https://www.facebook.com/936391186497368/

Dr. Nuredin Luke, Awasho Main Road, Shashemene (2026)

24/12/2025

Dhukkuba Amala Farra Hawaasummaa -
(Antisocial Personality Disorder)
***************************************
Amalli dhuunfaa muuxannoo, haala naannoo (iddoo jireenyaa) fi amaloota dhaalaan argamaniin murtaaya. Kanaaf, namoonni amala adda addaa qabaatu. Amaloonni adda adda namni tokko qabu wolitti ida’amuun namummaa (amala dhuunfaa) nama sanii kan ibsan ta’u.
—-

—-
Namonni tokko tokko garu sababoota adda addaatiif (dhaalaa fi jijjiirama haala hojii sammuu irraa) amala hin baratamne, kan adda ta’ee fi hawaasa keessatti akka amala gadheetti Ilaallamu deddeebiin gochuu (qabaachuu) danda’u. Amalli gadheen isaan itti fuufiinsan qabaatan kunis jireenya dhuunfaa, hojii, barnootaa, fi hawaasummaa isaanii kan jeequ ta’a. Amalli dhuunfaa sadarkaa san gahe akka rakkoo fayyaa sammuu cimaa (personality disorders) ilallama.
—-

—-
Rakkoowwan (dhukkuboonni) amala dhuunfaa (personality disorders) akaaku kudhantu jira. Isaan keessaa tokko kan ta’e dhukkuba amala farra hawaasummaa (antisocial personality disorder) asii gadiitti ilaalla.
—-

—-
Namoonni dhukkuba farra hawaasummaa qaban yeroo baay’ee safuu, ittiin bulmaata, fi bartee hawaasaa, akkasumas seera cabsuudhaan yakkamtoota ta’u. Yeroo hedduu, wontoota hookkora kakaasan godhu. Kijibuun, sobuun, dawaalee sammuu namaa hadoochanii fi alkoolii deddeebiin dhuguun isaan irratti muldhata. Itti gaafatamummaa maatii fi hojii isaanii irratti fuulleffatanii milkaayuun itti ulfaata.

Mallattoowwan dhukkuba amala farra hawaasummaa ijoo ta’an kan deddeebiin mul’atan isan armaan gadii kana:

* Waan hawaasni dogoggora jedhee fudhatu tuffachuu.
* Deddebiin waan soba ta’e dubbachuu.
* Miira namoota birootiif dhimma dhabuu ykn namoota kabajuu dhiisuu.
* Miira olaantummaa qabaachuu ( ani nama addaa fi ol’aanadha jedhanii yaaduu fa’a danda’u)
* Wontoota yakkaa ta’an deddeebiin raawwachuu
* Diinummaa, gara jabeessummaa, jeequmsa uumuu, fi namoota biroo doorsisuu.
* Namoota biroo miidhuun akka yakka hintaane itti dhaga’amuu.
* Nageenya ofiitii fi namoota birootiif dantaa dhabuu irraa wantoota balaa geessisan hojjachuu.
* Itti gaafatamummaa bahuu dadhabuu. Itti gaafatamummaa hojii ykn maatii bahuu dhabuu.
* Fedha fi yaalii of-ajjeesuu, akkasuma namoota biroo ajjeesuu qabaachuu
* Akkasumas, miidhaa qaamaa namoota irratti geessisuu, hatuu, seera cimaa cabsuu, qabeenya balleessuu, sobuu fi amanamummaa dhabuun mallatoolee ijoo muldhataniidha.

