https://www.facebook.com/104383918190100/

USHUS MCH KOTTAYAM, Amalagiri (2025)

27/11/2021

ലോക എയ്ഡ്സ് ദിനം 2021

അസമത്വങ്ങൾ അവസാനിപ്പിക്കാം ; എയ്ഡ്സും മഹാമാരികളും ഇല്ലാതെയാക്കാം.

30/12/2020

DAY : 30

2030 ആകുമ്പോഴേക്കും എച്ച്.ഐ.വി. ആണുവ്യാപനം ഇല്ലായ്മ ചെയ്യുക എന്നതാണ് UNAIDS ന്റെ ലക്‌ഷ്യം.

ലോകമെമ്പാടും എച്ച്.ഐ.വി. പ്രതിരോധ പ്രവർത്തനങ്ങൾ വളരെ മികവുറ്റ രീതിയിൽ നടപ്പിലാക്കി വരികയാണ്. ഇന്ത്യയിലെ എച്ച്.ഐ.വി. പ്രതിരോധ പരിപാടികൾ ദേശീയ എയ്ഡ്സ് നിയന്ത്രണ പദ്ധതിയുടെ ഭാഗമായി ദേശീയ എയ്ഡ്‌സ് നിയന്ത്രണസംഘടന നടപ്പിലാക്കി വരുന്നു.

2020 ആകുമ്പോൾ 'ആകെ അണുബാധിതരുടെ 90 ശതമാനത്തെയും കണ്ടെത്തുക ; അതിൽ 90 ശതമാനം ആളുകളും മരുന്ന് കഴിക്കാൻ തുടങ്ങുക; അപ്രകാരം മരുന്ന് കഴിക്കുന്നതിൽ 90 ശതമാനം ആളുകൾക്കും അണുബാധയെ അടിച്ചമർത്താൻ കഴിയുക'- എന്നതായിരുന്നു UNAIDS വിഭാവനം ചെയ്ത 90 : 90 : 90 സ്ട്രാറ്റജി. 2020 ആയതോടെ അത് സാധ്യമാക്കുകയും ചെയ്തു.

ആയതിന്റെ അടിസ്ഥാനത്തിൽ കൃത്യമായ ആസൂത്രണത്തോടെ പുതിയ ലക്ഷ്യത്തിലേക്ക് UNAIDS നീങ്ങുകയാണ്. 2030 ആകുംപോളെക്കും പുതിയ അണുബാധ ഭൂമുഖത്തുനിന്നും നീക്കം ചെയ്യുക അതിനായി എച്ച്.ഐ.വി. ആണുവ്യാപനം ഇല്ലായ്മ ചെയ്യുക എന്നതാണ് UNAIDS ന്റെ അടുത്ത ലക്‌ഷ്യം. എച്ച്.ഐ.വി അണുബാധക്കെതിരെയുള്ള ആ ലക്ഷ്യത്തിലേക്ക് എത്തിച്ചെരുന്നതിനുള്ള കൂട്ടായ പരിശ്രമത്തിലാണ് എയ്ഡ്സ് നിയന്ത്രണ ദൗത്യവും ഓരോ പ്രവർത്തകരും.

29/12/2020

DAY : 29

കൃത്യമായ ചികിത്സയിലൂടെ എച്ച്. ഐ.വി. ബാധിതർക്ക് സാധാരണ ഏതൊരു ആളിനെയും പോലെ സാധാരണജീവിതം നയിക്കാൻ കഴിയും.

എച്ച്.ഐ.വി/എയ്ഡ്സ് രോഗത്തിന് എതിരായ ആന്റി റിട്രോവൈറൽ തെറാപ്പി (ART) എന്ന ചികിത്സയിലൂടെ എച്ച്. ഐ. വി. വൈറസിന്റെ മനുഷ്യശരീരത്തിലെ പെരുകൽ ഫലപ്രദമായി തടയാനും അതിനെ നിയന്ത്രണവിധേയമാക്കാനും സാധിക്കും. അങ്ങനെ ശരീരം രോഗപ്രതിരോധ ശക്തി വീണ്ടെടുക്കുകയും അവസരജന്യ രോഗങ്ങളെ ചെറുക്കുന്നതിനു പ്രാപ്തമാകുകയും ചെയ്യും. കൃത്യസമയത്ത് രോഗം കണ്ടെത്തുകയും കൃത്യമായി ചികിത്സ ഉറപ്പു വരുത്തുകയുമാണെങ്കിൽ എച്ച്. ഐ.വി. ബാധിതർക്ക് സാധാരണ ഏതൊരു ആളിനെയും പോലെ ആരോഗ്യം വീണ്ടെടുത്തു സുദീർഘമായ സാധാരണ ജീവിതം നയിക്കാൻ കഴിയും.

ജീവിതശൈലിരോഗങ്ങളെ പോലെ തന്നെ നിയന്ത്രിക്കാൻ കഴിയുന്ന ഒരു ആജീവനാന്തരോഗമാണ് എച്ച്.ഐ.വി.യും. കൃത്യമായ ചികിത്സയും പരിചരണവും കൊണ്ട് എച്ച്.ഐ.വി എന്ന അണുബാധ മനുഷ്യശരീരത്തിൽ പെരുകുന്നത് നിയന്ത്രിക്കുവാൻ കഴിയുന്നു. അതിലൂടെ അണുബാധിതന് രോഗപ്രതിരോധ ശക്തിയുടെ കുറവിനാലുണ്ടാകുന്ന എയ്ഡ്സ് എന്ന അവസ്ഥയിൽ നിന്ന് മോചനം ലഭിക്കുകയും ചെയ്യുന്നു.

