08/08/2021
كل ما ينبغي أن نعرفه عن (الغضروف وألم أسفل الظهر وعرق النَّسا) :-
🔹 س :- يعني إيه (عِرْق النَّسا) ؟؟
🔸 ج :- عرق النسا( أو علمياً Sciatica )...ده وصف للألم الموجود بطول مسار العصب الوركي Sciatic nerve
🔹 س:- وإيه هو ( العصب الوركي ) ؟؟
🔸 ج :- هو العصب اللي بيغذّي معظم الطرف السفلي وبيتكوِّن من اتحاد 5 جذور عصبية ( 2 جذور قطنية + 3 جذور عجزية L4,5- S1,2,3 ).
🔹 س:- ياااااه...5 جذور عصبية...علشان تكوِّن عصب واحد بس !!!!
🔸 ج:- اه طبعاً ... لأن ده مش أي عصب ...ده أطول وأضخم عصب في جسم الإنسان ... (علي فكره ... ده العصب اللي بنخاف نلمسه واحنا بندِّي (الحقن العضل) لأي حَدْ).
🔹 س :- هو عرق النسا ده...بيحصل للستات بس ؟؟
🔸 ج :- لأ طبعاً...ممكن يحصل للستات أو للرجاله.
🔹 س :- طب ليه احنا فاكرين إن عرق النسا بيحصل في الستات بس ؟!!!
🔸 ج :- علشان احنا بننطق الكلمة غلط...بكسر النون ( النِّسا ) ...والصح تتنطق بفتح النون ( النَّسا )
🔹 س :- هوا عرق النسا...بييجي في الرجل اليمين ولا في الشمال ؟؟
🔸 ج :- لأن ربنا سبحانه وتعالي خالق عصب للرجل اليمين وعصب للرجل الشمال...فممكن عرق النسا ييجي في الرجل اليمين أو في الشمال ...وممكن ييجي في الاتنين - بس في حالات أقل - .
🔹 س :- طب أعرف إزاي إن عندي عرق النسا؟؟ أعراضه إيه ؟؟
🔸 ج :- عرق النسا عبارة عن :- ألم موجود ف أسفل الضهر بينزل لمنطقة الإليا -فقط- أو ممكن يكمل وينزل ف الفخد من ورا - فقط- أو يكمل وينزل لقصبة الرِجْل أوالسمانة..أو واخد الرِجل كلها
🔹 س :- وإيه كمان ؟؟
🔸 ج :- الألم ده :-
* ممكن يكون بسيط أو شديد
* بيتوصف كـ ( شد عضلي , حرقان, لسعة كهربا, تقطيع, نار ) ..ربنا يشفي كل مريض
* الألم ممكن يكون مستمر continuous وممكن يكون..بيروح وييجي intermittent
* الألم بيزيد مع القعدة ، المشي، الوقوف
* الألم بيزيد مع الكحة ، العطس ، الحزق straining
* الألم ممكن يظهر بالتدريج gradual وممكن يظهر مرة واحدة acute .
🔹 س :- ممكن يكون في أعراض تانية مع الألم ده - عرق النسا - ؟؟
🔸 ج :- اه ... ممكن يكون في :-
* تنميل وخدل
* ضعف بحركة مشط القدم Foot Drop
* أعراض متلازمة "ذيل الفرس" Cauda Equina Syndrome ودي أهم وأخطر نقطة في الموضوع كله.
🔹 س :- طب..ممكن ناخدهم نقطة.. نقطة :- سقوط مشط القدم ومتلازمة ذيل الفرس لأهميتهم الشديدة ؟؟
🔸 ج :- سقوط مشط القدم :- المريض ممكن يحس إن :- رجله بتسيب وهوا ماشي أو بتخونه أو هيقع أو الشبشب بيفلت منه أو طلوع السلم بقا أصعب عن المعتاد...وده معناه إن الجزء الحركي من العصب motor part بدأ يتأثر من ضغط الغضروف عليه...وده بيتطلب التدخل الجراحي السريع .
