29/10/2025
💙 29 de outubro: Día do Técnico en Emerxencias Sanitarias (TES)
Hoxe é unha data para reivindicar o valor, a unidade e o recoñecemento dun colectivo que é moito máis ca un uniforme.
Cada 29 de outubro lembramos a quen, cun traxe sinxelo e unha responsabilidade inmensa, representan a primeira liña da atención sanitaria extrahospitalaria en toda Galicia: os Técnicos en Emerxencias Sanitarias (TES).
🚑 Detrás de cada serea, de cada paciente trasladado, de cada chamada ao 061, hai unha historia de compromiso, humanidade e entrega.
Son profesionais que chegan cando a vida se detén por segundos, e tamén quen acompañan con respecto e empatíaa quen loita cada día contra a enfermidade ou a fraxilidade.
💬 Pero este ano, o Día do TES chega cunha mensaxe clara:
👉 Reclamamos o recoñecemento pleno do TES no VI Convenio Autonómico do Transporte Sanitario de Galicia.
Pasaron máis de 15 anos desde que se recoñeceu oficialmente a titulación do Técnico en Emerxencias Sanitarias. Aínda así, en Galicia a nosa categoría profesional segue sen reflectirse de forma coherente no convenio que regula o sector.
Un esquecemento que doe e dana a esperanza de máis de 2.500 profesionais que dan cada día o mellor de si mesmos.
Porque sen o TES, o transporte sanitario non sería o que é.
Porque sen unidade, non hai avance.
O colectivo de profesionais do sector lembrámolo cada día coas nosas intervencións.
O Transporte Sanitario Urxente (TSU) e o Non Urxente (TSNU) son dúas caras da mesma vocación: salvar, coidar e acompañar.
🔸 Ambos requiren a mesma formación.
🔸 Ambos implican a mesma responsabilidade.
🔸 Ambos merecen o mesmo recoñecemento.
Por iso, propostas que pretenden dividir o posto baixo etiquetas como TES-condutor, TES-axudante ou padioleiro, non só carecen de base legal, senón que rompen a unidade dun colectivo que sempre respondeu con profesionalidade e entrega ante centos de miles de pacientes cada ano.
⚠️ Ademais, esta fragmentación podería poñer en risco o futuro do noso colectivo, especialmente coa entrada en vigor do novo Real Decreto que regula os coeficientes redutores para a xubilación anticipada en profesións de especial penosidade ou risco.
Sen unha clasificación profesional unificada, os TES poderían ver ameazado ese dereito tan duramente conquistado.
💬 O persoal do transporte sanitario urxente e non urxente, non pide privilexios.
Pide respecto, xustiza profesional e recoñecemento real.
Este 29 de outubro non é só un día no calendario.
É unha chamada á responsabilidade, á unidade e á xustiza.
É o recordatorio de que o corazón do transporte e as emerxencias sanitarias de Galicia latexa cun só nome:
💙 Técnico en Emerxencias Sanitarias.
E con máis 2.500 profesionais que, coas súas mans e o seu corazón, nunca deixarán de responder cando a vida chama.
