23/12/2025
KINTAAROTII- Hemorrhoid/Pile
********************************
Kintaarootiin dhiita’a qaama taa'umsaa irratti mul'atu yoo ta'u innis hiddi dhiiga-deebistu kan naannoo sanitti gurmuun argamu yoo dhiita'u kan mudatuudha.
Dhiita’a kanaaf wantootni hedduun sababa ta'uu malu. Isaan kessaas:
* Yeroo bobbaaf taa'an baay'isanii ittanuu.
* Qufaa yeroo dheeraaf nama irra ture.
* Furdinna gar-malee guddaa ta'e qabaachuu.
* Saal-qunnamtii qaama bobbaan bahuun raawwachuu.
* Garaa gogsuu ykn baasaa yeroo dheeraaf nama irra ture.
* Yeroo dheeraaf deddebi’anii waan ulfaatu ol-kaasuu
* Dhukkuba tiruu ykn dhukkuba biraa kan dhiitaa garaatiif nama saaxiluu qabaachuu.
* Nyaata akka fuduraa fi kuduraa fayyadamuu dhabuun—wontoota rakkinna kanaaf nama saaxilan keessaa isaan ijoo ta'aniidha.
Kintaarotiin irra jireessaan ga'eeyyiiwwan woggaa 20 ol ta'anifi haadholii ulfaa irratti heddumminnaan mul'ata. Yeroo kaan caalaa yeroo qilleensi ho’aan jiru irra muldhachuu danda’a. Innis sababa hoo’i hidda dhiigaa keenya akka babaldhatu (vasodilation jiraatu) godhuufi.
---
---
Mallattoolee fi rakkinna Kintaarotii irraa dhufuu danda'an:
* Dhiitaa qaama taa'umsaa irratti mula'atu ykn dhiitaa qaama taa'umsaa keessaa gadi bahee mula'tu.
Kintaarootiin keessa qaama taa'umsaa kessatti bahus (Internal Hemorrhoid) ni jira; inni kun sadarkaalee afran armaan gaditti tarreffaman kana qaba:
▪︎Sadarkaa I: Gurmuu hidda dhiiga-deebiftuu keessa qaama taa'umsaatii bokoke dhiita’a uume. Dhiitaan kun alatti hin muldhatu. Inni kun yeroo hedduu miira dhukkubbiis hin qabu.
▪︎Sadarkaa II: Inni kun keessa qaama ta'umsatii kan gad-bahu ta'ee, garuu ofuma isaatii ol deebi'a.
▪︎Sadarkaa III: Kun ammoo dhiitaa gad-bahu kan qubaan ol-deebifamudha. Inni kun nama hoksisuufi dhukkubbiis ni qabaata.
▪︎Sadarkaa IV: Kun kan gad bahee muldhatu, qubaanis kan ol hin deebinee fi keessaa qaama ta'umsaatii ala bahee kan jirudha. Inni sadarkaa III fi IV kun woldhaansa akka opireeshiiniin muranii baasuus kan barbaadudha.
Mallatooleen biroo:
- Yeroo bobbaaf taa'an nama dhukkubuu ykn miirri akkasii namatti dhagahamuu.
- Dhukkubii malee dhiigni sagaraa irratti ykn woraqaa ittiin haxaayannu irratti argamuu.
- Naannoo taa'umsaa nama hooqsisuu/hossisuu/
- Yeroo tokko tokko bobbaan to'annaa malee ofuma gadi bahuu (kun keessattuu yoo dhiitaan sun tuttuqamee jiraate)
- Darbee darbee sirritti dhiiguu waan danda'uuf ykn dhiigni suuta suutaan dhiigu kun hirdhinna dhiigaatiif nama saaxiluu danda'a.
- Dhiitaan kintaarotii micciiramuun ykn guduumfamuun, akkasumas dhiigni ititee hidda dhiigaa naannoo sanii cufuun dhukkubbiin hamaan tasa akka namatti dhagahamu gochuu danda’a. Yeroo dhukkubbiin hamaan akkasi namatti dhagahame, yeroo otoo itti hin kennin, hatattamaan mana yaalaa deemuu barbaachisa.
---
---
Tooftalee armaan gadiitiin fayyadamuun kintaarootii of-irraa hanga isaa xiqqeessuun ykn miira dhukkubbii namatti dhagahamu san salphisuu ykn balleessuun ni danda'ama:
* Bishaan hoo'isanii sooqida moonqaa shaayii lamaa/sadihii itti naqanii daqiiqaa digdamaaf qaama teessumaatiin (iddoo dhiitaan jiruun) keessa taa'uu. Bishaan xiqqoma ha hoo'uu barbaadama malee nama gubuu hin qabu. Kana gochuun dhukkuboota nannoo ta'uumsatti mul'atan hedduuf faayidaa guddaa qaba.
* Bishaan gahaa. Guyyatti litirii sadihii ol dhuguu.
* Fuduralee fi Kudurallee adda addaa (kan akka shaanaa, kaarotii, dinnichaa, atara, muuzii, abukaadoo fi kkf) nyaachuu.
* Sochii qaamaa (deemsa ariifanna, daakkaa, daansii, fiigiicha, kubbaa milaa fi kkf) guyya guyyaan daqiiqaa soddomaafi achi oliif, yoo xiqaate torbaanitti guyyoota shaniif hojjachuu.
* Yeroo dheeraaf baay’isanii taa’uu dhabuu
* Nyaata dibatni itti baay’atan, foon, killee/buuphaa fi isaan irraa tolfaman hirdhisuu
* Cabbii qabanahaa ta'e iddoo taa'umsaatti qabuu. Guyyatti yeroo hedduu akkas gochuun dhiitaa san haalaan ni xiqqeessa.
* Bobbaa dabarsuu dhabuu. Yeroma inni namatti dhufe/mudde taa'uu. Dabarsuu dhabuun faayidaa hedduu qaba.
* Akkasumas, mana yaalaa deemanii rakkina jiru iftoominnaan erga doktoratti ykn ogeessa yaalatti himatan booda qoricha ykn yaala biraa (Opireeshinii sasalphaas ta'uu mala) isaan namaaf ajajan haalaan fudhachu/fayyadamuu
*** Mallatooleen armaan olitti eeraman keessaa tokko tokko malattoo dhukkuba kaansarii mar'umaan guddaas ta'uu waan danda'aniif, keessattu umriin keessan woggaa 50 ol yoo ta'e, mana yaalaa deemtanii qoratamuun adda baafachuu isin barbaachisaa.
---
Horaa, bulaa, deebanaa!
Fayyaa dahaa, fayyaa ta'aa!
--
©Dr Nuredin Luke
