https://www.facebook.com/mohammadseadabenha?mibextid=ZbWKwL

د/محمد سعده استشارى جراحة الأطفال وحديثى الولادة وجراحة المناظير, Ziftá (2025)

13/11/2025

الحمد لله..
الأهل راضيين جدا جدا بالنتيجة
وكل الزملا اللى شافوا الطفل بعد العملية...مش مصدقين أن ده الطفل اللى كان عنده شق بسقف الحلق كبير جدا جدا

12/11/2025

مش هتستفيد أى حاجة
بل بالعكس اللى قدامك هيحتقرك

مرضى كتير جولى عاملين عمليات قبل كده
مع زملاء من محافظات مختلفة
وللأسف نتايج العمليات مش أفضل حاجة
وجايين علشان نعمل تعديل أو إصلاح ..

ولقونى بأبسط الأمور خالص وبالكتير بأسأل على اسم الجراج اللى عمل العملية علشان أعرف طريقته والبروتوكول اللى ماشى عليه فقط
وبعد ما مابأعرف اسمه
لقونى بأشكر فيه عادى وباقولهم أنه أكيد عمل الصح وعمل شغله مضبوط ولكن الشفاء والتئام الجرح بيختلف من عيان لعيان..

وبعضهم جه وبعد ما شوفت العملية وطمنته
لقيته بيقولى انهم بعد ماالعملية الاولى مانجحتش راحوا لعدد من الزملاء وقعدوا يشتموا فى الجراح اللى عمل العملية وقال كلام سىء جدا جدا..

وبعضهم استغرب من رد فعلى فى الحالات دى وأنى بابتسم وبأشكر فى اللى قبلى ومش بأقول أى كلمة غلط فى حقه مهما كانت النتايج..
سواء بالألفاظ أو بالإيحاءات ..

وفى الآخر المدام قالتلى احنا مجموعة من المرضى جايين من محافظة بعيدة ومسافرين وسألنا على حضرتك كتير قبل مانيجى.
وسألتنى .
احنا متابعينك وعارفين انك يادكتور بتتعلم وبتحضر كل الكورسات ومش بتفوت حاجة برغم خبرتك اللى زمايلك كلهم شهدوا بيها وكمان مش بتستكبر تقول مااعرفش فى الحاجات اللى مش بتعرفها ولا بتستكبر تحول العيان لزميلك لو الحالة مش تخصصك
ودخلنا ع النت ولقينا الريفيوهات عنك حلوة جدا جدا
وكمان عارفين أن بيجيلك مرضى من دول عربية وأفريقية بالاسم وتواصلنا معاهم وفعلا بيشكروا فى حضرتك جدا جدا
وجايين وقولنا هيتنطط علينا خاصة أن عملياتن اولادنا مانجحتش..

ولكن اتصدمنا
انت يادكتور بسيط قوى قوى
وواخد الدنيا ببساطة
ومش بتتكلف فى الكلام
وكمان مش بتغلط فى زمايلك
وبتهزر مع العيال ومع أهاليهم
وبتسمعهم كويس

احنا كنا متوقعين ان لما هنجيلك هتعمل زى غيرك وتشتم وتغلط وتحسسنا انك العبقرى اللى مافيش زيه..

بس لقيناك بسيط خالص ..ليه كده??

كانت إجابتى
أولا وأخيرا التوفيق من ربنا ومش بالشطارة خالص.

ثانيا مش معنى أن ربنا جعل الشفا على ايديا فى حالات والنتايج كويسة أنى أغلط فى غيرى أبدا أبدا
لا خالص ده زى ماقولتلك توفيق ربنا..
وكل الزملاء على راسى ولوحد منهم احتاج منى أى مساعدة مش بأتأخر عنه ...ومش شطارة ابدا أنك تستغل لجوء المريض إليك وتقعد تشتم وتشنع فى الزملاء اللى قبلك.
مش شطارة خالص خالص

ثالثا أنى أتعلم وأتابع كل جديد ده حق العيان انى أتقن عملى على أكمل وجه.