കേരള സംസ്ഥാന എയ്ഡ്സ് നിയന്ത്രണ സൊസൈറ്റിയുടെ മേൽനോട്ടത്തിൽ പ്രവർത്തിക്കുന്ന ഉഷസ്‌ കേന്ദ്രങ്ങളിൽ (ART Centre) ART ചികിത്സ നൽകി വരുന്നു.

28/12/2020

DAY : 28

എച്ച് എച്ച്.ഐ.വി അണുബാധയുള്ള വ്യക്തിയോടൊപ്പം സുരക്ഷിതമായി ജീവിക്കാൻ കഴിയും

രക്തം, ശുക്ലം, യോനിദ്രവം, മുലപ്പാൽ എന്നിങ്ങനെയുള്ള ശരീര ദ്രവങ്ങളിൽ കൂടി മാത്രമാണ് എച്ച്.ഐ.വി അണുബാധ പകരുന്നത്. അതുകൊണ്ടു തന്നെ ഒരേ വീട്ടിലോ സമൂഹത്തിലോ അണുബാധിതനോടൊപ്പം താമസിച്ച് സാധാരണ ജീവിതം പുലർത്തുന്നവർക്ക് അണുബാധ ഉണ്ടാകുവാനുള്ള സാധ്യത ഇല്ല.

ഒന്നിലധികം ലൈംഗികപങ്കാളികളുമായി ഉറ ഉപയോഗിക്കാതെയുള്ള ലൈംഗിക ബന്ധത്തിൽ ഏർപ്പെടുന്നതിലൂടെയോ, അണുബാധയുള്ള വ്യക്തിയുടെ രക്തമോ, രക്തഉത്പന്നങ്ങളോ ശരീരത്തിൽ ഉപയോഗിക്കുന്നതിലൂടെയോ, കുത്തിവയ്ക്കാൻ ഉപയോഗിക്കുന്ന സൂചി ഉപയോഗത്തിന് ശേഷം പങ്കുവക്കുന്നതിലൂടെയോ, എച്ച്.ഐ.വി. അണുബാധിതയായ അമ്മയിൽ നിന്നും കുഞ്ഞിലേക്ക് ഗർഭാവസ്ഥയിലോ, പ്രസവസമയത്തോ, മുലയൂട്ടുന്നതിലൂടെയോ മാത്രമേ അണുബാധ പകരുകയുള്ളു.

നീന്തൽക്കുളങ്ങൾ, ടോയ്‌ലറ്റുകൾ, വീട്ടുപകരണങ്ങൾ, ഭക്ഷണപാനീയങ്ങൾ എന്നിവ പങ്കിടുന്നതിലൂടെയോ ഒരേ മുറിയിൽ താമസിക്കുന്നതിലൂടെയോ ചുംബനത്തിൽ കൂടെയോ എച്ച്.ഐ.വി അണുബാധ പകരില്ല. വായുവിലൂടെയോ കൊതുകുകളോ മറ്റു പ്രാണികളോ വഴിയോ എച്ച്.ഐ.വി അണുബാധ പകരുന്നതല്ല. കണ്ണുനീർ, വിയർപ്പ്, ഉമിനീർ, ഛർദ്ദിൽ, മൂത്രം, എന്നിവയിലൂടെവയും എച്ച്.ഐ.വി അണുബാധ പകരുന്നില്ല. അണുബാധയില്ലാത്തവർ അണുബാധയുള്ള വ്യക്തിയുടെ ശരീര ദ്രവങ്ങളുമായി സമ്പർക്കം പുലർത്തേണ്ടി വന്നാൽ കയ്യുറകൾ ധരിക്കുന്നത് നല്ലതാണ്.

ആയതിനാൽ അണുബാധിതരോടൊപ്പമുള്ള ജീവിതം ഏതൊരു സാധാരണ വ്യക്തിയുടെയും കൂടെയെന്നപോലെ സുരക്ഷിതമാണ്.

അകറ്റി നിർത്തേണ്ടത് അണുബാധയെയാണ്... അണുബാധിതരെയല്ല.

27/12/2020

DAY : 27

കേരളത്തിലെ എച്ച്.ഐ.വി അണുബാധിതർക്കുള്ള ചികിത്സയും മറ്റ്‌ സഹായങ്ങളും ഏകോപിപ്പിച്ച് നടപ്പിലാക്കിക്കൊണ്ടിരിക്കുന്നത് കേരള സംസ്ഥാന എയ്ഡ്സ് നിയന്ത്രണ സൊസൈറ്റിയുടെ നേതൃത്വത്തിലാണ്.

1981 ൽ ആണ് എച്ച്.ഐ.വി അണുബാധ ലോകത്തിൽ ആദ്യമായി റിപ്പോർട്ട് ചെയ്യപ്പെട്ടത്. 1986 ൽ ഇന്ത്യയിലും അണുബാധ ആദ്യമായി റിപ്പോർട്ട് ചെയ്തു. ഇതിന്റെ അടിസ്ഥാനത്തിൽ എച്ച്.ഐ.വി യെ ചെറുക്കുന്നതിനായി 1987 ൽ ദേശീയ എയ്ഡ്സ് നിയന്ത്രണ പദ്ധതി ആരംഭിക്കുകയും ചെയ്തു.

