20/03/2022
HIIKKAA SUURAA FAATIHAA
********Sadarkaa suuraa Faatihaa
Suuraan faatihaa sadarkaa hedduu, guddina, kabajaa fii waan adda isii godhu baayyee qabdi. Sanirraa waan Sunnaan sabate haa laallu:
1. Isiin ifaa Nabi Muhammad ﷺ malee Nabiyyiin biraa hin kennamini
Ibnu Abbaas Rabbi isaa fii abbaa isaarraa haa jaalatuu akki je’e:
بينما جبريلُ قاعدٌ عند النبيِّ صلَّى الله عليه وسلَّم، سمِع نقيضًا من فوقه؛ فرفَع رأسَه، فقال: هذا بابٌ من السَّماء فُتِح اليوم، لم يُفتح قطُّ إلَّا اليوم، فنزل منه مَلَك، فقال: هذا ملَكٌ نزل إلى الأرض، لم ينزلْ قطُّ إلَّا اليوم، فسلَّم، وقال: أبشِرْ بنورَينِ أوتيتَهما، لم يُؤتَهما نبيٌّ قبلك: فاتحة الكتاب، وخواتيم سورة البقرة، لن تَقرأ بحرفٍ منهما إلَّا أُعطيتَه
“Osoo Jibriil fii Nabiyyiin ﷺ wajjiin taa’anii sagalee gama samiitii dhagayee mataa isaa ol fuudhe, Jibriil akki je’een, kuni hulaa samii arra baname kan arra dura takkaa hin banamin, Malaaykaan tokkos gad bu’e, kuni malaaykaadha takkaa arra dura gama dachii gad hin buune. Malaaykichi Nabiyyii nagaya irratti buusee san booda akki je’een: gammadi ifaa lama ta si malee Nabiyyiin biraa hin kennamin sitti fide: isiin faatihatul kitaab (suuraa faatihaa) fii xumura suuraa Baqaraati. Harfii takka isiirraa qaraatee ifaa kennamtu malee hin haftu” Muslim: 806
2. Fatihaa qara’uudhaan gabrichi salaata keeysatti Rabbiin maqoo (kophaa) baha.
Hadiisa Abuu Hureeyraa Rabbi irraa haa jaalatu, Nabiyyii ﷺ akki je’e:
“Namni salaata salaatee Ummul Qur’aan (faatihaa) keeysatti hin qara’iin salaanni isaa irruudha – hogga 3 je’e- guutuu miti salaanni isaa. Abuu Hureeyraadhaan ‘nuti imaama duubaan hoggaa jirru yoo maal goona?” ja’aniin. If keeysatti qara’aa ani Ergamaa Rabbii ﷺ ka ja’uun dhagaye, ‘Rabbiin ol tahe ni je’e, salaata anaa fii gabricha kiyya jidduttiin wal qixatti adda qoode, gabricha kiyyaaf waan kadhateetu tahaaf. Gabrichi kiyya Alhamdulillaahi Rabbil aalamiin (faaruun cufti Rabbii aalamaatiif taate) hoggaa je’e Rabbiin ol tahe ni ja’a Gabrichi kiyya na faarse. Hoggaa gabrichi Ar-Rahmaan Ar-rahiim (akkaan gabroottaniif rifataa, akkaan mararfataa) je’e, Rabbiin ol tahe gabrichi kiyya faaruun narratti daddeebise ja’a. Hoggaa gabrichi Maalik yowmi diin (mootii guyyaa galataa) je’e, Rabbiin ol tahe ni ja’a gabrichi kiyya na guddise, amrii isa natti irkise. Hoggaa gabrichi suma qofa gabbarra, suma qofaan gargaarsinna je’e, Rabbiin ol tahe tuni anaa fii gabricha kiyya jidduudha gabricha kiyyaaf waan kadhatateetuu tahaaf ja’a. Hoggaa gabrichi karaa qajeelaa tahe kan warra ati irratti qananiiftee nu qajeelchi, karaa warra itti dallantee kan hin tahin, kan warra jallateetis kan hin tahin je’e Rabbiin ol tahe gabrichi kiyya waan kadhate argatuu qaba ja’a.” Muslim: 395
3. Faatihaa namni hin qara’iin salaanni isaa hin jirtu