رابعا ..(كما تدين تدان) وأنا بأحط نفسي فى موقف زميلى وبأتعامل من هذا المنطلق..

خامسا ..أنا مش أستاذ دكتور زى ما حضرتك بتنادينى وطبعا ده من ذوقك وكرمك ..ولكن ..أنا استشارى وعمرى ماقولت أنى أستاذ دكتور لأن ده مش حقيقى ده كادر جامعى لا أدعى الحصول عليه إطلاقا..

سادسا وده المهم يامدام ماتعطلينيش بقه أنا عاوز أخلص كشوفات و عمليات علشان ألحق أروح ألبس العباية واروح الغيط قبل الليل واقعد على التراب فى الغيط وأدامى الترعة وآكل الغدا على الأرض وآكل برتقال من ع الشجرة وأشرب ميه من الطرمبة....

وبالفعل خلصنا
ولحقت الغيط قبل المغرب.
بس العيال ضحكوا عليا وخدوا البرتقال الاصفر وسابولى البرتقال الأخضر...أخضر بس مسكر

خليك بسيط
وماتغلطش فى حد
الدنيا مش مستاهلة

08/11/2025

كلمة جميلة بتقولها الام وهى بتصحى اولادها بحب وبمودة..

عزيزتي الأم..
كتر خيرك
بتعملى مجهود خرافي مع أولادك وبناتك.
تربية وتغذية ومتابعة ومذاكرة .
وكمان لما حد فيهم بيتعب مش بتنامي
وبيكون هاين عليكى أنتى اللى تتعبي مكانه.
بجد كان الله فى عونك..

بس خلى بالك
مش معنى أن الشتاء دخل
وأن الفجر بقى بيؤذن بدرى فى الساقعة
وان الأولاد بيكون بدرى على مدارسهم .
أنك تتساهلى فى موضوع صلاة الفجر فى وقتها.
ماتتساهليش أن اولادك يصلوا بعد الشروق.

مش معنى كده انك تسيبيهم نايمين
لا
لا
لا
عرفيهم ان الجنة غالية وثمنها غالى قوى

رزقنا الله وإياكم واولادنا واولادكم الجنة..

07/11/2025

النهاردة فى المسجد فى صلاة الجمعة سمعنا صوت جامد.
وانتهت الصلاة وحدث هرج وقلق..
وإذا بصوت الإمام يقول عاوزين دكتور بسرعة فى الصف الثانى فى المسجد .
فتوجهت ناحية الصف الثانى وأنا واثق أن فى المسجد أطباء غيرى هيتحركوا..
وبالفعل وصلت لقيت رجل مغمى عليه وواضح عليه علامات الصلاح وحوله عدد من الزملاء الأطباء ..
وبدأ أحدهم بعمل انعاش قلبى رئوى مباشرة.
وانضممت إليهم وامتثلت لتعليماتهم وحاولنا إنقاذه بقدر الإمكان
وفجأة التفت إلي الرجل
فإذا به رجل أعرفه جار لى وأحبه وأقدره
دوما يصلى فى المسجد الخمس صلوات.
ودوما يؤذن للصلوات
ودوما يصلى الفجر بالمسجد
ودوما يجلس بعد الفجر يذكر الله حتى طلوع الشمس حتى غجر هذه الجمعه.

هنا دمعت عيناى وأنا أباشر مع زملائى الإنعاش القلبى الرئوي.
ونجهز سيارة إسعاف بسرعة ..
وما أثر فيا قول المصلين بصوت منخفض اذكروا الله وحاولوا أن ينطق الشهادة وكثير منهم يذكر الله بصوت نسمعه جميعا حتى يسمعه المريض ويكرر الشهادة..

