25/03/2026
Waa 2008, lana curatay burburka dhaqaalihii adduunka. Waxa isla sanadkaasi la galay marxaladda afaraad ee loo yaqaanno wareegga xasaradda (The Crisis). Lacagta iyo dowladaha ayaa la kala qarinayaa. Goob aysan dowladuhu maamulin ayaa la hindisay in lacagta lagu haysto si xor ah, beddelkii bangiga. Waa casrigii Cyrpto. Ku xiji Gu'gii Carabta ee 2011, oo isbeddel ballaaran uu ka dhacay dalalkii Carabta. Fashilkii afgembi ee Turkey. Isku daygii maamulista dalka ee lagu hungoobay iyo is difaaci dadka. Ka bixitaankii UK—ee midowga Yurub, rabitaan xooggan oo ay bulshadu muujisay, laguna guuleystay. COVID-19, dhacdo caalami ah, oo lagu tilmaamo in ay ahayd Biological war iyo qiimeyn istaraatiji ah, si lamid ahna daahfeyday nuglaanta nidaamka caafimaad iyo dhaqaale ee dalalka. Aagagga halista ah ee Yukrayn, iyo Taywaan. Kobaca Shiine iyo Ruush, ee ku aadan ka soo muuqashada garabka Mareykan iyo awood dheelitir u ah xoogga kali ah ee jiray. Dhisidda AI. Lataliye, Barafasoor, aqoonyahan, macalin, game changer iyo caawiye aad u xeeldheer, oo aqoon kastaa ku hubaysan, si wal na kuugu diyaar ah. Yagleelidda isbahaysiga BRICS. Duminta Doolarka iyo awood dhaqaale iyo wada-shaqayn, oo lagu jebinayo qabkii iyo isku-xirnaanta Mareykan iyo hareerihiisa. Afgembigii ka dhacay dalalka Saaxil la isku dhaho ee Africa. Furkiina Faaso, Maali iyo Nayjar. Soo afjaridda madax muddo fog talinaysay, dhisidda waayo cusub oo la jaanqaadayo nolosha iyo waayaha dadka. Afduubka madaxweyne dal oo sharci ku yimid, si loo qaato shidaalkiisa. Nikolaas Madhuurihii Vanasweela. Aasidda sharciyadii caalamiga ahayd, ee dalalka kala xadeynayay. Isticmaalka awoodda iyo xeerka KAYNTA. Xasuuqii Isr'l ee reer Qasa, ka aamusiddii lagu soo dhaweeyay, iyo in tallaabo laga qaadi waayo madaxdii Yahuudda. Weerarka Iiraan ku socdo haddeer, ee lagu doonayo in si buuxda loo burburiyo, ama dookha labaad ee ah in qariiradda laga tirtiro, ama wax u eg lagu sameeyo. In Turkey lagu xijiyo Iiraan kadib, si loo dhiso Isr'-sha weyn oo ah balanqaad iyo yool weyn oo DIINI ah, soo dhaweynta DAJAAL iyo noqoshada awoodda Bariga dhexe. Ka bixidda Mareykan ee NATO ee la diyaarinayo, ama tirtiridda qodobka 5aad ee isbahaysiga ee ah; ku gardarooshaha dal innaga mid ah, waxa aynnu ku bixinaynaa qiimaha ugu sarreeyo iyo jawaab wadajir ah. Qodobkaasi oo ah jidgooyo iyo caqabad hortaagan Mareykan iyo Isr'l, kadib Iiraan. Buuqa iyo fowdada uu Trump ku billaabay dunidii, iyo laalistiisa sharciga iyo nidaamkii caalamiga ahaa. Hadalkii uu yiri Shaykh Axmed Yaasiin, aasaasihii Xamaas, ee ahaa; in ay Isr'l burburi karto ka hor 2030. Doorashada Mareykan ee 2028, oo uu Trump ku doonayo markiisa 3aad xafiiska, oo haddii ay dhacdo Mareykan ku burburi karo. Sii wad uun dhacdooyinka...
Dhacdooyinkani waxa ka sheekeynayo buugga la yiraahdo The Fourth Turning. Afarta xilli ee wareegga ah. Waa taariikhda iyo u kuurgelidda waayo badan oo ina dhaafay. Nolosha biniaadamka 80-100-kii sana ba halmar ayay sameysaa wareeg weyn oo ay taariikhdu dib isku celinayso. Hal wareeg ama marxalad ba waxa ay socotaa 20-22 sano. Dhammaadka wareegga 80-100 sano oo soo billaabmay kadib dagaalkii labaad ee adduunka ayaa ku beegan 2030. Buuggu waxa uu leeyahay; waa sida ay taariikhda ku soo socotay qarniyo badan, iyo qiyaasaha suuragalka ah ee ka dhici karo mar labaad. Nuqulkani waxa la dabaacay 2023, oo ah xilli ay wax badan dhaceenay. Qoraaga waxa uu leeyahay, waxa aynnu ku jirnaa marxaladda afaraad ama 20-kii sano ee ugu dambeysay kala-wareegga weyn oo ah The Crisis, ka hor wareegga koowaad ee The High. Marxaladdani waxa uu ku sheegayaa in ay tahay xilliga qalalaasaha, isbeddelka weyn, iyo burburka nidaamyadii h**e, si loo dhiso nidaamka cusub ee caalamka. Qoraaga waxa uu aaminsan yahay in inta u dhaxeyso hadda oo ah 2026 ilaa 2030 ay tahay dhacdadii u dambaysay ee gunaanadka ah. Burburka nidaamyadii h**e oo dhan, iyo dib u qaabeyn cusub. Waxa uu leeyahay quwadaha waa weyn in ay degaalka 3aad sababaan ama dagaal Nukliyer ah dhaco waa filasho yar. Waayo, waxa ay ogyihiin in la wada baaba'ayo, sidaasi darteed, qatarta ah dagaallada sirdoonka, Nukliyeerka la qafiifiyay, dhaqaalaha iyo dhijitaalka ayaa aad u sarreyo in ay dhacaan. Halkaasi oo dal dhan lagu curyaamin karo iyada oo aan Nukliyeer la ridin.
Wakhtigani waa xilligii go'aanka, is diyaarinta iyo kala doorashada. Shucuubta adduunka waxa ay wajahayaan burbur buuxa ama in ay dhistaan nidaam cusub oo lagu wada noolaan karo. Duufaantaasina waxa ay billaaban kartaa hadda. Qofka dhalinyarta ah ee wakhtigani maalgashado naftiisa, waxa uu isku beegi karaa 2030, oo ah dhammaadka wareegga 80-100 sano ee wixii degaalka labaad ka dambeeyay ah, iyo billawga marxaladda koowaad ee The High. Waa xilli ay aqoontu iyo qofkeedu ba ay qiimo leeyihiin. Waa muddada uu qofi jaamacad kaga qalinjebin karo ugu yaraan. Cidkaste oo nafteeda dhistaa muddadani waxa ay noqon kartaa hoggaamiyaha dal iyo dad ba. Doorka qofkastaaba leeyahay, waa in uu naftiisa iyo shaqsiyaddiisa dhisaa, ka hor marxaladda xigto. Ixtiraam ama wax wanaagsan haddii uu qofku naftiisa la doonana wax akhris, macluumaad raadin, iyo aqoon kororsi ayaa ah waxa ugu weyn ee ay naftu ka mahadnaqi doonto. Haddii aad cadceed noqotid, cidna sacabada kugu qarin kari mayso. —Murti.
Saciid Diiriye
