01/04/2026
అన్ని దానాల్లో కన్నా విద్యాదానం గొప్పది అంటారు పెద్దలు!
నిజమే, విద్యాదానం, ఒక చెట్టుకి నీళ్లు పోయడం లాంటిది!
రెండిటిలో ఒకే పుణ్యం దక్కుతుంది,
అంతే ఫలితం సామాజానికి అందుతుంది!
బీజమై నేలనున్న విత్తనానికి,
నీరు పోసి, పెంచి చెట్టు చేస్తే,
అదే రేపు కాయై, పండై, ఇంకో వనానికి
ఆదిగా నిలుస్తుంది!
ప్రతీ విత్తనంలో ఒక అడవి దాగున్నట్టు,
ప్రతీ విద్యార్థి అభ్యాసంలో, మెరుగైన సమాజం తాలూకు నీడ ఉంటుంది!
అందుకే, నా దెగ్గరకు ‘Fellowship’ కోసమని వచ్చే వారందరిలో
ఒక ఆవిష్కరించని భవిష్యత్తు కనిపిస్తుంది!
అందుకే వారితో నా బంధం-అనుబంధం, డాక్టర్గా వుంటూ,
వ్యక్తిగా, వారసత్వంగా అనిపిస్తూ ఉంటుంది!
అందులో భాగంగానే, నా దెగ్గరికి వచ్చే అందరి ‘Fellows’ ని
వారు వెళ్లిపోయే సమయానికి మా ఇంట్లో డిన్నర్ కి ఆహ్వానిస్తాను!
మొన్నీమధ్య అలానే నా fellows అందరిని పసందైన భోజనానికి ఆహ్వానించాను!
ఇందులో కొసమెరుపు ఏంటి అంటే,
ఆర్థోపెటిక్స్ అనగానే,
ఒకప్పుడు అబ్బాయిలు మాత్రమే అనే అపోహ అందరికి తెలిసిందే,
కానీ, ‘లేచింది మహిళా లోకం’ అంటూ గొంతెత్తి పాడే నేటి సమాజంలో,
ఒక గుర్తించతగ్గ మార్పు జరిగింది, మొత్తం మా బృందంలో
నలుగురు ఆడవారు fellows గా ఉండటం నాకు బోలెడంత ఆనందాన్ని ఇచ్చింది!
మా అమ్మాయి కావ్యా కార్డియాలజిస్ట్ అయినప్పటి ఆనందమే,
ఆ అమ్మాయిలు ఆర్థోపెడిక్ సర్జన్లు అవుతున్నప్పుడు కలిగింది - గురవా రెడ్డి
