https://www.facebook.com/348655505640681/

Raytist, sohag, Sohag (2026)

21/07/2022

9 حاجات لازم تتبعها لما تعمل اي فحص مقطعية بالصبغة 🧐🤔👈👈

01/02/2022

السلام عليكم .أيها الفنيين والفنيات .اهلا بكم .
النهاردة هنتكلم ع الجزء التاني من البوست اللي فات وهو بعنوان #ازاي اصور ضرس العقل ؟؟

المره اللي فاتت اتكلمنا عن تصوير ضرس العقل ف الفك العلوي وقواعد واساسيات تصويره.
والنهارده هنعرف ازاي نصور ضرس العقل ف #الفك السفلى وأهم تركات التصوير .....يلا بينا .

١- #زي ما اتفقنا ف البوست السابق انه لازم القي نظرة ع الضرس الاول قبل ما اصوره .

٢_ #لابد انه يكون المريض قاعد مظبوط مش مايل مش يمين ولا شمال .

٣_ #أثناء تصوير اي ضرس ف الفك السفلي يرفع ذقن المريض قليلا. لانه هيساعد ع ثبات الفليم المستخدم بشكل أفضل وهذا مطلوب ف تصوير ضرس العقل .

٤_ #بعد النظر الي الضرس اللي مطلوب تصويره سوف يتم التعرف ع انهي وضعية يوجد عليه ضرس العقل .

٥_ #من المهم التعرف انه هناك اكتر من شكل لوضعيه ضرس العقل السفلي وهذا يصعب من عمليه تصوير .
#كلما زاد درجه انحراف وميل الضرس للداخل كلما صعب تصوير .

٦_ #لازم تبقي عارف انه اساس تصوير ضرس العقل ف الفك السفلي انه يتشاف الجذور شكلها ازاي وشكل الضرس نفسه .هل الضرس نايم ولا ايه وهل جذور سليمه ولا لا .

٧_ #لازم لازم لازم تجيب نهاية الجذور ع الفليم .

٨_ #لازم تجيب مسافة ١ مللي بعد الجذور للتأكد من وجود خراج ولا لا اسفل الضرس .

٩ _ # #بعد جلوس المريض ع الكرسي ورفع ذقنه قليلا ووضع الفليم بداخل فمه يتم الطلب منه بوقف بلع الريق أثناء التصوير حتي لا لم الحركه والاهتزاز .

١٠_ #من الجدير بالذكر معرفه انه ٧٠% من وضعيه ضرس العقل ف الفك السفلي بتيجي معتدلة وطبيعيه وفي الحاله دي بيكون طول وحجم الضرس صغيرين قليلا ومش لازم يتم الضغط الزايد ع الفليم داخل فم المريض لإظهار الجذور .

#بعض المشاكل وحلها؟؟؟.
١.المريض بيرجع ومش قادر يثبت .
يتم استشاره الطيب الأسنان بوضع مخدر ليدوكين ع الضرس ثم يتم تصويره.
وفي الحاله القصوي يتم توجيه المريض لعمل اشعه بانوراما .

٢. وضعيه ضرس العقل مايلة للداخل او الضرس جاي نايم ومش قادر تدخل الفليم .
يتم عمل زاوية ديستال للانبوبة لتحريك الضرس ناحيه الفليم وهذه الحاله لا يتم عملها الا ف الضرورة القصوى لأنها قد تسبب احيانا ف بعض التشخيص الخاطئ.

وبكدا اكون خلصت .اللي عنده اي سؤال يشرفني بيه ف التعليقات .
اشوفكم ف بوست جديد .
سلام

29/01/2022

السلام عليكم .أيها الفنين والفنيات اهلا بكم .
كتير مننا بواجهه صعوبه أثناء تصوير ضرس العقل او الضرس رقم 8 .
والنهارده هنتكلم ع بعض الأساسيات والقواعد والتركات اللي تمشي عليها لو متيجي تصوره .
#١.لازم تعرف مكان الضرس اللي هتصوره اذا كان ف الفك العلوي او السفلي. لانه بيتختلف معاك ف الطريقه التصوير .

