https://www.facebook.com/936391186497368/

Dr. Nuredin Luke, Awasho Main Road, Shashemene (2025)

08/12/2025

Baga Guyyaa Saboota, Sablammootaa fi Ummattoota Itiyoophiyaa 20ffaan isin gahe!

07/12/2025

Ganamaan hirribaa ka’e. Yoo ka’u ijoollee dhiibbootaan laakkayaman kan Tekwaandoo leenji’an tarree galanii hiriiraan yoo deeman arge. Wanti jalqaba sammutti na dhufe— fuulduree isaaniiti. Hojiin daa’imman kana hundaa ta’u eessaa dhufa? Eebbifamtoota hardhaatii biyyi hojii uumuu dadhabde daa’imman kanaa maal of harkatti qabdi jedhee na yaachise.

02/12/2025

Namoonni hojiidhaaf gara biyyoota alaa deemtan qorannoo meedikaalaa nu biraa argatuu dandeettu.

Teessoon: Shaashamannee, daandii aspaltii haaraa 01 irraa gara Waajjira Poolisii 81 geessu irra.

📞📲: +251 98 687 7587

15/11/2025

VAAYIRASII— Vaayirasiin maalidha?
***********************************

Vaayirasiin wanta lubbu-qabeeyyii fi lubbu-dhabeeyyii jidduu jiruudha. Of-danda’ee baay’achuu fi anniisaa tolfachuu hin danda’u. Vaayirasiin baay’achuufis ta’ee anniisaa tolfachuuf lubbu qabeeyyii biroo (nama, bineensota, baakteeriyaa, ykn biqiltoota) kan barbaaduudha. Isaaniin alatti of-danda’ee wal hin horu (baay’atu). Seelii namaa, bineensotaa ykn biqiltootaa yoo argate qofa kan baay’atuudha.

Vaayirasiin waan baay’ee xiqqaa ta’e kan ijaanii fi maayikirooskoopii baakteeriyaa ittiin ilaallu saniinis hin muldhanneedha. Seelii guutuu tokkos kan hin guunnedha. Seelii guutuu tokko kan hin taane, garuu qaccee sanyii xiqqaa tokko (DNA ykn RNA) fi qola pirootiinii kan eegumsaa DNA ykn RNA ta’e, kaapsiid (capsid) kan jedhamu qofa qaba. Vaayirasiin tokko tokko ammoo kaapsiidiin ala qola eeggumsaa kan membareenii seelii hubanii turan irraa argatan kan invaloop (envelope) jedhamu qabu.

Dabalataan, pirootiinootaa fi inzaayimoota murtaa’an qabaachuu danda’u. Saniin ala, vaayirasoonni, qaamota (orgaaneelii) seeliin lubbu-qabeeyyii tokko qabu hinqaban.

Vaayirasoonni, hedduun isaanii, yoo qaama seenan sirni ittisa qaamaa otoo dhukkuba hin fidin dursee isaan balleessuu ykn dhabamsiisuu danda’a. Isaan tokko tokko ammoo haala adda addaatiin dhukkuba fiduu danda’u.

Vaayirasoonni tokko tokko, seelii namaa faayidaa dhuunfaa isaaniitiif itti fayyadamuun dhukkuba fidu. Isaan kan biroo ammoo sirna ittisa qaamaa garmalee dallansiisuun dhukkuba fiduu.

Vaayirasoonni kan dhukkuba fidan seelii fayya-qabeessa namaa keessa seenuun qaamota xixiqqoo seelii sanaa fayyadamuun garmalee of-baay’isuuni. Erga kfbaay’isan booda hojii seelii sanii fi seelota bifa saniin huban faayidaan ala godhu. Erga itti fayyadaman booda seelonni sun akka du’an godhu. Yeroo tokko tokko ammoo sirna ittisa qaamaa garmalee dallansiisuun, yeroo sirni ittisaa deebii isaanii kennu dhukkuboonni (mallatooleen dhukkubaa) mudatu.

Vaayirasoonni dhukkuboota garagaraa fidu. Isaan keessaa muraasni: dhukkuba shiftoo (gifiraa), uttaalloo ykn hibibii, HIV (AIDS), gurraan xil (shugujuf), dhukkuboota tiruu vaayirasiin dhufan (hepatitis virus), infuleenzaa, COVID-19, dhukkuba laamshessaa (polio), dhukkuba saree maraattee (rabies) fi dhukkuboota kan biroo heddu fidu.

