01/05/2026
今日同副校長傾進修既安排。因為我哋係私立學校，所以要交學費。（state school讀嗰個課程唔駛錢）
副校一開口就問：「你係咪唔會走㗎？我哋已經預咗你會留喺度。
我好坦白咁答：「目前都冇打算走。」
副校解釋返啲條款：如果讀完畢業後兩年內離職，係需要按比例還返啲學費俾學校。咁呢個係常見做法，都合理。
我問：「咁如果係學校要我走，使唔使還呀？」
副校笑咗：「學校唔會要你走。不過，你其實唔使擔心要還錢。如果你俾人『挖角』或者搵到其他機會，通常新學校都會幫你清咗呢筆數。所以放心去讀啦。」
呢個對話令我諗返一年前考慮轉工既情況。
當初見工收到Offer嗰陣，HR話因為我係SEND Teacher，唔係教大班，幫唔到我做ECT Induction。因為做唔到Induction就攞唔到QTS，當時我好掙扎（因為舊校管理層真係好衰所以好想走），於是同學校講我需要時間考慮要唔要個Offer。
結果呢個副校打俾我，佢解釋做私校其實唔需要QTS，佢哋睇重嘅係實際能力。我講我擔心無QTS會影響將來既發展，於是副校話：「俾少少時間我，我打去問吓有冇得搞。」
然後，佢真係幫我搵到解決方案，幫我做到Induction。佢當時打俾我講搞得掂既時候，我聽得出佢係真係好開心，令我覺得佢哋真係care。
於是，過多兩個月，我就會攞到QTS。
好多學校只係想搵個人填補空缺，但呢間學校喺我未入職之前，就已經幫我搞咗一堆嘢，令我覺得呢間真係一間好難遇到嘅好學校。
依家做落，更加覺得當初無轉錯工。
#英國老師
#英國中學