Yaala gahaa malee, dhukkubni amala farra hawaasummaa (antisocial personality disorder) rakkoo umurii guutuu nama wojji jiraatu ta’a. Garuu namoota tokko tokko irratti mallattooleen tokko tokko ―keessattu amala hookkara uumuu fi yakkaa raawwachuu―yeroodhaan hir’achaa deemuu danda’u.
—-

—-
Namoonni dhukkuba farra hawaasummaa qaban ofuma isaaniitiin gargaarsa yaalaa hin barbaadan. Sirri akka ta’anii fi miira itti dhaga’amu irraas waan godhanitti hin gaabban. Kanaaf, hiriyyaan keessan ykn miseensi maatii keessan mallattoole kana muldhisuun yoo dhukkuba kana qabaachuu akka dandaʼu shakkitan, namni sun ogeessa fayyaa sammuu bira deemuun gargaarsa akka argatu suuta gorsuun amansiisuun gargaara!
—-
—-
Fayyaa ta’aa, fayyaa dahaa!

Waa’ee Rakkoowwaan Amala Dhuunfaa kan biroo Kitaaba Bu’uura Fayyaa fuula 379-382 irratti baldhinnaan ni argattu.

Dr. Nuredin Luke,

24/12/2025

Soonogiraafii (Ultrasonography)
*********************************
❖ Soonogiraafiin kenniinsa tajaajila fayyaa keessatti qorannoo namoota hedduuf godhamu keessaa isa tokko. Tajaajila qorannoo fi yaalaaf ni oola. Soonogiraafiin (qorannoon altiraasaawundii) kan hojjatu danbalii sagalee dhageetti gurra namaatii ol ta’e fayyadamuuni.

❖ Qorannoon Altiraasaawundii caarallaa qaama miidhuu danda’an (ionizing radiations) hin fayyadamu. Kanaaf, qorannoo ulfaa (daa’ima gadaamessa keessa jiru) irratti immeejiingii filatamaa ta’eedha. Qorannoo haadha ulfaa iratti, altiraasaawundiin: haala uumamaa fi taa’umsa daa’ima ulfaayamee, lubbuun jiraachuu fi dhiisuu isaa, tilmaama guyyaa daa’imaa, baay’inna (tokko, lakkuu ykn sanii ol ta’uu), hamma bishaan ulfaa fi haala hobbaatii fa’a ittiin qorachuuf ni tajaajila.

❖ Qaamota akka tiruu, rajiijii (pancreas), ispiliinii, kalee, hadhooftuu, afuuffaa fincaanii, piroosteetii, fi gadaamessa fa’a ittiin ilaaluuf kan fayyadu yoo ta’u, bu’aan isa irraa argamu (rakkoo jiru adda baasuun) dandeettii nama maashinichaan ilaaluu ykn qoratuu san irratti kan hundaa’uudha.

❖ Altiraasaawundiin onnee (echocardiography) ammoo sosochii maashaa fi valvii onne, baldhinna chaambarii (kutaalee onnee), hamma dhiigaa onnee seenuu fi bahu, dhiita’aa fi dhiigni kantare yoo onnee keessa jiraate ittiin qorachuuf nu gargaara.
—

—
Altiraasaawundiin woldhaansa (yaala) irrattis, faayidaalee akka:
➢ Meeshaalee yaalaaf oolanii fi qorichoota adda addaa, qaama keessatti iddoo barbaadamanitti, altiraasaawundiin ilaalaa kaayuuf ykn kennuuf.
➢ Osoo opireeshiiniin (baqaqsanii) hin banin, qaamota keessaa irraa waan akka siriinjii (lilmee) fa’a fayyadamuun altiraasaawundiin deeggaramaa samuuda qorannoof fuudhuuf,
➢ Danbalii sagalee cimaa ta’e fayyadamuun, tishuuwwan sochosuu fi hoo’isuuf, dhiiga kantare bittinsuuf (facaasuuf) tajaajiluu danda’a.
—-

—-
Fayyaa ta’aa, fayyaa dahaa!
Bu’uura Fayyaa, Fuula 36 irraa kan fudhatame.
Dr. Nuredin Luke

19/12/2025

Namoota carraan DV dhaqqabee Ameerikaa deemuuf qophii irra jiran dabalatee, isaan guutanii carraa eeggataa jiraniis Visa DV-dhaan gara Ameerikaa isaan fidu akka hin kennamneef Donald J. Trump ajaja dabarsanii jiru. DV Lottery wanti jedhamu waan barbachisaa ta’ee miti, kana booda dhaabbachuu qabas jedhaniiru.