Dhukkuboonni vaayirasiin dhufan muraasni isaanii kan akka gifiraa (measles), saree maraattee (rabies), gurraan xil (mumps), infuleenzaa (influenza), pooliyoo (polio) faati talaallii waan qabaniif yeroo barbaachisetti talaallii isaanii argachuun (fudhachuun) dhukkuboota kanniin irraa of ittisuun ni danda’ama.

Sababa vaayirasiin seelii qaamaa keessa seenuun seelichuma faayiidaa (sagantaa) ofiitiif oolfatuu fi qaccee sanyii (DNA ykn RNA) malee qaama lubbu qabeeyyi biroo hin qabneef dhukkuboota vaayirasiin dhufan hedduu isaanii adda baasanii rukutuun yaaluun rakkisaadha. Kanaaf, of-eeggannoowwan dhukkuboota kanaan qabamuu dhabuuf gargaaran hordofuun barbaachisaadha.

—-
Maddi: BU’UURA FAYYAA fuula 59 fi 60.
Fayyaa ta’aa, fayyaa dahaa!
Dr. Nuredin Luke

15/11/2025

Simbira halkanii ijaan agartaniii beektuu? Naannoo akkamiitti agartan?

14/11/2025

Mallattoolee Dhukkuba Vaayirasii Marburg
******************************************
Dhukkubni Vaayirasii Marburg-iin dhufu talaallis ta’ee qoricha addaa ka isa waldhaanu hinqabu. Talaalliin isaa qorannoo irra jira. Dhukkubsattootaaf yaalli dandamachiisuu adda addaa ni kennama. Kun ammoo du’aatii sababa dhukkubichaatiin mudatu hanga tokko hirdhisuu ni danda’a.

Nama mallattoo dhukkubichaa muldhiseef saaxilamanii vaayirasichi yoo namatti tare, guyyaa lamaa hanga digdamii tokkoo keessatti mallattoo muldhisuu jalqaba namni tokko.

Yeroo hedduu (yeroo hunda ta’uu baatus), Mallattooleen inni muldhisuu fi tartiibni mallattooleen itti muldhatanis akka kanaa gadiiti:

Mallattooleen dura muldhatan (mallattooleen guyyaa duraa) hoo’a qaamaa, bowwoo cimaa, fi miira dadhabii hamaa ta’eedha. Dabalatan, dhukkubbiin maashaalee fi buusaawwanis jirachuu danda’a.

Baasaan gar-malee haphii ta’e, dhukkubbiin garaa, lollojjiniifi haqqeen guyyaa sadaffaa irratti ni muldhatu. Dabalatan, guyyoota lamaa hanga torbaa jiddutti shifiniin gogaa qaamaa irratti ni muldhata.

Guyyaa shan yoo gahe—dhiigni afaanii, irgaa, funyaanii, akkasumas bifa haqqeetiinii fi baasaatiin ni jiga.

San booda dhukkubsataan gara dadhabuu, gara of-wollaluu deema. Dhukkubichis gara hammaachutti deema. Qamaa fi sirna qaamota heddu dadhabsiisa. Yoo dhukkibichi haalaan cimaa ta’e mallattoo muldhisuu eegalee guyyaa 8 ykn 9-ffatti lubbuu galaafachuu danda’a.

Kanaaf, namoota mallattoolee kanniin muldhisan irraa qaamaan fagachuun barbaachisaadha. Namoonni mallattoolee akkanaa of-irratti argan ammoo hatattamaan gara dhabbilee fayyaa deemuu qabu.

—-
Fayyaa ta’aa, fayyaa dahaa!
Dr. Nuredin Luke

14/11/2025

MARBURG VIRUS—
Ittisaa fi Tooftaa Inni Daddarbuun:
**********************************
Dhukkubni vaayirasii kanaan dhufu yoo nama qabe carraan lubbuu namaa galaafachuu isaa ol’aanaadha. Hanga %88 gahuu danda’a.

Wanti gaariin dhukkuba kanaa ammoo nama mallattoo dhukkubichaa muldhisuu jalqabe irraa malee nama mallattoo hin muldhisne irraa namatti hin darbu.

