https://www.facebook.com/102426024658901/

註冊物理治療師 Leon, 佐敦柯士甸道102號1701室, Mong Kok (2025)

Q: What is the address?

佐敦柯士甸道102號1701室

03/12/2024

個案分享

病人右邊腳腕重覆拗柴
令到宜家朝早起身落地就感到右邊腳腕痛
評估下發現佢重心停留係右邊
右腳不能做到一個完整嘅旋前動作 (pronation)

片中就係測試佢左邊盤骨前傾嘅幅度
因為愈係重心不能去左邊
左邊盤骨愈係停留前傾嘅狀態
通過針對性嘅矯正動作
重覆嘅3次
再測試就見到重心可以去返左邊
從而改善病人右邊腳腕問題

07/11/2024

< 頸痛因為你以前整親過隻手或腳！？>

臨床上經常會遇到痛症痛咗好耐都未好的病人，細問下佢地都係好耐以前試過一次創傷嘅經歷，最常見係曾經腳踝拗柴 / 臀部或尾龍骨跌傷 / 膊頭甩胶。而佢地當時好多時係休養或者敷藥咗幾個星期後，受傷部位唔再腫痛，就以為巳經好返曬無手尾。

如果當時消腫後，無去特登練返受傷部位不同的方向點樣郁返，其實根本未完全康復！因為全個身體咁多個關節，從來都係一個互相牽連嘅系統咁去運作，所以當個別部位受傷過後而活動有所限制，其實係會「牽一髮動全身」，限制埋其他部位。而呢個「就住發力」的姿勢係你唔細心留意的話自己係唔會察覺到。

呢種「就住發力」的模式會一路慢性地虐待緊你身體其他不同部位，可以係虐待緊你腰椎 / 肩關節 / 頸椎 / 手腕關節。時間耐咗終於有朝一日，被虐待的部位最終就會頂唔住痛，產生勞損 / 發炎 / 退化的情況而痛起上黎。如果嚴重起上黎就會產生結構問題，例如椎間盤突出 / 筋腱撕裂。

臨床上嘅常見例子，就係頸痛其實係受你手腕曾經跌傷或扭傷過後影響。手腕受傷過後通常會失去內旋 (Pronation)的活動幅度，而因為日常生活有好多動作需要手腕內旋，身體就唯有用肩胛前旋 (Anterior tilt) 去幫手令到手部可以達至內旋動作。但咁樣就會造成圓肩狀態，頸椎就會過度受壓，同時頸部肌肉會因為肋骨前部分缺乏膨脹，而要不停用力幫手呼吸，就會搞到成日頸梗膊痛。

點拉筋按摩都痛症都斷唔到尾，係因為你無教識返個腦點樣郁返受過傷個個部位。其實只要做返針對性嘅矯正動作，去練返曬曾經受傷部位嘅活動幅度同埋發力，通常幾堂治療後就會見到明顯好轉。

所以每一次受傷都好有機會建立咗一層關節活動限制，如果無妥善處理，係好有機會成為你長期重覆出現頸痛/腰痛/膊頭痛/膝頭痛嘅元兇。千祈唔好以為好耐以前整親過的部位唔關事 !

查詢電話 / whatsapp: 94437800

#頸痛 #寒背 #烏龜頸 #富貴包 #拗柴 #肩膊甩骹 #尾龍骨痛 #姿勢矯正 #物理治療 #根治痛症

29/05/2024

< 點解寒背姿勢搞極都唔好!? 仲係成日頸痛!? >

有無試過俾人話你「坐得衰」，但巳經成日特登挺直個人，都改善唔到寒背同頸痛問題？係咪巳經成日做挺胸開胸、收下巴、練背肌嘅運動，但都仲係頸緊膊痛？有無聽人話你知你對得太多電腦所以就頸痛，但今時今日無電腦又點工作呢，唔通要一路頸痛到退休先會好返？

要根治呢個問題，其實我地係要諗深多一層，解究一下你個腦係潛意識上，點解會不停想將你個上背停留係一個寒背的狀態。從人體最基礎的出發去諗，你生活中最重要而又每日都重覆做緊，就係呼吸同埋步行。

