دكتور محمد فوزي - جراح ومدرس النساء والتوليد بكلية الطب, عيادة دكتور محمد فوزي, Suez (2025)

23/09/2025

ده انهاردة تعليق الجمعية الأمريكية لأمراض النساء والتوليد وهيئة الرعاية الصحية البريطانية
بيردو علي تصريحات ترامب انهاردة إللي قال فيها البنادول بيعمل توحد لو اتاخد اثناء الحمل
ترامب ايام الكورونا كان بيقترح يحقن المصابين بكلور ومطهرات للقضاء علي الفايروس
مفيش اي رابط بين البنادول اثناء الحمل والتوحد عند الاطفال

22/08/2025

من غير زعل بس الأهالي إللي بتعمل كدة حرام عليهم والله
ونصيحة للبنات لما تبقي متجوزة وسنك صغير اقل من 32 حتي مش هنقول 35 بلاش تتسرعي عالخلفة اول الجواز وخصوصا لو مش عارفاه كويس لإنه فعلا ممكن يكون أهبل وجوزوه عشان يعقل
والله العظيم برشام منع الحمل اول سنة جواز مش هيعمل عقم
يا عم نعمل تحليل مخزون مبيض نطمن انه كويس ومفيش مشكلة لو أجلنا الخلفة اول سنة جواز
يعني تاني يوم الدورة نعمل تحليل
FSH يطلع اقل من عشرة
ونعمل تحليل
AMH يطلع آكتر من واحد
كدة اطمنا إن المخزون حلو
ياعم كمان نعمل بعد الجواز سونار مهبلي نطمن ان الرحم كويس
وبعدها نأجل الحمل اول سنة نتعود علي طباع بعض ونستقر ماديا شوية ونستمتع شوية من غير تعب الحمل
و مسؤولية العيال وبعدها نبطل البرشام ونستني الحمل
دكتور

19/08/2025

يعني خلاص مفيش تعب تاني مفيش ترجيع تاني مفيش حزق تاني 😅

الروبوت ده لو جه مصر برضه هنديله كليكسان عالفاضي وهنولده قيصري عشان الحوض ضيق 😁

هي الصين عاوزة مننا إيه 😇

للتوضيح بس:
انا لسة شايف الخبر يعني زيي زيك بالضبط مش عارف أي تفاصيل علمية عن الموضوع ولا أصلا بجد ولا اشتغالة صينية
😁

18/08/2025

كومبو اتنين في واحد
شد البطن مع الولادة القيصرية
السؤال إللي دايما بنسمعه من اغلب الحالات
حاولنا نحط النقط علي الحروف في الفيديو عالجروب
ونوضح الفرق بين الحقيقة والاوهام
هاتلاقي اللينك في اول كومنت
الصورة فيها شكل جرح شد البطن لو طلع كويس من غير مضاعفات والصورة التانية لما بتحصل مضاعفات
شوفي الفيديو في الكومنت وقوليلنا رأيك
_____________________________________________
دكتور
دكتوراه التوليد وأمراض النساء
استشاري مناظير النساء والحقن المجهري
مدرس بكلية الطب
للحجز والاستفسار 📞01020070798
السويس الاربعين بجوار مركز براعم للحضانات شارع الفرز

02/08/2025

عشان أفلام الرعب إللي بتحصل كل شوية
مفيش حاجة اسمها سرقة اعضاء
وتريند التيكتوك بيتكلم عن تجارة الأعضاء مش سرقة الاعضاء
مصر فيها زراعة أعضاء
لو الزراعة دي حصلت بمقابل مادي يعني لو المتبرع اخد فلوس بقي اسمها جريمة تجارة اعضاء

فاكر لما نزلت انت بوست تريقة وقلت ابيع كليتي واجيب ايفون
ده هو تجارة الأعضاء المجرم في مصر

انما شغل ابنك يتخطف عشان يسرقو أعضاؤه ده عمليا غير قابل للتطبيق

المشكلة ان أي قضية حصلت قبل كدة في مصر كان مقصود بيها تجارة والناس افتكرتها سرقة والصحفيين والاعلام عشان يجيبو ترافيك ومشاهدات ماهتموش يوضحو الفرق

بالمناسبة في دول زي الصين تجارة الأعضاء مش مجرمة في القانون

شغل الافلام بتاع التلاجة اللي مليانة اعضاء بشرية ده هبل مطلق
مفيش قلب هيعيش في التلاجة ست ساعات أصلا
زراعة الأعضاء محتاجة تتنقل بين اتنين نفص فصيلة الدم واختبارات توافق معقدة ومكلفة جدا
بيتاخد بعدها الكلي او فص الكبد من المتبرع وبيتنقل علي طول للمريض