18/12/2025

Dhukkubsattoonni Yaala Kaansarii Irra Jiraan Maaf Rifeensa Haadatu?
***********************
Kaansariif yaala godhamu keessaa tokko qorichaan kan kennamu—Keemooteeraapii (Chemotherapy) isa jedhamudha.
---

Keemooteeraapiin (qorichi yaalaa kaansariif kennamu) seelii kaansarii saffisaan walhoruu fi baay’aatu ajjeesuun hojjata. Yeroo kana akka xaxaa dalgaatti seeliilee qaamaa kan saffissaan guddatan (baay’atan) kan biros ni miidha.

Seeliilee miidhaman kana keessaa tokko seelii hidda rifeensaati. Miidhamuun seeliilee kanaa rifeensi akka nama irraa buqqa'u, akka haphatu, akka luqqa'u gochuun rifeensa gar malee haphisuu ykn guutuun guutuutti moluu hanga gochuu deemu. Haala kanaan kan miidhamu rifeensa mataa qofa otoo hin ta’in, rifeensi bobaa, saphiin, nyaarri ijaa fi rifeensi qaama irra jiru kan biros miidhamuu danda'u.
---

Haalli haphachuu fi buqqa'uu rifeensaa kun gosa qoricha Keemooteeraapii san irratti hundaa'un salphaa hanga hammaataa ta'uu danda'a. Qorichoonni miidhaa rifeensa irratti hin fidnes ni jiru.

Sababa rifeensi nama irraa dhumaa deemuufi buqqa'uun dura miirri dhukkubbiin gogaa mataa irratti namatti dhagahamuuf jecha rifeensa haadachuufi dhiisuu irratti akka murteeffatan dhukkubsattootaaf dhihaata.

---
Miirri gaddaa rifeensa ofii otoo argan nama irraa dhumuu akka dhukkubsattoota hin mudanneef yeroo hedduu akka haadatan gorfamu. Biyyoota guddatan keessatti firoottan, jaalalloonii fi hiriyyoonni nama yaala kanaaf rifeensa haadatee cinaa jiraachuu isaanii agarsiisuuf rifeensa isaanii wojjiin haadachuun deeggarsa isaaniii muldhisuun baratamaadha.
---

Wonti gaariin yaala xumuranii ji'oottan booda rifeensi jabinnaa fi halluu duraa isaa eeggatee bahuu baatullee deebi'ee ni bahaaf. Akkasumalle, yaalli caarallaan godhamu (Radiotherapy) rifeensi naannoo qaama caarallaan kennamee jiru akka haphatu ykn badu gochuu danda'a.

Amma irratti yaalli manca'uu rifeensaa kana haala amansiisaa ta'een dhoorku hin jiru.
---
Fayyaa ta'aa!
Horaa, bulaa, deebanaa!
---
©Dr. Nuredin Luke

17/12/2025

Hariiroo Itiyoophiyaa fi Hindii irratti:

Waa'ee Ilma Oromoo biyya Hindii bulchaa ture—MALIK AMBAAR—dhageessanii beektuu?

Yeroon inni jiraate wolakkaa jaarraa 16ffaa hanga kurmaana jalqabaa jaarraa 17ffaa ture. Erga babaldhatiinsi Oromoo jaarraa 16ffaa dhumatee booda— Malik Ambar naannoo magaalaa Harariitti, bara 1548, maatii Oromoo irraa dhalate. Maqaan maatiin isaa jalqaba baasaniif Chaapuu ture. Chaapuun maatii harka-qalleessa irraa dhalate. Bara inni dhalate san keessa daldalli garbaa (slave) baratamaa fi hoo’aa ture. Wogga woggaan yoo xiqqaate namoonni kuma kudhaanii ol ta’an Baha Afrikaa kana irraa fuudhamanii akka garbaatti Hindiyaa, Araba, Chaayinaa fi Pershiyaa (Iraanitti) gurguramu ture.

