04/11/2025
呢位病人長期感到左手臂痺痛，然後慢慢蔓延到左邊肩頸酸痛。
咁耐以嚟佢有四出求診，物理治療、脊椎神經科、中醫針灸推拿乜都試過，算係改善到手臂痺痛問題，不過肩頸嘅不適始終揮之不去。
請病人話我知唔舒服嘅地方，佢指住左邊前頸，話自己嘅「胸鎖乳突肌」（sterno-cleido-mastoid muscle）經常好唔舒服，就算照以前治療師教導嘅拉筋都於事無補。
既然拉筋冇用，就不如試試相反。我請病人聳起左肩，佢立時話本身嘅不適減少咗；反之當我捉住佢左手向下拉，不適感就立刻重現。
就算大家唔係治療師，睇到呢度都知佢左肩頸係唔適合拉筋，甚至唔適合做太多放鬆手法。
我解釋：「肌肉，以至所有軟組織，繃緊嘅原因都可以分為兩種，一係太亢奮，二係受抑制。太亢奮嘅肌肉，我哋可以用一般嘅放鬆方法，例如拉筋或按摩去改善。用一般人嘅理解，可以將佢想像為一組因為用力太多，而長期處於收縮狀態嘅肌肉。」
「但受抑制嘅肌肉，本身已經唔能夠有效發力。用普羅大眾能夠明白嘅方法解釋，就好似同一公司入面嘅兩位同事，其中一位可能太亢奮做哂所有嘢，於是另一位可以偷懶；又或者一位本身太攰，要偷懶，於是另一位因為要做埋佢嗰份而逼住處於亢奮狀態。無論如何，結果都係一樣，一個捱到病，另一個就懶懶閒。」
「如果我哋針對受抑制嘅肌肉再放鬆，就只會令佢繼續、甚至更加受抑制。輕則鬆完等如冇鬆，嚴重則鬆完仲差過唔鬆。」
「而最大問題係，不論過於亢奮或受抑制嘅肌肉，喺拉筋過程都會有差不多嘅繃緊感覺。即係話，病人唔能夠憑拉筋時嘅感覺，去判斷自己做啱定做錯。」
「我哋應該做嘅，係要搵出太亢奮嘅肌肉並將其放鬆，然後針對受抑制嘅肌肉，以特定嘅運動將其喚醒。即係要呵返太亢奮嘅嗰位同事，同時叫醒偷懶嗰位，起身做返自己嘅工作。」
病人有提過最初發病嘅時候，係因為用得電腦電話太多。理所當然地，就由呢啲不良姿勢常用到嘅肌肉開始檢查。
檢查發現，病人左邊嘅「胸小肌」（pectoralis minor）處於亢奮狀態，抑制住左邊嘅胸鎖乳突肌及斜角肌群等前頸肌肉、與及肩後面嘅上斜方肌。
當呢啲肌肉受抑制並變得繃緊，就有機會連同本身已經亢奮繃緊嘅胸小肌，一齊刺激到由頸走向手部嘅「臂神經叢」（brachial plexus），造成麻痺。本身長期拉緊嘅肌肉亦會令頸椎移動唔暢順，造成不適。
所以，第一次嘅治療，就以放鬆胸小肌，並配合運動喚醒左肩頸受抑制嘅肌肉為主。治療後，病人初步感覺良好，之前嘅治療做完冇呢個效果。
當然，事情永遠唔會咁簡單。之後嘅治療，我哋有做過頸椎牽引、有處理過牙骹及肩關節、亦有再睇遠啲，透過調整雙腿唔平衡去改善盆骨錯位等。
經過兩個月嘅努力，病人雖然離完全康復仲有距離，但已好轉唔少，起碼感覺到生活唔再受症狀影響。