للاسف في مصر مفيش نقل اعضاء من ميت لحي
يارب يتحط تشريع محترم للموضوع ده بدل ثقافة أكرام الميت دفنه
انا لو ميت افضل إن قلبي و كليتي يتنقلو لمريض محتاج بدل ما ياكلهم الدود

وبرضه انا مش هاعلق علي ابراهيم شيكا ووفاء عامر وام مكة ولا الكلام ده بجد ولا ترافيك عشان يلموا اسود وحيتان من اللايفات مش قصتنا اصلا انا باوضح ان فكرة السرقة والخطف من أجل سرقة الأعضاء مستحيل تطبيقيا
اخر حاجة ده لا شغلي ولا تخصصي بس حاولي تنشريه عشان الرعب اللي شغال
عاوزة تاخدي الكلام كوبي تنشريه عادي مفيش مشكلة

22/07/2025

برشام منع الحمل مش هيعمل سرطان في الثدي
ايوة زي ما سمعتي كدة سواء احادي او ثنائي الهرمون
الدراسات اثبتت فعلا انها بتزود احتمالية الاصابة بسرطان الثدي بنسبة بسيطة جدا لو اتاخدت بعد سن الخمسة واربعين سنة لفترة طويلة اكتر من خمس سنين
بس الدراسات كمان أظهرت انها بتقلل خطر الإصابة باورام القولون واورام المبيض وكمان بتحمي من اورام بطانة الرحم (بتقلل بتحمي مش بتزود)

دي زيها زي الهرمونات اللي ربنا خلقها اللي المبيض بيطلعها بالظبط
اصل الفكرة ان لما بناخد الهرمونات من البرشام اصلا هرمونات المبيض بتقف يعني ده بدل ده
بالعكس بقي الجرعة اللي في البرشام اقل من اللي بيطلعها المبيض

المشكلة تيجي امتي بقي؟
المشكلة لما بتتاخد بعد سن اليأس
في الستينات والسبعينات انتشر استخدام الهرمونات التعويضية لكبار السن والترويج ليها باعتبارها اكسير الشباب الدائم
تخيلي تاخدي علاج يمنع ضمور وترهل الثدي وجفاف المهبل وهشاشة العظام اللي بيحصل بعد سن انقطاع الدورة

لكن للأسف ربنا خلق الثدي لوظيفة معينة بتقف بعد سن اليأس و مخلقش الثدي يستحمل الهرمونات بعد السن ده والهرمونات اللي كانت زمان بتكبر الثدي وتحافظ علي شكله وتجهزه للرضاعة دلوقتي ممكن تخليه ينمو نمو سرطاني
ورغم ان ده حصل عند نسبة بسيطة جدا من الستات لكن اتمنع استخدام الهرمونات التعويضية الا بتحذيرات قوية ومتابعة طبية دقيقة
بعد ما الهرمونات التعويضية في الستينات كانت بتتباع في الاكشاك زي الريفو و الأسبرين كدة بقي ممنوع بتتباع الا بوصفة طبية واشتراطات معقدة

انتشر مؤخرًا منشور لطبيبة تدّعي أن حبوب منع الحمل ثنائية الهرمون التي تحتوي على الإستروجين والبروجسترون هي من المسببات الأولى للسرطان

وللاسف الرعب انتشر بسبب البوست المعتمد علي تفسير خاطيء جدا ومضلل (غالبا بشكل متعمد) للدراسات العلمية المنشورة
ملايين المصريات بنستخدم اقراص منع الحمل المركبة كاريح وسيلة منع حمل لأنها اكتر حاجة بتظبط الدورة وتقلل النزيف وتعالج اعراض تكيسات المبايض

ومئات الآلاف من البنات بتستخدمها قبل الجواز لعلاج اعراض تكيسات المبايض بأمان تام
تجارة الرعب للاسف بتجيب شير ولايك كتير ماتساعديش تجار الرعب
وياريت تساعدينا نوصل البوست لكل الناس إللي اترعبت
لايك 👍 للبوست وتعليق تحت 📝 ومنشن 🔖 لصاحبتك اللي نشرت بوست الرعب
لو عندك اي استفسار ممكن تشاركي علي الجروب بتاعنا من اللينك

https://www.facebook.com/groups/312845576271776/?ref=share&mibextid=NSMWBT

______________________________________
دكتور
دكتوراه التوليد وأمراض النساء
استشاري مناظير النساء والحقن
مدرس بكلية الطب
للحجز والاستفسار 📞 01020070798
📍 الاربعين بجوار مركز براعم للحضانات شارع الفرز

12/07/2025

⁉️نشيل الورم الليفي بس ولا الرحم كله⁉️
سؤال كل يوم

صلي علي رسول الله كدة وهنوضحها بالراحة
إجابة السؤال بتعتمد علي حاجتين بس
الرغبة في الانجاب والقدرة علي الانجاب
بس كدة بالبساطة دي