Baattuun vaayirasii kanaa sinbira halkanii fuduraalee fi abaaboo soorattuudha. Sinbirroon halkanii akkasii sun ammoo holqa keessa jiraatu. Gaafa namni holqa uumamaas ta’ee holqa namtolchee namoonni albuuda fa’a baasuuf qotan seenanii tasa fincaan, bobbaa, ykn hancufa sinbira halkaanii kanaaf saaxilaman vaayirasichi gara namaa dhufa.

San booda nama irraa namatti daddarba. Karaan inni daddarbuun illee tuttuqii qaamaa fi dhangala’oo qaamaatiin. Dhiiga, hancufa, fincaan, furrii, imimmaan, dafqa, isparmii, haqqee fi dhangala’oo kan biroo kan qaama dhukkubsataatii bahuuf saaxilamuun daddarba. Uffata walii uffachuun, siree tokko irra ciisuunis ni daddarba. Waldhungachuu fi saalqunnamtiin ni daddarba. Qilleensaan ykn hafuuraan fagoo irraa hin daddarbu. Walitti dhiheenya qaamaa dhihoo irraa yoo dhangala’aan yeroo haxxifatamu biifamuun daddarbuu danda’a.

Karaan inni ijoon biraa ammoo dhaabbilee fayyaa keessatti dhukkubsataa irraa gara ogeessa woldhanutti—ofeeggannoon cimaan yoo hin godhamnee daddarba. Yeroo sirna awwalchaa nama dhukkuba kanaan du’eef godhamu—yoo janaayiza (reeffa) wajji tuttuqii qabaatan—daddarbuu danda’a.

Namoonni dhukkubicha kan daddabarsan yeroo mallattoo muldhisuu jalqabaniidha. Kanaaf, namoota mallattoolee dhukkubichaa qaban irraa qaamaan fagachuu fi tuttuqqii dhangala’oo qaamaa ofeeggannoon hirdhate irraa of qusachuun barbaachisa.

14/11/2025

Ministerri Fayyaa sababni dhukkuba bifa weeraraatiin Magaalaa Jinkaatti mudatee Vaayirasii Marburg jedhamu ta’u qorannoon mirkaneessee jira.

Baattuun vaayirasii kanaa ammoo gosa sinbira halkanii (Fruit Bats) kan fuduraa fi abaaboo soorattuudha. Gaafa namni fincaan, hancufa ykn dhangala’a isii keessaa bahuuf saaxilame vaayirasichi kara namaa tara. San booda nama irraa gara namaatti—tuttuqaa dhangala’aa qaamaa ofeggannoon hirdhateen—daddarba.

13/11/2025

Dhaabbanni Fayyaa Addunyaa (World Health Organization) sakatta’iinsa, hordoffii fi to’annoo dhukkuba tibba kana Hospitaala Jinkaatti muldhataa jiruuf doolaara Ameerikaa 300,000 (birrii Itoophiyaa miliyoona 45 ol) ramaduu ibsee jira. Haala dhukkubichaas jala bu’ee hordofaa jira jedheera. Waan dansaadha!

13/11/2025

Viral Hemorrhagic Fever (VHF)
************************

Moggaasni ‘Viral Hemorrhagic Fever’ jedhu akkuma argitan kana jechoota sadi qaba.

‘Viral’ kan jedhu vaayirasii ta’e wohii irraa dhufuu isaa akeeka. Maq-ibsiin ‘Hemorrhagic’ jedhu ammoo dhiigsuu, kan dhiigsu, kan dhiiga dhangalaasu hiikkaa jedhu qaba. ‘Fever’ jechuun ammoo hoo’a qaamaa ykn dhagna gubaa jechuudha.

Kanaaf, haaluma salphaan as irraa hubachuun danda’amutti, ‘Viral Hemorrhagic Fever’ jechuun dhukkuboota vaayirasoota murtaa’aniin dhufan ta’anii kan irra jireessaan mallattoo hoo’a qaamaa fi qaama dhiigsuu (dhiigni qaama keessattii fi qaamaa gara alaatti akka dhangala’u godhan) jechuudha.