呼吸上，當你個腦感覺到你由鼻腔到氣管的通道不夠暢順，佢就會想將你個頭推前同向上昂，即係放係「烏龜頸」的狀態。目的就係想打開多 D 你條氣管，等你可以吸到多 D 空氣。

因為唞唔唞到氣係你生存最重要的功能，所以就算你做練幾多收下巴動作，你都會因為呢個唞氣問題，離唔開「烏龜頸」呢個狀態。要解決就要練習返條脷的姿勢，等條脷可以支撐返上顎骨，令到鼻腔到氣管的通道暢通返，再加上特定的呼吸練習就可以真正跳出寒背的姿勢。

步行上，當你承力落其中一邊腳推低個腳弓時，因為大腿骨同小腿骨不夠內旋的柔軟度而令到個承力機制做得不好，就無法係步行時妥當地利用腳弓帶動身體重心向前推進，同時就無法令胸前的肋骨膨脹，結果就造成寒背的姿勢。

所以要進一步根治寒背同頸痛的問題，係要做返一 D 矯正動作，教返識你個腦點樣係你步行時妥當地做返腳弓承力的機制。如果你步行每一步都用唔啱個腳弓去承力，你練幾多背肌都係無法真正挺到個胸。

臨床上，你可以做一個測試就係照住鏡 E 起棚牙，如果你上面棚牙係遮住咗你下面棚牙遮咗一大部分，你就好有機會仲停留係寒背或者「烏龜頸」的姿勢狀態。而你需要的就係練返條脷的姿勢，同埋練返推低腳弓承力的動作。

查詢電話 / whatsapp: 94437800

#頸痛 #寒背 #烏龜頸 #富貴包 #背肌 #姿勢矯正 #物理治療 #根治痛症

01/11/2023

< 點解d痛症睇極都唔好? (下) >

承上文，點解淨係接受「被動式」治療嘅效果好有限? 點解又針、又電療、又按摩、又全身復位、又伸展拉筋、又衝撃波、又磁波、又鎮痛貼、又搽藥膏，咩都做過曬，但就係做完舒服無耐又反覆痛返。

要從根本去治療，第二個大原則就係治療必須要你個腦去主動參與。係呀，你無睇錯，係你「個腦出咗問題」，係要醫你個腦！只有你自己個腦先可以發號施令，控制你日常生活中坐、企、行、上落樓梯、蹲低等等活動嘅姿勢點擺、重心點擺同埋點樣發力。

當你重心同姿勢都成日偏埋一邊，你個腦就慣咗用一個「錯誤方法」去幫你企到行到，而你又唔察覺唔到。而其實呢個習慣巳經慢性地對你身體不同的關節構成力學問題，過度負荷造成關節勞損，終有一日去到頂唔住就會發炎痛出黎。

所以如果你接受的治療係「被動」形式 (即係治療過程中你唔洗自己郁)，無錯通常做完會暫時紓緩個痛楚，但因為你個腦係無參與過治療嘅過程，你個腦係無學習返點先為之郁得啱，所以離開咗間診所後，你都係會繼續用返一個錯嘅發力方法，去應付返你日常生活嘅活動，結果無耐又會痛返。

咁點樣先可以令你個腦主動參與到? 你可能會諗係咪去Gym房係咁操背肌臀肌就得? 又或者多d去跑步游水就叫做有效嘅「主動」治療? 其實唔係咁簡單。

你個腦係發號施令控制你點發力之前，佢首先要從你嘅感官系統收集外界的訊息，包括腳板踩地的壓力感、全身關節活動感、牙齒咬感、視覺等等。即係如果你合埋眼向前行，你都即刻會變成全身肌肉收緊嘅姿勢狀態。

