https://www.facebook.com/198307480556836/

د.راندا الشرقاوي, ميدان السيد البدوي, Tanta (2026)

Q: What is the address?

ميدان السيد البدوي

26/11/2025

ازيكم
من وجهه نظركم ايه هي العلاقه الصحيه ؟؟!

19/10/2025

لما تحس إنك بطّلت تحس…

أحيانًا بعد ما نمر بظروف كتير،
بنكتشف إن مفيش فرق بين الفرح والحزن…
كله بقى شبه بعضه.
بطّلت أحس. بطّلت أتفاعل.
حتى اتخاذ القرار بقى صعب.
منهك نفسيًا وجسديًا… مش قادر أعمل حاجة.
بهرب من التفكير، من المواجهة،
ومن أبسط أشكال التعامل.

اللي بيحصل دا اسمه الخدر العاطفي أو التجمّد العاطفي.
العقل بيدخل في حالة “Freeze”
علشان يقدر يحميك من الانهيار،
علشان تكمّل وتعيش.
لكنه في المقابل… بيخزّن كل الألم والوجع جواك،
ولما يتراكم، بيحتاج مساحة آمنة يتفك فيها بهدوء ❤️‍🩹
** ولو حاسس إنك في المرحلة دي،
خدها كإشارة مش كفشل.
مشاعرك مش اتلغت، هي بس محطوطة “على الصامت” لحد ما تحس بالأمان.
ارجع خطوة واهتم بنفسك، اطلب دعم لو احتجت،
وصدق إن الإحساس هيرجع لما تبقى مستعد 🌿

15/10/2025

النهارده هتكلم كصديقة قبل ما أكون معالجة نفسية 💔

كان ليا صحبتي أصغر مني ،
من فترة بدأت تشتكي من كل أنواع التعب الجسدي..
كشفت كتير، عملت تحاليل، ومفيش سبب واضح.
كنت عارفة إن عندها مشاكل كتير ، ومش قادرة تستوعب اللي بيحصل في حياتها.
كنا بنشوفها بتضحك، وبتهزر، لكن كنت حاسة إن ورا الضحكة دي في وجع كبير.

امبارح دخلت العناية في غيبوبة كاملة، والنهارده ربنا رحمها.
ربنا يعوض شبابها الجنة، ويجعل صبرها وتعبها في ميزان حسناتها 🤍

اللي عايزة أقوله من قلبي:
المرض النفسي مش عيب، ولا حرام، ولا قلة إيمان.
الوجع النفسي لو اتكمم وسكتنا عليه، بيتحول لجسد بيتوجّع.
بيفلص في أمراض عضوية، في صداع، في وجع، وفي حالات كتير ربنا وحده يعلم سببها الحقيقي.

أنا شُفت ناس تتعب وتتوفى من وجع نفسي متراكم… من كلمة ما اتقالتش، أو من حزن ما اتشافش.

ارجوكم، كفاية نحكم على التعب النفسي كأنه ضعف.كفايه وصمه عار

وفي الآخر...
ربنا يرحمك يا آيات، ويغفرلك، ويثبتك عند السؤال ويعوض شبابك الجنه ويصبر قلب ابنك ويتولاه برحمته🤍🕊️

02/10/2025

سؤال لولبي: هو انتي بتتعبي زينا كدا 🙃؟
يعني لما بتقابلك مشاكل بتحليها في ثانية، دا شغلك بقى 😇؟

أنا: باب النجار مخلّع.. 😅
إنت مستني أقولك كدا؟ ولا أقولك: I'm a strong independent woman 👠🤕💃؟

الحقيقة إن المعالج مش روبوت.. هو إنسان قبل أي حاجة.
بيتعب، بيتعرض لضغوط، ومشاكل شخصية زي أي حد.
والوعي الحقيقي مش إنه يتظاهر إنه بخير، لكن إنه يعرف إمتى يلجأ لمعالج أو لإشراف مهني.
المعالج اللي يطلب مساعدة مش ضعيف، بالعكس..
هو شخص فاهم إن اللي يهتم بنفسه يقدر يكون حاضر بصدق مع غيره.
في الآخر.. كلنا محتاجين حد يسمعنا، حتى اللي بيسمعوا غيرهم كل يوم 💙

29/09/2025

ناس كتير بتسأل: "هو المعالج النفسي بيتأثر بمشاكل عملائه ؟ ازاي بتسمعي كل المشاكل دي ومش بتأثر عليكي طاقه سلبيه كتير ازاي بتعرفي تفصلي وتبقي برده متعاطفه معايا ؟؟!!"
الحقيقة إن المعالج مش روبوت.. هو إنسان عنده قلب ومشاعر.
أوقات بيتأثر، خاصة لو القصة فيها وجع يشبه وجعه، أو حاجة بتلمس جواه.