Dhukkubsataan tokko hoo’a qaamaa ol’aanaa ta’e (38°C ol ta’e) yoo qabaate. Hoo’i sunis yaala dhukkuboota beekkamoo akka Busaa, Taayifoodi fi kk-fi godhameen yoo jijjiirama (fooyyee) dhabe. Tanuma jidduun ammoo dhiigni irga, afaan, funyaan irraa fi gogaa jalaatti dhangala’uu yoo muldhise. Akkasumas, yoo baasaa fi haqqee addaan hincinne qabaate, ykn qolli ijaa yoo diimate ykn keelloo ta’e. Haalli dhukkuba isaa kun ammoo saffisaan itti cimuun gara orgaanota qaamaa dadhabsiisutti ce’ee yoo lubbuu yeroo gabaabduu (guyyoota keessatti) galaafate— wanti kun ‘Viral Hemorrhagic Fever’ ta’uu shakkama ykn shakkamuu qaba.

Shakkii san booda vaayirasii kamtu waan kana fidaa jira jedhamee, haala naannoo sanii wajjiin wal biras qabamee, qorannoo laboraatorii fooyya’aa ta’een adda baafama.

Vaayirasoota gartuu adda addaa 20 ol ta’antu dhukkuba akkanaa (Viral Hemorrhagic Fever) fiduu danda’u. Isaan keessa: Ebola, Yellow Fever, Dengue Hemorrhagic Fever, Lassa Fever, Marburg, Crimean-Congo Hemorrhagic Fever, Lujo Fever, …keessatti argamu.

Akkuma maqaan isaanii gargara ta’e kana, vaayirasootni kun cimminni dhukkubaa, mallatooleen dabalataan agarsiisan, hammeenyi isaan lubbuu galaafachuu irratti qaban wal-caala ykn adda addummaa qaba. Ebola, Marburg, Lujo kan jedhaman namoota huban keessaa %50–90 galaafachuu akka danda’an weerara dhukkuboota kanneenii kan kanaan dura ka’an irraa hubatamee jira.

Mee waa’ee dhukkuboota kanaa irratti waan gaafii isinitti ta’ee fi beekuu barbaaddan gaafadhaa. Barreeffama itti aanuun deebii gaafilee keessanii isiniif dhiheessa.

—
Fayyaa ta’aa, fayyaa dahaa!
Dr. Nuredin Luke

12/11/2025

Dr. Geetinet Abbiyu jedhama. Hospitaala Jinkaatti haakima waliigalaa ture. Kenna tajaajilaa fayyaa irratti dhukkubsattoota otoo waldhaanaa jiru innis dhukkuba ammaaf maalummaan isaa guututti adda hinbaane kanaan qabamee turtii guyyoota muraasa keessatti lubbuun isaa dabartee jirti. Isa malee namoonni mallattooleen dhukkubichaa irratti muldhatan afuris lubbuun darbanii jiru. Biyyon isaanitti haa salphattu. Maatii fi firoottan isaaniif Rabbiin jajjabinna haa kennu!

12/11/2025

OF-EEGGANNOO! 🚨🚨🚨

Ibsa galgala kana Ministerri Fayyaa baaseen dhukkubni ammaaf maalummaan isaa guututti adda hinbaane Naannoo Kibbaa, Magaalaa Jinkaa keessatti mudataa jira.

Dhukkubichis mallattoolee akka hoo’a qaamaa, qola ijaa diimessuu, baasaa dhiiga makate, dhiigni irga, afaan, funyaanii fi qaama biraatii dhangala’uu fa’a qaba.

Akka ogeeyyonni Hospitaala Jinkaa himanitti: torbee kana namoonni shan dhukkubichaan qabamanii lubbuun isaanii dabartee jirti. Isaan lubbuu dhaban keessaa lama ogeeyyota fayyaa (doktara tokkoo fi narsii tokkoo) kan dhukkubsattoota waldhaanaa turaniidha. Kun ammoo dhukkubichi nama irraa namatti haalaan daddarbaa ta’uu isaatiifi kan yeroo gabaabaa keessatti lubbuu galaafatu ta’uu agarsiisa.

Dr. Nuredin Luke

08/12/2025

07/12/2025

02/12/2025

15/11/2025

15/11/2025

14/11/2025

14/11/2025

14/11/2025

13/11/2025

13/11/2025

12/11/2025

12/11/2025

Address

Website

Alerts

Contact The Practice

Shortcuts

Share

Category