所以我地做「主動」嘅治療動作時必須加入埋感官元素。就咁舉鐵練力，或者去跑步游水，通常都未能提供有用嘅感官訊息，未能有效令到個腦重新學習一個「發力啱返」嘅模式。

總結而言，要長遠解決慢性痛症，一. 必須要視全身關節為個系統去分析，二. 治療必須有腦部參與矯正發力及姿勢的過程。

要知道做咩特定斯嘅治療動作先可以做到以上兩個原則，就需要透過一系列的動作測試，了解你發力同姿勢嘅問題，就可以對症下藥。

聯絡電話: 9454 5592
Whatsapp: http://wa.me/85294545592

#痛症 #腰痛 #頸痛 #膊頭痛 #手踭痛 #手腕痛 #膝頭痛 #足底筋膜炎 #物理治療 #運動治療

26/09/2023

< 點解d痛症睇極都唔好? (上) >

你有無試過有d長期勞損嘅痛症, 無論係腰頸痛、膊頭痛、手踭痛、手腕痛、膝頭痛、腳底痛……

去求醫個陣得到嘅答案就係話你患咗「### 綜合症」、「### 筋腱勞損發炎」、「### 關節退化生骨刺」。然後聽完以上「醫學名稱」後，就坐係到或者訓低「被動式」俾佢去醫。

然後有無試過做完曬d 「被動式」治療，又針、又電、又按、又全身復位、又衝擊波、又磁波，但紓緩幾日後又痛返曬？又或者有無試過自己好勤力返到屋企係咁拉筋，但點解拉完一排無幾耐又痛返？

如果你想從根本去解決痛症問題，作為有周身慢性痛症嘅你，一定要了解治療上有咩關鍵嘅原則。

第一個大原則:
< 要視整個身體為一個系統去分析力學嘅問題！>

人體全身嘅關節係一個整體嘅系統，牽一髮係會動全身，你盤骨點郁會直接影響你腳弓點郁，你呼吸時肋骨點郁又會直接影響你由膊頭以至手腕點郁。

當你呢個系統之中有任何一組關節無稱職地做好佢負責嘅工作，你身體會千方百計去用「錯誤發力方法」去補償呢個問題，令到你可以繼續做到日常工作，但係呢個「錯誤發力方法」係會產生力學問題，時間耐咗最終就會導致負荷太大嘅身體部位頂唔順，就會發炎痛出黎俾你知。

所以如果你邊個位痛，就淨係掛住醫你痛個個位，例如腳板痛就做小腿拉筋，膝頭痛就針下電下膝頭周圍，腰痛就衝擊波或者拉下條腰, 頸痛就係咁做挺胸收下巴練習。咁樣唔係解決緊個問題，只係紓緩緊個症狀。

情況就好似你屋企個天花漏水，你唔去搵下背後咩原因搞到漏水，淨係不斷係滴水個位抹乾佢，係滴少咗一陣，到頭來問題都係照舊係返度。

要了解你整個關節系統係發力模式上出咗咩問題，就要透過一個系統性嘅全身動作評估，然後透過一系列嘅治療動作去根治問題。

至於點解「被動式」治療幫到嘅效果好有限，下回再探討。

聯絡電話: 9454 5592
Whatsapp: http://wa.me/85294545592

#痛症 #腰痛 #頸痛 #膊頭痛 #手踭痛 #手腕痛 #膝頭痛 #腳底痛 #物理治療 #運動治療

14/09/2023

< 點解練極收腹收臀都仲係腰痛？ >

最近有位中年患有腰痛嘅男仕來求診。佢照咗腰椎磁力共振發現佢有椎間盤突出。佢聽到「椎間盤突出」就覺得好擔心，一心諗住點先醫好個椎間盤，但佢忽略咗「椎間盤突出」係不良姿勢引致腰椎過度受壓嘅結果，並唔係最根本原因。

咩不良姿勢？就係成日聽到嘅「盤骨前傾」。而呢位病人都試過跟教練去鍛練腹肌同臀肌，但腰痛都係仍然無改善。點解呢？

「盤骨前傾」並唔係單單因為坐得太多而形成。我地人體嘅設計係每步行一步，由腳跟上到去髖關節都需要有足夠的內旋幅度，先可以完成整個承力機制。當髖關節內旋幅度唔夠，個腦就會用「盤骨轉向前」呢個方法作為補償機制。

咁點解髖關節內旋會唔夠呢？其實同呼吸係好有關！你無聽錯！當我地呼氣呼唔盡時，骶骨就不能完整地前旋 (Sacral nutation)，兩邊髖關節亦都無法內旋，呢個現象係非常之常見。

