唐宇嶸醫生 - 順孕安產·香港婦產科及生殖醫學資訊專頁

27/09/2025

White Coat Ceremony 2025｜醫學生白袍禮：一輩子的承諾

今日代表婦產科學系出席HKU醫學生白袍禮，坐在台上見證新同學穿上白袍，現場氣氛莊重又溫馨。聽到中學校長代表分享同學努力考入醫學院的經歷，亦感受到每位同學背後的堅持與付出。

大家一齊宣讀醫生誓詞，多年後重溫這份承諾，別有一翻體會。醫學唔只係知識同技術，仲包括醫德與專業態度——誠實、尊重、同理心、對病人負責，始終都係做醫生最基本但亦最重要的事。

參加這個場合，亦提醒自己：除了臨床工作，教育和啟發新一代同樣重要。醫學精神需要一代一代傳承落去。

最後，祝各位新同學艱苦學習中搵到樂趣，醫學生涯充實愉快。醫學係團隊工作，大家一齊努力，為病人做到最好。

#醫學生 #醫德 #醫學教育

21/09/2025

🧵婦產科爸爸工作日記：取卵手術戴VR會唔會冇咁痛？

好多女士做IVF前最擔心嘅係：「取卵手術會唔會好痛？」
近年科技興玩VR，咁如果不育女士接受取卵手術時戴住VR頭盔睇片，有無幫到手呢？
我哋團隊早前就做咗個隨機對照研究（RCT），結果剛剛刊登咗醫學期刊 Human Reproduction！

點做嘅？
- 160位準備做取卵手術嘅女士被隨機分成兩組：一半戴VR頭盔睇大自然影片，一半照傳統方法
- 全部都用返標準麻醉＋鎮靜藥
- 做完手術即時問大家痛楚感覺、滿意度、副作用等

結果如何？
- 兩組女士痛楚感覺和滿意度其實差唔多
- 戴VR頭盔無明顯減痛效果

有時做多啲嘢未必一定有幫助，反而有證據支持嘅選擇先最重要💪🏻

特別多謝每一位參與研究嘅病人同我哋團隊嘅努力，冇你哋就做唔到呢個研究！🙏🏻

💡實證醫學就係將假設用科學方法測試
💡發表到國際期刊等全球專家審閱
💡好多治療聽落好合理，但真係要做過研究先知實際效果

[有興趣可以睇原文（Human Reproduction, 2025）](https://academic.oup.com/humrep/advance-article/doi/10.1093/humrep/deaf188/8259676)

#婦產科爸爸 #取卵 #虛擬實境 #醫學研究 #女仕健康

17/09/2025

🧵婦產科醫生爸爸日記：生BB愈嚟愈多福利？今年「組合拳」你要知！

過去政府一直唔干預生育，依家政策轉向，鼓勵大家生BB，有咩措施？

🔹稅務優惠齊上場
- 居屋/租屋利息有額外扣稅
- 生育醫療開支都可以扣稅
- 子女免稅額提升，BB出世嗰年仲有額外免稅

🔹住房支援更貼地
- 公屋申請「家有初生」可快一年上樓，已經超過5,300個家庭受惠
- 居屋都有「家有初生優先選樓」，800個新手家庭成功揀樓

🔹BB數量終於回升
- 2024年新生嬰兒數目顯著上升，全年多咗3,500個BB，升幅11%！

🔹新一輪「組合拳」再加碼
- 初生BB雙倍免稅期由一年變兩年，每個未滿兩歲BB，父母可享26萬免稅額
- 未來三年增設15間資助幼兒中心，日間照顧名額幾乎double，特別照顧0-2歲BB
- 校內課後託管名額唔設上限，家長返工更安心

🔹生育支援更全面
- 設孕婦專屬窗口，睇醫生輪候更方便
- 取消胚胎/配子自用儲存年限，輔助生育服務名額再增
- 推動彈性工作時間，家庭友善職場更普及

#婦產科醫生爸爸 #生育福利 #家庭支援 #新手爸媽 #政策觀察

九、社會發展 設立「社會高齡化對策工作組」 265. 政府致力構建長者友善的樂齡社會。去年《施政報告》提出成立的「促進銀髮經濟工作組」（工作組）已於5月...