1992 ആയപ്പോൾ എല്ലാ ജില്ലകളിലും എയ്ഡ്സ് സെൽ രൂപീകരിക്കപ്പെട്ടു. എച്ച്.ഐ.വി /എയ്ഡ്സ് പ്രതിരോധ പ്രവർത്തനങ്ങൾ നടപ്പിലാക്കുക എന്നതായിരുന്നു എയ്ഡ്സ് സെല്ലുകളുടെ ലക്‌ഷ്യം. ഇത് കൂടുതലായി ലക്ഷ്യത്തിലേക്ക് എത്തിക്കുന്നതിനായി ദേശീയ എയ്ഡ്സ് നിയന്ത്രണ പദ്ധതിയെ വിവിധ ഫേസ് (ഘട്ടങ്ങൾ) ആയി നടപ്പിലാക്കുവാൻ തുടങ്ങി.

1992 മുതൽ 1999 വരെ ആയിരുന്നു ഒന്നാം ഘട്ടം (NACP PHASE - 1). ബോധവത്കരണവും രക്ത സുരക്ഷയും ആയിരുന്നു ആദ്യഘട്ടത്തിൽ പ്രധാന ഉദ്ദേശ്യം. 1999 മുതൽ 2006 വരെ നീണ്ട രണ്ടാം ഘട്ടത്തിൽ (NACP PHASE - 2) അതുവരെ പ്രവർത്തിച്ചിരുന്ന എയ്ഡ്സ് സെല്ലുകൾ സംസ്ഥാന എയ്ഡ്സ് നിയന്ത്രണ സൊസൈറ്റികളായി രൂപമാറ്റത്തിനു വിധേയമായി. 2007 മുതൽ 2013 വരെ യുള്ള മൂന്നാം ഘട്ടത്തിൽ (NACP PHASE - 3) അണുബാധിതർക്കുള്ള ശുസ്രൂഷക്കും പരിചരണത്തിനും പ്രാധാന്യം നൽകി വന്നു. 2013 മുതൽ ഇപ്പോളും തുടരുന്ന നാലാം ഘട്ടം (NACP PHASE - 4) ലക്ഷ്യ വിഭാഗങ്ങളെ കേന്ദ്രീകരിച്ച് ആയിരുന്നു.

ദേശീയ എയ്ഡ്സ് നിയന്ത്രണ സംവിധാനത്തിന് കീഴിൽ ആണ് സംസ്ഥാന എയ്ഡ്സ് നിയന്ത്രണ സൊസൈറ്റിയുടെ പ്രവർത്തനം നടപ്പിലാക്കുന്നത്. കേരളത്തിൽ അണുബാധിതർക്കായി വിവിധ സാമൂഹ്യ സുരക്ഷാ പദ്ധതികൾ കേരള സർക്കാരുമായി ചേർന്ന് KSACS നടപ്പിലാക്കുന്നു. കേരളത്തിൽ എയ്ഡ്സ് പ്രതിരോധ പ്രവർത്തനങ്ങൾ നടപ്പിലാക്കുന്നത് കേരള സംസ്ഥാന എയ്ഡ്സ് നിയന്ത്രണ സൊസൈറ്റിയുടെ (KSACS) നിയന്ത്രണത്തിൽ ആണ്.

26/12/2020

DAY : 26

എച്ച്.ഐ.വി അണുബാധിതരുടെ രോഗ വിവരം അവരുടെ അനുവാദമില്ലാതെ മറ്റ് ആളുകളോട് പറയുന്നതും അണുബാധിതരെ ഒറ്റപ്പെടുത്തുന്നതും നിയമപ്രകാരം കുറ്റകരമാണ്.

എച്ച്.ഐ.വി അണുബാധിതർക്കെതിരെയുള്ള അതിക്രമം, പാർശ്വവത്കരണം, ഒറ്റപ്പെടുത്തൽ, നീതിനിഷേധം എന്നിങ്ങനെയുള്ളവക്കെതിരെ നിയമത്തിന്റെ തുല്യ പരിരക്ഷ ലഭിക്കുന്നതിനായി 2017 ൽ പ്രത്യേകമായ നിയമം (എച്ച്.ഐ.വി ആക്റ്റ്) പാർലമെൻറിൽ പാസാക്കുകയുണ്ടായി.

ഈ നിയമം പ്രകാരം ഒരാളുടെ എച്ച്.ഐ.വി അണുബാധ സംബന്ധിച്ച വിവരം രഹസ്യമായി സൂക്ഷിക്കേണ്ടത് ആ വ്യക്തിയുടെ അവകാശമാണ്. അണുബാധിതർക്ക് അയാളുടെ ചികിത്സക്ക് സഹായകരമെങ്കിൽ മാത്രം ചികിത്സയ്ക്കുന്ന ഡോക്ടർക്ക് ചികിത്സയെ സഹായിക്കുന്ന മറ്റ് ഡോക്ടറുമായി/ആരോഗ്യ പ്രവവർത്തകരുമായി ഈ വിവരം പങ്ക് വക്കുവാൻ അനുവതിയുണ്ട്. അതല്ലായെങ്കിൽ നിയമപരമായി കോടതിക്ക് മുന്നിൽ മാത്രമേ ഇത് തുറന്ന് കാട്ടേണ്ടതുള്ളു. മറ്റു ബന്ധുക്കൾ, സുഹൃത്തുക്കൾ എന്ന് തുടങ്ങി ആരുമായും എച്ച്.ഐ.വി അണുബാധയുടെ വിവരങ്ങൾ പങ്ക് വയ്ക്കാതെ രഹസ്യമായി സൂക്ഷിക്കുക എന്നത് അണുബാധിതന്റെ അവകാശമാണ്.

