29/12/2021
निर्धार योग प्रबोधिनीच्या ‘योगानुभूती – संचिताचा प्रवाह’ पुस्तकाचे प्रकाशन
निर्धार योग प्रबोधिनी संचलित ध्वज प्रकाशनने संपादित केलेले पहिले पुस्तक ‘योगानुभूती – संचिताचा प्रवाह’ या पुस्तकाचे नुकतेच प्रकाशन करण्यात आले आहे. सदर पुस्तकाचे प्रकाशन वेरूळ येथील संत जनार्दन स्वामी आश्रमात संपन्न झाले. यावेळी अखिल भारतीय योगशिक्षक महासंघ, महाराष्ट्राचा ‘महायोगोत्सव २०२१’ हा वार्षिक मेळावा आयोजित करण्यात आला होता. ज्यात संपूर्ण महाराष्ट्रातून ६०० योगशिक्षक सहभागी झाले होते.
संत जनार्दन स्वामी आश्रमाचे उत्तराधिकारी बालब्रम्हचारी श्री १००८ महामंडलेश्वर स्वामी शांतिगिरी महाराज यांच्या शुभहस्ते पुस्तकाचे प्रकाशन करण्यात आले आहे. यावेळी व्यासपीठावर बालब्रम्हचारी भ्राता रामानंद महाराज, अ.भा.यो.महासंघाचे अध्यक्ष डॉ. मनोज निलपवार, उपाध्यक्ष राहुल येवला, मुख्य संपादक कृणाल महाजन, प्रकाशक ज्ञानेश्वर पाटील, डॉ. निलेश वानखडे, आश्रमाचे प्रशासकीय अधिकारी दिनेश भुतेकर उपस्थित होते.
योगानुभूती – संचिताचा प्रवाह’ या पुस्तकात योगविज्ञान शाखेतील महाराष्ट्रातील तब्बल २३ लेखकांचे रिसर्च आर्टिकल समाविष्ट करण्यात आले आहे. योगविज्ञान शाखेतील रिसर्च आर्टिकल असलेले हे पहिले पुस्तक आहे. रिसर्च आर्टिकल लिहिण्यासाठी लेखकांना प्रवृत्त करण्याहेतू ‘रिसर्च आर्टिकल कसे लिहावे’ याविषयावर कार्यशाळेचे आयोजन देखील करण्यात आले होते. ज्यात कृणाल महाजन यांनी PPT च्या माध्यमातून मार्गदर्शन केले. यातून २३ लेखकांनी प्रेरित होत अनुभवांती आर्टिकल लिहिले आहे.
सदर पुस्तकाचे संपादन जळगाव मधील कृणाल महाजन यांनी केले तर संपादकीय मंडळात नागपूर येथील बळवंत भोयर, नाशिक येथील राहुल येवला, पुण्यातील चंद्रज्योती दळवी, कल्याण येथील दिलीप गायकवाड आणि लातूर येथील संदीप पवार आदि तज्ञ मंडळींनी सहकार्य केले.
