14/11/2025
🌍【世界糖尿病日｜點止減糖咁簡單！】
每年 11 月 14 日係「世界糖尿病日」。提起糖尿病，好多人第一時間會諗起「食得太多甜嘢」。其實，二型糖尿病嘅主要成因，係肥胖同不健康嘅生活習慣有關（例如：不良飲食習慣同缺乏體能活動）。
1️⃣ 糖尿病成因唔止「糖」咁簡單
二型糖尿病受多種因素影響，除咗缺乏體能活動、吸煙、飲酒等因素，以下呢啲同飲食相關嘅危險因素，同樣會增加患上二型糖尿病嘅風險：
❇ 不良飲食習慣：經常進食加工食品（如香腸、即食麪）、紅肉、高油、高鹽嘅食物，以及含糖或使用人造甜味劑嘅飲品，都會增加患上二型糖尿病嘅風險。
❇ 中央肥胖：脂肪積聚喺肚腩，會降低身體對胰島素嘅敏感度，令血糖調節更困難。
❇ 代謝綜合症：即中央肥胖、血糖過高、血壓過高、膽固醇或三酸甘油脂水平異常等同時出現；並經常同日常飲食、生活習慣有關，亦會進一步提高患上二型糖尿病嘅風險。
2️⃣ 預防關鍵：由健康飲食做起
✅ 多食高纖食物：每日最少進食五份蔬果、多選擇全穀類（如糙米、燕麥）、豆類等，有助穩定血糖、增加飽肚感，亦有助體重管理。
✅ 適量進食新鮮肉類(如瘦肉、去皮家禽和魚柳等)或含植物性蛋白質食物 (如豆腐、乾豆類和果仁等)，避免過量進食紅肉及加工肉類（如午餐肉、煙肉）。
✅ 避免過量攝取高鈉、高脂肪同高糖嘅食物，例如汽水、糕餅、炸物、即食食品等，呢類食品會增加肥胖風險，影響你嘅健康。
🎯【11月14日｜世界糖尿病日】
預防二型糖尿病，點止減糖咁簡單。記住均衡飲食、戒煙戒酒、做多啲體能活動，保持健康體重同腰圍，先係最有效嘅方法！
📌 #世界糖尿病日 #糖尿病 #健康飲食 #預防勝於治療 #二型糖尿病
--------------------
📣 想及時獲取健康資訊？ #衞生署衞生防護中心 已推出Instagram, WeChat及YouTube ( 詳情： https://shorturl.at/6vYjB ) ，快啲追蹤啦!
📌 從 App 獲取最新資訊！只需點擊連結即可立即下載應用程式： https://apigw.dhapp.dh.gov.hk/redirection.html?lang=tc