എച്ച്.ഐ.വി അണുബാധയുടെ പേരിൽ ഒറ്റപ്പെടുത്തുന്നതും, നീതി നിഷേധിക്കുന്നതും മേൽ സൂചിപ്പിച്ച നിയമപ്രകാരം കുറ്റകരമാണ്.

ഇതുമായി ബന്ധപ്പെട്ട നിയമസഹായം ആവശ്യമുള്ള എച്ച്.ഐ.വി അണുബാധിതർക്ക് ജില്ലാ നെറ്റ് വർക്ക് ആയ വിഹാൻ കേന്ദ്രവുമായി ബന്ധപ്പെടാവുന്നതാണ്.

25/12/2020

DAY : 25

എച്ച്.ഐ.വി അണുബാധക്കെതിരെ PEP ലഭ്യമാണ്.

ആരോഗ്യരംഗത്തു പ്രവർത്തിക്കുന്നവർക്കുൾപ്പെടെ ജോലിസംബന്ധമായ പ്രവർത്തിക്കിടയിൽ അണുബാധയുള്ള ആളിൽ നിന്നും എച്ച്.ഐ.വി അണുബാധ ഉണ്ടാകാനിടയുള്ള അപകടകരമായ സാഹചര്യം ഉണ്ടായാൽ ശരീരത്തിൽ വൈറസ് പിടിപെടുന്നത് തടയാൻ വേണ്ടി ഉപയോഗിക്കുന്ന ART മരുന്നുകളുടെ ഒരു ഹ്രസ്വകാല ചികിത്സയാണ് പോസ്റ്റ്-എക്സ്പോഷർ പ്രോഫിലാക്സിസ് (PEP ).

കുത്തിവയ്ക്കാൻ ഉപയോഗിക്കുന്ന സൂചി പോലെ മൂർച്ചയുള്ള ഉപകരണത്താൽ എച്ച്.ഐ.വി അണുബാധാ സാധ്യതയുള്ളൊരു മുറിവേൽക്കുകയാണെങ്കിൽ മുറിവും ചുറ്റുമുള്ള ചർമ്മവും, വെള്ളവും സോപ്പും ഉപയോഗിച്ച് കഴുകുക. എന്നാൽ ചർമ്മം ഉരയും പോലെ ഉരച്ചുകഴുകുകയോ ആന്റിസെപ്റ്റിക്സ് , സ്കിൻ വാഷുകൾ, ബ്ലീച്ച്, ക്ലോറിൻ, ബെറ്റാഡൈൻ എന്നിവ ഉപയോഗിക്കുകയോ ചെയ്യരുത്. മുറിവേറ്റ ഭാഗം വായിൽ വയ്ക്കുകയുമരുത്.

അണുബാധിതമായ രക്തമോ മറ്റ്‌ ശരീര ശ്രവമോ കണ്ണിൽ വീണുവെങ്കിൽ, കണ്ണ് തുറന്നുപിടിച്ച് വെള്ളമൊഴിച്ച് നനക്കുക. കണ്ണ് തിരുമ്മരുത്. കോണ്ടാക്ട് ലെൻസ് ധരിക്കുന്ന വ്യക്തിയാണെങ്കിൽ, അതു മാറ്റാതെ തന്നെ കണ്ണ് കഴുകുക. കണ്ണ് വൃത്തിയാക്കിയ ശേഷം, കോണ്ടാക്ട് ലെൻസ് നീക്കം ചെയ്ത് സാധാരണ രീതിയിൽ വൃത്തിയാക്കുക. കണ്ണിൽ സോപ്പോ അണുനാശിനിയോ ഉപയോഗിക്കരുത്.

ഇത്തരം സാഹചര്യത്തിൽ വിവരം മേൽ ഉദ്യോഗസ്ഥനെ ധരിപ്പിക്കുകയും ചികിത്സക്കായി അടുത്തുള്ള ART കേന്ദ്രവുമായി ബന്ധപ്പെടാവുന്നതുമാണ്.

രോഗാണുബാധക്കുള്ള സാഹചര്യ മുണ്ടായാൽ ആദ്യ രണ്ടു മുതൽ എഴുപത്തിരണ്ട് മണിക്കൂറിനുള്ളിൽ തന്നെ PEP തുടങ്ങേണ്ടതാണ്. എ.ആർ.ടി കേന്ദ്രത്തിൽ രോഗാണുബാധ സംശയിച്ചെത്തുന്നവർക്കു വേണ്ട മാർഗനിർദേശങ്ങളും കൗൺസിലിംഗും ലഭ്യമാണ്.