لكن الفرق إن المعالج متدرّب يعرف يحافظ على "المسافة المهنية"، يسمع ويتعاطف، من غير ما يشيل الحمل كله على كتفه.
وعشان كدا دايمًا بيهتم إنه ياخد إشراف ودعم، ويعتني بنفسه، عشان يقدر يكون حاضر لمريضه من غير ما ينهار.

التأثر مش ضعف.. التأثر إنسانية. والوعي هو اللي بيخلي المعالج يعرف يوازن بين تعاطفه وحياته الخاصة.

23/09/2025

في حاجه اسمها ازدواجية الفكرة أو التعلق المتناقض. يعني مثلا العقل يبقى ماسك في فكرتين عكس بعض:
"أنا مرتاحة لوحدي" بس "نفسي أتجوز"( بتبقي شغاله في
الخلفيه)
النتيجة؟ تفضلي عايشة وإنتي كأن جواكي صوت شغال في الخلفية، مش سايبك تستمتعي باللحظة.
فلما ييجي موقف فيه جواز أو علاقة، بتتصاعد الفكرة التانية: "ليه أنا مش كدا؟"، وتحسي إن في جزء منك ناقص أو محروم.
ده طبيعي يحصل مع أي فكرة متعلقة بالاحتياج الإنساني (زي الحب، القبول، الأمان). المشكلة مش في وجود الفكرة، المشكلة في التعلق بيها وكأنها شرط للسعادة.

لو عايزة تواجهيها عمليًا:

1. اسألي نفسك: أنا فعلاً محتاجة ده دلوقتي، ولا دي فكرة بترن في الخلفية وخلاص؟

2. حوّلي الفكرة من "لازم" لـ "ممكن". يعني: بدل "لازم أتجوز عشان أكون كويسة" تبقى "ممكن أتجوز وأكون كويسة، وممكن أكون كويسة دلوقتي".

3. ذكّري نفسك إن ربنا قادر يغير حياتك كلها في لمحة بصر، مش شرط على إيقاعك أو توقيتك.💙💙

10/09/2025

مفيش يأس حقيقي… إحنا ساعات بس بنبقى سجناء أفكارنا.
فكرة واحدة ممكن تتحول لسجن عمر كامل.
دور المعالج مش إنه يعيش مكانك أو ياخد خطواتك، هو بس بيمهدلك الطريق عشان تكمل لوحدك.
ما تسيبش الفكرة تسيطر عليك… ربنا قادر يغير من حال لحال في طرفة عين."

22/08/2025

إيمانًا منا بأهمية الصحة النفسية وتأثيرها على جودة الحياة، واستكمالًا لما كانت تفعله د. راندا الشرقاوي – رحمها الله –
يسر مركز جواد أن يعلن عن تفعيل يوم الاثنين الأول والأخير من كل شهر لتقديم الجلسات المخفضة، وذلك دعمًا لغير القادرين.(الحجز بميعاد مسبق)
هدفنا إن يكون العلاج النفسي متاح للجميع، لأن كل إنسان يستحق يعيش بصحة نفسية أفضل.
للتواصل 01289177570
012 83117800

13/08/2025

أوقات الوجع بيكون أريح من الشفاء… والضحية بتبقى أسهل من المتعافي.
دي حكاية من قلب شغلي…