Rakkoo diinagde cimaa qaban irraa maatiin ilma isaanii gabaa garbaatiif akka dhiheessan galmeeleen seenaa tokko tokko addeessanis, isaan hafan ammoo akka tiksummaa beeyladootaa irraa dirqiin fuudhatameetti kan dhiheessanis ni jiru. Chaapuun ijoollee ta’ee akka garbaatti fudhatame.

Worri isa bites fudhatanii Galaana Diimaa ceesisanii magaalaa Mocha (Mookaa) Yemenitti argamtutti nama galii jiddugaleessa qabutti dabarsanii gurguratan. Mookaan yeroo sanitti magaalaa balbala galaanaa (port city) sochii daldalaa hoo’aa qabdu turte. Mookaa erga turee boodas, namni isa bulchaa ture fuudhee gara magaalaa Baagdaad (Baghdad) geesse. Baagdaad yeroo sanitti magaalaa jiddugala beekumsaa, diinagdee, saayinsii fi qarooma addunyaa Islaamaa turte.

Bagdaaditti daldalaan Qaasim jedhamuu Chaapuu nama Yemenitti isa bulchaa ture irraa bitatee horachuu eegale. Qaasim Baagdaaditi Chaapuu Afaan Arabaa barreessuu fi dubbisuu, akkasumas Quraanaa fi barnoota amantii barsiisee daandii amantaa Islaamaa irratti guddise.

Dandeettiin Chaapuun waa qayyabachuu fi hubachuu irratti qabu baay’ee waan isa dinqisiiseef —Qaasim— Chaapuu maqaa “Ambaar” jedhu baaseef. Ambaar jechuun hiikkaa nama hubataa/xiinxallaa cimaa (Intelligent one) jedhu qaba. Qaasimis Ambaar (Chaapuu) Galaana Arabiyaa ceesisee Garba Hindii irraan fuudhee biyya amma Hindi (India) jedhamtu fidaan.

Yeroo san biyyi amma Hindi (India) jedhamtu akka mootummaa tokkootti hin turre. Naannoon tulluuwwan Dekkaan (Deccan) Hindi keessatti argamu mootiiwwan (sulxaanota) shan kan—Berar, Bahmani, Bijapur, Golcondaa fi Ahmadnagar— jedhaman qaba ture. Chaapuun (Ambaar) lafa mootiwwaan shanan Deekkaan kana keessaa tan Ahmadnagaar jedhamtutti nama isa horataa ture (Qaasim) wojji dhaqan. Qaasimis nama ministera mootii (sulxaanota) Ahmadnagaar keessaa tokko kan ta’e, Chengiizi, jedhamutti dabarsee gurgurate.

Mootiiwwan (sulxaanonni) Deekkan shanan kun bara san gara kiibbaatiin Impaayera Mughul irraa yaaliin weeraraa cimaan deddeebiin isaan mudata ture. Akkasumas, ofii isaaniitii wol moyatanii wolbulchuuf lola adda addaa wolirratti godhu ture. Lola angoo fudhachuuf godhame keessaa tokko irratti horataan haaraan Amabaar, ministerri sulxaanota Ahmadnagaar keessaa tokko kan ture, Chengiiz, bara 1576, ni ajjeefama. Kana hordofee, Ambaar (Chaapuun), garba ta’uu irraa gara nama bilisaatti dhufa.

Ambaar, erga garba ta’uu jalaa bahee bilisummaa qabaatee booda, loltoota maallaqni kaffalamee lolan ofii isaatii leenjisuu jalqabe. Suutuma jedhee loltoota ciccimoo gugsii fardaatiin loluu danda’an 150 qabaate. Jidduu bara 1576 hanga bara 1595 Ambaarii fi loltuuwwan inni leenjise kun Sulxaanota Deeccan (Hindii) keessaa Bijapurii fi Golkoondaa jedhaman keessatti hokkaraa fi fincila ka’u kaffaltiin kaffalamee to’ataa turan. Booda irra dandeetti addaa hokkara ka’u to’achuu irratti agarsiiseen maqaan “Malik” jedhamu eda’ameefi. San boodas “Malik Ambaar“ jedhamaa waamamuu jalqabe. Jidduma bara kanaa dubartii Kariimaa jedhamtu fuudhee, isii irraa ilmaan afur hora.