#٢.تعرف قبل متصور الدكتور طالب ليه تصوير الضرس العقل. بنسبة كبيره الدكتور بيطلب علشان الخلع(extraction ) ونسبه قليله بتطلبه علشان يتحشي (endodontics).ودا هيساعدك اكيد ف تصويرك وهل الفليم مرضي للدكتور ولا لا .

٣.التاكيد من المريض ع الضرس المراد تصويره .احيانا الدكتور قد يخطئ ف ترقيم رقم الضرس وبالتالي النقطه دي هتساعدك تفادي تعرض المريض لاكتر من جرعه ف حاله الاختلاف ف الترقيم .

٤.لازم اعرف نوع الفليم اللي هستخدمهم سواء كان فليم تحميض عادي او شريحه سينسور.او سينسور بسلك .دا هيعرفك ازاي تحط الفليم ف بوق المريض وكمان هيساعدك ف الخروج بصورة واضحه ومرضيه. .كما هو موضح ف الصور (2/3/4)

#ندخل بقا ع قواعد التصوير .
*الفك العلوي :-
١. المريض لازم يكون قاعد مظبوط ع الكرسي ودماغه ف وضع ال upright. يعني متكونش مرفوعه لفوق ولا نازله لتحت .ودا مهم علشان ظبط الزاويه بشكل صحيح. كما هو ف موضح ف الصور (5/8)

٢. ف كثير من الأحيان ضرس العقل مش بيجي ع مستوي باقي الضروس (6.7) وبتلاقيه متحرك لاعلي ف عظام الفك ولما تيجي تظبطه مع مستوي الضروس التانيه يطلع قاطع ف الجذور . كما هو موضح بالصور (6/7)

#الحل : بيتم وضع الفليم بشكل مائل بحيث يشمل نهاية جوزر ضرس العقل حتي لو مظهرتش الضروس التانيه بشكل مظبوط .

٣.التنبيه ع المريض بالتنفس من أنفه والتفكير ف شئ اخر غير التصوير حتي لا يشعر الغثيان والرغبة ف الترجيع .

٤.بيتم ظبط الزاوية بناءا ع وضع الفليم. بناءا ع وضع الفليم بناءا ع وضع الفليم بيحث تسقط الاشعه عمودية ع الفليم دون عمل اي زاويه محفوظة .وبتكون مركز سقوط الشعاع عند نقطه (outer canthus of the eye) . كما موضح ف الصورة (9)

٥.بيتم إعطاء جرعه مناسبه نتيجه لكثافة هذه المنطقة .

#اعمل ايه لو المريض فضل يرجع ؟؟
بيتم وضع مخدر ليدوكين ع منطقه الضرس ونستني ثواني حتي يتم تخدير المكان وبعدين نصور .
بس طبعا بعد ما يتم استشاره الطبيب الأسنان .
تاني .....تحت استشاره طبيب الأسنان ..

انا كدا خلصت اللي حابب يسأل اي سؤال يشرفني ف التعليقات .
اشوفكم ف باقي البوست ان شاء الله .
سلام 🥰😍

03/01/2022

بدئنا فكره جديدة وسلسلة جديدة كل فترة هنزل سؤال وعليه جايزة .
الهدف الاول اننا نستفيد من بعض ونقدم بعض الجوايز حتي لو بسيطة علشان نشجع بعض .
كل اللي عليك هتابع الصفحة وتجاوب ع السؤال .
وتاني يوم من نزول البوست هتختار عشرة أشخاص جاوبو إجابة كاملة علشان يكسبوا .
وكمان هنزل اسمائهم ع الصفحة .
بالتوفيق للجميع

22/07/2021

يعتبر من الاسئلة المهمة واللي ممكن في شغلنا كفنين مش بناخد بالنا منها وهي المسافة بين الانبوبة وما بين جسم المريض فالسؤال هنا بقا🤔

#هل وضع المريض بالنسبة لانبوبة الاشعة بيأثر علي جودة الفيلم؟
او بمعني اخر
#هل اختلاف المسافة بين انبوبة الاشعة وجسم بالمريض سواء بالزيادة او النقصان بيأثر علي جودة الفيلم ؟🧐
يلا نشوف
دلوقتي هنتكلم عن المسافة دي من ناحيتين :✌️
1.الناحية الفيزيائية ..
2الناحية التشريحية..