🔹 س :- طب و "متلازمة ذيل الفرس " ؟؟
🔸 ج :- لو نظرت لذيل الفرس..هتلاقيه عباره عن (حِزمة) متجمعة مع بعض...بالظبط كده...لو كان الغضروف في المنتصف وكبير جداً Large central Disc ( ومعاه كمان اختناق بالقناة العصبية القطنية )...ف هيحصل ضغط شديد علي (حِزمة الأعصاب) المسؤولة عن حركة الطرفين السفليين + التحكم في البول والبراز + الانتصاب...رحمة من ربنا...إن الحالات دي نادرة...لكن لو حصلت...لازم جراحة فورية لإنقاذ هذه الأعصاب شديدة الحساسية والتأثر .
🔹 س :- إيه أسباب عرق النسا ؟؟
🔸 ج :- شرحت في المقال السابق أسباب عرق النسا...ونفتكر مع بعض إن 80 % من حالات عرق النسا...سببها "الغضروف"
🔹 س :- طب والغضروف ده...بيعمل وجع ف الضهر بس ولا بيعمل كمان عرق النسا ؟؟
🔸 ج :- الغضروف ممكن يعمل وجع ف الضهر بس...وممكن يعمل وجع ف الضهر ويكون معاه عرق النسا .
🔹 س :- وهل عرق النسا ممكن ييجي من غير ما يكون معاه وجع ف الضهر ؟؟
🔸 ج :- اه طبعاً
🔹 س :- ولو في غضروف...ايه اهم :- وجع الضهر ولا عرق النسا ؟؟
🔸 ج :- الاتنين مهمين ...بس قولاً واحداً ...عرق النسا طبعاً
🔹 س :- ليه عرق النسا أهم ؟؟
🔸 ج :- لأن زي ما عرفنا في المقال السابق ...إن عرق النسا معناه إن العصب ممكن يكون ( مضغوط + مخنوق + ملتهب )..هوا ناقص ايه تاني اكتر من كده ممكن يحصل للعصب !!!!!!
🔹 س :- هوا عرق النسا ممكن يعمل (وَرَم) ف الرجل ؟؟
🔸 ج :- لأ...ورم الرجل ممكن يكون موجود حوالين الانكل أو يظهر مع الضغط علي قصبة الرِجل أو تورُّم وتحجُّر بالسمانة...وكل واحدة من دول ولها أسبابها...
🔹 س :-هوا عرق النسا ممكن ييجي مع ( الحمل )؟؟
🔸 ج :- اه طبعاً...والحمد لله في معظم الحالات بيتحسن تماماً بعد الولادة
🔹 س :- هوا كل الناس ممكن يحصل لهم الغضروف وعرق النسا ؟؟ ولاّ في ناس أكتر عرضة للإصابة بعرق النسا عن غيرهم ؟؟
🔸 ج :- الناس الأكتر عُرضة للإصابة بالغضروف وعرق النسا Risk factors :-
* أكبر ضرر علي الغضروف وضعية ( الانحناء للأمام وشيل حاجات تقيلة من الأرض ).
* الوظائف التي تتطلَّب الجلوس لفترات طويلة
* الجلوس في وضعية خطأ لفترات طويلة
* مرضي السمنة ، مرضي السكر ، كبار السن
* عدم ممارسة الرياضة
* التدخين
🔹 س :- طب إزاي أحافظ علي نفسي من الغضروف ومن عرق النسا؟؟
🔸 ج :- لو تجنَّبنا الأسباب السابقة... بمعني :-
*عدم رفع أشياء ثقيلة من الأرض وانت حاني ضهرك
* ممنوع تقعد لفترات طويلة..قوم من مكانك اتمشي شويه..وارجع اقعد تاني...وهكذا
* حافظ علي استقامة ضهرك أثناء الجلوس
* إنقاص الوزن ، ظبط السكر
* الاهتمام بشرب المياه وتناول الاطعمة الغنية بالكالسيوم وڤيتامين D
* ممارسة الرياضة...المشي مثلاً مفيش اسهل - ولا أهم - منه...مش للعمود الفقري وبس لأ... ده كمان لسلامة وصحة القلب والمخ كمان.
