تعديلات جديدة ونتنياهو هيستغلها فرصة وهيرفضها ويرمي اللوم عليهم، وتستمر الحرب زي ما هو عايز بالضبط...
2️⃣🔵 وفي أثناء بقى ما العالم كله قاعد مستني نتيجة النقاش وقرار المقاومة، في أحداث سريعة ومتصاعدة بتحصل على الناحية التانية... في إيران... 👇
حسب تسريبات وتقارير صحفية انتشرت خلال الكام يوم اللي فاتوا، فالحرس الثوري الإيراني حاليًا بينفذ "أكبر عملية تعبئة داخلية في تاريخه"، وبينقل الصواريخ الباليستية الإيرانية حاليًا لأنفاق جبلية ومواقع عسكرية محصنة، بعضها بيوصل عمقه لأكتر من 50 متر تحت الأرض... وكل ده بيتم استعدادًا بالتزامن مع تقارير بتأكد إن إسرائيل بتجهز لحرب جديدة وشاملة على إيران خلال الكام يوم اللي جايين، وغالبًا قبل 7 أكتوبر!
🟠 اللي بيرجح صحة التقارير دي هو إن الجيش الأمريكي بحسب مواقع التتبع بدأ بالفعل يحرك طيارات تزويد وقود من قواعده في تكساس وفلوريدا، باتجاه الخليج، ومعاهم كمان عدد من طيارات F-35 الشبحية...
الخطوات دي شبيهة جدًا باللي حصل قبل ما يضربوا إيران المرة اللي فاتت... وكل ده بيأكدلك إن في حاجة كبيرة بتتحضر، خصوصًا وإن ترامب من شوية عمل اجتماع بقادة الجيش الأمريكي كلهم في فرجينيا، وقعد يهدد باستخدام الأسلحة النووية وإن أعداء أمريكا "لابد أن يخافوا مما هو قادم"...
🟢 التطورات دي أنعكست تأثيراتها على الأسواق العالمية، ولو خدت بالك هتلاقي إن الدهب بقاله ايام عمال يقفز لمستويات ما حصلتش من عقود، وحاليًا لو انت متابع هتلاقي إن سعره تخطى بالفعل 3800 دولار للأونصة، بينما سعر الدولار العالمي بيقل... وهسيبلك مصادر من تقارير اقتصادية بتعرضلك كل الأرقام دي تحت في أول كومنت... كل ده بيقولك إن المستثمرين متوقعين حرب كبرى هتقوم قريب...
3️⃣🟡 وعلى الناحية التانية في البحر المتوسط، حصل تطور مهم جدًا بخصوص أسطول الصمود!
من شوية، وحسب هيئة البث الإسرائيلية، سلطات الاحتلال أصدرت قرار بمنع وصول سفن أسطول الصمود لشواطيء غزة تحت أي ظرف و "بأي ثمن"... والبحرية الإسرائيلية دلوقتي عندها أوامر بالاستعداد لإجراء عمليات مكثفة للسيطرة على سفن الأسطول ونقل النشطاء اللي عليها كلهم لسفينة حربية كبيرة إسرائيلية، وسحب سفنهم لميناء أشدود وإغراق بعضها في عرض البحر بعد تفريغها!
⚫️ وكل ده المفروض إنه هيحصل خلال الساعات اللي جاية، لإن الأسطول خلاص على مشارف الوصول للمياه الفلسطينية... وهيحصل على مرأى ومسمع من العالم كله!
4️⃣🟣🟠 بس أكتر تطور مرعب بقى، هو اللي حصل من حوالي ساعتين بالضبط في باريس! 👇
"إيمانويل ميثيثوا"، سفير دولة جنوب إفريقيا في فرنسا، والمعروف بدوره في دعم قضية جنوب إفريقيا ضد إسرائيل في المحكمة الدولية، وبإنه واحد من أكبر المؤثرين على دوائر الحكم واللوبيهات السياسية في البرلمان والحكومة الفرنسية، لقوه من شوية متكسر لـ 100 حتة على الأرض، بعد ما وقع "في ظروف غامضة" من الدور الـ 22 في الفندق بتاعه في باريس!
🟡 قبل ما يختفي بساعات، وحسب تقارير لمنصات صحفية هسيبهالك في الكومنتات، يُقال إنه أصلًا كان مختفي، وإن مراته وصلتها منه رسالة مقتضبة وغامضة وبعدين تليفونه اتقفل... وبعدها ظهر وهو مُلقى من نافذة الغرفة بتاعته في فندق "حياة ريجنسي" في منطقة بورت مايو غرب باريس... والنافذة دي حسب التحقيقات الأولية المفروض انها مؤمنة ومقفولة كويس... يعني مستحيل يكون سقط منها بالصدفة...
🔸️ طبعًا مين بقى اللي أسلوبه معروف كويس أوي في تنفيذ الاغتيالات بالإلقاء من طوابق وشرفات عالية في فنادق أو عمارات سكنية؟!
🟢 الله ينور عليك... الموساد طبعًا... دي واحدة من الأساليب المعروفة والمميزة ليهم، واللي اغتالوا بيها الجاسوس المصري "أشرف مروان" قبل كده في لندن بنفس الطريقة... والرسالة هنا متوجهة لدولتين في وقت واحد... جنوب إفريقيا اللي بتقود حملة دولية قانونية ضد الصهاينة لمحاسبتهم كمجرمي حرب، وفرنسا اللي بتقود جهود الإعتراف بالدولة الفلسطينية وحل الدولتين في أوروبا!
🔹️ يعني إسرائيل دلوقتي بتصفي الدبلوماسيين اللي بيفتحوا ملفات قانونية ضدها، وفي قلب العواصم الأوروبية… والعالم ساكت!