#الناحية الفيزيائية:✍️

زي ما قولنا قبل كدا انه اثناء خروج الاشعة من الانبوبة الالكترونات بتطلع من الفتيلة وتتحرك ناحية الانود وتخبط فيه وبتسقط علي هيئة فوتونات اشعة 👌وبما انه الانود بيكون مائل علشان احصل علي اشعة تسقط عموديا علي الجسم.🙂 فدا معناه انه الجرعة اللي بتسقط علي المريض بتكون قوية وعالية ف الطاقة ومركزة ف الجانب اللي فيه الانود لانها نازلة عمودي 👏,انما باقي الاشعة بتنحرف زي ما قولنا وبالتالي طاقتهم ضعيفة علي الاختراق. لذلك #يستحسن دائما عند تصوير الاعضاء السميكة كالفقرات والصدر وكدا اني اخلي العضو المراد تصويره اقرب ما يكون من الناحيه اللي فيه الانود يعني مثلا لو هصور صدر يبقي اخلي دماغ المريض ف الناحية اللي فيها الانود من الانبوبة ودا هيخليني احصل علي صورة بجودة عالية.👍

#الناحية التشريحية :☠
وهنا بقا هنتكلم بشكل كبير علي العضو اللي احنا بنصوره ومدي قربه من الكاسيت وعلي اساسه احنا بنقدر المسافة بتاعتنا .🙂
المسافة المتعارف عليها هي 100سم .
#ولكن
من اشهر الامثلة حول الموضوع دا هو تصويرالصدر (chest) ودا بنصوره لما يكون المريض واقف امام البكي الواقف (stand bucky) .وهنا لازم نعرف اي هي الاوضاع اللي انا هعملها للصدر؟؟🧐
فلو هصور المريض (anterio-posterior) فنلاحظ انه قلب المريض بعيد عن الفيلم ولو انا فضلت مثبت المسافة علي 100سم هينتج عندي انه حجم القلب هيكبر ودا ممكن يتم تشخصيه غلط من قبل الطبيب المعالج علي انه تضخم ف القلب .😲

اما لو في حاله تصوير الصدر (posterio-anterior) فهنا هنلاحظ انه القلب اقرب للفيلم من الوضع الاول وهيظهر بحجمه الطبيعي علي الفيلم وبالتالي هيتم تشخيصه بشكل صيحيح من قبل الطبيب المعالج 😊
لذلك ينصح دائما ف المقام الاول بتصوير الصدر في الوضع (posterio-anterior ) ما دام المريض قادر علي ذلك.

#وبالتالى تعد المسافة بين الانبوبة وبين الفيلم من اهم العوامل اللي بتساعد ف قراءة فيلم الاشعة بشكل صحيح ومنها تشخيص دقيق.👌

#فيجب دائما :
1.ضبط المسافة بين الانبوبة والفيلم بشكل صحيح.☑️
2.الاخذ في الاعتبار انه كلما ذادت المسافة ستقل طاقة الفوتونات الاشعة الساقطة وستزداد كمية الاشعة المتناثرة .☑️
3.الاقلال من المسافة يؤدي الي تكبير الاعضاء مما يؤدي ف النهاية الي التشخيص الغير صحيح .☑️

22/07/2021

استكمالا للبوست السابق
السؤال الثاتى
#ما هو البكى وما انواعه واحنا ليه بنستخدمه؟🧐
البكى هو عبارة عن شبكة بتكون مثبتة ف تربيزة جهاز الاشعة العادية او موجود داخل البكى الواقف (stand bucky).👌👌

