28/11/2025
የብክለት መከላከል እና መቆጣጠር ስልጠና ተሰጠ።
በባሕር ዳር ዩኒቨርስቲ የጥበበ ግዮን ስፔሻላይዝድ ሆስፒታል ጥራት ማረጋገጥ ዳይሬክተር ከኅዳር 16-19 2018 ዓ.ም ብክለትን መከላከል እና መቆጣጠር ለሆስፒታል ባለሙያዎች የግንዛቤ ማስጨበጫ ስልጠና ተሰጠ።
የኮሌጁ የጤና አገልግሎት ምክትል ኮርፖሬት ዳይሬክተር ደ/ር ደጋለም ባየ በመክፈቻ ንግግራቸው ሰልጣኞችን የመጣችሁበት ዓላማ የታካሚዎችን ደንነት ለመጠበቅ አካባቢያችንን ከብክለት መከላከል እና መቆጣጠር ብቻ ሳይሆን ከእያንዳንዱ ሰልጣኝ የሚገኘው የልምድ ልውውጥ ለተሻለ አገልግሎት ያነሳሳናል ብዬ አምናለሁ ብለዋል።አክለውም ታካሚም ሆነ ባለሙያ በቅድሚያ ማየት የሚፈልገው የአካባቢውን እና የክፍሉን ንጽህና ስለሆነ ሁላችንም በባለቤትነት ስሜት ፅዳቱን ማሻሻል፣የተበላሸን መጠገን፣ቀለም መቀባት እና በአጠቃላይ ሆስፒታላችን ውብ እና ለአይን ማራኪ ማደረግ ይጠበቅብናል ብለዋል። ይህን ለማድረግ እሳቢያችን እና አተያያችን ካልተስተካከለ ዛሬ ብናፀዳው እና ብናድሰው ነገ መቆሸሹ አይቀርም ስለዚህ አተያያችንንማስተካከል የነገ የሚባል አይደለም ካሉ በኋላ ቆይታችሁ መልካም እና የተሳካ እንደሚሆን ተስፋ አደርጋለሁ ብለዋል።
በስልጠናው ተገኝተው የፕሮግራም ትውውቅ የአደረጉት የሕክምናና ጤና ሳይንስ ኮሌጅ የተከታታይ ሙያ ማጎልበቻ ስልጠና ዳይሬክተር ወ/ሮ አልማዝ ማማሩ ስልጠናው በሁለት ዙር ለሁለት ቀናት እንደሚሰጥ ፤ሰልጣኞችም አተያያቸውን የሚያስተካክሉበት እንደሚሆን በመግለጽ የስልጠናውን ተቋማዊ ፋይዳ አስረድተዋል።
ስልጠናውን ሲሰጡ ከነበሩት መካካል የፈለገ ህይወት ሆስፒታል የአካባቢ ጤና አጠባበቅ ባለሙያ አቶ መልካሙ ነጋ ሲያስረዱ ብክለት መከላከል እና መቆጣጠር ማለት በበሽታ አምጭ ተህዋስ እና ተጋላጭ መካከል ግንኙነት እንዳይኖር የሚያደርግ ስልት ነው በማለት አስረድተዋል።ሲያብራሩም የሰውነት መከላከያ አልባሳትን በአግባቡ በመጠቀም፣የህክምና አገልግሎት መስጫ ክፍሎችንና የሥራ አካባቢን በወቅቱ በማፅዳት፣የእጅ ንፅህናን በመጠበቅ፣ የተጠቀምናቸውን የህክምና መሣሪያ በአግባቡ በማፅዳት እንዲሁም ቆሻሻን በቦታው በመለየትና በአግባቡ በማስወገድ ህሙማንን፣ የጤና ተቋም ሠራተኞችን በአጠቃላይ ማህበረሰብን እና ከባቢ አየሩን ጤናማ ለማድረግ ይጠቅማል ብለዋል።
ሌላዋ የፈለገ ህይወት ሆስፒታል የአካባቢ ጤና አጠባበቅ ባለሙያ ወ/ሮ ወሰንየለሽ ደሳለኝ እንዳሉት በመርፌ የምንሰጣቸው የህክምና አገልግሎቶች ላይ መመሪያዎችን በመከተል ጥራቱን የጠበቀ አገልግሎት መስጠት እንደሚገባ በተለይም በደም ስር የሚሰጡ መድኃኒቶች ጥንቃቄ እንደሚያሻቸው አስገንዝበዋል።
የጥበበ ግዮን ስፔሻለይዝድ ሆስፒታል የአገልግሎት ጥራት ማሻሻል ክፍል ባለሙያ የሆኑት አቶ ገበያው ብርሃኑ ደግሞ የምንሰጠው ስልጠና በዋናነት የሚያተኩረው የአካባቢ ንፅህናን መጠበቅ ፣የእጅ መታጠብ፣ ለህመም አማጭ ተህዋስ የተጋለጠ ባለሙያ መውሰድ ስለሚገባው የመከላከያ መድኃኒት፣ በስራ ላይ ስለሚከሰቱ የሥራ አደጋ ቅድመ ጥንቃቄዎች እና የታካሚዎችን ወረፋ አስተዳደር ላይ ነው በማለት ገልፀዋል።