وهنا جال فى خاطرى هذه الأفكار
انه صلى الفجر وجلس حتى الشروق
وذهب للمسجد قبل الجمعة واستمع للخطبة
وهاهو يحدث له التعب المفاجئ أثناء الصلاة فى المسجد.
وفى لحظة قد تنتهى الدنيا

خواطر جميعها تبكى القلب والعين وتسعدهم فى آن واحد.
ومايجول بخاطرى
لو توفاه الله ..فهنيئا له هذه الخاتمة
ولو عاد للحياة فهو دوما فى طاعة الله وخيىكم من طال عمره وحسن عمله.

وفجأة بلطف الله ورحمته تبدأ تتحرك عيناه.
ونسمع نبض القلب وعودة التنفس.
وهنا تعود البسمة والحياة إلى جميع الزملاء فى المسجد
وبالفعل تم تجهيز سيارة وذهبنا به إلى المستشفى..
وماكان يدعو للامتنان
ان أجد زميلى الذى كان معى فى المسجد
وظننت انه تركنى وحدى معه فى السيارة لأرافقه إلى المستشفى ووصلنا المستشفى.
لأجد زميلى هذا سبقنى إلى الاستقبال فى المستشفى
وجهز التروللى بنفسه وتكلم فى الحالة مع التمريض والأطباء.
وبالفعل وعلى وجه السرعة تم استقباله فى الاستقبال وعمل الاسعافات الأولية وكلنا أمل فى الله ان تعود البسمة والفرحة إلى قلوب الجميع.

وبالفعل كان الزملاء والتمريض بالمستشفى على أهبة الاستعداد وتعاملوا مع الحالة بحرفية ومهارة ..حتى استقرت الأمور..
وهنا اتصلت بزميلى رئيس قسم المخ والأعصاب بالمستشفى ونزل من بيته على الفور وباشر الحالة بنفسه.

وهنا جاءت لحظة ننتظرها
لحظة لانعلم بأى حال ستكون
كلنا أمل فى الله
وكلنا يقين فى لطفه ورحمته
وكلنا إيمان بقضاء الله وقدره.
لحظة شاهدتها بنفسي وانتظرتها
وبالفعل بدأت اللحظة وهى أن يتكلم المريض ويكون أول كلامه ذكر الله وشكر الله..وهو يبكى..لما رآنا حوله ونحن جيرانه وأحبابه ولكن أهله بعيد فى قريته..وهنا تذكرت توصية النبى صلى الله عليه وسلم بالجار..وواجب كل منا نحو جاره..
فنحن جيرانه واكن فى هذه اللحظة أكثر من أهله وأقرب..

وتعود إليه الحياة مرة أخرى..بعد أن فارقته قليلا
ولله الحمد والمنة..
وهنا توافد الأهل والأقارب ليطمئنوا عليه..

بجد كتر خير كل الزملاء فى استقبال المستشفى
كل الشكر للتمريض فى المستشفيات وخاصة الاستقبال فهم فوق العين والرأس...

وكل الشكر للأهالى المصلين فى المسجد الذين كانوا على قدر المسئولية وتعاملواا مع الموقف بكل حكمة وهدوء ومسئولية...

وما جال فى خاطرى وأنا أقف أمام سرير المريض بالمستشفى ...طوال هذه الرحلة القصيرة..
أن الموت سيأتي يوما ما
فعلى أى حال سيأتينا
على طاعة
أو غير ذلك.

نسأل الله أن يستعملنا لطاعته ويختم لنا بالخير.

هى الحياة قد تنتهى فى لحظه
فلنجعلها فى طاعة الله
ونحمد الله أن وهبنا عمرا ووقتا وعافية وصحة حتى نكون فى طاعته وذكره وشكره..

دمتم بخير

06/11/2025

فريق متميز متكامل.