24/12/2020

Day : 24

എച്ച്.ഐ.വി അണുബാധിതർക്ക് വിഹാൻ കേന്ദ്രങ്ങൾ പരിചരണ സഹായം നൽകി വരുന്നു.

എച്ച്.ഐ.വി. അണു ബാധിതരുടെ അതിജീവനത്തിനും അവരുടെ ജീവിതനിലവാരം ഉയർത്താനും വേണ്ടി പ്രവർത്തിക്കുന്ന സഹായകേന്ദ്രങ്ങളാണ് വിഹാൻ കേന്ദ്രങ്ങൾ. അണുബാധിതർക്ക് അവരുടെ എ.ആർ.ടി .മരുന്നുകൾ കൃത്യനിഷ്ഠയോടെ കഴിക്കുവാനും, മാനസികപിന്തുണ നൽകുവാനും സാധാരണജീവിതം നയിക്കുവാൻ അവരെ പ്രാപ്തരാക്കുവാനും ആവശ്യമെങ്കിൽ മാർഗനിർദേശങ്ങൾ നൽകി മറ്റു സഹായകേന്ദ്രങ്ങളുടെ പിന്തുണ ഉറപ്പിക്കുവാനും, സമൂഹത്തിൽ അനുകൂല സാഹചര്യനിർമ്മിതിക്കുമൊക്കെ വേണ്ടിയുള്ള സമാന പ്രശ്നം അനുഭവിക്കുന്ന ആളുകളുടെ ഒരു കൂട്ടായ്മയാണ് വിഹാൻ.

എച്ച്.ഐ.വി. ബാധിതരുടെ കുടുംബങ്ങളിലെ സ്ത്രീകൾക്കും കുട്ടികൾക്കും വേണ്ടി ജീവിത നൈപുണ്യ വിദ്യാഭ്യാസത്തിലും തൊഴിലധിഷ്ഠിത പരിശീലനത്തിലുമുള്ള ക്ലാസുകൾ, ഗാർഹിക പരിചരണ സേവനങ്ങൾ എങ്ങനെ ചെയ്യാമെന്നതിനെക്കുറിച്ചു പരിശീലനം എന്നിവ വിഹാൻ സംഘടിപ്പിക്കുന്നു. പരസ്പരം ആശങ്കകൾ പങ്കിടാനും പഠിക്കാനും ഒരു വേദി നൽകുക എന്ന ഉദ്ദേശത്തിൽ വിഹാൻ പ്രവർത്തിക്കുന്നു. കേരള സർക്കാർ എച്ച്.ഐ.വി അണുബാധിതർക്കായി നടപ്പിലാക്കുന്ന സാമൂഹ്യ സുരക്ഷാ പദ്ധതികൾ അർഹരായ ആളുകളിലേക്ക് എത്തിക്കുവാനായുള്ള ഒരു കേന്ദ്രം കൂടിയാണിത്.

23/12/2020

DAY : 23

കേരളത്തിലെ എച്ച്.ഐ.വി അണുബാധിതർക്കായി സർക്കാർ വിവിധ സാമൂഹ്യ സുരക്ഷാ പദ്ധതികൾ നടപ്പിലാക്കി വരുന്നു.

പോഷകാഹാര വിതരണം, ധനസഹായ പദ്ധതി, സൗജന്യ ചികിത്സയും പരിശോധനയും, സൗജന്യ ഗർഭാശയ പരിശോധന, വിദ്യാഭ്യാസ സ്‌കോളർഷിപ്പ് പദ്ധതി, ചികിത്സാ പരിചരണ സഹായം, സമഗ്ര ആരോഗ്യ ഇൻഷുറൻസ് പദ്ധതി തുടങ്ങിയവ എച്ച്.ഐ.വി അണുബാധിതർക്കായി നൽകി വരുന്ന പദ്ധതികളാണ്.

സഹായം ആവശ്യമുള്ള എച്ച്.ഐ.വി അണുബാധിതർക്ക് ജില്ലാ നെറ്റ് വർക്ക് ആയ വിഹാൻ കേന്ദ്രവുമായി ബന്ധപ്പെടാവുന്നതാണ്.

22/12/2020

DAY : 22

എച്ച്.ഐ.വി അണുബാധിതർക്കായി പ്രത്യേക നിയമസഹായം നൽകി വരുന്നു.

നിയമത്തിന്റെ മുമ്പിലെ തുല്യതയും നിയമത്തിന്റെ തുല്യ പരിരക്ഷയും പൗരന്മാരുടെ അവകാശമാണ്. എച്ച്.ഐ.വി അണുബാധിതർക്കെതിരെയുള്ള അതിക്രമം, പാർശ്വവത്കരണം, ഒറ്റപ്പെടുത്തൽ, നീതിനിഷേധം എന്നിങ്ങനെയുള്ളവക്കെതിരെ നിയമത്തിന്റെ തുല്യ പരിരക്ഷ ലഭിക്കുന്നതിനായി നിയമ സഹായം ലഭ്യമാണ്. കേരള സംസ്ഥാന നിയമ സഹായ അതോറിറ്റിയുടെ കീഴിൽ പ്രവർത്തിക്കുന്ന ജില്ലാതല നിയമ സഹായ അതോറിറ്റികൾ വഴിയാണ് ഈ സേവനം ലഭ്യമാകുന്നത്. എച്ച്.ഐ.വി അണുബാധിതർക്ക് അവരുടെ അവകാശങ്ങൾ ഉറപ്പാക്കുന്നതിനായി 2017 ൽ പ്രത്യേകമായ നിയമം (എച്ച്.ഐ.വി ആക്റ്റ്) പാർലമെൻറിൽ പാസാക്കുകയുണ്ടായി.

