19/09/2025
أول 3 سنين من عمر الطفل الأم بتعمل مجهود خرافي في رعاية الطفل
كائن ضعيف محتاج خدمة 24 ساعه ..
أكل ، شرب ، نضافه ، رضاعه ، سهر ، قلة نوم ، بامبرز وأخيرا مرحلة البوتي تريننج
وصلتي لهنا ... فربنا يباركلك وجزيتي خيرا ع تعبك معاه❤️
لكن اول متخلصي مرحلة البوتي تريننج ويبدأ يعتمد ع نفسه في بعض الأمور
اعرفي انك دخلتي في مرحلة جديده
تعب جسماني أقل .. لكن محتاجه صبر وحكمة وهدوء أعصاب
إعتبري ابنك ده مشروع بتشتغلي عليه
خططي لحياته من دلوقتي
أول حاجه بصي ع حصيلته اللغويه
بدأ يكون جمله ولا لأ
بيردد كلامك وكل يوم في تطور ولالا
لو في مشكله .. اسعي في حلها متستنيش
لو تمام والحصيله كويسه فده أفضل سن ممكن يكتسب فيه معلومات ويحفظ فيه
لسه عقله رايق وفاضي ليكي ومحتاج نعمل مخزون كويس
حفظيه أي حاجه تخطر ع بالك💯
ألوان
حيوانات
بلاد
قرآن
أعضاء جسمه
هتعلميه عربي إنجليش أي شئ فنسبة استيعابه هتكون أفضل من السن الأكبر👍🏼👍🏼
اشتغلي ع الخصوصيه
دي بتاعتي ودي بتاعتك
مينفعش تاخد ده
دي هدومك ودي هدوم أخوك
ده أكلك وده أكل اختك وهكذا
بعد 3 سنين هنبدأ ندخل كلمة ( الجنه) في جمله
ولكن مش هنذكر ( النار) خالص
تعالي نعمل كذا عشان نروح الجنه سوا ❤️
الجنه جميله وفيها كل حاجه بتحبها
كده غلط وربنا هيزعل منك
بعد أربع سنين .. إعطيه نبذه صغيره عن ( النار)
الناس الوحشه اللي مش بتطيع ربنا هتدخل النار
ولكن هنذكر الجنه وجمالها واننا بنعمل كل حاجه حلوه عشان نخش الجنه أكتر من ذكر (النار)
بدأ يتعود ياكل لوحده
علميه يسمي الله
وبعد مايخلص أكل يقول ( الحمدلله)
تعمدي تعلي صوتك وانتي بتعملي ده عشان يعمل زيك ❤️
هيبدأ يكون نسخه من كل اللي معاه في البيت ويردد نفس الكلام بنفس الاسلوب
نشتغل ع نفسنا ونظهر أحسن ما فينا عشانهم
سن ال3 و ال4 وال 5 سنوات
سن مهم وبيعتمد عليه السن اللي بعده
والله المستعان ❤️