05/11/2025

جاتلنا الأسبوع ده بنوتة صغيره
متابعينها من فترة طويلة
كانت ابتلعت مادة كاوية للأسف (البوتاس)
وتابعتها وعملنا منظار للتشخيص والتوسيع أكثر من مرة
ولكن للأسف المرئ تآكل تماما بالمادة الكاوية..
وهى ستخضع لعملية كبيرة وهى زرع مرئ..
وسنقوم باستبدال المرئ بجزء من القولون الأسبوع القادم..
دعواتكم ليها بنجاح العملية وتمام الشفاء

وبالمناسبة الحزينة دى 🥲🥲

بنقول لمرضانا.

استمرارا لتقديم خدمة متميزة للأطفال فى عياداتنا
بالأضافة إلى جراحات الأطفال الدقيقة وجراحات المناظير
بالتعاون من أفضل مراكز مناظير الجهاز الهضمى فى طنطا وبنها.

وهى منظار الجهاز الهضمى العلوى للأطفال التشخيصى والعلاجى
Pediatric Upper GIT endoscopy (diagnostic and therapeutic).
للأطفال الذين يعانون من أمراض تخص
الجهاز الهضمى العلوى المرىء والمعدة والاثنى عشر
ويحتاجون لعمل المنظار حيث يتم تقييم الطفل وإجراء المنظار وإجراء التدخل الجراحى المناسب لهم عند الحاجة لذلك.
فاللهم لك الحمد والشكر

ودائما نسعد بخدمة أطفالنا وتقديم كل مفيد وحديث لهم فى تخصص جراحات ومناظير الأطفال وحديثى الولادة..

الصورة أثناء توسيع المرئ لطفل فى الشتاء الماضى.

وماتنسوش تدعو لها بالشفاء ولأسرتها بالصبر

05/11/2025

من سنوات بأبحث عنه ومش لاقيه..
من سنوات كنت حاسس أن ده ناقصني فى تخصصى علشان أفيد بيه الأطفال ولكن مش عارف أتقنه ...
وروحت علشان أتعلمه بطريقة علمية فى أكثر من مكان وأكتر من جامعة..وبالفعل اشتغلته فى الأطفال ولكن لم أستمتع بتعلمه بطريقة منظمة ومنهجية ..

ولكن النهاردة تحقق الحلم وحسيت ان اللى بأدور عليه كتير ربنا جعله أمامى ويسر لى أن أتعلمه.
لأول مرة فى مصر
كورس مناظير جهاز هضمى أطفال لجراحين الأطفال فقط..

حاجة كنت منتظرها من زماااان
وحاولت أتعلمها
ولكن كانت بتقابلنى مشكلة أن معظم الكورسات للكبار مش للأطفال.وأنا مش عاوز اتعلمه فى الكبار.

لأننا كجراحين أطفال بتقابلنا أطفال عندها مشاكل كتير فى المرئ والمعده
وبيكون المنظار مفيد جدا. سواء من ناحية التشخيص أو المساعدة فى العلاج.
احنا آه بنعمل المنظار لحالات بسيطة من زمان
والمنظار موجود عندنا
وده كان واضح فى نقاشى مع البروفيسير أننا بنشتغل بيه فى حالاتنا واللى بنتميز بيها عن أى تخصص تانى وكمان هو كان كنبهر اننا بنعمله من أعمار صغيرة جدا جدا..

ولكن أنك تتعلمه أكتر من خبير متميز وأستاذ كبير زى أد جمال سليمان أستاذ مناظير الجهاز الهصمى بجامعة الأزهر.
وكمان تستخدمه للأطفال بطريقة أكثر إتقانا ده أكيد هيكون أفضل للأطفال..

كورس متميز جدا جدا

اليوم فى معهد ناصر أثناء حضور كورس
مناظير الجهاز الهضمى فى الأطفال..
Pediatric upper git endoscopy..

دكتور حالات أطفال زى إيه ؟؟؟؟

ارتجاع المرئ
انسداد وضيق المرئ
ناسور بالمرئ
كيس بالمرئ.
ابتلاع جسم غريب
انسداد بالمعده أو الاثنى عشر.

