04/01/2026
2025 წელი ნამდვილად ერთ-ერთი ყველაზე რთული, შრომით დატვირთული, ახალი გამოწვევებით სავსე და ამავე დროს ძალიან საინტერესო ეტაპი იყო ჩემს პროფესიულ ცხოვრებაში. მინდა გულწრფელი მადლობა გადავუხადო ჩემს თითოეულ პაციენტს ნდობისთვის, მხარდაჭერისთვის და იმ ადამიანური ურთიერთობებისთვის, რომლებიც ჩვენ შორის ჩამოყალიბდა.
გულწრფელობა და ურთიერთნდობა ექიმსა და პაციენტს შორის ჩემთვის უმთავრესი ღირებულებაა. სწორედ ეს ქმნის წარმატებული მკურნალობის საფუძველს. ვფიქრობ, ყველა დამეთანხმებით, რომ ნებისმიერ საქმეს აქვს როგორც წარმატებული, ისე ნაკლებად წარმატებული მომენტები და გამონაკლისი არც ჩვენი სფეროა, რადგან მედიცინა ზუსტი მეცნიერება არ არის.
თუმცა ერთი რამ ჩემმა ყველა პაციენტმა ზუსტად იცის, მე არასოდეს ვეგუები წარუმატებლობას. არ ვიშურებ არც ძალას, არც დროს და არც ენერგიას იმისთვის, რომ ერთად მივაღწიოთ სასურველ შედეგს. შემიძლია დანამდვილებით გითხრათ, რომ არც ერთი წამი არ დამიშურებია იმისთვის, რომ თქვენი იმედები გამემართლებინა.
ეს წელი სავსე იყო 16-საათიანი სამუშაო დღეებით, გათენებული ღამეებით, სწრაფად მოსამზადებელი საქმეებით (რომლებიც, სიმართლე გითხრათ, ყველაზე ნაკლებად მიყვარს), მაგრამ ამ ყველაფერს ჰქონდა უდიდესი მნიშვნელობა — ძალიან ბევრ პაციენტს დავუბრუნეთ ღიმილი, ბევრს გავუწიეთ პირველადი დახმარება და უამრავ ადამიანს შევუწყეთ ხელი ჯანმრთელობის აღდგენაში.
მადლობა თითოეულ თქვენგანს ნდობისთვის. სწორედ თქვენ მაძლევთ მოტივაციას, რომ ყოველდღიურად უკეთესი ვიყო და არ შევწყვიტო ბრძოლა საუკეთესო შედეგებისთვის.
განსაკუთრებული მადლობა მინდა გადავუხადო ჩემს ოჯახს, ჩემს მეუღლეს ალექსანდრას და მეგობრებს გვერდში დგომისთვის. ვიცი, რომ დროს ხშირად გაკლებთ. ისიც ვიცი, რომ რთულია და მადლობას გიხდით იმ გაგებისთვის, რომლითაც ეკიდებით იმ დროს, რასაც ჩემი პროფესია მოითხოვს. ყველაზე მთავარი კი ის არის, რომ იცით, თქვენს გამო საკუთარი თავი ნებისმიერ დროს შემიძლია გვერდზე გადავდო.
დიდი მადლობა მინდა ვუთხრა ალადაშვილის საავადმყოფოს ყბა-სახის ქირურგიულ განყოფილებას, ბატონ ზურაბ ჩიჩუას ხელმძღვანელობით. რომლის თითოეულმა წევრმა წლების წინ შვილივით და ძმასავით მიმიღო. მათ უდიდესი როლი აქვთ ჩემს ცხოვრებაში, როგორც პროფესიულ, ისე პიროვნულ ჩამოყალიბებაში.
მადლობას ვუხდი ჩემი კლინიკის უკლებლივ ყველა წევრს იმისთვის, რომ მაქვს მათი იმედი და ვიცი, რომ მათაც აქვთ ჩემი. ყოველდღიური სწრაფვა უკეთესობისკენ, პროფესიონალიზმი და თავდადება ჩვენი მთავარი ძალაა. დარწმუნებული ვარ, ერთად კიდევ ბევრად მეტს შევძლებთ. მადლობა თითოეული ერთად გატარებული წუთისთვის და იმ შრომისთვის, რომელსაც ყოველდღიურად დებთ საერთო საქმეში.
ბოლოს მადლობა მინდა ვუთხრა ჩვენს ლაბორატორიებს თემურ წიკლაურს, ასევე K-Lab-ის მთელ გუნდს, რომლებიც ჩვენთან ერთად დაუღალავად შრომობენ, ჩვენთან ერთად ათენებენ ღამეებს და ქმნიან იმ სილამაზეს, რომელიც ჩვენს პაციენტებს ღიმილს უბრუნებს.
მადლობა ყველა იმ კომპანიას, რომლებიც ერთგულად დგახართ ჩვენი კლინიკის, ჩვენი პროფესიისა და პაციენტების გვერდით, ზრუნავთ ჩვენს განვითარებაზე და მუდამ საუკეთესო პროდუქციით გვამარაგებთ. ❤️
და ბოლოს, დიდი მადლობა ყველა კოლეგას, რომ 2025 წელსაც ერთად ვემსახურეთ საერთო საქმეს. გისურვებთ პროფესიულ წარმატებას და რაც ყველაზე მნიშვნელოვანია, კმაყოფილ პაციენტებს. 🙏
გილოცავთ ახალ 2026 წელს ! ❤️🎍