Bara 1595 Impaayerii Moghul, Sulxaanota Dekkaan keessaa kan inni itti jalqaba dhaqe—Sulxaanota Ahmadnagaar— weeraraan qabachuuf woraana jalqaba. Malik Ambaaris, loltoota qabuun dabalata, ummata sulxaanota Dekkaan keessa jiran dammaqsuunii fi hidhachiisuun woraana kuma torba (7,000) ta’u horata. Bara 1597 yeroo Impaayerri Moghul, mootitti Ahmadnagaar yeroo sanii injifatee turetti, Malik Ambar dhageettii, dandeetti woraanaa fi fudhatama qabutti fayyadamuun worra Moghul erga ari’e booda — inni sanyii mootii irraa waan hin dhalataniif bulchuuf waan fudhatama hin qabneef— maatii sulxaanotaa keessaa mucaa tokko akka sulxaana (mootii) Ahmadnagaar ta’u godhe.

Mucaa mootii akka ta’u godhe kanattis, mucayyoo isaa itti heerumsiise. Achii haala kanaan innis miseensa maatii sulxaanotaa ta’e. Mucaan akka sulxaanatti (mootitti) angoo irra haa taa’u malee, murteewwan siyaasaa fi diinagdee murteessoo kan dabarsuu fi ajaju Malik Ambaar ture.

Bara 1605 Malik Ambaar mootota shanan Dekkaan tokkoomsuun, woraana cimaa loltuuwwan kuma shantamaa qabu erga horate booda, Impaayeera jabaa yeroo sanii Moghul Impaayer, lafa Dekkaan isaan qabatan irraa ari’uun bilasa baasuu danda’e.

Erga isaan ari’e booda magaalaa bareeduu yeroo sanii Khirkii (Khuladabad) jedhamtu ijaare. Magaalaan tunis masaraa mootummaa babbareedoo ta’an, iddoowwan bashannaanaa fi finca’aa adda addaatiin, akkasumas sochii dinagdee hoo’aan guddataa dhufuun jiraattota kuma dhibba lamaa ol horatte. Malik Ambaar magaalattiitti ujummoo sarara bishaanii diriirsuun magaalaa jireenyaaf gaarii fi filatamtuu akka taatu godhe.

Bara 1610, mucaan inni akka mootitti irra kaayee mucatti isaa itti heerumsiisee ture sun, sakkoo badee intala biraa fuudhee, intala fuudhe san wojjiin, jaartii isaa tan duraa intala Malik Ambar san diinonfachuu jalqabe. Malik Ambaaris, mootichaa fi jaartii isaa haaraa san summiidhaan dhabama isaan gochuun; ilma mooticha kan mucattiin isaa deettu, kan inni akaakkayyutti ooluuf mootii akka ta’u gubbaa irra kaayee ofii bulchuu itti fuufe. Worri maatii sulxaanotaas akka hin komanneef faayidaa adda addaa kenneefii lafa raabseef.

Worri Impaayera Moghul yeroo irra deebiin Sulxaanota Dekkaan, Ahmadnagaar fa’a, weeraruuf ka’an, Malik Ambaar lolee lolchiisee afoo dhaabbachuun isaan dhaabsise. Kanatti aaree mootiin Moghul yeroo sanii suuraa Malik Ambaar fi isaa, kan inni (mootichi) Moghul Malik Ambaar xiyyaan itti woraanu hojjisiifatee masaraa isaa kaayee ture. Garuu akka hawwe san argee Malik Ambaar woraanee ajjeesuus, ta’ee mo’achuu hin dandeenye.