നിയമസഹായം ആവശ്യമുള്ള എച്ച്.ഐ.വി അണുബാധിതർക്ക് ജില്ലാ നെറ്റ് വർക്ക് ആയ വിഹാൻ കേന്ദ്രവുമായി ബന്ധപ്പെടാവുന്നതാണ്.

21/12/2020

DAY : 21

എച്ച്.ഐ.വി അണുബാധിതരെ ബി.പി.എൽ പട്ടികയിൽ ഉൾപ്പെടുത്തിയിട്ടുണ്ട്.

കേരളത്തിലെ എച്ച്.ഐ.വി അണുബാധിതർക്കായി സർക്കാർ വിവിധ സാമൂഹ്യ സുരക്ഷാ പദ്ധതികൾ നടപ്പിലാക്കി വരുന്നു. ഇതിന്റെ ഭാഗമായി എച്ച്.ഐ.വി അണുബാധിതരുള്ള എല്ലാ കുടുംബങ്ങളെയും വരുമാനപരിധി കണക്കാക്കാതെ ബി.പി.എൽ പട്ടികയിൽ ഉൾപ്പെടുത്തിയിട്ടുണ്ട്. ആന്റിറിട്രോവൈറൽ ചികിത്സാ കേന്ദ്രമായ ഉഷസ് കേന്ദ്രത്തിൽ (A.R.T.) രജിസ്റ്റർ ചെയ്തവർക്ക് അവരുടെ വ്യക്തിവിവരങ്ങൾ രഹസ്യമായി നിലനിർത്തിക്കൊണ്ടു തന്നെ ബി.പി.എൽ. ലിസ്റ്റിൽ ഉൾപ്പെടുവാനപേക്ഷിക്കാൻ കഴിയും. ഈ അപേക്ഷ സമർപ്പിക്കുന്നതിന് ഉഷസ് കേന്ദ്രങ്ങളുമായോ ജില്ലാ നെറ്റ് വർക്കായ വിഹാൻ കേന്ദ്രങ്ങളുമായോ ബന്ധപ്പെടാവുന്നതാണ്.

20/12/2020

Day : 20

എച്ച്.ഐ.വി. അണുബാധിതരിൽ ഏറ്റവും വേഗം ഉണ്ടാകാനിടയുള്ള ഒരു അവസരജന്യ രോഗമാണ് ക്ഷയരോഗം (ടി.ബി)

എച്ച്.ഐ.വി അണുബാധ മനുഷ്യന്റെ രോഗപ്രതിരോധ സംവിധാനത്തെ ബാധിക്കുകയും അത് മൂലം രോഗപ്രതിരോധ ശക്തി കുറയുകയും ചെയ്യുന്നു. ഈ അവസ്ഥയിൽ ഇക്കൂട്ടരിലുള്ള ഏത് രോഗാണുബാധയും വളരെ വേഗം രോഗമാകാൻ സാധ്യത ഏറെയാണ്.

ശരീരത്തിന്റെ ഏത് ഭാഗത്തിലും ടി.ബി ബാധിക്കാം എന്നിരുന്നാലും മുഖ്യമായും വായുവിൽ കൂടി പകരുന്ന ഒരു ശ്വാസകോശ രോഗമാണ് ക്ഷയരോഗം. ആയതിനാൽ തന്നെ ഈ രോഗാണു ശ്വസന പ്രക്രിയയിലൂടെ ഏതൊരു വ്യക്തിയുടെയും ശരീരത്തിൽ അകപ്പെടാൻ സാധ്യതയുമുണ്ട്. എന്നാൽ ആരോഗ്യമുള്ള വ്യക്തിയിൽ അത് രോഗമായി മാറുന്നില്ല, പക്ഷെ എച്ച്.ഐ.വി അണുബാധ മൂലം രോഗപ്രതിരോധ ശക്തി കുറഞ്ഞ ആളുകളിൽ ഇത് രോഗമായി മാറാൻ മറ്റുള്ളവരെ അപേക്ഷിച്ച് 10 മടങ്ങ് സാധ്യത കൂടുതലാണ്.

ആയതിനാൽ എച്ച്.ഐ.വി അണുബാധയുള്ള ആളുകൾ ടി.ബി ഉണ്ടോ എന്നറിയാനുള്ള പരിശോധന നടത്തേണ്ടതും, അതുപോലെതന്നെ ക്ഷയരോഗമുള്ളവർ എച്ച്.ഐ.വി അണുബാധ ഇല്ല എന്ന് പരിശോധിച്ച് ഉറപ്പ് വരുത്തേണ്ടതും അത്യാവശ്യമാണ്.

19/12/2020

DAY: 19

അണുബാധിതയായ അമ്മയിൽ നിന്നും കുഞ്ഞിലേക്ക് എച്ച്.ഐ.വി. അണുബാധ പകരുന്നതു തടയാൻ സാധിക്കും.