لو شيلنا الرحم كله انت فقدتي القدرة علي الانجاب
بس
الرحم وظيفته انك تخلفي
مالوش علاقة بالهرمونات مالوش علاقة الأنوثة وبرضه مش هايأثر علي العلاقة الزوجية
الأنوثة والهرمونات دي وظيفة المبيض اللي ممكن مانجيش جنبه عادي لو لسة شغال مافيهوش اورام

لو شيلنا الورم الليفي بس وحافظنا علي الرحم كدة عندنا فرصة للحمل وممكن يحصل حمل
بس برضه في احتمال بعد سنة اتنين تلاتة او عشرة ان الرحم يكوّن اورام ليفية تانية ويعمل نزيف تاني ونضطر ندخل عمليات تاني
وممكن كمان مايرجعش تاتي وتبقي مشكلتنا اتحلت

مثالين للتوضيح
💥لو عندك تلاتين سنة يبقي هنشيل الاورام الليفية ونسيب الرحم عشان يبقي في فرصة لحدوث حمل تاني سواء كان ورم واحد أو خمستاشر ورم ليفي
ولو طلبتي مني اشيل الرحم غالبا أرفض هاحاول اقنعك نحافظ علي الرحم الا لو معاكي خمس عيال مثلا ومصممة

في الحالات دي بنبقي حريصين جدا علي استئصال كل الاورام الليفية حتي الصغيرة جدا عشان نقلل احتمالية انها تكبر لان في حالات كتير لما بنشيل الاورام الكبيرة الدم كله بيتوجه للاورام الليفية الصغيرة وبتكبر بصورة سريعة

🔥طيب لو عندك خمسة واربعين سنة أو اكتر ومفيش فرصة لحدوث الحمل يبقي من مصلحتك اننا نشيل الرحم كله
انا عارف انها بتبقي ساعات نفسيا صعبة بس وقتها ده القرار الأقرب للصواب واللي هاحاول اقنعك بيه والقرار في الآخر هيرجع لك اكيد

هنجاوب في بوست تاني بقي نعمل العمليات دي منظار ولا فتح بطن عشان ده برضه تقريبا سؤال يومي
__________________________________________
دكتور
دكتوراه التوليد وأمراض النساء
استشاري مناظير النساء والحقن المجهري
مدرس بكلية الطب
للحجز والاستفسار 📞 01020070798
📍 الاربعين بجوار مركز براعم للحضانات شارع الفرز

21/06/2025

لو مش عاوزة حمل لازم وسيلة منع حمل عشان ماتجيش تقوليلي ازاي ابقي تيتا وحامل
اه عادي ممكن يحصل حمل بعد الاربعين ولو عاوزة حمل ودورتك منتظمة مش هندخل باي علاج

لو عندك اي استفسار ممكن تشاركي معانا علي جروبنا نستقبل الاستفسارات البوستات
بلاش اعلانات هتتمسح

https://www.facebook.com/groups/312845576271776/?ref=share&mibextid=NSMWBT

19/06/2025

والله الحاجات دي اللي بتصبرنا عالحياة الصعبة اللي بنعيشها في شغلنا
لما تسهر طول الليل عشان حالة بتولد طبيعي وتاني يوم عندك لستة عمليات وبعدها تروح العيادة
بناتك مش تشوفهم غير في الأعياد والإجازات القصيرة اللي بتاخدها
مفيش مواعيد شغل منتظمة والتليفون شغال علي طول
طواريء في اي وقت
مضاعفات كتير بتحصل ومفيش مفر غير انك تتعامل معاها باعصاب هادية وانت بتحاول تطمن الناس
علي فكرة اكتر سبب بيخلي الدكتور مايعرفش يتعامل مع المضاعفات بصورة سليمة دايما بيكون الاهل القلقانين لازم دايما تطمنهم وتعرفهم هتعمل ايه خطوة خطوة
عشان يساعدوك مش يعطلوك

عاوز اقول شكرا لكل اللي بعتولنا الهدايا الجميلة دي
احنا بنكمل عشانكم والله
دكتور

16/06/2025

هنبطل هزار عشان بنتفهم غلط
مفيش حاجة اسمها تقفيل جرح قيصرية بالليزر
الجرح لازم يتخيط

🚩الفيديو اللي فات كان واضح انه تهكم علي بعض الاطباء اللي بيدعو تقفيل الجرح بالليزر والمؤتمرات اللي غالبا بتبقي رشاوي مقنعة من شركات الادوية علي هيئة فسح والناس فهمت غلط ولقيت رسايل كتير بتسأل علي الليزر