透過練習返完整地呼氣，重新打開返髖關節內旋，減少盤骨前傾嘅補償機制，2-3堂後佢腰痛巳經紓緩咗五六成。然後再透過針對性的治療動作，改善返佢兩邊唔平衡嘅姿勢 (包括高低盤骨同高低膊)，最後同佢練返核心穩定性，7-8堂後佢腰痛就好返好多。

所以，當你都有腰痛時，就要留意返呼吸模式同埋髖關節嘅柔軟度，就算照到有椎間盤突出都唔需要絕望！

關於呼吸與骶骨關係的文獻:
https://www.degruyter.com/document/doi/10.7556/jaoa.2018.041/html

聯絡電話: 9454 5592
Whatsapp: http://wa.me/85294545592

#腰痛 #椎間盤突出 #盤骨前傾 #髖關節柔軟度 #物理治療 #運動治療

25/04/2023

< 有無諗過多年前的疤痕影響到你周身痛一路好唔到? >

承上一篇文章，除咗過往身體受過創傷的部位，另一個最常見會引致大腦控制身體習慣一個「錯誤發力模式」就係疤痕。

最近有位中年女仕因為兩邊手踭同埋兩邊膝頭痛症來求診，佢本來係酒樓工作，成日要送餐行來行去，所以佢自己一路覺得係「做野勞損」。點知佢辭埋職諗住休息一輪會好d，但過咗幾個星期後佢手踭同膝頭的痛楚都無好轉。

問診時發現佢20年前頸前位置因為做過甲狀腺手術而留有一條打橫的疤痕，評估時發現佢呢條疤痕影響咗佢大腦的發力模式，令到佢盤骨同胸椎都旋埋咗一邊，所以令到手踭同膝頭在日常生活中受到過度拉扯，同時又大大減低咗佢手腳可以負重的能力，所以就連普通行路同做下小小家務都頂唔住而產生痛症。

好多時疤痕位置經過好多年後都仲係一路影響住病人發力的習慣，而病人自己唔察覺。並唔係話疤痕位置的傷口未癒合，而係疤痕組織會黏位疤痕以下的肌肉及筋膜，從而擾亂關節感覺及大腦控制肌肉發力的整個系統。

以上呢位女仕，治療時幫佢鬆返開疤痕組織，同同佢練返盤骨同胸椎旋轉的柔軟度及控制，佢手踭同膝頭痛就好好多了。記住痛症要搵根源，唔好淨係追住痛的位置去搵。留意下你身體上有無明顯的疤痕，而透過見面評估你就會好清楚條疤痕係咪你一路好唔到的痛症的元凶！

關於疤痕同身體痛症的關係的參考文獻:
https://www.ncbi.nlm.nih.gov/pmc/articles/PMC3883554/

聯絡電話: 9454 5592
Whatsapp: http://wa.me/85294545592

#疤痕 #手踭痛 #網球肘 #膝頭痛 #膝關節退化 #胸椎柔軟度 #物理治療 #運動治療

02/04/2023

< 以為拗柴隻腳唔痛唔腫, 就當無事好返曬? >

有無試過拗柴隻腳「好返」之後，過幾個月就開始有腰痛、肩頸痛、甚至另一邊膝頭痛或者腳痛? 然後因為以上呢d痛症去求醫，又一路只係睇完就鬆幾日, 唔係真正解決到? 好多病人以為腳腕拗柴同腰痛、肩頸痛部位相距咁遠無理由關事，而其實人體全身關節的運作係「牽一髮動全身」, 而從來唔係每個關節自己獨立運作。

最近有位踼開波的運動員因為右邊小腿脛前疼痛 (Shin splint) 來搵我求醫，佢來之前去搵過好多治療都係集中係右腳，但係都解決唔到佢一發力跑步就會引發佢右邊小腿內側痛楚。問診時發現佢兩年前另一邊腳腕拗過柴，當時去俾人捽完敷藥，之後消咗腫唔痛就以為「好返」。

