23/10/2025
昨日海洋公園公布業績，年度虧損達2.7 億，可以用黐鬼線形容。
海洋公園蝕本嘅原因好多，禮品部不思進取，就肯定係其中一個。
自從子女出世之後，多年來我都持續購買全年入場證，個女細時就同個女去，佢大啲唔去我就同個仔去，我自己生日亦捉埋兩個去。每次入場，我哋都會在場內消費，唔帶嘢食，探完動物就入餐廳，企鵝餐廳係我哋多年來嘅最愛，食物唔係太好食，但係好坐，而我，係嗰啲連紀念品都買得一餐嘅本地遊客。
話說舊年我又買咗全年入場證啦，當日我哋只有一家三口入場，帶齊雨褸又去玩激流旅程。
一上到船，就有職員話影相，咁就是但啦，咪影囉，但我已經同自己講，唔會買㗎啦。
離開遊戲船上水，就經過照片攤位。原來而家海洋公園又更改作風，以前有一段時間，照片有人啱先至印出嚟，但今次員工一早就印定晒啲8R插晒喺度。就咁嘅，我係嗰種，去到咩主題公園都話買張相留念嘅人，我覺得有個套就會放喺度，望到就會有啲開心。雖然海洋公園嘅照片已經影咗好多次，但係呢，今次我個仔肯望鏡頭同埋笑晒喎！不過一張相連埋相架$199 ？我都係唔好咁黐線啦。
我同職員講：唔使啦，屋企有啦，買咗好多啦…
職員：唔怕啦！影得咁靚，而且相架出咗新款喎！買返去紀念吓啦⋯(盡力sell盡力sell)
我：吓？出咗新款咩？係咪㗎？
職員：係呀，仲有兩個款可以揀㖭啊，你睇吓鍾意邊個？
咁…
就喺職員熱情奔放嘅引誘之下，我又俾錢買咗一份，開開心心咁攞返屋企。
點知，返到屋企打開個飾物櫃一睇，我頂！又話出咗新款？同我10年前，即係2014買嗰張一樣嘅？仲有8年前嗰張又一樣喎，咩新款呀？20世紀新款啊？搞錯啊！呃人呀！搵笨呀！
嬲到我呢～
過多兩個禮拜，我又返返去海洋公園，同樣去返嗰個激流旅程，一樣經過嗰個相片攤位，職員一樣講話：出咗新款，買返去紀念吖！
我同職員講：哥哥吖，你哋唔好再呃人 啦，我兩個禮拜之前買咗，你講嗰個新款，同10年前一樣喎！
哥哥：唔好意思呀，我做咗一年幾，10年前係咩款，我真係唔知。
啱嘅，有邊個會喺攝影攤位做10年吖？ 佢係同舊年比嘅新款，佢點知海洋公園會由10年前開始訂咗一批相架，賣到而家都仲賣緊同款啫？呢樣我理解喎，真係唔係員工嘅問題。
但係海洋公園咁低能嘅行銷操作，除咗我呢啲資深嘅本地會買紀念品嘅遊客，邊個知？
海洋公園嘅管理人員，唔該你哋擘大雙眼睇吓自己搞緊乜啦？
紀念品貴，係唔緊要㗎，$200 一個相架加一張8R照片，都有我呢啲傻人購買喎，因為買嘅係回憶呀嘛！但係唔該你哋攞啲誠意，搵多啲人做設計，每次訂返500個就算，唔好話每季，起碼每年出一個新款，都仲有機會引到本地人消費吖，目標客路唔係淨係遊客㗎喎！仲有啊，你哋之前限量手錶就用鱷魚皮，完全都冇保育sense，紀念相架就10年都同款，水族館門口嗰個攝影棚仲好笑呀，嗰隻魔鬼魚由2009年我拍拖去到好似今年先至有變，一個留影背景足足用咗15年，真係唔好問人哋，點解冇晒興趣入去了！
去年我哋去杭州嘅唔出名遊樂園，有啲刺激項目係一路有鏡頭攝影過程，然後系統用自己人面識別/服裝識別之後，佢自動cut一條有你做主角，仲配咗音樂嘅片段俾返你購買，價錢只不過係好似$30，七日之後自動delete（我肯定delete咗，因為我睇完唔記得俾錢，過咗七日買唔到了）香港成日講咩新科技大製作，我唔使你學航天科技吖，海洋公園派人學吓國內嘅小樂園技術，搞吓個業績唔好蝕得咁甘，得唔得呢？