حالات أحيانا بنحتاج نعمل لها جراحة
وأحيانا بتحتاج منظار فقط.

وده ليس معناه عدم التعاون مع الزملاء أطباء جهاز هضمى الأطفال أبدا...
لا
لا
فنحن جميعا نتعاون لتقديم أفضل علاج للأطفال.وكل منا يتعلم ويتطور ويواكب كل جديد وحديث ومفيد للأطفال.

دمتم بخير.

01/11/2025

خرجت من العيادة
اصلى المغرب
جنبى والد فاضل كنت عامل لحفيده إصلاح مجرى بول من فترة.
وكا بييجى المتابعة مع والدته وجده دايما
وكنت ملاحظ خوف والدته وجده عليه جدا جدا جدا
ووالدته كانت ست فى منتهى الأدب والحياء والأخلاق.
وكمان كانت كل شوية تتصل تطمن يادكتور هنشيل القسطرة امتى؟؟؟ ..طيب هنطمن على الولد امتى ؟؟؟..طيب امتى هتعرف العملية نجحت ولا لا؟؟؟؟
وانا كنت بأحاول أطمنها وأجاوب. عليها بهدوء وكمان أهزر مع جد الطفل وأقوله انت مستعجل ليه!!
قاللى أمه مستعجلة علشان هى نفسها تسافر. ..وعاوزة تطمن على الولد قبل ماتسافر.
ومرت فترة والولد بقى كويس وطمنتهم
وبالفعل الأسرة مش بتيجى
ولكن هناك تواصل بالتليفون للاطمئنان على الطفل
وده بأعمله مع عدد كبير من الحالات نتواصل واتس أو فون نتابع الطفل.
المهم من فترة مافيش تواصل ومافيش رد
بينى وبين نفسي قولت احتمال يكون حصل مضاعفات للعملية
زى ناسور أو شكل العضو مش أحسن حاجة وهما راحوا لزميل ومحرجين يردوا عليا..
فبطلت أتصل بيهم..
برغم أنى بأحب التواصل مع الأهل للاطمئنان على الأطفال.

المهم تمر الأيام وألاقى جد الطفل جنبى فى المسجد النهاردة
وجنبه حفيده الأكبر أخو الطفل اللى كان عامل العملية..
قمت بعد الصلاة واخد الطفل فى حضنى وقولت لجده أخباركم إيه ؟؟
وبهزار بأقوله هو علشان أم الولد سافرت يعنى تتكبر علينا وماتردش علينا..
وأنا شايل الطفل على رجلى..
لقيت الجد بيبصلى نظرة انا مش فاهم هو زعلان ولا فرحان.
ودماغى تودى وتجيب
قمت كاسر الصمت بهزار ..
ماشى ياعمى هو علشان بتسافروا برة تتنططوا علينا؟؟.
رد وقالى لا يادكتور ازاى.
الولد زى الفل والعملية زى الفل.
بس الأم كانت مستعجلة ان الولد يخف علشان تطمن عليه وتسافر
وانت بعد ماطمنتها عليه سافرت مع زوجها ومع الأولاد يعملوا عمرة..
ووصلت مكه وعملت العمرة هى والأولاد وزوجها.
قولتله ربنا يتقبل
يعنى العسل اللى على رجلى ده عمل عمرة ؟؟
قاللى آه
قولتله تقبل الله ياقمر..
رد وقاللى شكرا ياعمو.
قولت للجد
وبعدين..

رد وقاللى وبعد ماخلصت العمرة رجعوا الفندق ..
وتعبت الظهر وتوفت العصر وصلوا عليها بالحرم العشاء ودفنت بمكة
وعاد الزوج والأولاد بدون الأم.
🥲🥲🥲🥲🥲.

هنا صمت وضممت ابنها إلى صدرى ولم أستطع الكلام.

مش عارف أقوله معلهش ماتزعلش وأصبره.
ولا اقوله مبروك أنها توفت هذه الوفاة الجميلة.