അണുബാധിതയായ അമ്മയിൽ നിന്നും അവരുടെ കുഞ്ഞിലേക്ക് ഗർഭാവസ്ഥയിലോ, പ്രസവസമയത്തോ, മുലയൂട്ടുമ്പോഴോ അണുബാധ പകരാനുള്ള സാധ്യത ഏറെയായതിനാൽ ഏറ്റവും നേരത്തെതന്നെ അമ്മയുടെ എച്ച്.ഐ.വി. അണുബാധയെക്കുറിച്ചു മനസ്സിലാക്കുന്നതും കൃത്യമായ ചികിത്സാപദ്ധതികൾ സ്വീകരിക്കുന്നതും പ്രസവസമയത്തെയും തുടർന്നുമുള്ള ആരോഗ്യ സുരക്ഷാ മുൻകരുതലുകളും കൊണ്ട് കുഞ്ഞിലേക്ക് അണുബാധ പകരുന്നതു തടയാൻ സാധിക്കും.

നിർദേശിക്കപ്പെട്ട മരുന്നുകൾ കൃത്യസമയത്തു കഴിക്കുകയും രക്തത്തിലെ വൈറൽലോഡ് നില പരിമിതമായിരിക്കുകയും ചെയ്യുന്ന അമ്മയിൽ നിന്നും അവരുടെ കുഞ്ഞുങ്ങളിലേക്ക് രോഗം പകരുവാനുള്ള സാധ്യത കുറവാണ്. ആയതിനാൽ എല്ലാ ഗർഭിണികളും ആദ്യ ഘട്ടത്തിൽ തന്നെ എച്ച്.ഐ.വി പരിശോധന നടത്തി ചികിത്സ ആരംഭിക്കുന്നത് നല്ലതാണ്.

18/12/2020

Day : 18

എച്ച്.ഐ.വി. അണുബാധിതർക്കുള്ള പരിശോധനകൾ സൗജന്യമാണ്..

എച്ച്.ഐ.വി. അണുബാധിതർക്കുള്ള എല്ലാ പരിശോധനകളും C T സ്കാനും സർക്കാർ ആശുപത്രികളിൽ സൗജന്യമായി ലഭിക്കുന്നതാണ്. ചികിത്സക്കായി ART സെന്ററിൽ (ഉഷസ്‌ കേന്ദ്രത്തിൽ) രജിസ്റ്റർ ചെയ്ത എച്ച്.ഐ.വി. അണുബാധിതർക്ക് മാത്രമാണ് ഈ സൗജന്യ സേവനം ലഭ്യമാകുന്നത്.

17/12/2020

Day : 17

എച്ച്.ഐ.വി അണുബാധിതർക്കുള്ള ചികിത്സ സൗജന്യമാണ്..

എച്ച്.ഐ.വി അണുബാധക്കെതിരെയുള്ള ആന്റി റിട്രോവൈറൽ തെറാപ്പി മെഡിക്കൽ കോളേജുകളിൽ സൗജന്യമായി ലഭിക്കുന്നതാണ്. കേരള സംസ്ഥാന എയ്ഡ്സ് നിയന്ത്രണ സൊസൈറ്റിയുടെ മേൽനോട്ടത്തിൽ പ്രവർത്തിക്കുന്ന ഉഷസ്‌ കേന്ദ്രങ്ങളിൽ (ART Centre) നിന്നുമാണ് സൗജന്യമായി ART ചികിത്സ ലഭ്യമാകുന്നത്.

എച്ച്.ഐ.വി അണുബാധ കാരണം രോഗപ്രതിരോധശക്തി കുറഞ്ഞ് എയ്ഡ്സ് എന്ന അവസ്ഥയിലേക്ക് പോകുന്നത് ഇല്ലാതാക്കുവാൻ ART ചികിത്സ സഹായകരമാണ്.

16/12/2020

Day : 16

നിയന്ത്രണ വിധേയമായ ഒരു ആജീവനാന്തരോഗമായി എച്ച്.ഐ.വി. രോഗാണുബാധയെ പരിഗണിക്കുന്നു.

പ്രമേഹവും രക്താതിസമ്മർദ്ദവും ഉൾപ്പെടെയുള്ള ജീവിതശൈലിരോഗങ്ങളെ പോലെ തന്നെ വൈദ്യശാസ്ത്രത്തിന് നിയന്ത്രിക്കാൻ കഴിയുന്ന ഒരു ആജീവനാന്തരോഗമാണ് എച്ച്.ഐ.വി.യും. കൃത്യമായ തുടർചികിത്സയും പരിചരണവും കൊണ്ട് എച്ച്.ഐ.വി എന്ന അണുബാധ മനുഷ്യശരീരത്തിൽ പെരുകുന്നത് നിയന്ത്രിക്കുവാൻ കഴിയുന്നു. അതിലൂടെ അണുബാധിതന് രോഗപ്രതിരോധ ശക്തിയുടെ കുറവിനാലുണ്ടാകുന്ന എയ്ഡ്സ് എന്ന അവസ്ഥയിൽ നിന്ന് മോചനം ലഭിക്കുകയും ചെയ്യുന്നു.

