14/02/2026
مريض #القلب ❤️ ياخد علاجه إزاي في #رمضان 🌙؟ ومين يقدر يصوم ومين لازم يفطر؟!
--------------------------------
رمضان قرب كل عام وأنتم بخير وربنا يتقبل منا الصيام وصالح الأعمال.
أغلب المرضى اللي بنقابلهم بيكونوا رافضين يفطروا في رمضان حتى لو نصحناهم بكده؛ علشان كده هأبدأ بالكلام على الناس اللي ننصحهم يفطروا لأن الصيام ممكن يسبب ليهم ضرر.
١- المرضى الي بيعانوا من ذبحة صدرية غير مستقرة أو جلطة في القلب حديثة.
٢- المرضى اللي عاملين عمليات حديثا زي تركيب الدعامات أو جراحة قلب مفتوح لزراعة الشرايين.
وكلمة حديث في النوعين دول مدتها أد إيه؟ الحقيقة إن مفيش دراسات كتير نقدر من خلالها نحدد أقل مدة يقدر بعدها المريض يصوم لكن لو أخدنا بالأحوط لصحة المريض هنقول يفطر لمدة ٣-٦ شهور بعد حصول حاجة من النوعين دول وبعدها يقدر يقضي أيام الصيام ويفضل طبعا إن القضاء يبقى في الشتاء مش الصيف لأن النهار أقصر ومفيش فقد كبير للسوائل من الجسم.
٣- مرضى ضعف عضلة القلب اللي بيحتاجوا لجرعات كبيرة من دواء مدر للبول لمنع تجمع المياة بالجسم.
٤- مرضى الضغط اللي ضغطهم مبيتظبطش إلا بأنواع كتير من أدوية الضغط واللي بتتاخد أكثر من مرة ف اليوم بحيث إن الصوم هيمنع السيطرة على الضغط.
والنوعين دول هيحتاجوا تقييم من الطبيب لدرجة الحالة بحيث يحدد مين لازم يفطر ومين يفضل إنه يفطر ومين يقدر يصوم بدون ضرر.
دول أشهر الأسباب اللي تخلي مريض القلب يفطر، لكن أغلب مرضى القلب فيما عدا كدا يقدروا يصوموا بدون مشاكل، مرضى الذبحة الصدرية المستقرة وضعف عضلة القلب والضغط والصمامات اللي حالتهم مستقرة مع العلاج وحتى المرضى اللي عاملين جراحات بالقلب أو مركبين دعامات من فترة تزيد على ٦ أشهر يقدروا يصوموا بدون ضرر في أغلب الحالات.
طيب إزاي ناخد العلاج مع الصيام؟
--------------------------------
# المرضى اللي بياخدوا مدر للبول يرجعوا للطبيب لأن جرعة مدر البول ممكن تقل مع الصيام.
# المرضى اللي بياخدوا أدوية جرعتها مرة أو مرتين في اليوم غالبا مش هيبقى عندهم مشكلة لأن العلاج هيتوزع بين الإفطار والسحور لكن المرضى اللي بياخدوا أدوية جرعتها ٣ أو ٤ مرات ف اليوم يرجعوا للطبيب لكتابة بدائل جرعتها مرة أو مرتين.
# في أدوية كتير مش هيفرق لو أخدناها قبل الأكل أو بعده وكمان الأدوية اللي بتتاخد بعد الأكل مفيش فيهم مشكلة لكن في أدوية بتتاخد على معدة فاضية وهتلاقى الأطباء بيفصلوا بينها وبين الأكل بنصف ساعة على الأقل (قرص قبل الأكل بنصف ساعة) الأدوية دي يفضل تتاخد قبل السحور علشان مانعذبش المريض ونأخره عن الأكل ساعة الإفطار.
# أدوية السيولة زي الأسبرين بتتاخد بعد الأكل فطار أو سحور مفيش مشكلة.
# أدوية الكوليسترول بتتاخد مساء أفضل وبعد الأكل يبقى ناخدها بعد الإفطار.
#شارك وخلى غيرك يستفيد
------------------------------------------
#الزقازيق: ناصية شارع أبو نضارة ، امتداد كوبري العبور طريق المنصورة ، بعد كوبري العبور ب ٢٠٠ متر تقريبا
للتواصل: 01030983489