#هل البكى هو الدرج الحديدي الموجود بالترابيزة واللي بنضع فيه الكاسيت اثناء التصوير 🤔؟
بالطبع لا خالص.الدرج الحديدي ما هو الا درج بيتم وضع الكاسيت فية اثناء التصوير .اما البكى فهي شبكة بتكون ف الترابيزة نفسها وموقعها بيكون بين الكاسيت والمريض اثناء التصوير .🙂

#ما هي فكرة عمل البكي وليه احنا بنستخدمه؟🧐
بطبيعة جسمنا وحجم الاعضاء واللي ممكن تختلف من شخص للتاني سواء رفيع 🧍‍♂️او تخين فبتختلف معاها قدرة الاشعة علي اختراق الاعضاء👍 دي فكل لما كان جسم المريض او حجم العضو المراد تصويره صغير كلما ذاد قدرة الاشعة علي الاختراق .👌

فمثلا لما نيجي نصور اليد او القدم🦶 نتجية انه حجم الانسجة الخاصة بيهم صغيره فانا تلقائي بدي جرعة اشعة صغيره وهتخترق كمان الانسجة او الوضع في حالة تصوير الفقرات القطنية مثلا او الحوض او البطن فنظرا لكبر حجم الاعضاء وخاصة لو كان المريض تخين فدا هيخليني اذود الجرعة وبتالي هيكون فيه اشعة متناثرة كتييرة زي ما قولنا ف البوست اللي فات 🙂
لاني هضطر افتح محدد الاشعة لمساحة اكبر والنتجية من الاشعة المنتاثرة دي هياثر علي جودة الصورة ودرجة التباين بتاعتها (contrast) 😳,والاشعة المنتاثرة دي بتكون طاقتها صغيرة وقدرتها ع الاختراق اقل وبتالي بتفضل تخبط ف الجسم وتنحرف وتروح وتيجي🥴 ودا كله ياثر علي جودة الفليم وعلشان اتغلب علي المشكلة دي بنستخدم #البكي فالفايدة منه هو انه بيعمل علي تركيز الاشعة اللي طاقتها كبيرة ولها قدرة كبيرة ع الاختراق ويركزها علي الفليم ويمنع الاشعة المتناثرة انها توصل للفليم وبالتالي هنحصل علي فليم جودتة عالية وممتاز .😊

#بيشتتغل ازاي ؟😏
انا لما باجي ادي الجرعة للمريض بتبدء الشبكة بتاعت البكي تهتز زي المصفاه وبمجرد لما ادي الاون بتركز الاشعة العالية علي الفيلم وتمنع الضعيفة من الوصول .👍

#ما هي انواع البكى ؟🤔
هما نوعان :-
1.البكى النايم (ودا البكى اللي بيكون مثبت ف الترابيزة نفسها ومن الفحوصات اللي بيتعمل استخدامه فيها تصوير الفقرات الصدرية والقطنية -عظام الحوض-البطن-الصدر في بعض الحالات-عظمة الفخذ)🦵

2.البكى الواقف (stand bucky) .ودا البكى اللي بيكون مثبت علي حامل او عمود واقف ويستخدم فى فحوصات عديدة تتطلب وقوف المريض مثل تصوير الصدر -الكتف -البطن -الفقرات والاوضاع الديناميكية-الجمجمة ).☠️

22/07/2021

بسم الله الرحمن الرحيم .
سواء كنت فني أشعة جديد👨‍🎓أو متحرف الشغل من سنين فدا مش معناه اننا نغفل أساسيات مهمة في شغلنا 🤔 ومعرفتها اللي من وجهه نظر الكتير انها عادي وأننا بنفذ أوضاع وخلاص🙂 .الا انها بتفرق فني أشعة عن فني أشعة تاني خالص .😎
فحيبنا نبدء من البداية ونعرف الفنين الخريجين الجداد او حتي القديم بالمعلومات دي وبشكل مبسط خالص🙂 دون التعقيد والدخول ف الفيزياء البحتة بشكل جميل وسلس ومشوق .