10/09/2025

📌【本專頁守則及免責聲明】

為遵守香港醫務委員會（MCHK）規定，保障用戶及專業操守，特設以下守則：

本專頁只作健康教育用途，內容根據最新醫學資訊，不構成個別診斷、治療或醫患關係，亦無任何商業推廣。

互動守則
- 歡迎查詢一般健康問題，但請勿留言或私訊個人病情、檢查報告、相片或索取醫療建議。
- 如有緊急或嚴重健康問題，應親自求醫，切勿只依賴本專頁資訊。

私隱保障
- 嚴禁張貼可識別身份的病歷、照片或私隱資料。
- 本專頁不會公開分析個案資料，亦不會收集個人資料。

專業分際及免責聲明
- 不接受個案諮詢/分析檢查報告/開證明/提供醫療建議。
- 所有內容僅供參考，使用本專頁即代表同意以上條款。
- 有疑問，請諮詢主診醫生。

管理原則
- 本專頁保留刪除違反守則、推銷、不當、私隱等留言的權利。
- 所有互動以尊重、專業、互信為原則。

💡溫馨提示：
每個人健康狀況不同，網上資訊不能取代面對面醫療，請大家尊重醫學專業界線。

10/09/2025

🧵婦產科醫生爸爸日常：大肚要打流感針💉？

早兩日有位準媽媽嚟產檢問：「醫生，新聞話流感高峰期又嚟啦，懷孕期間打流感針真係有用咩？會唔會唔安全？」

🔹點解孕婦特別需要打流感針？
- 孕婦感染流感後，併發症（例如肺炎、早產等）風險明顯高啲。
- 打咗針，媽媽身體會產生抗體，啲抗體仲可以經胎盤保護BB，BB出世頭幾個月都一齊受惠。
- 世界衛生組織（WHO）同香港衛生防護中心專家都一致建議所有懷孕媽媽任何孕期都可以安全接種流感疫苗。

🔹打流感針會唔會有影響？
- 科學數據顯示，滅活或重組型流感疫苗對媽媽同胎兒都安全，冇證據會致畸或導致流產。
- 但要留意，鼻噴式「活疫苗」唔適合孕婦使用。

🌸媽媽話：「原來打流感針不單止保護自己，仲可以幫埋 BB，仲要唔駛錢添😊！」

===================
🔹政府資助流感疫苗 9月25日開始！
- 由2025年9月25日起，政府資助流感疫苗正式開打。
- 懷孕媽媽可於參與政府疫苗資助計劃（VSS）嘅家庭醫生、產科門診、公私營診所接種。

#婦產科醫生爸爸 #孕婦流感針 #政府資助疫苗 #媽媽要保護自己 #一人打針兩人受惠

06/09/2025

🧵 婦產科醫生爸爸工作日記：順產定開刀？最新國際指引點睇？🤰🏻🤱🏻

產前門診好多準媽媽都問：「醫生，我應該揀順產定剖腹產好？」

最近，英國婦產科醫學院（RCOG）新聞稿提及：
順產同剖腹產各有好處與風險，邊種方式最啱你，要根據你同BB嘅情況、醫生評估同你個人選擇。

而家醫學界最大嘅轉變係——唔會再單一推崇順產或剖腹，最重要係知情同自主選擇。

無論選擇邊一種，兩者在大多數情況下都係安全有效，唔需要覺得有一種一定比另一種「高級」或「次等」。

最終目標都係：媽媽BB平安健康，過程中感受到被尊重同支持，呢個先至最重要！

我見證過好多不同分娩經歷，每個家庭嘅故事都好獨特——

有啲媽媽開頭想順產，但遇到突發情況要緊急剖腹；又有啲媽媽因為高危因素，一早就計劃好開刀。亦有好多好似我太太前三胎都咁好彩，安全順產，黎緊亦希望可以繼續由我順利「執」出黎😊。
無論選擇咩方法，最緊要同醫生商量清楚，做過最合適自己嘅決定！

你又點揀？有冇任何疑問或分娩故事想分享？一齊交流下啦！💪🏻❤️

#婦產科爸爸醫生 #順產定開刀 #媽媽的選擇 #醫學科普 #知情選擇 #健康資訊 #正能量

Reference: https://www.rcog.org.uk/news/rcog-opens-consultation-on-new-good-practice-paper-on-planned-caesarean-birth-services/)