Malik Ambaar magaalaa ofi ijaare Khuladabad keessatti soodduu guddaa ijaarate. Otoma bulchaa jiruu bara 1626 dhukkubsatee du’aan boqate. Soodduu isaa suuraa irratti argitan kana, kan ammas magaalaa Hindii Khuladabad jedhamtu keessatti argamu, keessatti awwaalame. Soodduun kun ammas kan jiru yoo ta’u, Hindi keessatti akka hambaa seenaa murteessaa tokkotti ilaallama.

16/12/2025

Handhuurri Oromiyaa eessa? 😉

14/12/2025

Hardha sirna awwaalcha Professor Hamdeessa Tusoo irra oolle.

Professor Hamdeessan ilmaan Oromoo muraasa bara dukkanaa san carraa baratanii barsiisuu argatan keessaa tokko.

Hamdeessaan nama Oromoo waggaa 53 hardhaa University Australia jiru irraa digriidhaan eebbifamaniidha. Woggaa 44 hardhaa nama Ph.D dalaganiidha. Piroofeesara Oromoo kan jalqabaati. Namoota isaan barsiisan keessaa Dr. Gammachuu Magarsaa fa’a keessatti argamu.

Nama umurii isaanii guutuu saba Oromoo beeksisuufi Oromoo beekumsaan ijaaruu irratti fixaniidha. Waldaa Qorannoo Oromoo (OSA) isaantu hundeesse. Hawaasa Oromoo biyyoota lixaa keessatti ijaaruu irratti shoora leencaa bahatanii jiru. Oromoon nama guddaa jireenya isaa guutuu isaaf dadhabaa tureef hardha geeggessaa kabajaa godheefi.

10/12/2025

Kiliinika Dr. Nuredin Luke:

* Qorannoo fi yaala dhukkuboota keessoo.
* Hordoffii ulfaa fi tajaajila deessisuu.
* Yaala daa’immanii fi dargaggeeyyii.
* Tajaajila baqaqsanii woldhaanuu sasalphaa.
* Tajaajila ciibsanii yaaluu.
* Qorannoo fi yaala dhukkuboota saal-qunnamtii (dhukkuba dhiiraa).
* Qorannoo Meedikaalaa namoota biyya alaa deemaniif

Teessoon: Shaashamannee, aspaalti haarawa 01 irraa gara Buufata Poolisii 81 geessu irraa argattu

📞 0916014725

08/12/2025

Baga Guyyaa Saboota, Sablammootaa fi Ummattoota Itiyoophiyaa 20ffaan isin gahe!

07/12/2025

Ganamaan hirribaa ka’e. Yoo ka’u ijoollee dhibbootaan laakkayaman kan Tekwaandoo leenji’an tarree galanii hiriiraan yoo deeman arge. Wanti jalqaba sammutti na dhufe— fuulduree isaaniiti. Hojiin daa’imman kana hundaa ta’u eessaa dhufa? Eebbifamtoota hardhaatii biyyi hojii uumuu dadhabde daa’imman kanaa maal of harkatti qabdi jedhee na yaachise.

02/12/2025

Namoonni hojiidhaaf gara biyyoota alaa deemtan qorannoo meedikaalaa nu biraa argatuu dandeettu.

Teessoon: Shaashamannee, daandii aspaltii haaraa 01 irraa gara Waajjira Poolisii 81 geessu irra.

📞📲: +251 98 687 7587

15/11/2025

VAAYIRASII— Vaayirasiin maalidha?
***********************************

Vaayirasiin wanta lubbu-qabeeyyii fi lubbu-dhabeeyyii jidduu jiruudha. Of-danda’ee baay’achuu fi anniisaa tolfachuu hin danda’u. Vaayirasiin baay’achuufis ta’ee anniisaa tolfachuuf lubbu qabeeyyii biroo (nama, bineensota, baakteeriyaa, ykn biqiltoota) kan barbaaduudha. Isaaniin alatti of-danda’ee wal hin horu (baay’atu). Seelii namaa, bineensotaa ykn biqiltootaa yoo argate qofa kan baay’atuudha.