എച്ച്.ഐ.വി/എയ്ഡ്സ് രോഗത്തിന് എതിരായ ആന്റി റിട്രോവൈറൽ തെറാപ്പി (ART) എന്ന ചികിത്സയിലൂടെ എച്ച്. ഐ. വി. വൈറസിന്റെ മനുഷ്യശരീരത്തിലെ പെരുകൽ ഫലപ്രദമായി തടയാനും അതിനെ നിയന്ത്രണവിധേയമാക്കാനും സാധിക്കും. അങ്ങനെ ശരീരം രോഗപ്രതിരോധശക്തി വീണ്ടെടുക്കുകയും അവസരജന്യരോഗങ്ങളെ ചെറുക്കുന്നതിനു പ്രാപ്തമാകുകയും ചെയ്യും. കൃത്യസമയത്ത് രോഗം കണ്ടെത്തുകയും കൃത്യമായി തുടർചികിത്സ ഉറപ്പു വരുത്തുകയുമാണെങ്കിൽ എച്ച്. ഐ.വി. ബാധിതർക്ക് ഏതൊരു സാധാരണ ആളിനെയും പോലെ ആരോഗ്യം വീണ്ടെടുത്തു സുദീർഘമായ സാധാരണജീവിതം നയിക്കാൻ ഇന്നു കഴിയും.

15/12/2020

DAY: 15

എയ്ഡ്‌സ് രോഗത്തിന് ഫലപ്രദമായ ചികിത്സ ലഭ്യമാണ്

എയ്ഡ്‌സ് രോഗബാധ കണ്ടെത്തിയതിന്റെ ആരംഭ കാലഘട്ടത്തിൽ രോഗബാധിതനായ ഒരാൾ ശരീരത്തിന്റെ സ്വഭാവികമായ രോഗപ്രതിരോധ ശേഷി നഷ്ടപ്പെട്ട് ഏതാനും വർഷങ്ങൾക്കകം പലവിധ രോഗങ്ങൾക്ക് കീഴടങ്ങി മരിക്കുന്ന നിരാശാജനകമായ അവസ്ഥയാണുണ്ടായിരുന്നത്. എന്നാൽ ഇന്ന്‌ രോഗകാരണമായ എച്ച്.ഐ.വി. വൈറസിന്റെ ആക്രമണത്തിനെതിരെ ഫലപ്രദമായ നൂതന ചികിത്സാരീതിയുണ്ട്, അത് ആന്റി റിട്രോ വൈറൽ തെറാപ്പി (എ.ആർ.ടി) എന്നാണ് അറിയപ്പെടുന്നത്. ഈ ചികിത്സ ഒരാളിലെ എച്ച്.ഐ.വി അണുബാധ എയ്ഡ്‌സ് ആയി രൂപാന്തരപ്പെടുന്നതു തടയുന്നു.

കൃത്യസമയത്ത് എ.ആർ.ടി. ചികിത്സ ആരംഭിക്കുന്നതിലൂടെ എച്ച്. ഐ. വി. വൈറസിന്റെ മനുഷ്യശരീരത്തിലെ പെരുകൽ ഫലപ്രദമായി തടയാനും അതിനെ നിയന്ത്രണവിധേയമാക്കാനും സാധിക്കും. അങ്ങനെ ശരീരം രോഗപ്രതിരോധശക്തി വീണ്ടെടുക്കുകയും അവസരജന്യരോഗങ്ങളെ സ്വയം തുരത്താനതിനു കഴിയുകയും ചെയ്യും. കൃത്യസമയത്ത് രോഗം കണ്ടെത്തുകയും കൃത്യമായി തുടർചികിത്സ ഉറപ്പു വരുത്തുകയുമാണെങ്കിൽ എച്ച്.ഐ.വി. ബാധിതർക്ക് ഏതൊരു ആളിനെയും പോലെ ആരോഗ്യം വീണ്ടെടുത്തു സുദീർഘമായ സാധാരണജീവിതം നയിക്കാൻ ഇന്നു കഴിയും.

14/12/2020

DAY: 14

ലൈംഗിക രോഗങ്ങൾക്കുള്ള ചികിത്സ സർക്കാർ ആശുപത്രികളിൽ സൗജന്യമാണ്.

ലൈംഗിക രോഗങ്ങൾക്കുള്ള സൗജന്യ പരിശോധനയും ചികിത്സയും മെഡിക്കൽ കോളേജ്, ജില്ലാ ആശുപത്രി, ജനറൽ ആശുപത്രി എന്നിവിടങ്ങളിൽ കേരള സംസ്ഥാന എയ്ഡ്സ് നിയന്ത്രണ സൊസൈറ്റിയുടെ നിയന്ത്രണത്തിൽ പ്രവർത്തിക്കുന്ന "പുലരി" ക്ലിനിക്കുകളിൽ ലഭ്യമാണ്.

ജനനേന്ദ്രിയ ഭാഗങ്ങളിൽ വേദനയോട് കൂടിയതും അല്ലാത്തതുമായ വ്രണങ്ങൾ, കഴലവീക്കം, പുരുഷന്മാരിൽ വൃഷണ വീക്കം, സ്ത്രീകളിൽ ബന്ധപ്പെടുന്ന സമയങ്ങളിലുള്ള അടിവയറുവേദന, മൂത്രനാളിയിൽ നിന്ന്/ യോനിയിൽ നിന്ന് പഴുപ്പ് എന്നിവ ലൈംഗിക രോഗങ്ങളുടെ ലക്ഷണങ്ങളാണ്.

USHUS MCH KOTTAYAM