كانت تريد أن تطمئن على ابنها فلذة كبدها قبل أن تسافر. للعمرة
وهاهى قد أحرمت وسافرت وأدت عمرتها وتوفيت وصلى عليها بالمسجد الحرام ودفنت بمكة.

اللهم اغفر لها وارحمها وتقبلها.

فعلا كانت ملاك فى صورة إنسان
أسألكم لها الدعاء.

أجمل حاجة فى مهنتنا انك بتعيش مع الأهل لحظات الفرح بنجاح العمليات وشفاء أولادهم.
وأصعب حاجة لحظات المواساه والحزن لما علاقتك كطبيب تتوكد بالأهل ويكون فيه بينك وبينهم مودة ومعزة وحب وتقدير.

01/11/2025

اللهم لك الحمد
تم اختيارى للاستمرار بالعمل فى خدمة الأطفال.
فخور جدا أننى مستمر فى رسم البسمة والفرحة على وجوههم.
وأن أكون أحد أعضاء فريقين متميزين فى جراحات الشفة الارنبية وسقف الحلق المشقوق.

شكرا مستشفى دار الشفاء
شكرا مستشفى تبارك

كل الشكر والتقدير على هذه الثقة الغالية.
وأدعو الله أن أكون عند حسن ظنكم وظن المرضى وأهاليهم.

فريق دار الشفا بطنطا
فريق تبارك بالتجمع الخامس.

ويسعدنى ان أستقبل المرضى
من كافة الأعمار
من كافة المحافظات
وأيضا المرضى غير المصريين.

نسعد بكم جميعا

ونقوم بإجراء الجراحات على أعلى مستوى من الحرفية والمهارة.

د محمد سعده
Seada Smile.

31/10/2025

ام كلمتنى الاسبوع ده من القاهرة
ابنها محتاج عملية وقالولها تكلفتها ٢٥٠ الف جنيه
أب كلمنى من الصعيد وابنه محتاج عملية متقدمة جدا وقالوا له تكلفتها تتخطى ال ٤٠٠ الف جنيه..
أم عملت عملية لابنها فى الصعيد ب ١٠٠ الف والنتيجة ماكانتش أفضل حاجة وجاية علشان أعمل إصلاح له..

نقدر نقول لحضراتكم

العمليات البسيطة والمتوسطة بتتعمل فى أماكن كتير ومراكز كتير وكمان مش بتكون مكلفة قوى واحنا بنعملها برضه تقريبا..ودى بتكون مصدر دخل لمعظم الجراحين..

ولكن الجراحات المتقدمة والمعقدة
زى جراحات الصدر المتقدمة
جراحات مسالك الأطفال المتقدمة
جراحات إصلاح التشوهات الخلقية المعقدة بكافة أنواعها
مش كل المراكز بتقدر تقدمها
وكمان بتكون مكلفة جدا جدا فى المراكز اللى بتقدمها لانها فعلا عمليات صعبة جدا وتحتاج تجهيزات كبيرة

علشان كده
أى أسرة عندها مريض طفل محتاج عملية من العمليات الكبيرة والمعقدة فى جراحات الأطفال وإصلاح التشوهات الخلقية المعقدة.
اى أسرة محتاجة جراحة مناظير متقدمة فى جراحات الأطفال.

تقدر تشرفنا ..
والعملية بإذن الله مجانا..

دمتم بخير..

29/10/2025

ياااااه
عملت العملية ٧ مرات 🥲🥲

د/محمد سعده استشارى جراحة الأطفال وحديثى الولادة وجراحة المناظير

13/11/2025

12/11/2025

08/11/2025

07/11/2025

06/11/2025

05/11/2025

05/11/2025

01/11/2025

01/11/2025

31/10/2025

29/10/2025

Address

Telephone

Website

Alerts

Contact The Practice

Shortcuts

Share

Category