26/10/2025
مفيش أكلة ممنوعة! 🍰🍕
مفيش حاجة اسمها أكل محرم أو ممنوع تمامًا…
فيه أكل ممكن تاكله كل يوم،
وأكل تاكله أحيانًا،
وأكل تاكله نادرًا.
لكن فكرة “الأكل الممنوع” هي الأخطر! 😱
لأن مجرد ما تمنع نفسك منه، عقلك بيبدأ يدوّر عليه طول الوقت!
وده اللي بيخليك تفقد السيطرة في أول فرصة.
⚖️ علشان كده، بحب أعيش بنظام بسيط جدًا بس فعّال:
أسلوب حياة 80:20
يعني إيه؟
إنك تسيطر على أكلك بنسبة 80٪ في الأيام العادية،
والـ20٪ الباقيين تسيب مساحة بسيطة لنفسك في المناسبات الخاصة 🎉
احنا مش ملايكة… ولا مطلوب مننا الكمال 🙌
لو المريض قالي: “الشهر ده كنت نص نص”
برد عليه: “جميل جدًا، ده أحسن من إنك تبقى صفر!”
حتى 60٪ التزام يعتبر إنجاز 💪
لكن خلي بالك ⚠️
محتاج يكون عندك نظام إنذار مبكر علشان ما يحصلش انتكاسة.
القانون بسيط جدًا:
❌ ما تغلطش أكتر من 3 مرات ورا بعض.
يعني مش ينفع تقول “عيد ميلادي” 3 أيام ورا بعض 🎂
ولا تحتفل بالكريسماس أسبوع كامل 😅
ولو غبت عن الجيم 3 مرات متتالية…
صدقني المرة الرابعة مش هتروح!
✅ القاعدة الذهبية:
غلطة أو اتنين تتصلح،
لكن التالتة بداية التراجع.
خليك دايمًا في المنطقة الرمادية الإيجابية…
لا كمال ولا فوضى، بس توازن ذكي ومستمر ⚖️
