29/01/2026
يامدام ..
حضرتك أنسب عمر للولادة هو بعد نص الشهر التاسع إلا لو فيه سبب واضح (في الأم أو الجنين أو الحمل) يستدعي ولادة بدري عن كدا
فماينفعش نولد الطفل بدري لمجرد انه يتسجل في نفس اليوم اللي اتولدت فيه بنت خالتك أو في يوم عيد ميلاد جوزك أو عشان يلحق يتسجل السنة دي عشان المدرسة ولا عشان يتولد في نفس يوم ميلاد اخوه
حضرتك بنت خالتك مش هتنفعه لما تولدي بدري وتلاقيه تعبان ومحتاج حضانة ، وجوزك أكيد مش هيبقى مبسوط لو حصل دا ، وميعاد المدرسة مش حاجة تستدعي نولده بدري ونعرضه للخطورة دي ..
احنا بنعتبر الطفل مكتمل ابتداء من منتصف الشهر التاسع فيما بعد ..
وبالمناسبة .. حقن الرئة ليست بديلا عن عمر الجنين .. يعني مش معنى انك أخدتي حقن الرئة انه خلاص بقى نولد أول يوم في التاسع !!
وبرضه مش معنى ان وزن الجنين زيادة شوية اننا نولده بدري ..
دمتم بخير وعافية 💐 💐 💐
قبل كدا بلاش تضغطي على الدكتور وتفتعلي شكاوي مش موجودة عشان تولدي بدري ..
ماتخافيش بطنك مش هتبوظ في اليومين دول 😃😃