#婦產科爸爸醫生 #順產定開刀 #媽媽的選擇 #醫學科普 #知情選擇 #健康資訊 #正能量

30/08/2025

🧵 婦產科醫生爸爸懷孕日記：懷孕期間坐骨神經痛小知識

今日星期六，早上睇完症同巡房，下午手術中間有空檔，返去幫太太整張新凳仔。呢張新凳買咗一段時間，但一直無時間整。

老實講，其實係太太兩日前發作咗一次好嚴重嘅坐骨神經痛，痛到幾乎行唔到路。見佢咁辛苦，我都好內疚，覺得自己應該早啲處理。

🦴 咩係坐骨神經痛？
坐骨神經痛（sciatica）係指由腰部經臀部、大髀後面伸延落小腿嘅痛楚或麻痺感。

👶 懷孕媽媽為何易中招？
- 骨盆及脊柱姿勢改變，腰椎負擔增加
- 子宮增大，間接壓力影響神經
- 體重增加
- 荷爾蒙令韌帶及關節鬆弛

🛠️ 舒緩建議
- 保持良好坐姿／站姿
- 避免長時間同一姿勢
- 適量活動及溫和伸展（建議由醫生或物理治療師指導）
- 用有承托力嘅椅／腰枕（正如太太終於換到嘅新凳仔😅）
- 熱敷或溫水浴可暫時舒緩

⚠️ 甚麼情況要即時求醫？
- 痛楚非常嚴重或持續惡化
- 下肢麻痺、無力、行動困難
- 伴有大小便困難／失禁
- 其他異常症狀（如下肢腫脹、發燒）

新椅終於裝好，太太坐得舒服啲，我都放心啲。

#婦產科醫生 #孕婦腰痛 #坐骨神經痛 #健康小知識

25/08/2025

🧵 婦產科醫生爸爸健康資訊：更年期潮熱新療法🩺🌡️

「醫生，我成日突然覺得好熱🥵、出汗💦，夜晚訓得唔好😴，又有情緒波動😔。有家族乳癌史，唔敢用荷爾蒙，仲有冇其他方法？」

其實，潮熱🔥、夜間出汗💧、失眠🌙、情緒變化，係唔少更年期女士常見問題。除咗傳統荷爾蒙治療，近月有多一種選擇：Fezolinetant（非荷爾蒙藥物）。

Fezolinetant屬於NK3受體拮抗劑🧬。臨床研究顯示，有助減少潮熱及夜間出汗，部分人數日或數星期內有改善。

藥物作用主要影響大腦體溫調節🧠，並無荷爾蒙。

常見副作用包括頭痛、疲倦🥱、噁心🤢、腹瀉🚽及肝酵素升高🧪。用藥前及期間要驗肝功能🩸。如有黃疸、深色尿液、右上腹痛⚠️，要即時停藥並求醫🏥。藥物長遠安全性仍需觀察🔍。

潮熱嚴重，或荷爾蒙治療不適合／不願意使用人士可考慮使用。是否適合，需由醫生按個人情況評估。

除咗Fezolinetant，亦有其他非荷爾蒙治療方案（如部分抗抑鬱藥/血壓藥/神經痛💊），或生活習慣調整🧘‍♀️、心理支援🫂等，均可按需要討論。

❗️如對治療方案有疑問，建議諮詢你的主診醫生，切勿自行服藥。

#更年期 #潮熱 #健康資訊 #女性健康

23/08/2025

🧵 婦產科醫生爸爸懷孕日記：孕中期結構超聲——脊椎檢查（Spine Screening）🦴🩻

根據國際婦產科超聲學會（ISUOG）2022年指引，孕中期超聲檢查脊椎的重點如下：

🔸 兩個主要切面（Transverse & Sagittal Views）
醫生會用橫切面（transverse）和縱切面（sagittal）觀察BB脊椎，由頸椎到尾椎，評估椎骨排列、連續性，有冇缺損或分裂。

