17/07/2025
成書之路⋯其實真係好不可思議,背後的人付出很多很多🥰這些努力是需要被看見的！
請好好支持呢本書呀！
由零到出版 ✍🏼📖
新書籌備接近一年，我上年暑假返香港，同Astor、醫生提及呢個想法。跨專業處理兒童偏食及餵食問題本身係一個新概念，市面上似乎從來冇類似嘅書，所以所有嘢都係由零去計劃。
我接觸出版商，其中有位編輯細心留意到我地成立咗Feeding Foodies，表示有興趣出版呢類題材，希望我地以專家團隊形式解釋偏食成因及解決方案。下一步就係要我哋提供新書大綱。
大綱係大家討論咗最耐嘅部份，更改無數次。書本包含咩內容？家長想知道啲咩？我哋作為作者想講乜嘢？我哋仲想邀請邊位專家？我哋點寫先唔似教科書？內容應該點鋪排及展示先至最貼地而唔累贅？多謝同事Celia臨盆前都幫緊我哋手，細心聆聽我同Astor想點，一齊計劃。
最後我哋決定：首先解釋兒童偏食及餵食問題嘅背景，包括本地及外國文獻數據、醫學界2019年提倡PFD及跨專業處理。之後用35條Q&A形式解答家長常見問題，包括生長線、發展里程碑、加固、兒童偏食及餵食問題嘅背後因素，並拆解迷思、跨專業分析個案、分享作為媽媽嘅自身經歷等。
要實用就必定要有食譜，而食譜唔只靠賣相，仲要真正針對偏食，並必須製作簡單去切合繁忙家長需要。最後有幼兒急救錦囊、加固食物表、幼兒獎勵表等。我哋係想要一本圍繞兒童偏食及餵食嘅工具書，希望家長、工作上接觸兒童的老師及醫護人員都會覺得有用。
我哋邀請到團隊中一直合作嘅小兒外科醫生王醫生、兒童體智及行為發展學科專科醫生杜醫生、兒童職業治療師Karen。加上作為作者嘅我係兒科營養師，Astor係專注餵食治療嘅言語治療師，大家都係兩個孩子嘅媽媽。我哋圍繞身體結構及功能、兒童發展、感官敏感、口腔吞咽、先天疾病/狀況、兒童營養及生長、家長餵養觀念、管教模式、烹調技巧等去討論，從各自專業角度去分析常見問題：點解BB食奶慢？點解孩子唔食菜？唔食肉？食飯唔食餸？含飯唔吞？餐餐要食一模一樣？點解有啲早產孩子/自閉症/食物敏感的孩子會有餵食問題？各個專家建議家長可以點做？點樣引導孩子嘗試新食物等等？最高難度係點樣涵蓋所有重點，解釋清楚，而內容唔重複、唔沉悶、唔累贅。
大綱諗好，出版商同意出版！事前計劃好，寫書就快好多。但對於多年來一直寫作嘅我嚟講，今次寫書，我居然有少少寫到想嘔嘅感覺，因為要協調邊個專家寫邊個部份、為每一篇章加插十幾廿個參考文獻、計劃輔助嘅插圖/相片/短片。我不斷寫不斷修改，樽頸位係當寫到四萬幾字時，怕字數太多而要取捨內容，幸好出版商確保最後字數唔緊要。
寫食譜及影相係最大挑戰！我之前幾次出食譜，通常都有兩位或以上營養師一齊出，大家可以互相幫忙。今次係自己一個，仲要人在英國！就算我日日煮餸，可以分享自己孩子喜歡嘅食譜，但寫食譜係另一個層次，因為要寫清楚份量，亦唔可以只係寫一條蘿蔔、一茶匙生抽、兩湯匙麵粉咁簡單，因為需要做營養分析，所以寫食譜時要幫食材磅重，轉化成幾多克，先做到營養資料分析。經過一輪努力，食譜寫好了，當我徬徨點樣趕死線時，感激中大師兄兼前講師、本身係Food Scientist嘅Astley居然主動幫我做食譜營養分析！有佢幫手，我對於營養分析嘅準確程度絕對無後顧之憂，因為我知道佢係會用可靠嘅食物營養資料庫、選擇合適嘅數據、計算嘅程式亦非常清楚，Astley嘅食譜營養分析直頭係營養標籤級數！我就可以全心安排影相同寫書了。
影相當日可以話係最瘋癲！因為只有我一個人煮30個食譜，並安排喺一日內影完。我之前出食譜時可以做到，因為有兩個營養師一齊煮、出版商派人幫手，但今次我自己人在英國，我要專登搜尋亞洲食材，影相當日最初亦只有我同攝影師兩個，幸好住附近嘅朋友仔亦有幫手，非常感激。要我一日煮30個餸當然煮唔到，所以星期三影相，我由星期六就開始煮，安排邊啲可以放喺冰格、邊啲可以放雪櫃、邊啲必須要即日煮、張相要有邊啲裝飾、準備定啲小道具、計劃影相先後次序，真係少啲協調能力都唔掂（我下次真係未必再自己做呢件事😅）
一月訂好大綱、二月影相、三月交大稿、四五月再補交剩餘部份，五六月就係最後排版，校對時，我要協調每個專家去校對自己嘅部份並整合各位意見，加插醫生好有用嘅臨床相片，以為及我哋孩子珍貴嘅成長照片等。感謝之前一齊出過食譜嘅Sylvia一口答應寫推薦序、兩位家長將親身經歷寫入推薦序，看完文字我哋好感激又感動❤️ 有知道我出書嘅HA顧問醫生舊同事寫推薦語，有HA營養師舊同事對我哋餵食治療服務及新書非常支持，幾句言語肯定都已經好窩心❤️
最後確定書名、封面，有產後歸隊嘅Celia幫我哋調整到完美。七月頭終於確定拎去印，居然趕得切書展！雖然我唔可以親身去(因為今年暑假喺英國)，但最緊要係本書出到，質素同內容最緊要。大家去到書展/書局，見到本書話俾我知、影張相俾我，有乜建議話我知，第二版時可以加入。我期待快啲收到本書，望吓我地努力好耐嘅製成品！
多謝Astor同我一齊完成呢個艱巨任務。呢段時間，我一直返NHS工(雖然返0.8)、見私家病人、照顧家庭，所以先生同兩個仔都投訴了，多謝佢哋支持同諒解。
睇到呢度，多謝大家支持😊
#營養師 #註冊營養師 #英國營養師 #香港營養師
#兒童醫院
#兒科營養師 #營養師媽媽
#我哋出書啦 二寶媽媽·言語治療師李姑娘
唯食 Feeding Foodies - 香港嬰幼兒餵食顧問
萬里機構 wanlibk.com
