07/02/2026
ಸ್ವಾಭಿಮಾನ ಸ್ವದೇಶಿ ಕೇಂದ್ರದ 11ನೇ ವಾರ್ಷಿಕೋತ್ಸವ: ಸ್ವದೇಶಿ ಉತ್ಸವ ಯಶಸ್ವಿ
ಸ್ವಾಭಿಮಾನ ಸ್ವದೇಶಿ ಕೇಂದ್ರದ ವತಿಯಿಂದ 11ನೇ ವಾರ್ಷಿಕೋತ್ಸವದ ಅಂಗವಾಗಿ ಆಯೋಜಿಸಲಾದ ಎರಡು ದಿನಗಳ ಬೃಹತ್ ಸ್ವದೇಶಿ ಉತ್ಸವ ಕಾರ್ಯಕ್ರಮವು ಯಶಸ್ವಿಯಾಗಿ ಆರಂಭವಾಯಿತು.
ಕಾರ್ಯಕ್ರಮವು ಬೆಳಿಗ್ಗೆ 11:00 ಗಂಟೆಗೆ ಆರಂಭಗೊಂಡು, ಶತಮಾನದ ಸಂತ ಶ್ರೀ ಸಿದ್ಧೇಶ್ವರರು, ಸ್ವದೇಶಿ ಚಳವಳಿಯ ಪ್ರೇರಣಾದಾಯಕ ಸಂತ ಶ್ರೀ ರಾಜೀವ್ ಭಾಯಿ ದೀಕ್ಷಿತ್ ಹಾಗೂ ಭಾರತಮಾತೆಯ ಭಾವಚಿತ್ರಗಳಿಗೆ ಪುಷ್ಪಾರ್ಚನೆ ಮಾಡುವ ಮೂಲಕ ಚಾಲನೆ ನೀಡಲಾಯಿತು. ಚೇತನ್ ಮಠ ಅವರು ವಂದೇ ಮಾತರಂ ಗೀತೆಯನ್ನು ಹಾಡಿದರು.
ದಿವ್ಯ ಸಾನಿಧ್ಯ ವಹಿಸಿ ಮಾತನಾಡಿದ ಡಾ॥ ದಾಕ್ಷಾಯಣಿ ಅವ್ವಾಜಿ ಅವರು ಆರೋಗ್ಯಕರ ಆಹಾರ ಸೇವನೆಯ ಮಹತ್ವವನ್ನು ವಿವರಿಸಿ, ಕುಟುಂಬದ ಆರೋಗ್ಯವನ್ನು ಕಾಪಾಡುವಲ್ಲಿ ಮಹಿಳೆಯರ ಪಾತ್ರ ಅತ್ಯಂತ ಪ್ರಮುಖವೆಂದು ಹೇಳಿದರು. ರಾಸಾಯನಿಕರಹಿತ, ನೈಸರ್ಗಿಕ ಆಹಾರ ಸೇವನೆಯತ್ತ ಜನರು ಗಮನಹರಿಸಬೇಕೆಂದು ಅವರು ಸಲಹೆ ನೀಡಿದರು.
ಇದಾದ ನಂತರ ಸ್ವಾಭಿಮಾನ ಸ್ವದೇಶಿ ಮಳಿಗೆಯ ಸಾಧನೆಗಳನ್ನು ಒಳಗೊಂಡ ಕಿರುಚಿತ್ರವನ್ನು ಪ್ರದರ್ಶಿಸಲಾಯಿತು.
ಕಾರ್ಯಕ್ರಮದ ಮುಖ್ಯ ಉಪನ್ಯಾಸಕರಾಗಿ ಧಾರವಾಡದಿಂದ ಆಗಮಿಸಿದ್ದ ಶ್ರೀಯುತ ಗೌರಿಶಂಕರ ಕರೋಶಿ ಅವರು ಮಾತನಾಡಿ, ಕೃಷಿಯಲ್ಲಿ ಬೀಜದಿಂದ ಹಿಡಿದು ಕೀಟನಾಶಕ ಹಾಗೂ ಕಳೆನಾಶಕಗಳವರೆಗೆ ಸಂಪೂರ್ಣವಾಗಿ ಮಾರುಕಟ್ಟೆಯ ಅವಲಂಬನೆ ಸರಿಯಲ್ಲ ಎಂದು ಅಭಿಪ್ರಾಯಪಟ್ಟರು. ರೈತರು ಮಾತ್ರವಲ್ಲದೆ ಜನಸಾಮಾನ್ಯರೂ ಸ್ವಾವಲಂಬಿ ಹಾಗೂ ಪೂರಕ ಜೀವನಶೈಲಿಯನ್ನು ಅಳವಡಿಸಿಕೊಳ್ಳಬೇಕೆಂದು ಅವರು ಕರೆ ನೀಡಿದರು.
ಕಾರ್ಯಕ್ರಮದಲ್ಲಿ ರೈತರಿಗೆ ವರದಾನವಾಗಿರುಬ ಗೋಕೃಪಾಮೃತವನ್ನು ಉಚಿತವಾಗಿ ವಿತರಣೆ ಮಾಡಲಾಯಿತು.
ಕಾರ್ಯಕ್ರಮದ ಅಂತ್ಯದಲ್ಲಿ ವಿವಿಧ ಕ್ಷೇತ್ರಗಳಲ್ಲಿ ಸಾಧನೆಗೈದ ಎಲೆಮರೆಯ ಕಾಯಿಯಂತಿರುವ ಸಾಧಕರನ್ನು ಶ್ರೀಯುತ ಗೌರಿಶಂಕರ ಕರೋಶಿ ಅವರು ಸನ್ಮಾನಿಸಿದರು.
ಸನ್ಮಾನಿತರಾದವರು: ಶ್ರೀ ಕೃಷ್ಣ ಕೆಂಭಾವಿ, ಶ್ರೀ ಮಹೇಶ್ ಬೀದರ್ಕರ್, ಶ್ರೀ ನಾಗನಾಥ್ ಯಾದಗೀರ್, ಅಮೃತ್ ತೇಲಿ, ಮೇಕ್ ಇಟ್ ಪಾಸಿಬಲ್ ತಂಡ, ಶ್ರೀ ಗುರು ಬೆಟಗೇರಿ, ಶ್ರೀ ಶಿವರಾಜ್ ಕುಮಾರ್ ಹಳ್ಳಿ ಹಾಗೂ ಚೇತನ್ ದೀಕ್ಷಿತ್.
ಸನ್ಮಾನ ಕಾರ್ಯಕ್ರಮವನ್ನು ಸಂಪೂರ್ಣ ಪರಿಸರಪೂರಕವಾಗಿ ಆಯೋಜಿಸಲಾಗಿದ್ದು, ಖಾದಿ ನೂಲಿನಿಂದ ತಯಾರಿಸಲಾದ ಹಾರಗಳು ಹಾಗೂ ಖಾದಿ ಶಾಲುಗಳನ್ನು ಬಳಸಲಾಯಿತು.