🔸 椎骨排列及皮膚包覆
會特別留意椎骨有冇裂縫（如脊柱裂 spina bifida），以及脊椎表面皮膚有冇完整包覆。

🔸 檢查限制
由於檢查效果受胎兒姿勢，有時未必可以完全清楚顯示整條脊椎所有細節。如有需要及情況許可，醫生亦可以用冠狀面（coronal view）作進一步觀察。

點解要做脊椎檢查？
因為脊柱裂等先天性脊椎發育異常有機會影響BB日後運動及神經功能。部分嚴重個案可以產前發現，及早安排專業支援。

內容只作健康教育參考，唔代表醫療建議。如有疑問，記得問返主診醫生。

#婦產科爸爸醫生 #超聲波 #結構超聲 #孕婦檢查 #脊椎超聲 #健康資訊

19/08/2025

🧵 婦產科爸爸醫生日常：原來「孕吐」都可以好嚴重 🤰🏻🤢

前幾日有位早孕媽媽嚟到診所，面色蒼白，話自己成日嘔、飲水都頂唔順，體重跌咗幾公斤，仲話見到嘢食都驚。

其實，孕吐大部分都係溫和，可以靠分開少量多餐、輕食下白麵包或者餅乾慢慢適應。但有一小部分孕婦會變成「妊娠劇吐」（Hyperemesis Gravidarum）—— 即係成日嘔、食唔落、甚至脫水、體重明顯下降、尿量少，呢啲唔係「捱下就過」咁簡單。

如果孕吐嚴重到飲水都會嘔，感覺頭暈、心跳快、冇力，記住要盡快搵醫生。嚴重時可能要入院吊鹽水，甚至用藥幫手止嘔。唔好怕麻煩人，亦唔好覺得自己「太大驚小怪」，其實好多媽媽都經歷過，唔係你一個。

每個人懷孕反應都唔同，最緊要係照顧好自己，有咩唔舒服要及早求醫。

溫馨提示：以上內容只作一般健康資訊分享，並不構成個人醫療建議。如有需要，請向你嘅主診醫生查詢。

#婦產科爸爸醫生 #妊娠劇吐 #孕婦健康 #健康小貼士

16/08/2025

🧵 婦產科醫生爸爸工作日記：少女突然腹痛——卵巢扭轉的警號 👩🏻‍⚕️⚡️

呢排遇到一位十幾歲嘅年輕女仔，媽媽陪佢嚟急症，話佢突然間肚痛到捲埋一團，仲嘔咗兩次。超聲波顯示右邊卵巢明顯腫脹，血流減弱，完全唔似普通功能性卵巢囊腫咁簡單。根據臨床表現，加上超聲波所見，好大機會係卵巢扭轉（ovarian torsion）——一種卵巢因為扭轉咗血管，導致血液供應受阻嘅急症。

呢種情況拖得越耐，卵巢壞死風險越高，會影響將來生育功能，甚至有生命危險。我建議即刻安排入院緊急微創手術，盡快鬆開扭轉、保住卵巢。

媽媽一開始好驚，擔心手術會唔會有後遺症，經解釋明白手術必要性，都決定即時簽紙做手術。

手術好順利，發現卵巢確實打咗兩個圈，好彩及時處理，組織未有壞死。手術後，女仔好快就無痛，復原得好好。

溫馨提示
女仔或女士如果突然間肚痛得好急、伴隨嘔心、臉色蒼白，應該盡快搵醫生檢查，因為有啲婦科急症需要即時處理，拖延會加重風險。

以上內容經過改編，並無任何真實病人個人資料，僅供健康教育用途。不構成醫療建議，如有健康疑問，請諮詢註冊醫生。

#婦產科爸爸醫生 #婦科急症 #卵巢扭轉 #健康資訊 #少女急性腹痛

15/08/2025

🧵 婦產科醫生爸爸懷孕日記：孕中期結構超聲——心臟篇（Cardiac Screening）❤️🩻根據國際婦產科超聲學會（ISUOG）2022年指引，孕中期心臟檢查有以下重點：🔸 心臟位置同方向（Situs & Axis）醫生會檢查心臟喺左邊定右邊，正常心尖應該指向左前（約45度），同胃同側。🔸 四腔心切面（Four-chamber view) 係最基本、最重要嘅心臟影像！會睇：- 心房、心室數量對稱- 心房間隔、心室間隔- 心室大小，無肥大/縮細- 心臟瓣膜無移位或缺損- 心包腔無異常積液🔸 左右心室流出道（Outflow tracts）醫生會再掃「左右心室流出道」切面，分清楚：- 主動脈（Aorta）同肺動脈（Pulmonary artery）分開、交錯走向- 無異常狹窄、走錯位或合併點解咁重要？因為好多先天性心臟病如果早啲發現，可以安排專科跟進、分娩及治療計劃，保障BB同媽媽健康。內容只作健康教育參考，唔代表醫療建議。有疑問，記得問返主診醫生 #婦產科爸爸醫生 #超聲波 #結構超聲 #孕婦檢查 #心臟超聲 #健康資訊