فيه ناس… بتحب وجعها أكتر ما بتحب نفسها.
ييجوا يقولوا "عايزين نتغير"، من باب أنا عملت اللي عليا وأول ما أقرب من الجرح الحقيقي، ألاقيهم بيبعدوا متمسكين بدور الضحية لانه بقي هو ومش عاوز يغيره بياخد تعاطف وحب وحنان وكل اللي هو عاوزه.
لكن المتعافي… عليه يشوف نفسه بوضوح، يعترف، يشتغل على نفسه، يوقف لوم الآخرين، وياخد خطوات مش سهلة.
أوقات، وأنا قاعدة قدامهم، بحس إني سامعة نفس القصة بنفس النبرة… انتوا السبب انتو الغلط.
ولو حاولت أغيّر الإيقاع أو أفتح باب مختلف… يقلبوا عليّ ويحطوني في قايمة "الأشرار" في حياتهم.
ومع كده… عمري ما قلت لحد "ما تجيش تاني".
يمكن لأني عندي امل أنهم يفوقوا قبل ما يضعوا نفسهم واللي حواليهم كمان … يمكن المرة الجاية يبقى فيه فرق، يمكن ربنا يبعتله موقف يقلب موازينه ويخليه يسيب دور الضحية ويمسك في نفسه.
اتعلمت إن مش كل صرخة وجع معناها نية شفاء،
ومش دايمًا العلاج بيعالج،
وأوقات… أنا كمعالجة، بخرج من الجلسة وأنا موجوعة أكتر من اللي قدامي.
بس برجع وأقول… يا رب علّمني الرحمة قبل الحكمة. 🤲❤️

05/08/2025

يا ترى إيه اللي بيحصل لما حد يقول لنا كلام يوجع تحت ستاره بهزر اللي في قلبي ع لساني ؟
من وجهة نظر علم النفس، الكلام ده ليه أثر كبير، بالذات على صحتنا النفسية. الكلام ده ممكن يسبب لينا:
* وجع نفسي: الكلام ده بيوجع زي الخبطة، والمخ بيتعامل معاه بنفس طريقة تعامله مع الألم الجسدي.
* ثقتنا بنفسنا بتتهز: لما حد يقلل مننا أو ينتقدنا على طول، بنبتدي نشك في نفسنا وقدراتنا.
* خوف من الناس: الكلام الجارح ممكن يخلينا نتكسف من نفسنا ونبعد عن الناس عشان خايفين يوجعونا تاني.
طيب، إزاي نتعامل مع الكلام اللي بيوجع؟
لما حد يجرحنا بكلامه، ممكن نعمل كام حاجة عشان نحمي نفسنا:
* وضحي له بهدوء: ممكن تقولي له: "لما بتقول الكلام ده، أنا بتضايق"، بدل ما تقولي له "أنت شخص جارح". التركيز هنا على مشاعرك إنتِ، مش عليه هو.
* حطي حدود: من حقك تقولي للشخص ده إنك مش هتقبلي أي كلام جارح تاني، وإنك هتنهي الكلام لو ده حصل.
* دوري على دعم: لو الكلام ده مأثر عليكي بشكل كبير، يبقى لازم تكلمي حد تثقي فيه أو حتى دكتور نفسي عشان يساعدك.
نصيحة ليكِ عشان كلامك ما يجرحش حد
الكلام مسؤولية، وده معناه إننا لازم ناخد بالنا من كل كلمة بنقولها. عشان كده، قبل ما تتكلمي:
* فكري قبل ما تقولي: اسألي نفسك: هل الكلام ده ضروري؟ هل الكلام ده هيسعد اللي قدامي ولا هيوجعه؟
* حطي نفسك مكان غيرك: افتكري إن كل واحد له مشاعره وظروفه، وحاولي تتعاطفي معاه عشان ما تجرحيهوش.
الكلام اللي بيوجع ممكن يفضل عايش جوانا لوقت طويل، عشان كده لازم نختار كلامنا بحرص ونخلي كلامنا دايماً يكون لطيف.

24/07/2025

عارف لما تعمل حادثة وجسمك كله يتدغدغ ومش يبقي فيه حته سليمه ويتحتاج وقت عشان يتحسن ويفوق.....
الاكتئاب برده حادثة بس مش سير دي حادثه جوا روحك
اديها الوقت والمساحه عشان ترجع تتلملم نفسها تاني
خد خطوه واحده كل يوم ليك مش عليك
ارتاح وقوم

13/07/2025

سؤال للنقاش
من وجهه نظرك ايه هو سبب المرض النفسي اي كان نوع المرض؟! وانتي نقول دا مرض مش عرض؟

د.راندا الشرقاوي

26/11/2025

19/10/2025

15/10/2025

02/10/2025

29/09/2025

23/09/2025

10/09/2025

22/08/2025

13/08/2025

05/08/2025

24/07/2025

13/07/2025

Address

Telephone

Website

Alerts

Shortcuts

Share

Category