康匯手法物理治療中心 United Manual Therapy Centre - HK

12/12/2025

今個星期收第三個whatsapp
完全一樣嘅pattern

一嚟就話“醫師，我扭傷邊度邊度，想約個時間嚟睇睇”
或者“請問係咪物理治療／中醫診所？”

下一句就問“請問呢個號碼係醫師定姑娘”

同佢講話幾點有位，佢又會隔一大輪先覆話唔得閒，要遲啲先約

然後又會突然send個msg嚟講早晨打招呼之類

全部嘅頭像都係貓／狗
全部都係本地號碼，但打返去係唔通，有一個仲話停止服務

頭兩個即report and block
啱啱呢個唔好彩了，鬧返夠本先block

p.s.我平時好溫文爾雅的

30/11/2025

［母校新聞］條友去完外國做完大外宣，返到嚟就靜靜雞出個聲明話可能講錯嘢，know play

I wish to address and clarify several points arising from my recent interview with Channel 4 News on 26 November 2025 regarding the Wang F*k Court fire ...

26/11/2025

細個有朋友住宏福苑，上過去N次打機睇波過夜...
依家見到咁個心真係嗱住嗱住

希望場火快啲救熄，人畜都平安

18/11/2025

我D _ _ M西木

我接受到技不如人咁輸
我接受到落後之後肯試肯變陣但徒勞無功咁輸
但我真係接受唔到見到形勢急轉直下都冇反應，到落後要湧上去嗰陣一樣冇反應，到最後得返些少時間先求其去變咁輸

如果係咁嘅使鬼要個領隊咩

04/11/2025

呢位病人長期感到左手臂痺痛，然後慢慢蔓延到左邊肩頸酸痛。

咁耐以嚟佢有四出求診，物理治療、脊椎神經科、中醫針灸推拿乜都試過，算係改善到手臂痺痛問題，不過肩頸嘅不適始終揮之不去。

請病人話我知唔舒服嘅地方，佢指住左邊前頸，話自己嘅「胸鎖乳突肌」（sterno-cleido-mastoid muscle）經常好唔舒服，就算照以前治療師教導嘅拉筋都於事無補。

既然拉筋冇用，就不如試試相反。我請病人聳起左肩，佢立時話本身嘅不適減少咗；反之當我捉住佢左手向下拉，不適感就立刻重現。

就算大家唔係治療師，睇到呢度都知佢左肩頸係唔適合拉筋，甚至唔適合做太多放鬆手法。

我解釋：「肌肉，以至所有軟組織，繃緊嘅原因都可以分為兩種，一係太亢奮，二係受抑制。太亢奮嘅肌肉，我哋可以用一般嘅放鬆方法，例如拉筋或按摩去改善。用一般人嘅理解，可以將佢想像為一組因為用力太多，而長期處於收縮狀態嘅肌肉。」

「但受抑制嘅肌肉，本身已經唔能夠有效發力。用普羅大眾能夠明白嘅方法解釋，就好似同一公司入面嘅兩位同事，其中一位可能太亢奮做哂所有嘢，於是另一位可以偷懶；又或者一位本身太攰，要偷懶，於是另一位因為要做埋佢嗰份而逼住處於亢奮狀態。無論如何，結果都係一樣，一個捱到病，另一個就懶懶閒。」

「如果我哋針對受抑制嘅肌肉再放鬆，就只會令佢繼續、甚至更加受抑制。輕則鬆完等如冇鬆，嚴重則鬆完仲差過唔鬆。」

「而最大問題係，不論過於亢奮或受抑制嘅肌肉，喺拉筋過程都會有差不多嘅繃緊感覺。即係話，病人唔能夠憑拉筋時嘅感覺，去判斷自己做啱定做錯。」

「我哋應該做嘅，係要搵出太亢奮嘅肌肉並將其放鬆，然後針對受抑制嘅肌肉，以特定嘅運動將其喚醒。即係要呵返太亢奮嘅嗰位同事，同時叫醒偷懶嗰位，起身做返自己嘅工作。」

病人有提過最初發病嘅時候，係因為用得電腦電話太多。理所當然地，就由呢啲不良姿勢常用到嘅肌肉開始檢查。

檢查發現，病人左邊嘅「胸小肌」（pectoralis minor）處於亢奮狀態，抑制住左邊嘅胸鎖乳突肌及斜角肌群等前頸肌肉、與及肩後面嘅上斜方肌。

當呢啲肌肉受抑制並變得繃緊，就有機會連同本身已經亢奮繃緊嘅胸小肌，一齊刺激到由頸走向手部嘅「臂神經叢」（brachial plexus），造成麻痺。本身長期拉緊嘅肌肉亦會令頸椎移動唔暢順，造成不適。

