02/02/2026
كل سنة وحضراتكم طيبين..
هنبدأ سلسلة تغيير بعض المفاهيم أو العادات الخاطئة فى حياتنا , البوست هيبقى طويل شويه , بس بإذن الله يضيف حاجه إيجابيه فى حياتك .
لسه بدري على رمضان؟ لأ مش بدري ولا حاجة، جسمك محتاج يستعد من دلوقتي عشان ميتصدمش أول يوم.
عشان المحتوى الطبي يوصل لكل الناس، محتاجين دعمكم المستمر.. تفاعل بسيط منك ممكن يكون سبب إن معلومة مهمة توصل لحد محتاجها ضروري ❤
نيجي بقى للمهم.. أول يوم رمضان، قبل الفطار بساعة، تلاقي نص الناس ماسكة دماغها ومش طايقة كلمة من حد.. والكل فاكر إن ده بسبب "الجوع" أو "العطش". الحقيقة إن المتهم الرئيسي هنا هو "الكافيين" اللي جسمك بيبدأ يصرخ عشان محتاجه.
هو إيه اللي بيحصل في جسمنا لما بنبطل شاي وقهوة فجأة؟
حضرتك متعود تشرب قهوة أو شاي الصبح.. الكافيين ده مادة بتعمل انقباض للأوعية الدموية في المخ.. لما بتيجي فجأة تمنعه (في الصيام)، الأوعية دي بترجع تتوسع تاني وبزيادة، وده بيضغط على الأعصاب وبيعمل الصداع الرهيب اللي بنسميه "أعراض انسحاب".
طب والحل؟ هل نبطل شاي وقهوة خالص؟
لأ طبعاً.. الحل في كلمة واحدة: "إنك تعوَّد جسمك".
لو حضرتك بتشرب ٣ كوبايات في اليوم، مينفعش تصحى أول يوم رمضان تخليهم "صفر" لحد المغرب. جسمك هيعملك مشكلة.
الخطة من النهاردة:
قلل الكمية: لو بتشرب ٣ خليهم ٢، وبعد يومين خليهم واحدة.
أخر الميعاد: بلاش قهوة الصبح بدري أول ما تصحى.. حاول تأخر أول كوباية كل يوم ساعة، لحد ما تقرب ميعادها من ميعاد "المغرب".
اخدع عقلك: جرب تشرب قهوة "ديكاف" (منزوعة الكافيين) في وسط اليوم، عشان ترضي العادة النفسية من غير ما تدخل كافيين لجسمك.
نيجي بقه للناس اللي فاكرة إنها لو شربت "جردل قهوة" في السحور مش هتصدع تاني يوم.. للأسف حضرتك كده بتعمل مشكلتين:
أولاً الكافيين مدر للبول فهتعطش جداً،
وثانياً مفعوله هيروح على الضهر وهتصدع برضه.
فـابدأ درب جسمك من دلوقتي، عشان أول يوم رمضان يبقى للعبادة واللمة الحلوة، مش للنوم والصداع والنرفزة.
وأخيراً وَمَا تَوْفِيقِي إِلَّا بِاللَّهِ ۚ عَلَيْهِ تَوَكَّلْتُ وَإِلَيْهِ أُنِيبُ
يا رب اكون قدرت افيدكم بمعلومة وبس كده ❤
