30/04/2026
【被ABA耽誤嘅小朋友？】
最近有個嚟諮詢嘅小朋友，媽咪話佢有好多焦慮行為，之前做咗好多年ABA，覺得「被耽誤咗好多年」。
（先唔好問點解佢會搵我，因為其實我都係做ABA，只係風格可能另類少少😅）
同呢個小朋友諮詢咗大約半年，佢嘅情況一路都有改善。
最近媽咪同我再傾偈嘅時候，又再提起：「佢之前咁多年，真係被ABA耽誤咗。」
我當時同媽咪表達咗一個睇法：
其實唔係ABA耽誤佢，ABA只係一個概念。真正耽誤佢嘅，係之前case supervisor嘅諗法，同對小朋友嘅誤解。
因為小朋友表達能力唔強，個supervisor就以為佢理解力同其他能力都唔高，所以寫嘅課程係嚴重低估小朋友能力，進度緩慢。
另外，之前個supervisor將「Antecedent-Behavior-Consequence (ABC)入面嘅B（行為）」放咗喺結果，令到小朋友焦慮；而我將個B重點放番喺「學習態度」同「過程」，等小朋友明白：
自己其實有能力學習，最緊要態度正確，慢慢咁幫佢減輕焦慮。
但其實我用緊嘅都係ABA，所以，ABA本身唔係問題。
問題在於有啲治療師嘅教育理念唔夠準確，或者靈活度唔夠高，冇跟住小朋友嘅能力去因材施教，將錯嘅元素放入ABA理論入面，結果自然唔好。
我寫呢篇文，係想消除大家對ABA嘅誤解。
ABA可以好溫暖，好靈活，關鍵係用呢套理論嘅人，背後對教育嘅理念同小朋友「行為」可唔可以有準確嘅理解同分析。
#靈活 #行為分析 #家長必睇 #焦慮 #判斷 #育兒日常 #香港爸爸 #香港親子 #香港媽媽 #幼稚園 #教育理念