فنتوكل ع الله .☝☝
السؤال الأول.
#ما هي مكونات أنبوبة الأشعة وازاي بتخرج الأشعة؟؟🙄

باختصار بتتكون الانبوبة من ثلاثة عناصر اساسية
1.الفتيلة او اللي بنسميها الكاثود (cathode )اللي بتطلع الالكترونات. ومتقلقش هقولك ازاي ..☺

2.الانود(Anode) ودا اللي بتتجه اليه الاالكترونات وتخبط فيه وبعدين تنزل الأشعة وهنقول برضو ازاي اصبر معايا🤌 بس ...

3.محدد الأشعة (Collimator) ودا اللي بتحكم فيه علشان نحدد كمية الأشعة اللي بتنزل للمريض حسب المنطقة او العضو اللي هصوره .👌

#طاب ازاي الأشعة بتطلع من الانبوبة ؟؟🧐

أنبوبة الأشعة زيها زي اي جهاز كهربي موجود ف بيتنا بيحتاج لكهرباء علشان يشتغل .حلو خالص .👍.نيجي نقول انه القطبين اللي هوصل فيهم الكهربا للانبوبة هما الفتيلة ودا القطب السالب والانود ودا القطب الموجب .
طاب كويس لحد هنا.. 👈👈
انا هروح اوصل كهربا للفتيلة فيمر فيها تيار كهربي والتيار دا زي ما احنا خدنا ف ابتدائي واعدادي بيحتاج فرق جهد يزقه علشان يتحرك فاحنا بندي فرق جهد كويس للتيار اللي هيمر ف الفتيلة.. فايه اللي بيحصل 😶

الفتيلة تروح تطلع الكترونات بتكون سريعة جدا ودا بيعتمد ع حجات كتيره وأهمها فرق الجهد اللي احنا خدناه.
بعد كدا بتتحرك الالكترونات ناحيه الانود وتخبط فيه وبتقل السرعه بتاعتها وتروح تسقط ع هيئة فوتونات أشعة ودا بعد عمليات فيزيائية كدا ملناش دعوة بيها دلوقتي .😏😉

#طيب شكل الانود دا بيكون ازاي ؟؟ودا هياثر ف ايه ؟؟

اولا زمان كان شكله ثابت ومش بيتحرك ودا كان بمجرد ما يخبط فيه الالكترونات بتخليه يسخن وبتكون الحراره مركزة ف مكان واحد اللي هو مكان اللي خبطت فيه الالكترونات وكمان هنا كان واقف بشكل عمودي فلما تخبط فيه الالكترونات .الفوتونات اللي هتطلع هترتد بعيد الانود وتنزل بشكل منحرف وبالتالي الجرعه هتبقي مشتتة وهتكون عاليه ف مكان وأقل ف مكان تاني
.ولكن وصلنا للحل🤫 انه يكون الانود مائل ويتحرك فمنها بتوزع الحرارة اللي بتسخنه ومنها بخلي الأشعة تنزل بشكل عمودي وبالتالي هتكون مركزة وقوية ولكن برضو هتكون فيه شويه فوتونات بتنزل منها منحرفة ولكن افضل من الاول ...وهنا بيجي دور المحدد في انه بقلل بيه الأشعة المنحرفة والمتناثرة ودا هياثر ع جودة الفليم ويمنع تعرض المريض لكميه كبيرة من الاشعة ملهاش فايدة .....

وبكده احنا نكون جوابنا علي السؤال الاول .ونظرا لطول البوست هنزل إجابة باقي الأسئلة ف بوست تاني .

_لو فيه اي استفسار او اي سؤال يشرفني الإجابة عليكم .

وقفنا الله وإياكم لما يحبه ويرضاه .

#احنابتوع الاشعة.

Raytist

21/07/2022

01/02/2022

29/01/2022

03/01/2022

22/07/2021

22/07/2021

22/07/2021

Address

Website

Alerts

Shortcuts

Share

Category