27/11/2025
如果朝早巴士準時，我係會同舊校負責訓導嘅副校長相遇——佢遲過我上車，早過我落車。
其實我同佢本身喺舊校都有計傾，但開頭我一來怕會阻到佢，因為佢通常拎住本書上車，二來又覺得冇咁多嘢好傾，本身唔係好熟，驚會好awkward。
所以開頭，我通常扮專心睇書／寫日記，一星期至多一次先會同佢打招呼，然後就會一齊坐傾下計。
呢個狀態去到三星期前，我本身真係睇緊書，但又咁啱抬頭見到佢啱啱上車，於是同佢揮手，佢就坐咗埋嚟，我就收埋本書。
佢即刻話：「我係咪打擾到你啊？」我話無。之後佢就話其實好多時都見到我，不過唔想打擾我。我話：「You are very welcome to disturb me, it's good to chat.」
於是，我哋就變咗每朝見到都會打招呼同傾計。然後，原來佢真係好好傾，因為佢睇好多書，所以就算日日傾都仲有嘢可以傾。我哋變咗講「I will see you tomorrow」做道別。
琴日巴士明明準時，但佢冇上車，我諗佢一係要返早一係有乜事唔返學。
點知今朝巴士去到佢個站，都係唔見佢，然後巴士又停，就聽到佢好大聲咁話：「Thank you driver!」
佢喘晒氣咁衝上嚟，我同佢打招呼，佢即刻講：「I don't know why I am running late again!! I can't even finish my breakfast!」佢個右半邊咀都係 cream——好明顯食早餐食得太急！
我：「你琴日係咪都係遲？」佢：「係，唔知做乜呢兩日都咁趕！」
我：「好難想像你會遲啊。」佢：「真係唔知發生乜事！」
因為喺巴士，我係坐佢左邊，所以傾計係唔會見到佢啲 cream，我又諗唔到點提示佢好，所以算數，當冇嘢發生……
今朝我哋傾到大埔嘅大火，我俾佢睇相，佢見到咁一次過燒咁多棟樓都好震驚。傾傾下，我提起件事令我諗返 612 ，又講呢件事有關既管治問題。然後佢問我其實香港人係點睇英國。
我話我代表唔到香港人，我只係講我自己嘅睇法。佢話覺得英國真係要負責任。我之前同佢講過 Life in the UK 呢個考試，佢話根本就無理由要我哋呢個試，佢話佢喺度大，一樣好多嘢都唔識。（佢係仲教英文同歷史嘅。）
有咁嘅同路人，朝早既巴士車程先無咁難捱。
#英國生活
#英國老師
#英國中學
