03/01/2026
Leenjii Hubannoo Arjoomaa Dhiigaa Fedhii Irratti Hundaa’e kennama Ole.
Amajjii 3, 2026
Magaalaa Maayaa kuta​a Haramaayaa Baankiin Dhiigaa Maayyaa, Biiroo Fayyaa Oromiyaa waliin qindoomuun, barattoota Yuunivarsiitii Haramayaa, barattoota manneen barnootaa sadarkaa lammaffaa fi barsiistota Godina Harargee Bahaa fi Bulchiinsa Magaalaa Maayyaatiif leenjii hubannoo uumuu kenneera.
​Sirna kana irratti, hirmaattonni marii bal’aa taasisuun yaada isaanii kan ibsan yoo ta’u, dhimma arjooma dhiigaa fedhii irratti hundaa’e yuunivarsiitii fi manneen barnootaa isaanii keessatti milkeessuuf waadaa galaniiru.
​Hirmaannaa Hunda Galeessaa
​Hogganoonni Waajjira Fayyaa Magaalaa Maayyaa qophii kana irratti argaman akka jedhanitti, dhiiga gahaa fi itti fufiinsa qabu dhiyeessuun dirqama waliiniiti.
​"Hojiin arjooma dhiigaa fedhii irratti hundaa’e Baankii Dhiigaa qofaan kan raawwatamu miti; hirmaannaa qaamoolee hundaatiis ni barbaada," jedhan.
​Rakkoo Hanqina Dhiigaa Furachuu
​Hoggantootni Biiroo Fayyaa Oromiyaa akka jedhanitti, Baankiin Dhiigaa Maayyaa qooda fudhattoota waliin ta’uun sababa hanqina dhiigaatiin du’a mudachuu danda’u hambisuuf hojii murteessaa hojjachaa jira. Ta’us, sababa adda addaatiin fedhiin dhiigaa hospitaalota keessatti dabalaa jiraachuu isaa hubachiisaniiru.
​Fedhii dabalaa jiru kana guutuuf, hogganoonni hawaasni barnootaa tarkaanfii ariifachiisaa akka fudhatan waamicha dhiyeessaniiru. Keessattuu:
​Barattoonni Yuunivarsiitii Haramayaa fi manneen barnootaa sadarkaa lammaffaa hubannoo argatan hiriyaa isaaniitti akka dabarsan.
​Barattoonni arjoomtoota dhaabbataa akka ta’anii fi waggaatti yoo xiqqaate si’a sadii dhiiga akka arjooman jajjabeessaniiru.
​Dhumarratti, Biiroon Fayyaa Oromiyaa tajaajila lubbuu baraarsaa Baankii Dhiigaa Maayyaa caalaatti cimsuuf deeggarsa barbaachisu hunda gochuuf waadaa galeera.