所以，第一次嘅治療，就以放鬆胸小肌，並配合運動喚醒左肩頸受抑制嘅肌肉為主。治療後，病人初步感覺良好，之前嘅治療做完冇呢個效果。

當然，事情永遠唔會咁簡單。之後嘅治療，我哋有做過頸椎牽引、有處理過牙骹及肩關節、亦有再睇遠啲，透過調整雙腿唔平衡去改善盆骨錯位等。

經過兩個月嘅努力，病人雖然離完全康復仲有距離，但已好轉唔少，起碼感覺到生活唔再受症狀影響。

17/10/2025

快閃幾日，下星期一照常應診
如有需要可whatsapp/signal 97996749

10/10/2025

尋日同病人講起「究竟點先算康復 」呢個課題。

大部份人認為／誤解／希望將身體復原至100%先叫復原。可惜嘅係，我哋自出娘胎開始，身體就不停處於耗損＞復原＞耗損＞復原嘅循環入面。而身體喺修理每次耗損嘅期間，患處都會產生黏連／傷痂，呢啲組織彈性比唔上原先健康嘅組織，所以會留低一個弱點，變成「舊患 」。

年輕嘅時候，新陳代謝較快，復原能力較高，身體產生黏連嘅時間較短，因此後生病人復原後，患處嘅組織更能接近原先受傷前嘅狀態。

隨住年紀漸長，新陳代謝減慢，受傷需時更長先能夠修補，所以每次受傷身體都會產生更多黏連及疤痕，故此我哋呢啲老人家（唉）每次痛完，都會有「總係好得唔徹底 」嘅感覺。尤其如果傷患係由日復日、年復年嘅日常作息習慣造成的話，身體根本唔可能完全脫離病因，痛楚每隔一段時間就會重臨。

既然微觀上，身體冇可能變回完美嘅狀態，我哋對於「 復原」嘅定義，就只可以退而求其次，改為「唔痛 」、「用到力 」、「唔影響工作／生活／運動 」。（其實都已經好難做到）

重點係，我哋嘅身體要運作得好，並唔需要處於完美狀態，只要「夠用」就得。具體講就係，就算關節附近有耗損、有黏連、有舊患都好，只要移動得暢順，壓力能夠平均分散至身體可以接受嘅程度，就可以保持無痛。治療嘅方針就係咁簡單，僵硬嘅地方就用各種方法放鬆，唔夠力嘅肌肉就以運動鍛煉，務求令身體回復返最合適嘅狀態。

就好似屋企部雪櫃咁，隨時24/7咁用咗超過十年，裡面嘅零件必定有耗損，不過整體運作得到就可以了。

p.s. 全地球幾十億人，嚴格嚟講可能得啱啱出世嘅bb先有機會完美，但都要出生過程順利先得。萬一子宮收縮得太劇烈，將bb擠壓得太緊要，或者要拉要夾先出到嚟的話，可能由出世一刻開始已經有唔對稱嘅情況。

p.s.2 以前玩大航海時代，新船落水遇著個風暴或者同其他艦隊打完一次，之後就算修理好，最大耐久度都去唔返100%。嗰時覺得好納悶，但依家就發覺呢個世界所有包含移動部件嘅機器其實都係咁。

21/09/2025

［超前部署］下星期三嘅預約已經改哂，但依家睇嚟似乎星期二晚，甚至星期四朝早都可能開唔到工...

