28/04/2025
الي بعاني من التعلّق القلق ( anxious attachment)، بنخدع بسهولة في العلاقات،لأنه الطرف التاني بحكي الكلام الي كتير محتاج يسمعه وبيبين الاشي وكأنه اهتمام ، وبالاخص لما يكون في انجذاب، بيصير الموضوع أصعب، لإنه ما بدك تخسر/ي هالإحساس، مش مدركين إنه عم نخسر أشياء أكبر وأهم بمجرد ما نختار نضل وبدون ما نحاول نفهم الحقيقه.
أي حدا عنده نمط تعلّق قلق بحاجه يفهم إنه ما بقدر يصلّح أو يغيّر أي حدا، والمحاوله مضيعة كبيرة للطاقة والوقت.
وغالباً الي عندهم تعلق قلق بيجذبوا انسان مع نمط تعلّق متجنّب (avoidant attachment).
اسمعوا للإشارات من أول العلاقة: الشخص اللي عنده تعلّق متجنّب بيكون أولها معطي اهتمام كبير وحماس ورعاية، وفجأة بيبعد، وبتصير تحس/ي إنه الغلط منك وبتتساءل: شو عملت غلط؟ بالاضافه لخوف كبير من الترك ومع هيك ممكن تعطي مساحه او تترك/ي ، او انه بتجرب / ي تواجه/ي لاجل العلاقه تستمر ولكن بدون فايده..
بس من بعدها بعاود بيرجع فجأة بنفس الاهتمام وممكن اعتذار وكلام ووعود جميله ولكن بعد ما ترضي بعاود بعيد نفس التصرف وبيرجع يختفي جسديا و /او معنويا مرة تانية، وهيك ممكن يستمر الوضع لسنين طويله..
كمان في تصرفات معينة بتبين، زي إنه ما بيتحمل مسؤولية أفعاله والقاء اللوم على الاخر، أو ينتقد بشكل مستمر او اي احساس داخلي عندك انه في اشي مش مزبوط.
وكمان الكون نفسه بيحاول يفرجينا إشارات : متل عرقلة أو صعوبة نلتقي أو نحكي ومنختار نتجاهل هالإشارات لإنه كتير حابين إنه العلاقة تزبط. (وكمان لانه بدخول لهاي العلاقه في دروس بحاجه نتعلمها )
الحل نكون واعيين على أنماط التعلّق الغير آمنة اللي عنا ونقدر نختار العلاج والشفاء.