* الإقلاع عن التدخين
🔹 س :- معني كلامك...ان احنا نقدر نمنع حدوث الغضروف وعرق النسا ؟؟
🔸 ج :- مش الغضروف وعرق النسا وبس..لأ...ده معظم أمراض الطب تقدر تمنعها لو توافر الوعي الطبي العلمي الصحيح لدينا...ف " الوقاية خير -1000 - مرة من العلاج ".
🔹 س :- إزاي بنشخّص عرق النسا ؟؟
🔸 ج :- أول واحد بيشخص عرق النسا...المريض نفسه...لأنه هوا اللي حاسس بالألم...-ليست النائحة كالثكلي - مش كده وبس...ومحدد مكان الألم بكل دقه...فهو ألم لا يُنْسَي - دور دكتور العمود الفقري إنه يفحص المريض وممكن يطلب بعض الفحوصات علشان يعرف إيه ( سبب) عرق النسا عند المريض
🔹 س :- هل في علاج لعرق النسا ؟؟ وبيجيب نتيجة ؟؟ والمريض فعلاً بيخف ؟؟
🔸 ج :- أكتر من 80 % من الحالات في العالم كله...بتتحسن تماماً مع :- العلاج الدوائي ، الراحه ، العلاج الطبيعي ، تغيير أنماط الحياة الغير صحيحة ، الوقت ....
🔹 س :- الوقت ؟!!! يعني ...إيه ؟؟
🔸 ج :- عرق النسا = ألم عصب = عصب مضغوط ومختنق وملتهب بسبب الغضروف ( زي ما شرحت في المقال السابق ) ...Pathogenesis of sciatica ...فأكيد التحسن هياخد وقت ، من 6-8 أسابيع..ف منستعجلش
🔹 س :- هل أنا كمريض أو كشخص عادي سليم .. مطلوب مني اعرف الكلام ده كله...واقرا المقال الطويل ده ؟!!!
🔸 ج :- اه طبعاً...
* أولاً :- بالنسبة للمريض :-
المفروض إنه يعرف كل حاجة عن طبيعة مرضه - ربنا يشفيه ويعافيه - كما هو مُتَّبع في أكبر مراكز العمود الفقري في العالم ..ما يُعْرَف ب "تعليم وتثقيف المريض " ... Patient education
* ثانياً :- بالنسبة للشخص العادي :-
احنا بنتكلم عن " مرض العصر".. اكتر من 80% من البشر حول العالم...بيصابوا بآلام أسفل الظهر في فترةِ ما من فترات حياتهم...وللأسف...المتوقع إن النسبة دي كمان هتزيد الفترة الجاية ( تزيد أكتر من 80% !!!! ) لأن ضغوط الحياة حول العالم كله بتخلّينا كلنا نشتغل لساعات طويلة وبنبذل مجهود كبير...اشتغل ربنا يعينك ويقويك...بس وانت بتشتغل...حافظ علي عمودك الفقري...عينك دايماً عليه
🟩 العمود الفقري للإنسان...آية..تشير لإعجاز الله في خَلْق الإنسان...فالإنسان هو الكائن الوحيد "معتدل الضهر" ... دوناً عن باقي مخلوقات الله (مثلاً الحصان، الجمل، ...الخ )..." منحنية الضهر "...النقطة دي بس لوحدها...اتكتب فيها آلاف الأبحاث والمقالات العلمية Anatomy of the upright position ...ولا يخلو مرجع من أكبر مراجع العمود الفقري في العالم من " فصل كامل ... " عن " كيفية اعتدال العمود الفقري لدي الإنسان ".. Acquisition of Human Verticaltiy .............
" الذي خلقك فسواك فعدلك ".
د/ محمد رضا عبد العزيز
مدرس واستشاري جراحة المخ والأعصاب والعمود الفقري
