05/03/2026
لو سألوكي مين هينتصر ..هتردي تقولي ايه ؟؟
كل البيوت دلوقتي بتتابع الأحداث اللي بتحصل في العالم
وطبيعي أولادنا كمان غصب عنهم هيشوفوا وهيسمعوا
وطبيعي يدور في ذهنهم حوارات وأسئلة ..
ايه السبب…؟؟
ليه ده بيحصل ..؟؟
مين هينتصر ..؟؟
وفرصتنا ان احنا نوضح ونطمن ونرسخ في نفوسهم ان النصر عند ربنا ليه معايير واضحة ..لا تتبدل ولا تتغير مهما دار الزمن واختلفت الأحداث
ولنا في غزوة بدر العبرة والعظة
قِلّة… بلا عُدّة كافية…
لكن ناس قلوبها بتمتليء باليقين
ربنا سبحانه وتعالى قال:
﴿وَلَقَدْ نَصَرَكُمُ اللَّهُ بِبَدْرٍ وَأَنتُمْ أَذِلَّةٌ﴾
ما قالش وأنتم أقوياء…
ولا وأنتم مستعدّين…
قال: وأنتم أذلّة.
عشان يعلّمنا إن معادلات السماء غير معادلات الأرض.
وإن النصر مش وليد السلاح…
بل وليد الصدق، والثبات، والتجرّد لله.
لما نحكي لأولادنا عن بدر في الأيام دي…
مش بنحكي قصة معركة.
إحنا بنغرس فيهم معنى:
إن قلة الإمكانيات لا تعني قلة العناية.
وإن تأخر النصر لا يعني غيابه.
وإن الله يُدبّر الأمر ولو خالف كل حسابات البشر.
إحنا مش مطلوب مننا نفس اللي اتطُلب منهم.
لكن مطلوب مننا نفس الأصل:
صدق القلب…
وصلاح العمل…
وحسن الظن بالله.
يمكن أعظم ما نورثه لأولادنا في زمن الاضطراب…
قلبًا مطمئنًا بأن الله غالب على أمره.
ايه القصة اللي بتحبي تطمني بيها ولادك في الاحداث اللي زي دي ؟؟