好多時，受傷的部位會令到你「就住郁、就住行」，而就算你受傷位置過一排唔再腫唔再痛，因為腦部對於曾經受過傷的部位係非常印象深刻，佢係唔會咁易識得自己調節返停止唔再「就住郁、就任行」，反而會形成咗一個長期的「錯誤發力習慣」，而最重要係病人自己係唔會察覺原來自己仲係就住就住！

然後你身體任何一個關節部位，都可以被你呢個長期的「錯誤發力習慣」所造成的不良力學虐待緊，時間耐咗就會出現「勞損發炎」、「提早退化」、「撕裂」呢d形容緊個「受害者」的情況。

以上呢位足球運動員經過針對佢拗過柴個隻腳，以及身體整體發力上的矯正治療，佢右邊小腿脛前疼痛就好好多啦。想知道你自己發力習慣有無問題，就要見面透過精準的動作及肌肉評估，就會清楚知道要做咩動作先可以針對你痛症問題，從而得到長遠的解決。

聯絡電話: 9454 5592
Whatsapp: http://wa.me/85294545592

#拗柴 #頸痛 #肩頸痛 #腰痛 #脛前疼痛 #物理治療 #運動治療

05/03/2023

< 扁平足靠鞋墊？>

最近有個中年男病人有腳痛同埋腰痛，去到鞋店俾人度下腳弓，被告知有扁平足，就長期著住鞋墊。佢著咗鞋墊後覺得腳痛有少少改善，但反而多咗頸痛膊頭痛問題。點解呢？

首先我地要了解腳弓嘅解剖學。腳弓本身係一個需要活動的關節。腳弓唔係一個陷阱，唔係與生俱來特登「陰你」俾個位你下陷落去整痛你。

腳弓嘅設計係令你步行時，當你將體重踩落去隻腳個一下，腳弓就會扁落去，做緊腳掌內旋 (foot pronation)。腳弓扁落去呢一下，目的係為咗吸震，同時儲起肌肉同筋腱被拉開的彈性能量，預備腳弓回彈時可以做到一個有效嘅腳掌外旋 (foot supination)。腳弓要有扁落去又回彈的完整過程，先可以令你成個人可以有效地利用腳弓活動機制向前步行。

如果用鞋墊去頂實咗個腳弓，腳弓就無曬空間可以做到扁落去又回彈的過程，腳部就失去咗步行時幫你將重心向前推進的機制。所以著住鞋墊去步行，係用緊一個唔正常的代償機制去步行，代償機制出現就好有機會製造腳部以外身體部位的痛症。

咁如果有扁平足應該點樣處理呢？其實扁平足只係顯示咗整個身體「發力習慣」出咗問題，只要針對性地以動作矯正你「錯誤發力習慣」，就可以長遠改善因為腳弓有問題所引致的各種痛症。

22/02/2023

< 頸成日痛? 巳經成日拉筋又坐到直但都好唔到? 一大關鍵你要知 >

最近有唔少病人因為頸痛來求診，而佢地好多時都係網上搵到的資訊，通常都係教人側埋頸一邊，做上斜方肌的拉筋，但係效果通常都唔理想。再加埋坐直又睇少d電話都仲係頸痛。其中一個忽視咗的關鍵就係要考慮埋整個肋骨 (Ribcage) 的柔軟度。

臨床最常見頸痛的病人呼吸協調都出現問題，通常一邊肋骨失去膨漲打開的柔軟度而令到吸氣較差，另一邊肋骨就反而失去收縮的柔軟度而令到呼氣較差。

呢個情況令到肺部係呼吸時膨漲收縮的幅度下降，腦部感受到呢個情況時就會用頸部肌肉去輔助呼吸。尤其係上斜方肌 Upper trapezius / 斜角肌 Scalenes / 胸鎖乳突肌 Sternocleidomastoid 呢幾組肌肉就會被逼做埋幫手呼吸的工作，最終不勝負荷就會有勞損同炎症，令到肩頸成日痛又好唔返。

所以如果你有頸痛問題，發覺做極拉筋都好唔返，就要考慮肋骨的柔軟度。臨床上用肩胛骨的動作測試就可以知道肋骨係膨脹定收縮不足。精準的測試搵到原因，配合針對問題的動作治療，先可以有效治療頑固痛症！