Vaayirasiin waan baay’ee xiqqaa ta’e kan ijaanii fi maayikirooskoopii baakteeriyaa ittiin ilaallu saniinis hin muldhanneedha. Seelii guutuu tokkos kan hin guunnedha. Seelii guutuu tokko kan hin taane, garuu qaccee sanyii xiqqaa tokko (DNA ykn RNA) fi qola pirootiinii kan eegumsaa DNA ykn RNA ta’e, kaapsiid (capsid) kan jedhamu qofa qaba. Vaayirasiin tokko tokko ammoo kaapsiidiin ala qola eeggumsaa kan membareenii seelii hubanii turan irraa argatan kan invaloop (envelope) jedhamu qabu.

Dabalataan, pirootiinootaa fi inzaayimoota murtaa’an qabaachuu danda’u. Saniin ala, vaayirasoonni, qaamota (orgaaneelii) seeliin lubbu-qabeeyyii tokko qabu hinqaban.

Vaayirasoonni, hedduun isaanii, yoo qaama seenan sirni ittisa qaamaa otoo dhukkuba hin fidin dursee isaan balleessuu ykn dhabamsiisuu danda’a. Isaan tokko tokko ammoo haala adda addaatiin dhukkuba fiduu danda’u.

Vaayirasoonni tokko tokko, seelii namaa faayidaa dhuunfaa isaaniitiif itti fayyadamuun dhukkuba fidu. Isaan kan biroo ammoo sirna ittisa qaamaa garmalee dallansiisuun dhukkuba fiduu.

Vaayirasoonni kan dhukkuba fidan seelii fayya-qabeessa namaa keessa seenuun qaamota xixiqqoo seelii sanaa fayyadamuun garmalee of-baay’isuuni. Erga kfbaay’isan booda hojii seelii sanii fi seelota bifa saniin huban faayidaan ala godhu. Erga itti fayyadaman booda seelonni sun akka du’an godhu. Yeroo tokko tokko ammoo sirna ittisa qaamaa garmalee dallansiisuun, yeroo sirni ittisaa deebii isaanii kennu dhukkuboonni (mallatooleen dhukkubaa) mudatu.

Vaayirasoonni dhukkuboota garagaraa fidu. Isaan keessaa muraasni: dhukkuba shiftoo (gifiraa), uttaalloo ykn hibibii, HIV (AIDS), gurraan xil (shugujuf), dhukkuboota tiruu vaayirasiin dhufan (hepatitis virus), infuleenzaa, COVID-19, dhukkuba laamshessaa (polio), dhukkuba saree maraattee (rabies) fi dhukkuboota kan biroo heddu fidu.

Dhukkuboonni vaayirasiin dhufan muraasni isaanii kan akka gifiraa (measles), saree maraattee (rabies), gurraan xil (mumps), infuleenzaa (influenza), pooliyoo (polio) faati talaallii waan qabaniif yeroo barbaachisetti talaallii isaanii argachuun (fudhachuun) dhukkuboota kanniin irraa of ittisuun ni danda’ama.

Sababa vaayirasiin seelii qaamaa keessa seenuun seelichuma faayiidaa (sagantaa) ofiitiif oolfatuu fi qaccee sanyii (DNA ykn RNA) malee qaama lubbu qabeeyyi biroo hin qabneef dhukkuboota vaayirasiin dhufan hedduu isaanii adda baasanii rukutuun yaaluun rakkisaadha. Kanaaf, of-eeggannoowwan dhukkuboota kanaan qabamuu dhabuuf gargaaran hordofuun barbaachisaadha.

—-
Maddi: BU’UURA FAYYAA fuula 59 fi 60.
Fayyaa ta’aa, fayyaa dahaa!
Dr. Nuredin Luke

Dr. Nuredin Luke

24/12/2025

24/12/2025

19/12/2025

18/12/2025

17/12/2025

16/12/2025

14/12/2025

10/12/2025

08/12/2025

07/12/2025

02/12/2025

15/11/2025

Address

Website

Alerts

Contact The Practice

Shortcuts

Share

Category