Hadiisa Ubaadaa bin As-Saamit Rasuulli sallallaahu aleeyhi wasallam akki je’e:
لا صلاةَ لِمَن لم يقرأْ بفاتحةِ الكِتاب
“Salaanni hin jiru (hin qeebalamu) nama Faatihatul kitaab (bantuu kitaabaa) hin qara’inirraa” Bukhaarii: 756, Muslim: 394
4. Faatihaan qoricha izinii Rabbiitiin
Hadiisa Abuu Saiid Al-Khudrii Rabbi irraa haa jaalatu akki je’e:
انطلَق نفرٌ من أصحابِ النبيِّ صلَّى الله عليه وسلَّم في سَفرةٍ سافروها، حتى نزَلوا على حيٍّ من أحياء العرب، فاستضافوهم فأَبَوْا أن يُضيِّفوهم، فلُدِغ سيِّد ذلك الحيِّ، فسَعَوا له بكلِّ شيءٍ، لا ينفعه شيءٌ، فقال بعضُهم: لو أتيتم هؤلاءِ الرهطَ الذين نزلوا؛ لعلَّه أن يكون عند بعضهم شيءٌ، فأتَوَهْم، فقالوا: يا أيُّها الرهط، إنَّ سيِّدنا لُدِغ، وسَعَينا له بكلِّ شيءٍ، لا ينفعُه؛ فهل عند أحدٍ منكم من شيءٍ؟ فقال بعضهم: نعَمْ، واللهِ إني لأرقي، ولكن واللهِ لقدِ استضفناكم فلم تُضيِّفونا! فما أنا براقٍ لكم حتى تجعلوا لنا جُعلًا، فصالَحوهم على قَطيعٍ من الغَنم، فانطلق يتْفُل عليه، ويقرأ: الحَمْدُ لله رَبِّ العَالَمِينَ، فكأنَّما نشِط من عِقال، فانطلَق يمشي وما به قَلَبَةٌ ، قال: فأوْفوهم جُعلَهم الذي صالحُوهم عليه، فقال بعضُهم: اقسِموا، فقال الذي رقَى: لا تَفعلوا حتى نأتيَ النبيَّ صلَّى الله عليه وسلَّم فنذكُرَ له الذي كان، فننُظرَ ما يأمرُنا، فقدِموا على رسولِ الله، فذكروا له، فقال: وما يُدريك أنَّها رُقيةٌ؟! ثم قال: قد أصبتُم، اقسِموا، واضرِبوا لي معكم سهمًا، فضحِكَ رسولُ الله صلَّى الله عليه وسلَّم
“Tuutti takka sahaaboota Nabiyyii ﷺ keeysaa imala takkaaf bahanii deeman, hanga ganda araboota baadiyyaa tokko gahanitti. Ganda saniin nu keeysummeeysaa ja’anii gaafannaan didan. Damiinni ganda sanii tas iddamee dawaa gosa hundaan itti carraaqanii fayyisuu dadhaban. Gariin warra gandaa jara imala deemu ka ganda keenya qubate san dheeynee dawaa haa gaafannuu akka tasaa namni dawaa beekhu isaan keeysa yoo jiraate waliin ja’anii itti dhaqan. Itti dhufanii yaa tuuta imala deemtu damiina keenyaatu iddame, qoricha hundaan yaallee dadhabne isinirraa namni dawaa qabu jiraa? Ja’aniin. Sahaaboota keeysaa eeyyee dawaa nin beekha garuu keeysumummaa isin gaafannee nu diddan Wallaahi ani dawaa isiniif hin godhu hanga kafaltii nuuf kennitanii je’een. Re’ee muraasa kennurratti waliif galan. Sahaabtichi dhaqee suuraa faatihaa qara’ee irratti tufuu jalqabe, damiinni gandaa akka beeyladaa hidhaa hikkatteetti ke’ee mirqaanaan deeme, rakkinni irraa fayye. Jarri gandaa beellama kafaltii ni guuteef, gariin sahaabaa addaan haa qooddannu waliin ja’an. Inni dawaa godheef suni hanga Nabiyyii ﷺ bira dheeynee waan tahe hunda itti himnee waan nu ajaju barruu itti dhiisaa je’een. Ergamaa Rabbii ﷺ bira dhufanii waan tahe itti himan. Ati maaltu akka faatihaan qoricha taate si barsiise?! Je’een, Eegasii haqa qunnamtan qooddadhaa re’ee teeysan anaafis qooda keeysan keeysatti godhaa je’ee Nabiyyiin ﷺ kofle.” Bukhaarii 2276