09/09/2025

呢位病人係我朋友嘅家傭，幾星期前開始突然雙腳腫痛，然後逐漸感覺到腰、背、肩、頸都有痛楚，連深呼吸都覺得不適。朋友帶佢睇過跌打（剩係幫佢雙腳敷藥），之後幾日病人聲稱明顯有好轉（！？），但之後又打回原形。病人覺得自己再應付唔到家務同照顧小朋友嘅工作，要告老回鄉云云。

就咁聽朋友講完，諗到幾點：

1）有啲病人嘅痛症就係咁，易來易去；發作嘅時候可能痛到世界末日一樣，但只需要一啲簡單嘅紓緩治療，又可以突然好轉一大截。

2）通常呢類病人嘅痛症，心理因素佔咗相當比重。當心理壓力太大，身體就會釋放出「皮質醇」（cortisol）。過量皮質醇會影響身體嘅「筋膜」（fascia），令其變得繃緊及失去正常嘅彈性，然後痛症就會出現。

3）如果影響到背部嘅「胸腰筋膜」（thoraco-lumbar fascia），就有機會進一步令腰、腿、背、肩、頸、上肢出現難以定位嘅痛症，甚至影響到呼吸。

4）外傭因為離鄉別井前來工作，特別容易因思鄉而出現上述嘅問題。

因為病人有出現過雙腳腫痛，順理成章地我就由人體嘅地基──雙足開始入手。檢查發現原先較腫嘅左腳，腳掌較為外翻（over-pronation)。外翻嘅腳掌會加劇足踝內側嘅壓力，令該處嘅肌腱拉傷、發炎、腫痛。

此外，腳掌外翻會帶動整條腿內旋，有機會造成各式各樣嘅下肢痛症。而內旋嘅腿部更有機會令盆骨前傾，導致兩邊盆骨出現高低，引起腰背痛等問題。

當拉扯蔓延至本身已經繃緊嘅胸腰筋膜，與之相連嘅「背闊肌」（latissimus dorsi）及橫膈膜都會受影響，然後肩頸痛、呼吸不順、甚至胸口痛楚都會隨之而來。

所以，我第一次嘅治療，主要就係以手法放鬆過份外翻嘅左足及內旋嘅左腿，同埋以拔罐放鬆胸腰筋膜。另外，亦要提醒病人當站立嘅時候（例如煮飯），要避免長時間將體重放哂喺左腳，應該間中用右腳踩力。此外，仲有教授病人一啲簡單嘅自療方法及動作。

一星期後病人覆診，回報痛楚減輕咗大半。第二次治療除咗繼續處理左腿及胸腰筋膜外，再簡單以牽引及手法放鬆頸椎及肩關節，就告完成。

幾日後收到朋友短訊，病人覺得情況大有改善，已經打消辭職念頭，佢終於可以鬆一口氣，暫時唔使為重新聘請工人煩惱。

02/08/2025

黑雨之下，我由今朝0915開始踩到2點冇停過

問過所有病人，個個都話照嚟，仲要冇人遲到
好攰但好感動，萬分感激

19/07/2025

上星期有位病人，佢腰痛一星期，因為害怕觸痛患處所以戴上腰封，意圖保護腰椎。我問佢戴咗幾多日，佢話痛幾耐就戴咗幾耐，連瞓覺都冇除低。

我向佢解釋，正常狀態下，我哋嘅深層背部肌肉，連同橫隔膜及盆腔肌肉，喺收縮時能夠增加腹腔入面嘅壓力，協助穩定腰椎。

但戴上腰封後，呢方面嘅功能就會被腰封取代，如果配戴嘅時間太長，腰部嘅肌肉就會逐漸「偷懶」，久而久之更加會變弱。去到呢個階段，患者只要一除低腰封，就會感到腰部非常虛弱，甚至有閃到腰嘅危機感。患者於是唯有繼續配戴落去，形成惡性循環。

所以腰封正確嘅使用方法，係要斷續配戴，例如每一小時就要除低十五分鐘，甚至只有需要體力操作嘅時候先戴。我經常同病人講，腰封只適合嗰啲腰痛但仲要頂硬上去搵食嘅人，配戴腰封之後嘅安全感同舒適感，其實係糖衣毒藥。

p.s.至於病人嘅腰痛，佢前日返嚟嗰時已經好返八成，稍微修理一下，再叮囑佢一啲強化運動，就宣告畢業。