🚩للتوضيح بس في خيوط بتدوب جوة الجسم زي "الفيكريل" اللي بنقفل بيه طبقات البطن الداخلية
وخيوط زي "البرولين" مابتدوبش في الجسم ودي بنفضلها في تقفيل الجروح لأنها مش بتتفاعل نهائي مع الجسم يعني ماينفعش اي جسم يكون عنده حساسية منها
لما تشيلي اللزقة وماتلاقيش خيط وتلاقي الجرح مقفول هنا احنا استخدمنا خيط بيدوب في الجسم ماستخدمناش ليزر ولا حاجة
الخيط ده هيدوب في خلال شهر لتلات شهور لوحده
لكن علميا افضل حاجة للجلد ان انا استخدم خيوط لا تتفاعل مع الجسم واشيلها بعد التئام الجرح

فك السلك مابيتعبش مش هتحسي بيه اصلا لما اقص طرف الخيط واشد الطرف التاني من الناحية التانية
اكتر حاجة ممكن تتعب اصلا هيبقي البلاستر اللي ممكن يكون لازق الجلد واللي هنشيله في كل الاحوال سواء خيط بيدوب او مش بيدوب
اتأكدي تماما اني بافضل استخدم افضل طريقة وأفضل أدوات وأفضل خيوط مثبتة علميا في الابحاث والدراسات العلمية البروتوكولات الطبية العالمية وده في كل خطوات الجراحة او العلاج
مش باعرف اشتغل بنظام ريح الزبون

🚩بنختار نوع التخدير اللي متأكدين علميا انه الأفضل وطول الوقت بنبقي معاكي عشان نقلل قلقك من التخدير ومش بنستخدم طريقة تخدير جايبينها من المتحف محدش في العالم بيستخدمها في الولادة دلوقتي الا في حالات خاصة

🚩في طرق كتيرة للولادة بدون الم بنختار منهم الطريقة الاعلي فاعلية والأكثر راحة وكتير منكم جربوها وشافو الفرق
مش بنروح بجهاز وندور علي حد يسلك الكانيولا لما تتسد

🚩معاد الولادة باحدده حسب ما العلم بيقول مش حسب مانت عاوزة او لما تزهقي حتي لو هتنزل تروحي تولدي مع زميل تاني ومش بابقي عاوزك تبوظي الطبخة علي اخر رشة ملح
🚩مش هاكتبلك علاج انا مقتنع انه مالوش فايدة
يعني علميا مفيش حاجة اسمها حقنة الصفرا اللي الام بتاخد ها عشان البيبي مايجيلوش صفرا
ومش كل الناس بتحتاج حقن الرئة اللي اصلا مالهاش اي فايدة لو ولدتي بعدها باكتر من اسبوع وده كلام الدراسات العلمية مش جايبه من بيتنا ولا من تجاربي الشخصية مع الحالات

ودي صورتي مع ليلي في المؤتمر 😂
اللي مش مؤتمر
ماتنسيش بقي تعملي لايك ولو في استفسار عام يبقي في الكومنتات اي استفسار خاص يبقي عالواتس
______________________________________
دكتور
دكتوراه التوليد وأمراض النساء
استشاري مناظير النساء والحقن المجهري
مدرس بكلية الطب
للحجز والاستفسار 📞 01020070798
📍 الاربعين بجوار مركز براعم للحضانات شارع الفرز

09/06/2025

اول يوم في العيادة باذن الله يوم الأربعاء
الحجز بالتليفون 👌 01020070798
كل سنة وانتم طيبين
اعتذر عن الرسايل اللي معرفتش ارد عليها اوقات طويلة مكانش معايا شبكة
وكل سنة وانتم طيبين
دكتور

03/06/2025

كل سنة وانتم طيبين
سؤال كل سنة
ينفع ناكل كبدة ولا ماينفعش في الحمل
ايوة ينفع
بس برضه ايوة في مشكلة في الكبدة
الكبدة فيها حاجات كتير مفيدة جدا واغنى مصدر للحديد ولفيتامينات كتير
لكن فيها فيتامين الف كتير
هو في الجرعات العادية مش غلط لكن لو بصورة كبيرة ممكن يعمل مشكلة
يعني ينفع ناكل كبدة في العيد بالهنا والشفا وينفع كل اسبوع او اسبوعين مرة
لكن ماينفعش كل يوم كبدة
بس كدة
اللينك ده هاتلاقي عليه ناكل إيه ونشرب إيه في الحمل

https://m.facebook.com/story.php?story_fbid=2340077032892731&id=2242963322604103

كل سنة وانتم طيبين وعيد اضحي سعيد

دكتور

دكتور محمد فوزي - جراح ومدرس النساء والتوليد بكلية الطب

23/09/2025

22/08/2025

19/08/2025

18/08/2025

02/08/2025

22/07/2025

12/07/2025

21/06/2025

19/06/2025

16/06/2025

09/06/2025

03/06/2025

Address

Telephone

Website

Alerts

Contact The Practice

Shortcuts

Share

Category