聯絡電話: 9454 5592
Whatsapp: http://wa.me/85294545592

#頸痛 #上交叉綜合症 #肩頸痛 #烏龜頸 #寒背 #圓肩 #呼吸 #橫隔膜 #物理治療 #運動治療

22/02/2023

< 碌極 IT Band 都解決唔到外側膝頭痛 ? 呢個關鍵問題被忽略 >

最近有位跑開步又經常行山的女仕因為外側膝頭痛來求診。佢係網上搵到有好多資訊都顯示佢患上外側膝頭痛係「髂脛束綜合症」(Iliotibial band syndrome)，然後就跟住網上建議用瑜伽滾筒去碌鬆大腿外側的髂脛束 (IT Band)。但碌完一大輪都只係鬆幾日，過兩日去跑返步外側膝頭又痛返，點解始終都唔夠真正解決到呢？

關鍵問題係要睇脛骨的外旋及內旋柔軟度。

如果脛骨欠缺內旋的柔軟度，就要先就要先放鬆闊筋膜張肌 (Tensor fascia lata) 及髂脛束 (IT Band)，然後啟動及強化縫匠肌 (Sartorius)，在此情況下去碌鬆 IT band 係可以幫助解決外側膝痛問題。

如果脛骨欠缺外旋的柔軟度，就要先放鬆縫匠肌及內側膕繩肌，然後啟動及強化闊筋膜張肌、肌二頭肌 (Biceps femoris)，在此情況下去碌鬆 IT Band 係完全無助解決外側膝痛問題！

所以要有效解決外側膝痛的問題，要先透過動作測試去斷定脛骨旋轉的狀態，再針對性地做返相應矯正發力的治療動作，有精準的評估加上針對性的解決方法，先可以一擊即中問題的根本。

聯絡電話: 9454 5592
Whatsapp: http://wa.me/85294545592

#膝頭痛 #外側膝頭痛 #跑步膝頭痛 #髂脛束綜合症 #物理治療 #運動治療

19/02/2023

< 排球運動員的膊頭痛 >

需要膊頭上舉的運動 (Overhead sports) ，包括羽毛球、排球、手球的運動員唔多唔少都試過肩膊痛症或者有「棘住」，臨床上最常見就係肩膊失去內旋的幅度 Glenohumeral Internal Rotation Deficit (GIRD)。

最近有位 20 歲打開排球的運動員，就係有呢個 GIRD 的肩膊問題，每一次佢打排球時，手掌擊球一刻肩膊就會隱隱作痛。佢上網搵資料搵到「睡眠者肩膊伸展」Sleeper stretch 呢一個伸展運動，話可以幫助改善肩膊內旋的幅度，但佢跟住做完發覺改善唔到個幅度不特止，仲更加痛多咗。

原因係肩膊內旋呢個動作唔係獨立一個動作，要有效改善肩膊內旋的幅度，需要其他關節的配合，包括
一) 需要肩胛骨前傾(Anterior tilt) 及前突(Protraction) 的配合
二) 需要啟動腹肌去拉動肋骨向前傾，同時配合呼氣的力量 (即是需要橫隔膜放鬆)
三) 需要胸椎向相反方向旋轉的配合
四) 需要盤骨後傾(Posterior tilt) 及腳弓旋後(Supination) 的配合

如果只顧獨立地將肩膊向內旋方向格硬拉落去做伸展，只會更加扯傷肩膊的筋腱及軟組織，令肩膊問題更嚴重。

做開肩膊上舉運動的你，要深入了解肩膊痛極都好唔到的真正原因，就必須要透過臨床動作及肌肉測試，先可以一擊即中搵到解決方法。

聯絡電話: 9454 5592
Whatsapp: http://wa.me/85294545592

#排球 #羽毛球 #肩膊痛 #肩膊內旋 #物理治療 #運動治療

註冊物理治療師 Leon

03/12/2024

07/11/2024

29/05/2024

01/11/2023

26/09/2023

14/09/2023

25/04/2023

02/04/2023

05/03/2023

22/02/2023

22/02/2023

19/02/2023

Address

Website

Alerts

Shortcuts

Share

Category